1Ti ne hoko ai, ne liu kamata e fenoga ha mautolu ke he tutakale; mo e fenoga atu ke he faahi uta ke he magaaho ia. Ne fenoga ai mo e moua e mautolu e tau matematekelea loga he tutakale; ne fanafanau ai e tau hoana ha mautolu he tutakale.

2Ha kua loga e tau monuina ha mautolu mai he Iki, ko e momoui ni a mautolu he tau kakano manu mata, ke he tutakale, ne maeke ni he tau fifine ha mautolu ke fakahuhu e tau fanau ha lautolu mo e malolo, hanai, tuga ni e tau taane; mo e kamata ke fakauka he fenoga mo e nakai feguigui ai.

3Kua kitia ai e tautolu kua lata ke fakakatoatoa e tau poakiaga he Atua. Ti kaeke kua omaoma he tau fanau he tau tagata e tau poakiaga he Atua, kua fagai e ia a lautolu mo e foaki e ia e malolo ki a lautolu, mo e tauteute e ia e taha puhala ke maeke ia lautolu ke taute e tau mena ne poaki e ia ki a lautolu; ko e mena ia, ne taute e ia e tau mena ma mautolu ha ne o fenoga ai ke he tutakale.

4Ti ne o fenoga a mautolu ke he loga e tau tau, hanai, ke he valu e tau tau ke he tutakale.

5Ti ne hohoko a mautolu ke he fonua ko Ponitifulu, ha kua loga e tau fua lakau pihia mo e meli; ko e tau mena oti nai, ne tauteute he Iki ke nakai mamate a mautolu. ti ne kitia e m utolu e tahi, ne fakahigoa ai ko Ilianatumu, ko e kakano he kupu ia ka liliu, ko e loga e tau vai.

6Ti ne hoko ai, ne fakatutu e mautolu e tau fale ie tata atu ke he tapa tahi, ti pete ni ne mamahi a mautolu mo e loga e tau matematekelea mo e tau mena uka, hanai, tuga kua lahi ni ti nakai maeke ia mautolu ke tohi e tau mena oti, kua olioli he hohoko atu a mautolu ke he tahi; ti ne fakahigoa ai e mautolu e matatepu nai ko Ponitifulu, ha kua loga e tau fua lakau.

7Ti ne hoko ai, ko au ko Nifai, ne mole ai falu a tau aho ke he fonua ko Ponitifulu, ne hoko mai e leo he Iki ki a au, ne pehe: Matike, mo e fano a koe ke he mouga. Ti ne hoko ai, ne matike ai au mo e hake ke he mouga mo e ui atu ke he Iki.

8Ti ne hoko ai, ne vagahau mai e Iki ki a au, ne pehe mai: kia ta e koe e taha toga, to fakakite e au ki a koe, ke maeke ia au ke uta ai haau a tau tagata ke he taha faahi he tahi nai.

9Ti ne pehe atu au: Ma iki na e, to fano au ki fe ke moua e lapatoa ke fakatataka, ke talaga aki e tau mena gahua ke tufuga aki e toga tuga kua fakakite mai e koe ki a au.

10Ti ne hoko ai ne tala mai he Iki ki a au e matatepu kua lata ke fano au ki ai ke moua e lapatoa ke taute aki e tau mena gahua.

11Ti ne hoko ai, ko au ko Nifai, ne talaga e au e taha mena ke uulo atu ke he afi, talaga mai he tau kili manu, ka mole he taute e au e mena ke uulo aki e afi, ne tuki e au ua e maka ke kamata aki taha afi.

12Ha kua nakai fioia he Iki a mautolu ke tafu afi ai he o fenoga ai a mautolu he tutakale; ha kua pehe a ia: To fakamitaki e au e tau mena kai ha mutolu, ke nakai lata ia mutolu ke tunu ai.

13To eke au mo hulu ha mutolu he tutakale; mo e to tauteute e au e puhala ma mutolu kaeke ke omaoma a mutolu ke he tau poakiaga haaku, ko e mena ia kaeke ke omaoma e mutolu e tau poakiaga to takitaki e au a mutolu ke he fonua he maveheaga; mo e to iloa e mutolu ko au haia ne takitaki ai a mutolu.

14Hanai, ti ne pehe foki e Iki: ka hohoko atu a mutolu ke he fonua he maveheaga, to iloa e mutolu, ko au ko e Iki, ko e Atua; mo e ko au ko e Iki, ne laveaki a mutolu mai he mate; hanai, ne ta mai e au a mutolu mai he fonua ko lerusalema.

15Ko e mena ia, ko au ko Nifai, kua fakafita au ke omaoma e tau poakiaga he Iki, ti ne tomatoma e au e tau matakainaga haaku ke fakamooli mo e gahua fakamakutu.

16Ti ne hoko ai, ne talaga e au e tau mena gahua mai he lapatoa ne moua e au mai he tau maka.

17Ko e magaaho ne kitia ai he tau matakainaga haaku kua kamata au ke ta e toga, ne kamata a lautolu ke feguigui ki a au, mo e pehe: Ko e tangata goagoa e tehina ha tautolu, ha kua manatu a ia kua maeke ia ia ke ta e toga; hanai, ti kua manatu foki a ia kua maeke ia ia ke fenoga ke he taha faahi he moana lahi nai.

18Ti pihia e tau loma he tau matakainaga haaku ki a au, mo e kua nakai manako a lautolu ke gahua, ha kua nakai tua a lautolu to maeke ia au ke ta e toga; kua nakai tua foki a lautolu kua fakatonu mai he Iki ki a au.

19Ti ne hoko ai, ko au ko Nifai, kua fakaatukehe lahi ha ko e tau loto mao ha lautolu; ti ko e magaaho ne kitia e lautolu kua kamata ai au ke fakaatukehe kua fiafia e tau loto ha lautolu, kua pihia ai, ti olioli a lautolu ki a au mo e pehe: Kua iloa e mautolu kua nakai maeke ia koe ke ta e toga, ha kua iloa e mautolu kua nakai ha ha ia koe ha fifiliaga tonu, ko e mena ia, to nakai maeke ia koe ke fakahoko ha gahua lahi pehe nai.

20Ti ko koe, kua tuga e matua taane ha tautolu, kua muitua ke he tau manatu goagoa mai he loto haana; hanai, ne takitaki e ia a tautolu mai he fonua ko Ierusalema, mo e fanoa ai a tautolu ke he tutakale ke he loga e tau tau, mo e gahua lahi ai e tau fifine ha tautolu, mo e mamafa a lautolu he tau tama, mo e fanafanau ai a lautolu he tutakale mo e tau mamahi loga, toe ni ke mamate; kua mua atu e mitaki kaeke ne mamate fakamua a lautolu to o mai a lautolu mai i Ierusalema ke mamahi he tau matematekelea nai.

21Kitia la, kua mamahi a tautolu ke he loga e tau tau nai ke he tutakale, ka e kaeke ne nonofo a tautolu he fonua, he tau tufaaga ti ne maeke a tautolu ke fiafia mo e olioli ha ko e tau mena ha tautolu.

22Ti kua iloa e tautolu ko lautolu kua nonofo i Ierusalema; kua tututonu a lautolu ha kua omaoma e lautolu e tau fakatufono mo e tau fifiliaga he Iki, mo e tau poakiaga oti, tuga mo e tau fakatufono ha Mose; ko e mena ia, kua iloa e tautolu kua tututonu a lautolu kua fakafili atu he matua taane ha tautolu a lautolu, mo e takitaki kehe e ia a tautolu ha kua talia e tautolu e tau kupu haana; hanai, ko e tehina ha tautolu kua tuga a ia. Kua vagahau e tau matakainaga haaku he feguigui mo e loma ki a maua.

23Ti ne hoko ai, ko au ko Nifai, ne vagahau ki a lautolu ne pehe atu: Kua tua nakai a mutolu ne maeke e tau mamatua taane ha tautolu ke fehola kehe mai he tau lima he tau tagata Aikupito kaeke ne nakai talia e lautolu e tau kupu he Iki?

24Hanai, kua manatu nakai a mutolu ne maeke a lautolu ke o kehe mai he peaaga, kaeke ne nakai poaki he Iki ki a Mose kua lata ke takitaki e ia a lautolu mai he paeaaga?

25Kua iloa e mutolu oti ne nonofo e tau fanau ha Israela he paeaaga mo e iloa foki e mutolu kua lahi e mamafa he tau gahua ha lautolu, kua uka ke hahamo, ko e mena ia, kua iloa e mutolu ko e mena mitaki ke ta mai a lautolu mai he paeaaga.

26Kua iloa e mutolu ne poaki he Iki ki a Mose ke taute e gahua lahi ia; mo e iloa e mutolu ne vevehe ua e Tahi Kula ha ko e tau kupu haana, mo e ne o a lautolu i loto he kelekele momo.

27Ka e iloa e mutolu ne tomo e tau tagata Aikupito he Tahi Kula, ko e tau kautau ha Falao.

28Ti iloa foki e mutolu ne fagai ai a lautolu ke he manai he tutakale.

29Hanai, ti iloa e mutolu ne ta e Mose e maka, ha ko e mana he Atua kua ha ha ia ia ti tafe mai e vai, ke maeke he tau fanau ha Isaraela ke fakato e fia inu ha lautolu.

30Ti pete ni kua takitaki he Iki ko e Atua a lautolu, ko e Lukutoto ha lautolu ne takitaki ai a lautolu he tau aho mo e foaki e ia e hulu ka hoko e pouli, mo e y taute e tau mena oti kua lata he tau tagata ke moua, ne fakamaō ha lautolu a tau loto mo e fakapouli e tau manamanatuaga ha lautolu mo e fakafualoto ki a Mose, mo e Atua mooli kua moui.

31Ti ne hoko ai, ha ko e haana a tau kupu, ne mamate ai a lautolu, ti ha ko e haana a tau kupu ne takitaki e ia a lautolu, ha ko e haana a tau kupu ne taute e ia e tau mena oti ma lautolu; ne nakai taute ai ha mena taha ka e nakai mai ia he tau kupu haana.

32Ti ka mole ia he o a lautolu he vailele ko Ioritana, ne fakamalolo e ia a lautolu ke vega kehe e tau fanau he motu ia mai he fonua, hanai mo e fakamavehevehe a lautolu ti mamate ai tuai.

33Ti ko e magaaho nai, kua manatu kia a mutolu kua tututonu a lautolu ne nonofo he fonua he maveheaga, ne vega he tau mamatua ha tautolu a lautolu mai ai? Kitia la, kua tala atu e au ki a mutolu, Nakai.

34Kua manatu kia a mutolu kua fifili e tau mamatua ha tautolu ki a lautolu ia kaeke ne tututonu mooli a lautolu? Kua tala atu e au ki a mutolu, Nakai.

35Kitia la, kua fakaalofa e Iki ke he tau tagata oti kana, tuga kua taha, ko ia kua tututonu kua mua atu e fakaalofa he Atua ki ai. Ka e kitia la, ne tiaki he tau tagata nai e tau kupu oti he Atua, kua momoho ha lautolu a tau mahani kelea ti kua katoatoa e ita he Atua ki a lautolu; ti ne kaiaalu he Iki e fonua ki a lautolu, mo e fakamonuina e ia ke he tau mamatua taane ha tautolu; hanai, ne kaiaalu e ia ki a lautolu ke he mamateaga ha lautolu, mo e fakamonuina ke he tau mamatua ha tautolu ke maeke ia lautolu ke moua e malolo ke pule ki ai.

36Kitia la, ne taute he Iki e lalolagi ke nonofo e tau tagata i ai; ne tufugatia e ia e tau fanau haana ke nonofo ai.

37Ti ne lagaki e ia e kautu tututonu, mo e moumou e ia e tau kautu he tau tagata kelea.

38Ti takitaki e ia a lautolu kua tututonu ke he tau fonua uho, mo e fakaotioti e ia a lautolu kua kelea, mo e kaiaalu e ia e fonua ha lautolu.

39Kua eke mo e pule a ia ki luga he lagi muatua, ha ko e haana nofoa Iki haia, mo e kua eke e lalolagi mo haana tuaga hui.

40Ti kua fakaalofa a ia ki a lautolu kua manako ki a ia mo Atua ha lautolu. Kitia la, ne fakaalofa a ia ke he tau mamatua ha tautolu, mo e mavehe mo lautolu, hanai, ko Aperahamo, Isaako mo Iakopo, mo e manatu e ia e tau maveheaga ne taute e ia; ko e mena ia ne ta mai ai a lautolu mai he fonua ko Aikupito.

41Ti ne fakaako e ia a lautolu he tutakale aki e akau haana ha kua fakamao e tau loto ha lautolu, tuga ha mutolu, ti ne fakahako e ia a lautolu ha ko e tau mahani kelea ha lautolu. Ne fakafano mai e ia e tau gata puhopuho ne lele, ki a lautolu, mole atu he gagau a lautolu ne tauteute e ia e puhala ke fakamalolo a lautolu; ko e fekau kua lata ki a lautolu ke taute ko e kikite, ha kua mukamuka e puhala ia, kua tokologa ni a lautolu ne mamate.

42Ti ne famamao e tau loto ha lautolu mai he taha magaaho ke he taha magaaho ti amuamu a lautolu ki a Mose, pihia ke he Atua ha lautolu; pete ia kua iloa e mutolu, ne takitaki e ia a lautolu mo e haana mana ke he fonua he maveheaga.

43Ti ko e magaaho nai, kua mole e tau mena nai, kua hoko mai e magaaho kua kelea lahi a lautolu, hanai, kua teitei hoko mai e magaaho ke fakaotioti a lautolu; ha kua iloa e au to hoko mai e aho ke fakaotioti a lautolu, ka e moui e tokofiha ni, to uta ai ke he paeaaga.

44Ko e mena ia, ne poaki ai he Iki ke he matua taane haaku kua lata ke fano kehe a ia ke he tutakale; ti ne kumi foki he tau tagata Iuta ke uta kehe e haana moui; hanai, kua kumi foki a mutolu ke kuta kehe e haana moui; ko e mena ia, ko e tau kelipopo tagata a mutolu ke he tau loto ha mutolu ti tuga a lautolu a mutolu.

45Kua mafiti lahi a mutolu ke taute e tau mena kelea ka e fakatuai ke manatu ke he Iki ko e Atua ha mutolu. Ne kitia e mutolu e agelu; ne vagahau a ia ki a mutolu, ti logona e mutolu haana a leo mai he taha magahala ke he taha magahala; ti ne vagahau a ia ki mutolu ke he leo tote, ka kua nakai logona e mutolu, nakai maeke a mutolu ke logona e haana e tau kupu; ko e mena ia, kua vagahau a ia ki a mutolu tuga e leo he pakulagi, kua eke ai ke lulu ai e lalolagi tuga ko e maihiihi ne fai.

46Ti kua iloa foki e mutolu kua maeke ia ia ke he mana he tau kupu haana ke uta kehe e lalolagi; hanai, ti iloa e mutolu ko e mana he tau kupu haana kua maeke ia ke fakamomole e tau mena tule, mo e lipilipi e tau matatepu kua momole. Oi, ti ko e ha kua maō ai e tau loto ha mutolu?

47Kitia la, kua mavehevehe haaku a agaaga ha ko mutolu, ti kua mamahi haaku a loto; kua matakutaku au neke vega kehe a mutolu ke he tukulagi. Kitia la, kua puke au ke he Agaaga he Atua kua lahi ni, kua nakai fai malolo ke he haaku tino.

48Ti ne hoko ai kua mole he vagahau e au e tau kupu nai, ne ita a lautolu ki a au, ha kua puke au ke he mana he Atua, tuga ke otioti ai haaku a ka kano; ko e ha tagata ke piki mai ki a au to fifigo tuga e pupu pakupaku; to nakai fai ia ke he ha mena he Atua, ha ko e mena to ta he Atua a ia.

49Ti ne hoko ai, ko au ko Nifai, ne tala age au ki a lautolu ke nakai liu feguigui foki ke he matua taane ha lautolu; mo e nakai finagalo foki ke gahua a lautolu mo au ha kua poaki mai he Atua ki a au ke ta e au taha toga.

50Ti ne pehe atu au ki a lautolu: Kaeke kua poaki he Atua ki a au ke taute e tau mena oti to maeke ia au ke taute e tau mena ia. Kaeke kua poaki e ia ki a au ke pehe ke he vai nai, kia eke a koe mo kelekele, to eke e vai mo kelekele; ti ka pihia au to taute ni.

51Ko e magaaho nai, kaeke kua ha ha he Iki e malolo pihia mo e taute loga e tau mena ke he tau fanau he tau tagata, ko e ha kua nakai maeke ia ia ke fakatonu mai ki a au kua lata ke ta e au e taha toga?

52Ti ne hoko ai, ko au ko Nifai, ne vagahau e au loga e tau mena ke he tau matakainaga haaku kua lahi ni, kua fakagogoa a lautolu mo e nakai maeke a lautolu ke taufetoko mo au, mo e nakai hoko e tau lima ha lautolu ki a au poke piki mai e tau matalima ha lautolu, pihia ke he loga e tau aho. Ha kua matakutaku a lautolu neke fifigo a lautolu ki mua ia au, ha kua malolo lahi pihia e Agaaga he Atua, kua logona e lautolu.

53Ti hoko ai, ne pehe mai e Iki ki a au: Kia fakaloa atu foki e lima haau ke he tau matakinaga haau to nakai fifigo a lautolu ki mua haau, to fakaofo e au a lautolu, kua pihia e Iki, to taute e au pihia, ke iloa e lautolu ko au ko e Iki ha lautolu a Atua.

54Ti ne hoko ai, ne fakaloa atu e au e lima haaku, ke he tau matakainaga haaku mo e ne nakai fifigo a lautolu ki mua ia au; ka e ne lulululu he Iki a lautolu, tuga mo e tau kupu ne vagahau mai e ia.

55Ko e magaaho nai ne pehe a lautolu: Kua iloa mooli e mautolu kua nofo e Iki mo koe, ha kua iloa e mautolu ko e mana he Iki ne vivivivi ai a mautolu. Ti ne veveli hifo a lautolu ki mua haaku mo e teitei ke hufeilo ki a au, ka e nakai manako au ke pihia a lautolu, ti pehe atu au ki a lautolu: Ko au ko e matakainaga ha mutolu; hanai, ko e tehina ha mutolu ko e mena ia kia hufeilo ke he Iki ko e Atua haia ha mutolu; mo e fakalilifu ke he matua taane mo e matua fifine ha mutolu kia loga ai ha mutolu a tau aho ke he motu ka foaki atu he Iki ko e Atua ha mutolu ki a mutolu.