1Ne hoko ai, ko au, ko Nifai, ne mole atu e vagahau haaku ke he haaku a tau matakainaga, kitia la, ne pehe mai a lautolu ki a au: Ne tala mai e koe e tau mena kua uka lahi, mua atu, kua nakai maeke ia mautolu ke taute.

2Ne hoko ai, ne pehe atu au ki a lautolu kua iloa e au kua vagahau e au e tau mena uka hagaao ke he tau tagata kelea ha ko e tau mena mooli; kua fakatututonu e au e tau tagata tututonu, mo e fakamooli to lagaki ki luga a lautolu ke he aho fakamui; ko e mena ia kua uka lahi e mena mooli ki a lautolu kua lauia ai, ha kua hokotia ke he uho he tau loto ha lautolu e tau mena na.

3Ko e haaku a tau matakaiknaga na e, kaeke kua tututonu a mutolu mo e manako foki ke talia e tau mena mooli mo e fanogonogo ki ai, kia o fakahako ki mua he Atua, ti nakai feguiguiaki ai a mutolu ha ko e tau mena mooli, mo e pehe: Kua vagahau e koe e tau mena uka ki a mautolu.

4Ne hoko ai, ko au ko Nifai, ne tomatoma atu ke he tau matakainaga haaku mo e fakamakutu, ke omaoma e tau poakiaga he Atua.

5Ne hoko ai, ne fakatokolalo a lautolu ki mua he Iki, kua pihia ai, a ti olioli ai au mo e ha ha ia au e tau amaamanakiaga lalahi ha ko lautolu, kia o atu a lautolu he tau puhala he tututonu.

6Ne taute mo e talahau ai e au e tau mena nai ke he magaaho ne nofo ai e matua taane haaku ke he fale ie ha ha he vaha loto he tau mouga, ne fakahigoa e ia ko Lemuela.

7Ne hoko ai, ko au ko Nifai, ne fai hoana ai au ke he taha tama fifine ha Isamaeli; mo e fai hoana ai foki e tau matakainaga haaku ke he tau fanau fifine a Isamaeli; ne fai hoana a Sorama ke he tama fifine uluaki a Isamaeli.

8Ti pihia e fakakatoatoaaga he matua taane haaku e tau poakiaga oti ne poaki he Iki ki a ia. Pihia foki, ki a au ko Nifai, ne fakamonuina mai he Atua kua mua atu ni.

9Ne hoko ai, ne vagahau mai e leo he Iki ke he matua taane haaku ke he taha po, mo e poaki ki a ia ko e aho hake kia fina atu haana a fenoga ke he tutakale.

10Ne hoko ai, ne matike e haaku a matua taane he pogipogi, mo e fina atu ke he gutuhala he fale ie, ne ofo lahi ai a ia ke kitia e taha mena kua veliveli mo e kehe lahi e talagaaga, ne talaga aki e veo. Mo e kua ha ha i ai he veliveli na ua e lima; mo e tuhi ai e taha lima ke he puhala kua lata ke o ai a mautolu ke he tutakale.

11Ne hoko ai, ne fakamaopoopo e mautolu e tau mena ha mautolu kua lata ke uta ke he tutakale, mo e tau koloa foki ne foaki mai he Iki ki a mautolu; mo e uta foki e mautolu e tau tega akau kehekehe mo e ta atu ke he tutakale.

12Ne hoko ai, ne uta ai e mautolu e tau fale ie mo e o atu ke he tutakale, mo e o atu ke he taha faahi he vailele ko Lamana.

13Ne hoko ai, ne o fenoga a mautolu ke he fa e tau aho, ne o atu ke he faahi toga po ke faahi toga ki uta, ti fakatutu foki e tau fale ie ha mautolu; mo e fakahigoa ai e matakavi na ko Sesa.

14Ne hoko ai, ne uta e mautolu e tau fana fiti mo e o atu ke he tutakale ke taitai ke fagai aki e tau magafoa ha mautolu, ka mole ia ti liliu atu a mautolu ke he tau magafaoa ha mautolu ke he tutakale ke he matakavi ko Sesa. Ne o atu foki a mautolu ke he tutakale, muitua ni ke he hagaaoaga fakamua, mo e fakatata ni ke he maaga talumelie he tutakale ne tata atu ke he Tahi Kula.

15Ne hoko ai, ne o fenoga a mautolu ke he loga e tau aho, mo e taitai mena kai he hala, aki e tau fana fiti mo e tau maka ne vilo ti liti.

16Ti ne mumui atu a mautolu ke he hala ne tuhi mai he mena veliveli, ne takitaki aki a mautolu ke he tau maaga kelekele talumelie he tutakale.

17Ti o fenoga a mautolu kua mole ai e loga e tau aho, ne fakatutu e mautolu e tau fale ie mo e fakahautoka, ke okioki, mo e kumi mena kai ma e tau magafaoa ha mautolu.

18Ti ne hoko ai, ki a au ko Nifai, he magaaho ne fina atu ai au ke keli manu ke kai kitia la, ne mapaki ai e haaku a fana fiti ne taute mai he lapatoa mitaki; kua mole e mapaki e haaku a fana fiti, kitia la, ne ita e tau matakainaga haaku ki a au ha kua malona tuai e fana fiti haaku, ha kua nakai moua e mautolu ha mena ke kai.

19Ti ne hoko ai, ne liliu a mautolu ke he tau magafaoa ha mautolu mo e teao ha mena kai, ti kua lolelole lahi a lautolu ha ko e fenoga kua matematekelea lahi a lautolu ha kua manako ke moua taha mena ke kai.

20Ti ne hoko ai, ne kamata ai a Lamana mo Lemuela mo e tau fanau taane ha Isamaeli ke feguigui lahi, ha ko e tau mamahi mo e tau matemataekelea ha lautolu ke he tutakale ti ne kamata ai foki e matua taane haaku ke gu pihia ke he iki ko e haana Atua; hanai, ti kua momoko lahi a lautolu, a ti feguiguiaki a lautolu ke he Iki.

21A ti ne hoko ai, ko au ko Nifai, kua matematekelea foki au fakalataha mo e tau matakainaga haaku, ha kua malona haaku a fana fiti mo e tau fana fiti ha lautolu kua galo e matoho, kua kamata ke uka lahi, kua pihia ai kua nakai maeke ia mautolu ke moua ai ha mena kai.

22Ti ne hoko ai, ko au ko Nifai, ne vagahau fakalahi au ke he tau matakainaga haaku, ha kua liu mao e tau loto ha lautolu, a ti hoko ke loma ke he Iki ko e Atua ha lautolu.

23Ti ne hoko ai, ko au ko Nifai, ne taute e au e fana fiti foou aki e akau; mo e mai he taha ka akau hako e matafana; ko e mena ia, kua kanavaakau ai au ke he fana fiti, mo e tau maka mo e vilo. ti ne pehe atu au ke he matua taane haaku: Kua lata ke fina atu au ki fe ke moua ai e tau mena ke kai?

24Ti ne hoko ai, ne kumikumi a ia ke he Iki, ha kua fakatokolalo a lautolu ha ko e tau kupu haaku; ne vagahau e au e loga he tau mena ki a lautolu ha ko e malolo he agaaga haaku.

25Ti ne hoko ai, ne hoko mai e leo he Iki ke he matua taane haaku; mo e lahi e akonakiaga ne moua e ia ha ko e haana gu ke he Iki, kua lahi ni, ti kua tuku hifo a ia ki lalo muatua he momoko lahi.

26Ti ne hoko ai, ne pehe mai e leo he Iki ki a ia: Kitekite atu ke he fua veliveli, mo e kitia ai e tau mena kua tohia ai.

27Ti ne hoko ai, ko e magaaho ne kitia he matua taane haaku e tau mena ne tohi ai he fua veliveli, ne matakutaku mo e vivivivi lahi a ia, fakalataha mo e tau matakinaga haaku, mo e tau fanau taane ha Isamaeli mo e tau taki tokoua ha lautolu.

28Ti ne hoko ai, ko au ko Nifai, ne kitia e au e tau lima ne tuhituhi ai he fua veliveli, ne gahuahua ni fakalata ke he tua mo e makau, mo e mailogaaga ha mautolu ki ai.

29Ti kua tohi ai foki e tala foou, kua mukamuka ke totou, ti kua lagomatai foki ke maeke ia mautolu ke maama e tau puhala he Iki; mo e kua tohi foki mo e hiki ke he falu a magaaho, fakalata ni mo e tua mo e makau kua tuku e mautolu ki ai. Ti tuga pehe, kua maeke a mautolu ke kitia kua maeke e Iki ke fakahoko e tau mena lalahi mai he mena tote.

30Ti ne hoko ai, ko au ko Nifai, ne fina atu au ki luga he fuga mouga, fakalata ke he hala ne tuhi ai he fua veliveli.

31Ti ne hoko ai, ne keli ai e au e tau manu favale, kua pihia ai, kua maeke ai au ke moua e tau men kai ma e tau magafaoa ha mautolu.

32Ti ne hoko ai, ne liu atu au ke he tau fale ie ha mautolu mo e hahamo foki e tau manu ne keli e au; ti ko e magaaho ne kitia e lautolu e tau mena kai, kua lahi mahaki ni e fiafia ha lautolu. Ti ne hoko ai, ne fakatokolalo a lautolu ki mua he Iki, mo e tuku atu e tau fakaaue ki a ia.

33Ti ne hoko ai, ne liu fenoga foki a mautolu, kua o fenoga ke he faahi tuga he kamataaga, kua mole atu e loga he tau aho ne fenoga ai a mautolu ne liliu fakatutu foki e tau fale ie ha mautolu, mo e okioki ai.

34Ti ne hoko ai, ne mate a Isamaeli mo e tanu ai ke he matakavi ia ne fakahigoa ko Nahomo.

35Ti ne hoko ai, ne maanu lahi e tau fanau fifine ha Isamaeli, ha kua galo kehe tuai e matua taane ha lautolu, mo e ha ko e tau matematekelea ha lautolu ke he tutakale; ti ne feguigui a lautolu ke he matua taane haaku, he ta mai e ia a lautolu mai he fonua ko Ierusalema, ne pehe: Kua mate tuai e matua taane ha tautolu; hanai, kua lahi e fanoa ha tautolu he tutakale, mo e mamahi ai ke he tau matematekelea loga, hoge, fia inu, mo e mategugu; ti ka mole ia e tau matematekelea nai to mamate a tautolu he tutakale he hoge.

36Ti ne feguigui pihia lautolu ke he matua taane haaku, pihia ki a au foki; mo e manako a lautolu ke liliu atu ki Ierusalema.

37Ti pehe atu a Lamana ki a Lemuela mo e tau fanau taane ha Isamaeli: Kitia la, kia tamate e tautolu e matua taane ha tautolu, mo e ha tautolu e tehina ko Nifai, ha kua eke a ia ke pule mo e takitaki a tautolu ko e haana a tau matakainaga ne fakamua.

38Ko e magaaho nai, kua pehe a ia ne tutala e Iki mo ia, ti ne fefafekau foki e tau agelu ki a ia, ka e kitia la, kua iloa e tautolu kua pikopiko a ia ki a tautolu, kua tala mai e ia e tau mena ia ki a tautolu, mo e taute e ia loga e tau mena, ko e tau lagatau ia haana ke fakahehe e ia e tau mata ha tautolu mo e manatu liga to takitaki e ia a tautolu ke uta ke he taha tutakale kehe mo e ka mole he takitaki kehe e ia a tautolu, kua manatu a ia ke patuiki ke pule ki a tautolu, ke maeke ia ia ke taute ha mena kua manako mo e finagalo a ia ki ai. Ti pihia e fakahehe he taokete haaku ko Lamana e tau loto ha lautolu ke ita.