1Ne hoko ai, ko au, ko Nifai, ne liu mai au he tutala mo e Iki; ke he fale ie he matua taane haaku.

2Ne hoko ai, ne vagahau mai a ia ki a au ne pehe mai; Kitia la, ne miti e au e miti, ha ha i ai e poaki he Iki ki a au ke liliu a koe mo e tau matakainaga haau ki Ierusalema.

3Kitia la, kua leveki e Lapana e talahauaga he tau tagata Iutaia mo e matohiaga he tau mamatua tupuna haau, kua tohi tuai e tau mena ia ke he tau lapa maka veo.

4Ko e mena ia, ne poaki he Iki ki a au, kia fano a koe mo e tau matakainaga haau ke he fale ha Lapana, mo e kumi e tau fakamauaga mo e ta mai ke he tutakale.

5Ti ko e mogonai, kitia la, kua feguigui haau a tau matakainaga, kua pehe, kua uka lahi e mena kua manako au ki ai mai ia laua; ka e kitia la, nakai manako au ke he mena nai mai ia laua, ka ko e iki kua poaki mai e ia e mena ia.

6Ko e mena ia, fano a koe ma haaku tama, to fakaalofa e iki ki a koe, ha kua nakai gugu a koe.

7Ne hoko ai, ne pehe atu au ko Nifai, ke he haaku a matua taane, to fano au ke taute e tau mena ne poaki mai he Iki ki a au, ha kua iloa e au kua nakai poaki he Iki e tau poakiaga ke he tau fanau he tau tagata, ka e nakai tauteute e ia e taha puhala ke maeke ai ia lautolu ke taute e tau mena kua poaki mai e ia ki a lautolu.

8Ne hoko ai, ko e magaaho ne logona he matua taane haaku e tau kupu na, kua fiafia lahi a ia, ha kua iloa e ia ne kua fakamonuina he Iki au.

9Ti ko au ko Nifai, mo e haaku a tau matakainaga ne o fenoga ai ke he tutakale, mo e tau fale ie ha mautolu, ke o hake ke he fonua ko Ierusalema.

10Ne hoko ai, ko e magaaho ne hohoko a mautolu ke he fonua ko Ierusalema, ti kamata e tau matakainaga haaku mo au ke tau pulega.

11Ne taute e mautolu e vili, po ko hai ka fina atu ke he fale a Lapana. Ti hoko ai, ne moua e Lamana e kotofaaga ti fano a Lamana ke he fale a Lapana, mo e tutala ai a laua ke he haana a fale.

12Mo e manako a ia ke he tau lapa maka veo mai ia Lapana. Kua ha i ai he tau lapa maka veo ia e matohiaga he matua taane haana.

13Kitia la, ne hoko ai, ne ita lahi a Lapana mo e tulei atu a Lamana mai i mua haana mo e nakai foaki e tau lapa maka veo ki a ia. Ko e mena ia, ne pehe atu a Lapana, kitia la, ko koe, ko e tagata fofo mena to tamate e au a koe.

14Ne hola a Lamana mai i mua ia ia, ti tukuogo e ia e mena ne taute e Lapana ki a ia, a ti momoko lahi a mautolu, ti manatu e tau matakainaga haaku ke liliu atu ke he haaku a matua taane kua ha ha i ai ke he tutakale.

15Ka e kitia la, ne pehe atu au ki a lautolu, kua moui e Iki kua momoui foki a tautolu, to nakai o atu a tautolu ke he matua taane ha tautolu kua ha ha i ai ke he tutakale a to katoatoa e mena ne poaki mai he Iki ki a tautolu.

16Ko e mena ia, kia tumau a tautolu ke omaoma e tau poakiaga mai he Iki: ko e mena ia kia o atu a tautolu ke he fonua ko e tufaaga he matua taane ha tautolu, ha kua toka e ia e tau auro mo e tau ario mo e tau koloa kehekehe. Ne taute e ia e tau mena oti nai ha ko e poakiaga he Iki.

17Ha kua iloa tuai e ia to moumou a Ierusalema, ha kua kelea lahi a lautolu kua nonofo ai.

18Kitia la, ne tiaki e lautolu e tau kupu he tau perofeta. Ko e mena ia, kaeke ke nofo hifo e haku a matua tane ke he maaga nai, ka e pehe e poakiaga mai he Iki ke hola kehe mai he fonua nai; kitia la, to mate foki a ia. Ko e mena ia, kua lata ni ke hola kehe a ia mai he fonua nai.

19Kitia la, ko e finagalo he Atua kua lata ke moua ai e tautolu e tau fakamauaga nai kua ha ha i ai ke he tau lapa maka veo, ke leveki a tau mena nai ke maeke ai he tau fanau ha tautolu ke iloa e vagahau he tau mamatua ha lautolu;

20Mo e leveki foki e tau kupu ne talahau mai he tau perofeta tapu oti, ne moua mai e lautolu mai he Agaaga mo e mana he Atua, mai he kamataaga he lalolagi ke hoko mai ke he vaha nai.

21Ne hoko ai, ne pihia haaku a tau vagahau ke he haaku a tau matakainaga mo e talia ai e lautolu ke maeke ai a lautolu ke tua tumau, ke omaoma e tau poakiaga he Atua.

22Ne hoko ai, ne o hifo a mautolu ke he fonua ha mautolu, ti ta mai e tau auro, mo e tau ario, katoa mo e tau mena uho ha mautolu.

23Ka mole ia he fakamaopoopo e mautolu e tau mena nai, ne o atu a mautolu auloa ke he fale a Lapana.

24Ne hoko ai, ne huhū atu a mautolu ki a Lapana ne manako a mautolu ke foaki mai e ia e tau lapa maka veo kua ha ha ia ia, ke foaki mai ki a mautolu, to foaki age e mautolu ki a ia e tau auro, mo e tau ario, mo e tau mena uho ha mautolu.

25Ti hoko ai ko e magaaho ne kitia e Lapana e tau koloa ha mautolu kua lahi pihia, ne manako a ia ki ai, ha ko e manako lahi haana, ne vega e ia a mautolu ki fafo, mo e fakafano mai e ia e tau fekafekau haana ke tamate a mautolu ke maeke ai ia ia ke moua e tau koloa ha mautolu.

26Ne hoko ai, ne fehola kehe a mautolu mai he tau fekafekau ha Lapana, mo e tiaki hifo foki e mautolu e tau koloa ha mautolu, ti moua ai e Lapana e tau mena ia.

27Ne hoko ai, ne fehola kehe a mautolu ke he tutakale mo e fakamumuli ai a mautolu ke he taha ava maka, ne nakai moua ai he tau fekafekau ha Lapana a mautolu.

28Ne hoko ai, ne ita a Lamana ki a au ti pihia ke he haaku a matua taane; ne ita foki a Lemuela ha kua fanogonogo a ia ki a Lamana, ne vagahau mai e Lamana mo Lemuela e tau kupu ki a maua e tau lafu, ko e mena ia, ne fahi foki e laua a maua aki e ka akau.

29Ne hoko ai, ko e magaaho ne fahi ai e laua aki e akau, kitia la, ne hoko mai e agelu mai he Iki mo e tu ki mua ha laua, mo e vagahau atu pehe: Ko e ha kua fahi ai pihia e tehina ha mua aki e akau? Iloa nakai e mua kua fifili he Iki a ia ke pule ki a mua ha kua mahani kelea a mua? Kitia la, to liliu atu foki a mutolu ki Ierusalema, to tuku atu he Iki a Lapana ke he tau lima ha mutolu.

30Ka mole ia e vagahau mai e agelu ki a mautolu, ti haele kehe ai a ia.

31Kua mole atu e agelu, ne kamata foki a Lamana mo Lemuela ke feguigui aki, ne pehe a laua: To tuku mai fefe he Iki a Lapana ke he tau lima ha tautolu? Kitia la, ko ia ko e tagata malolo, mo e maeke ia ia ke takitaki e toko limagofulu, hanai, kua maeke foki ia ia ke tamate e toko limagofulu, ti nakai kia pihia ki a tautolu?