1Ko e magaaho nai, ko au ko Nifai, kua nakai tohia e matohiaga he haaku a tau matua ke he maaga nai he fakamauaga haaku; po ke ha magaaho ke fakakite ai e au ke he tau lapa maka nai kua tohia e au; ha kua tohia ai ke he fakamauaga ne leveki mai he matua taane haaku; ko e mena ia kua nakai tohia ai e au ke he gahua nai.

2Kua mafola ni ka pehe atu au, kua tupu mai a mautolu ia Iosefa.

3Ti kua nakai lekua ia ki a au ke makutu ke fakakite katoa e tau tala ke he tau mena he matua taane haaku, ha kua nakai maeke ia ke tohia ai he tau lapa maka nai, ha kua manako au ke atā ke tohia e au e tau mena mai he Atua.

4Ha ko e hokulo he haaku a manatu, ke maeke ia au ke futiaki mai e tau tagata ke o mai ke he Atua a Aperahamo, mo e Atua a Isaako, mo e Atua a Iakopo, ke momoui ai.

5Ko e mena ia, to poaki au ke he haaku a tupu ke aua neke fakapuke e tau lapa maka nai aki e tau mena kua nakai aoga ke he tau fanau he tau tagata.

6Ko e mena ia, ko e tau mena kua fiafia ki ai e lalolagi kua nakai tohia e au, ka ko e tau mena kua fiafia ki ai e Atua mo lautolu kua nakai tokaloto ke he lalolagi.