1Kitia la ne hoko ai, ne kamata e Iki ke vagahau atu ke he haaku a matua taane, hanai, ne ha ha i ai ke he taha miti, ne pehe ai ki a ia: Uhoaki a koe ma Lihai, ha ko e tau mena ne taute e koe, mo e haau a mahani fakamooli, ne fakamatala e koe e tau mena ke he tau tagata nai tuga ne poaki atu ai e au ki a koe; kitia la, kua kumi a lautolu ke uta kehe e haau a moui.

2Ne hoko ai, ne poaki e Iki ke he haaku a matua taane, ke he miti: Kua lata ke uta e ia haana a magafaoa mo e fehola ke he tutakale.

3Ne hoko ai ne omaoma a ia ke he tau kupu he Iki, ko e mena ia ne taute pihia e ia tuga ne poaki he Iki ki a ia.

4Ne hoko ai, ne fano kehe a ia ke he tutakale. Ne toka e ia e haana a fale mo e haana a tufaaga he tau fonua, katoa mo e haana a tau auro, mo e haana a tau ario, mo e haana a tau mena uho, mo e nakai uta e ia ha mena taha he tau koloa ia, ka ko e magafaoa ni haana ne uta e ia, mo e tau mena kai, mo e tau fale ie, mo e fehola kehe atu a lautolu ke he tutakale.

5Ne o hifo mai ai tata atu ke he kau tahi he Tahi Kula; ne fenoga a ia tata atu ke he Tahi Kula; mo e fenoga ai a Lihai mo e haana a magafaoa kua ha ha i ai ke he tutakale, ko e matua fifine haaku ko Salai, mo e tau taokete haaku ko Lamana, Lemuela mo Samu.

6Ne hoko ai, ne fenoga a ia ke he tutakale ke he tolu e tau aho, ti ta e ia e haana a fale ie ha ha i ai ke he taha vahaloto he tau mouga tata ke he taha vailele.

7Ne hoko ai, ne ta e ia e taha fatapoa aki e tau maka, mo e taute e ia e poa ke ne Iki, mo e taute e fakaaueaga ke he Iki ko e Atua ha tautolu.

8Ne hoko ai, ne ui e ia e higoa he vailele ko Lamana, ne tafe atu ke he vai puna he Tahi Kula; ne nofo ai a ia he vaha mouga tata atu ke he gutu he vailele nai.

9Ko e magaaho ne kitia he matua taane haaku ne tafe atu e vailele nai ke he Tahi Kula, ne vagahau atu a ia ki a Lamana, mo e pehe ai, Oi, kia lahi a koe tuga e vailele nai, kia liligi mau ke he vai puna he tututonu.

10Ne vagahau foki a ia ki a Lemuela; Oi kia lahi a koe tuga mo e vahaloto he tau mouga nai, mauokafua mo e tumau mo e nakai maueue, ke omaoma e tau poakiaga he Atua.

11Ne vagahau pihia a ia ha kua matauka a Lamana mo Lemuela; kitia la ne feguigui a laua ke he loga e tau mena, ke he matua taane ha laua, ha ko e tau fakakiteaga ne takitaki mai e ia a laua mai he fonua ki Ierusalema, mo e tiaki e tau tufaaga fonua ha lautolu, mo e tau auro, mo e tau ario, mo e tau mena uho, ke mamate a lautolu ke he tutakale. Ne pehe a laua ne taute e ia e tau mena nai ha ko e tau manatu goagoa he haana a loto.

12Kua pihia e tau mena ne feguigui ai a Lamana mo Lemuela ke he matua taane ha laua. Ne feguigui ha kua nakai maama ia laua e tau mena mai he Atua ne eke a laua.

13Ne nakai tua foki a laua ke he tau kupu mai he tau perofeta ke he fakaotiotiaga he maaga lahi ko Ierusalema. Kua tatai a laua mo e tau tagata Iutaia kua nonofo i Ierusalema, ne kumi ke uta kehe e moui he matua taane haaku.

14Ne hoko ai, ne vagahau atu mo e malolo e matua taane haaku ki a laua he vaha mouga ko Lemuela, ha kua puke a ia ke he Agaaga, a ti vivivivi a laua i mua haana. Ne fakakupu e ia a laua ke nakai maeke ai ia laua ke feguigui foki, ko e mena ia, ne omaoma a laua ke he tau poakiaga haana.

15Ti ne nofo e matua taane haaku i loto ke he taha fale ie.

16Ne hoko ai, ko au ko Nifai, kua fuata, ka e pete ia, kua tino lahi, mo e manako lahi foki au ke moua e iloilo ke he tau mena galo mai he Atua, ko e mena ia ne ole atu au ke he Iki; mo e kitia la, ne aahi mai a ia ki a au mo e fakamolū e ia e loto haaku mo e maeke ai ia au ke tua ke he tau kupu ne vagahau mai he matua taane haaku ko e mena ia, ne nakai fetoko au ki a ia tuga ne taute he tau matakainaga haaku.

17Ne vagahau atu au ki a Samu, mo e fakailoa atu ki a ia e tau mena ne moua e au mai he Iki ha ko e Agaaga Tapu. Ne hoko ai, ne tua a ia ke he tau kupu haaku.

18Ka e kitia la, ne nakai fanogonogo mai a Lamana mo Lemuela ke he haaku a tau kupu ti kua momoko e haaku a loto ha kua mao e tau loto ha laua, ne ole atu au ke he Iki ma laua.

19Ne hoko ai, ne vagahau mai e Iki ki a au, mo e pehe mai; Uhoaki a koe, ma Nifai, ha ko e haau a tua, ha kua kumi fakamakamaka e koe au, mo e loto fakatokolalo.

20Ti kaeke ke omaoma e koe e tau poakiaga haaku, to moui monuina a koe, to takitaki ai foki a koe ke he taha fonua he maveheaga; hanai, ko e motu ne tauteute e au maau; hanai, ko e motu kua mua atu mai he tau motu oti.

21Ti kaeke ke tumau e fakafetoko he tau matakainaga haau ki a koe, to mumutu kehe e au a lautolu mai i mua haaku.

22Ti kaeke ke omaoma e koe e haaku a tau poakiaga, to eke a koe mo takitaki mo e faiaoga ke he haau a tau matakainaga.

23Kitia la, ko e aho ia ka totoko mai a laua ki a au, to kaiaalu e au a laua ke he malaia mamahi ke nakai fai malolo a lautolu ke kaumahala e tau fanau haau, ka to kaumahala ni e tau fanau haau kaeke ke fetoko mai foki a lautolu ki a au.

24Ti kaeke ke fakafetoko e haau a tau fanau ki a au to fahi e lautolu e tau fanau haau, mo e fakalagā a lautolu ke liu manatu e tau puhala kua hako.