1Ti kua manako au ke iloa ai e mutolu, ne oti e tau perofetaaga mai he matua taane haaku ko Lihai hagaao ke he tau fanau haana, ne hoko ai, ne liu vagahau foki e Iki ki a ia, ne pehē: Kua nakai lata ia Lihai ke uta e haana a magafaoa hokoia ni ke he tutakale ka kua lata ke moua he tau fanau taane e tau fanau fifine mo hoana, ke maeke ai ia lautolu ke fakatupu e tau fanau ke he Iki, ke he motu he maveheaga.

2Ti hoko ai, ne poaki he Iki ki a Lihai ke fakafano foki e ia a au ko Nifai, mo e tau matakainaga haaku ki Ierusalema, ke ta mai ai a Isamaeli mo e magafaoa haana ke he tutakale.

3Ti hoko ai, ne o atu au mo e haaku a tau matakainaga ke he tutakale ke o hake ki Ierusalema.

4Ti hoko ai, ne o hake a mautolu ke he fale ha Isamaeli, ti mata fiafia mai a Isamaeli ki a mautolu, kua pihia a ti vagahau e mautolu e tau kupu mai he Iki.

5Ne hoko ai, ne fakamolū he Iki e loto ha Isamaeli mo e haana a magafaoa foki, kua pihia a ti tuku fenoga a lautolu mo mautolu mo e o hifo ai ke he tutakale ke he fale ie he matua taane ha mautolu.

6Ne hoko ai, ko e magaaho ne o fenoga a mautolu ke he tutakale, kitia la, ko Lamana mo Lemuela mo e tokoua e fanau fifine ha Isamaeli, mo e tokoua e fanau taane a Isamaeli mo e tau magafaoa ha laua ne fakafetoko mai a lautolu ki a au, hanai, ko au ko Nifai, mo Samu mo e matua taane ha lautolu ko Isamaeli, mo e hoana haana, mo e tokotolu e tau fanau fifine haana.

7Ti hoko ai, ha kua fetoko mai a lautolu, ne manako ai a lautolu ke liliu ke he fonua ko Ierusalema.

8Ko e magaaho nai, ko au ko Nifai, kua momoko lahi ha kua maō e tau loto ha lautolu, ko e mena ia ne vagahau atu au ki a lautolu pehe, hanai, ki a Lamana mo Lemuela foki: Kitia la ko mua ko e lafu taokete haaku, ko e ha kua maō pihia ai ha mua a tau loto, mo e pouli e tau manamanatuaga ha mua, a ti vagahau ai au ko e tehina ha mua, hanai, kua eke au mo fakafifitakiaga ki a mua.

9Ko e ha kua nakai talia ai e mua e tau kupu mai he Iki?

10Kua nimo fefe ia mua e agelu ke Iki ne kua kitia e mua?

11Hanai, kua nimo fefe ia mua e tau mena lalahi ne taute he Iki ki a tautolu, tuga ne laveaki e ia a tautolu mai he tau lima ha Lapana mo e maeke foki ia tautolu ke moua ai e tau fakamauaga.

12Hanai, kua nimo fefe ia mua kua maeke he Iki ke taute e tau mena oti kua finagalo a ia ki ai, ma e tau fanau he tau tagata, kaeke kua fakakite e tua ha lautolu ki a ia? Ko e mena ia, kia tua a tautolu ki a ia.

13Kaeke kua fakamooli tumau a tautolu ki a ia, to moua e tautolu e fonua he maveheaga; mo e to iloa foki e mutolu to moumou a Ierusalema ke fakakatoatoa e tau kupu he Iki; ka to fakakatoatoa e tau mena oti ne vagahau he Iki hagaaoi ke he moumouaga a Ierusalema.

14Kitia la to fakaoti ai mo e nakai nofo mo lautolu e Agaaga, kitia la, ne tiaki e lautolu e tau perofeta, mo e liti e lautolu a Ieremia ke he fale puipui. Ne kumi e lautolu ke uta kehe e moui he matua taane haaku, kua pihia ai, a ti hola kehe a ia mai he fonua.

15Kitia la, kua tala atu e au ki a mutolu, ka eke ke liliu a mutolu ki Ierusalema to mamate foki a mutolu mo lautolu. Ko e magāho nai, ka eke ke fifili a mutolu ki ai kia o hake a ke he motu, ti manatu e tau kupu ne vagahau e au ki a mutolu, ka eke ke o atu to mamate foki a mutolu, ha kua pihia e tau kupu ne ole fakamakamaka he Agaaga ki a au ke vagahau.

16Ti hoko ai, ko e magaaho ne vagahau ai e au, ko Nifai, e tau kupu nai ke he tau matakainaga haaku, ne ita a lautolu ki a au. Ne hoko ai, ne taofi e lautolu au, kitia la, kua vale lahi a lautolu, mo e lili e lautolu au aki e afo, mo e kumi e lautolu ke uta kehe e moui haaku, ke toka ai au ke he tutakale ke fakaoti ai he tau manu favale.

17Ka ne hoko ai, ne liogi au ke he Iki, pehe: Ko e Iki na e, tuga mo e haaku a tua kua ha ha ia koe, maeke nakai ia koe ke laveaki au mai he tau lima he haaku a tau matakainaga, hanai, kia foaki mai ki a au e malolo ke maeke ai ia au ke vevete e tau afo kua lili aki au.

18Ne hoko ai, ko e magaaho ne vagahau ai e au e tau kupu ia, kitia la, kua tagataga tuai e tau afo mai he tau lima mo e tau hui haaku, mo e tu ai au ki mua he tau matakainaga haaku, mo e vagahau foki ai au ki a lautolu.

19Ne hoko ai, ne ita foki a lautolu ki a au, mo e manako a lautolu ke taofi au; ka e kitia la, ne ole e taha mai he tau fanau fifine ha Isamaeli, pihia mo e tokoua haana, mo e taha tama taane foki ha Isamaeli, ne ole ke he tau matakainaga haaku, kua pihia a ti molu ai e tau loto ha lautolu; mo e nakai liu a lautolu ke lali ke uta kehe e haaku a moui.

20Ne hoko ai, ne momoko a lautolu ha ko e tau gahua kelea ne taute e lautolu, pihia ai, ne tukutuku hifo a lautolu ki mua haaku mo e ole a lautolu ki a au ke fakamagalo ki a lautolu e tau mena ne taute e lautolu ki a au.

21Ne hoko ai, ne fakamagalo e au ki a lautolu e tau mena oti ne taute e lautolu ki a au, mo e tomatoma atu au ki a lautolu ke liogi ke he Iki ko e Atua ha lautolu ke moua e fakamagaloaga. Ne hoko ai, ne taute e lautolu pihia. Ne oti e liogi ha lautolu ti fenoga atu a mautolu ke he fale ie he matua taane ha mautolu.

22Ne hoko ai, ne o hifo a mautolu ke he fale ie he matua taane ha mautolu. Ko au mo e haaku a tau matakainaga, mo Isamaeli mo e magafaoa katoa haana, ne taute ai e mautolu e fakaaueaga ke he Iki ko e Atua ha mautolu, mo e tuku atu e poa mo e tau poa huhunu ki a ia.