Ko e Tohi Fakamua a Nifai
Ko e Magahala ne Pule mo e Gahua ai a Ia.
Ko e tala ki a Lihai mo e haana a hoana ko Salai, mo e tau fanau taane tokofa ha laua, (kamata mai ia ia e tama ne fanau fakamua) ko Lamana, Lemuela, Samu mo Nifai. Ne tomatoma atu e Iki ki a Lihai ke fehola kehe mai a lautolu i Ierusalema, ha kua perofeta atu a Lihai ki a lautolu he maaga ha ko e tau hala ha lautolu, ne manako a lautolu ke tamate a ia. Ne fenoga atu a Lihai mo e haana a magafooa ke he tolu e tau aho ke he tutakale. Ne liliu atu a Nifai mo e haana a tau matakainaga ki Ierusalema ke moua he tau fakamauaga ke he tau tagata Iutaia. Ko e tala ke he tau matematekelea ne hoko ki a lautolu. Ne moua e lautolu e tau fanau fifine a lsamaeli ke eke mo hoana ha lautolu. Ne uta e tau magafaoa ha lautolu mo e o atu ke he tutakale. Ko e tau mena ne mamahi ai mo e tau matematekelea ne hohoko ki a lautolu ke he tutakale. Koe puhala he fenoga ha lautolu. Ne hohoko a lautolu ke he taha moana lahi. Ne fakafetoko e tau matakainaga haana ki a ia. Ne mahala a lautolu ha ko Nifai, ti ta ai e ia e taha toga. Ne ui e lautolu e matatepu na ko Ponitifulu. Ne o fenoga atu a lautolu he moana ke he motu he maveheaga. Ko au ko Nifai ne tohia e tohi nai.
Ko e Veveheaga 1
Ne kitia e Lihai e afi fakatupou mo e tohi he perofetaaga. Ne talahau tuai e ia e malaia ka hoko ki Ierusalema, ne taluhau mai tuai foki e haele mai he Mesia — Ne kumi he tau tagata lutaia a ia ke tamate.
1Ko au ko Nifai, kua fanau mai au he tau mamatua tututonu, ko e mena ia ne moua mai e au e tau fakaakoaga nai mai he iloilo he matua taane haaku; ne kitia e au loga e tau monuina mai he Iki, hanai, ne moua foki e au e iloilo ke he tau mena mitaki mo e tau mena galo he Atua ko e mena ia kua fakamau ai e au e tau mena ne tutupu he haaku a vaha.
2Hanai ko e mena ia kua taute ai e au e talahauaga nai he vagahau he haaku a matua taane, ne moua e ia e vagahau nai mai he tau fakaakoaga he tau Iutaia mo e vagahau he tau Aikupito.
3Kua iloa e au kua mooli e tohi nai kua taute e au; ne tohi e au e tohi nai ke he haaku a lima, ne tohi foki e au mai he haaku a iloilo.
4Ne hoko ai, ke he kamataaga he pule a Setekaia ko e patuiki ke he kautu ha Iuta, (ko e matua taane haaku ko Lihai, ne nofo a ia i Ierusalema tali mai he haana a moui); ko e tau ia, ne o mai ai e tokologa he tau perofeta ne perofeta atu ke he tau tagata ke tokihala neke fakaotioti e maaaga lahi ko Ierusalema.
5Ko e mena ia, ne liogi atu e haaku a matua taane, ko Lihai, ke he Iki, hanai, ne liogi ai a ia mo e haana a loto katoa ma e haana a tau tagata.
6Ti hoko ai, ne liogi ai a ia ke he Iki, ti hoko mai ai e taha afi fakatupou mo e nofo ki luga he taha maka i mua ia ia; ne kitia mo e fanogonogo a ia ke he loga he tau mena, ha kua loga e tau mena ne kitia mo e logona e ia a ti vivivivi lahi ai a ia.
7Ne hoko ai, ne liu atu a ia ke he haana a fale i Ierusalema mo e tokaveli a ia ke he haana a mohega, ha kua lolelole a ia ha ko e malolo he Agaaga mo e tau mena ne kitia e ia.
8Ha kua lolelole a ia ha ko e malolo he Agaaga, ne kitia e ia taha fakakiteaga, ne kitia e ia e lagi kua mahafagi mai, mo e haana manatu ne kitia e ia e Atua kua nofo a ia i luga he nofoa Iki, ne agaagai atu haana a tau agelu ki a ia, ha ne lologo mo e fakaheke atu ke he ha lautolu a Atua.
9Ne hoko ai, ne kitia e ia e taha kua haele mai he lagi, mo e fofoga e ia e kikila kua mua atu ia ke he tupou la.
10Ne kitia foki e ia toko hogofulu ma ua kua mumui atu ki a ia, ti kua mua atu e ha lautolu a kikila ke he kikila he tau fetu.
11Ne o hifo mai a lautolu ke he lalolagi; ne fina atu e taha ne fakamua mai ia lautolu mo e tu ai ki mua he matua taane haaku, mo e foaki atu e tohi ki a ia, mo e ole atu a ia ki a ia ke totou.
12Ne hoko ai, ko e magaaho ne totou ai e ia e tohi ne puke a ia ke he Agaaga he Iki.
13Ti totou ai e ia, pehe: oi te, oi te, ki a Ierusalema, ne kitia e au e mahani fakalialia haau. Hanai, loga e tau mena ne totou he matua taane haaku hagaao ki Ierusalema — kua lata ke fakaotioti mo e moumou, mo lautolu kua ha hai ai tokologa ke mamate ke he pelu, mo e tokologa ke uta ai ke he fakapaeaaga i Papelonia.
14Ne hoko ai, ne pehe, ko e magaaho ne totou mo e kitia he matua taane haaku e tau mena kua ofoofogia, ne vagahau atu e ia loga e tau mena ke he Iki; tuga kua pehe, kua lahi e haau a mana mo e ofoofogia e haau a tau mana ma Iki na e, ko e Atua Mua Ue Atu. Kua tokoluga haau a nofoa Iki i luga he lagi, koe haau a malolo, mo e tututonu, mo e fakaalofa noa ke he tau tagata oti he lalolagi. Ko e haau a fakaalofa, ti nakai toka noa e koe ke mamate a lautolu kua o atu ki a koe.
15Kua vagahau pihia e haaku a matua taane, mo e haana a tau fakaheke atu ke he haana a Atua; ha kua kolikoli e haana agaaga, mo e puke namo e haana a loto, ha ko e tau mena ne kitia e ia, hanai, ne kua fakakite he Iki ki a ia.
16Ti ko e magaaho nai, ko au ko Nifai, kua nakai fakamau maopoopo e au e tala katoa mai he tau mena ne tohi he haaku a matua taane, ha kua tohi mo e fakamau e ia e loga e tau mena ne kitia e ia ke he tau fakakiteaga mo e haana a tau miti; ne tohi foki e ia e loga e tau mena ne perofeta mai po ke tala atu e ia ke he tau fanau haana, to nakai fakamau maopoopo e au e tau mena nai.
17Ka to tohia e au e tala nai ke he tau mena ne tutupu ke he tau aho he haaku a moui. Kitia la, kua tohi fakaku e au e tohi nai mai he tohi ne tohia ai he haaku a matua taane, kua tohia e au ke he tau lapa maka ne tufugatia e au ke he tau lima ni haaku. Ko e mena ia kaeke kua oti he fakaku e au e tohi nai mai he tohi he haaku a matua taane, to tohi ai e au e tala ke ke haaku a moui.
18Ko e mena ia, kua manako ai au ke iloa e mutolu e tau mena nai ke ofoofogia ai ne fakakite he Iki ke he haaku a matua taane, ko Lihai, hanai, ko e moumouaga a Ierusalema, kitia la, ne fina atu a ia ke he tau tagata, mo e kamata ke perofeta mo e tala age ki a lautolu e tau mena ne kua kitia mo e fanogonogo a ia ki ai.
19Ti hoko ai, ne fefeua mo e va he tau tagata Iutaia a ia ha ko e tau mena ne vagahau e ia ki a lautolu, ha kua talahau e ia e tala mooli ke he tau mena kelea mo e tau mahani fakalialia ha lautolu; ne tala age e ia ki a lautolu ko e tau mena ne kitia mo e fanogonogo a ia ki ai, mo e tau mena foki ne totou mai e ia he tohi kua fakakite tonu mai ai e haele mai he Mesia mo e lukutoto ma e lalolagi katoa.
20Ko e magaaho ne fanogonogo e tau tagata Iutaia ke he tau mena nai, ne ita lahi a lautolu ki a ia; hanai, tuga ni mo e tau perofeta tuai, ne vega kehe e lautolu, ti pinimaka mo e kelipopo ai; ne kumi foki e lautolu e haana a moui ke uta kehe mai ia ia. Ka e kitia la, ko au, ko Nifai, to fakakite atu e au ki a mutolu kua fakaalofa e iki ki a lautolu kua fifili e ia, ha ko e ha lautolu a tua, ke fakamalolo a lautolu ke malolo, ke laveaki a lautolu.