1Ti ne hoko ai, ne hufeilo a lautolu ke he Iki mo e o fakalataha mo au; mo e gahua ai a mautolu mo e taute e tau akau kua kehe lahi foki. Ne fakakite he Iki mai he taha magaaho ke he taha magaaho e puhala kua lata ia au ke taute e tau akau he toga.

2Ko e magaaho nai, ko au ko Nifai, ne nakai taute e au e tau akau tuga he puhala kua iloa he tau tagata, ti nakai talaga foki e au e toga he puhala he tau tagata, ka e ne taute e au tuga ne fakakite mai he Iki ki a au; ko e mena ia kua nakai tuga ne fa mahani ai e tau tagata.

3Ti ko au ko Nifai, ne fina atu mau au ke he mouga, mo e ne liogi mau au ke he Iki, ko e mena ia ne fakakite mai he Iki ki a au e tau mena lalahi.

4Ti ne hoko ai, kua fakamau e au e toga, tuga mo e tau kupu he Iki, ne kitia he tau matakainaga haaku kua mitaki, mo e ne mitaki lahi e tufuga ne taute e mautolu; ko e mena ia, ne fakatokolalo foki a lautolu ki mua he Iki.

5Ti ne hoko ai, ne hoko mai e leo he Iki ke he matua taane haaku, ke mamatike a mo e o hifo a mautolu ke he toga.

6Ti ne hoko ai, ke he aho hake, kua oti he tauteute e mautolu e tau mena oti, loga e tau fua lakau mo e tau vala manu mai he tutakale, mo e meli kua lahi, mo e tau mena kehekehe tuga mo e tau poaki he Iki, ne o hifo a mautolu ke he toga, mo e tau uta mo e tau tega akau ha mautolu, mo e tau mena ne ta mai ai mo mautolu, ko e tau tagata oti fakalata ke he haana tau tau; ko e mena ia, ne o hifo a mautolu ke he toga, mo e tau hoana mo e tau fanau ha mautolu.

7Ne fanau he matua taane haaku e tokoua e tau fanau taane ke he tutakale; ne fakahigoa ai e ia e tama fakamua ko Iakopo ka ko e tama fakamui ko Iosefa.

8Ti ne hoko ai, ne o hifo a mautolu oti ke he toga mo e uta e tau mena kai mo e tau mena oti ne poaki mai ki a mautolu, ne fakatoka atu ai a mautolu ke he tahi mo e poka ai he matagi a mautolu hagaao atu ke he fonua he maveheaga.

9Ne o a mautolu he matagi ke he loga e tau aho, kitia la, ko e tau matakainaga haaku mo e tau tama taane ha Isamaeli fakalataha mo e tau hoana ha lautolu, ne kamata ke fiafia, ti koli mo e lologo, mo e tau vagahau hemu, hanai, tuga kua nimo ia lautolu e mana ne ta mai ai a lautolu; hanai kua hemu lahi e tau mena ne taute e lautolu.

10Ti ko au, ko Nifai, ne kamata au ke matakutaku lahi neke ita e Iki ki a mautolu mo e fahi a mautolu ha ko e tau mahani kelea ha mautolu, ke tomo a mautolu ke he moana hokulo; ko e mena ia ko au, ko Nifai, ne kamata ai ke vagahau fakamalolo ki a lautolu; ka e kitia la, ne ita a lautolu ki a au mo e pehe: Kua nakai talia a mautolu ke eke a koe ko e tehina ha mautolu mo pule ki a mautolu.

11Ti ne hoko ai, ne lili e Lamana mo Lemuela au ke he afo, mo e eke fakakelea lahi e lautolu au; pete ia, ne fakauka e Iki ke he tau mena ia ke maeke ia ia ke fakakite e haana a mana, ke katoatoa e haana e tau kupu ki a lautolu kua mahani kelea.

12Ti ne hoko ai, ne mole he lili e lautolu au kua mau ni nakai maeke ia au ke taute ha mena taha, ko e takitaki puhala ne tauteute he Iki, kua nakai gahuahua ia.

13Ko e mena ia, ne nakai iloa e lautolu e puhala ke fakaholo ki ai e toga, pihia a ti to ai e afa lahi, hanai, ko e afa lahi mo e matakutakuina, kua liu ki tua a mautolu ke he tolu e tau aho; ti ne matakutaku lahi a lautolu neke tomo he moana; pete ia, ne nakai vevete e lautolu au.

14Ti ko e aho ke fa aki ne liu ki tua a mautolu, ne kamata e afa ke to lahi mahaki.

15Ti ne hoko ai, ne teitei folofua he tahi a mautolu. Mole atu e liu hala tua a mautolu ki luga he fuga vai ke he fa e tau aho, ne kamata e tau matakainaga haaku ke kitia kua hoko mai tuai e fakafiliaga he Atua ki a lautolu ki a au mo e vetevete e tau afo mai he tau lima haaku, kitia la, kua fua lahi; ti kua fua lahi foki e tau hui haaku, kua mamahi lahi foki.

16Pete ia, ne onoono atu au ke he haaku a Atua, mo e nava atu ki a ia he aho katoa; mo e nakai gu atu au ke he Iki ha ko e haaku a tau matematekelea.

17Ko e magaaho nai, ne vagahau he matua taane haaku ko Lihai loga e tau mena ki a lautolu mo e pihia foki ke he tau fanau taane ha Isamaeli; ka e kitia la, ne fakamatakutaku e lautolu ha taha kua vagahau maaku, ha kua fuakau e tau mamatua haaku mo e tau mamahi loga ha ko e tau fanau ha laua, ne veveli ai a laua, hanai, ke he tau mohega kua gagao a laua.

18Ha kua fakaatukehe mo e momoko lahi a laua mo e tau mahani kelea he tau matakainaga haaku, ne teitei mamate a laua; hanai, kua teitei tuku hifo e tau ulu hina ha laua ke he efuefu; hanai kua teitei o a laua mo e tau loto momoko he tukuaga ke he vai.

19Ti ko Iakopo mo Iosefa, kua ikiiki agaia a laua kua lata ke moua taha levekiaga mitaki, ne togi foki ha ko e matematekelea he matua fifine ha laua; pihia mo e hoana haaku foki mo e haana tau hihina mata mo e tau liogi, pihia mo e tau fanau haaku, ne nakai fakamolu ia e tau loto he tau matakainaga haaku ke vevete au.

20Ti kua nakai fai mena ka ko e mana ni he Atua, kua fakamatakutaku a lautolu ke fakaoti ai; ke fakamolu e tau loto ha lautolu; ko e mena ia, kua kitia e lautolu kua teitei tomo a lautolu ke he tahi, ne fakatokihala a lautolu mai he mena ne taute e lautolu, pihia a ti vevete e lautolu au.

21Ti ne hoko ai, mole atu e vetevete e lautolu au, kitia la, ne uta e au e takitaki puhala ti ne gahua ai ke he ha mena ne manako au ki ai. Ti ne hoko ai, ne liogo au ke he Iki; mole atu he liogi au, ne fakaoti ai e tau matagi, ti ne fakaoti ai e afa mo e ha ha i ai e maha lahi.

22Ti ne hoko ai, ko au ko Nifai, ne fakaholo e au e toga, mo e folau atu a mautolu ke he fonua he maveheaga.

23Ti ne hoko ai, mole atu e folau a mautolu ke he loga e tau aho, ne hoko atu a mautolu ke he fonua he maveheaga, ti o atu a mautolu ke he motu mo e fakatutu e tau fale ie ha mautolu; mo e ui ai ko e motu he mavaeheaga.

24Ti ne hoko ai, ne kamata a mautolu ke fakamolu e kelekele, mo e to e tau tega akau, hanai, ne to e mautolu e tau tega lakau oti ke he kelekele, ne ta mai e mautolu mai he fonua i Ierusalema. Ti ne hoko ai, ne tupu lahi ai, ko e mena ia, ne kua fakamonuina lahi a mautolu.

25Ti ne hoko ai, ne kitia e mautolu ki luga he fonua he maveheaga, he o fenoga ai he tutakale, kua nonofo ai e tau manu kehekehe, ko e tau povi mo e tau povi taane, mo e asini mo e solofanua, mo e tau koti mo e tau koti vao, mo e tau manu favale kehekehe foki, kua mitaki ke fakaaoga he tau tagata. Ti ne moua e mautolu e tau maka kehekehe, ko e auro, mo e ario, mo e apa kula.