1Ne hoko ai, ne vagahau au ke he tau matakainaga haaku, ne pehe atu: Kia o hake a tautolu ki Ierusalema, kia tumau a tautolu ke tua mo e omaoma ke he tau poakiaga he Iki; Kitia la, kua mua ue atu e haana malolo ke he lalolagi katoa, ti nakai kia mua e haana malolo ke he malolo a Lapana mo e toko limagofulu, hanai po ke toko hogofulu afe haana?

2Ko e mena ia, kia o hake ai a tautolu. Kua lata ke fakamalolo a tautolu ke tuga a Mose; ha kua vagahau mooli a ia ke he Tahi Kua ti vevehe ua ai ke he tau faahi, ti o mai ai e tau mamatua taane ha tautolu mai he paeaaga ke fenoga ai ke he hala momo, ne mumui atu e tau kau a Farao mo e tomo ai ke he Tahi Kula.

3Kitia la, kua iloa tuai e mua kua mooli e tau mena nai, mo e iloa foki e mua kua vagahau mai e agelu ki a mua; ko e ha kua mahalohalo ai a mua? Kua lata ke o hake a tautolu; ha kua maeke he Iki ke leveki a tautolu, tuga ne leveki e ia e tau mamatua ha tautolu. To fakaoti e ia a Lapana tuga ne taute e ia ke he tau Aikupito.

4Ko e magaaho ne vagahau ai e au e tau kupu nai, ne ita a laua ki a au, mo e feguigui foki; ka e pete ia ne mumui mai e tau matakainaga haaku ki a au a to hohoko atu a mautolu ki fafo he pa a Ierusalema.

5Ti kua pouli a ti tala age au ke fakamumuli a lautolu i tua he pa. Ka mole ia he fakamumuli a lautolu, ne totolo atu au ke he maaga mo e hagaao atu ke he fale a Lapana.

6Ne takitaki he Agaaga au ha kua nakai iloa tuai e au e tau mena ke taute.

7Pete ia, ne fina atu au mo e tata atu ke he fale ha Lapana, ti kitia e au e taha tagata ne kua tokaveli ke he kelekele ki mua ia au, ha kua konahia a ia ke he uaina.

8Ne hoko atu au ki a ia, mo e iloa ai ko Lapana haia.

9Ne kitia e au e pelu haana, ti aaki e au e pelu haana mai he faga he pelu; ne kitia e au ko e kakau he pelu kua talaga aki e auro hokoia kua mua he mitaki foki, ko e lapa he pelu kua talaga ia mai he taha lapatoa uho.

10Ne hoko ai, ne pehe mai e Agaaga ki a au ke tamate e au a Lapana; ka e pehe e loto haaku: Kua nakai la kelipopo e au ha tagata. Ti memege ai au kua nakai manako au ke tamate a ia.

11Ti pehe mai foki e Agaaga ki a au, kitia la ne ta mai he iki a ia ke he tau lima haau. Hanai, kua iloa foki e au ne kumi a ia ke uta kehe e moui haaku; hanai, ne nakai talia e ia e tau poakiaga he Iki, mo e kaiha foki e ia e tau koloa ha mautolu.

12Ne hoko ai, ne liu pehe mai e Agaaga ki a au: Kia tamate a e koe a ia ha kua tuku atu he Iki a ia ke he tau lima haau.

13Kitia la, kua tamate he Iki e tau tagata kelea ke maeke ai ke fakahoko e haana tau gahua tututonu. Kua lata ni ke mate e tagata tokotaha ka e nakai tolomuli e kautu mo e mamate ai ha ko e nakai tua.

14Ko e magaaho nai, ne logona e au ko Nifai e tau kupu nai, ne manatu e au e tau kupu nai he Iki ki a au he magaaho ne ha ha i ai au he tutakale, ne pehe mai, ka omaoma he tau fanau haau e tau poakiaga haaku to momoui monuina a lautolu ke he fonua he maveheaga.

15Hanai, kua manatu foki au to nakai maeke a lautolu ke amaoma e tau poakiaga he Iki mo e tau fakatufono ha Mose, kaeke kua nakai moua e lautolu e tau fakatufono ia.

16Ti iloa foki e au kua tohia e tau fakatufono ha Mose ke he tau lapa maka veo.

17Ne iloa foki e au kua tuku mai he Iki a Lapana ke he tau lima haaku ke maeke ai ia au ke moua e tau talahauaga kua ha ha i ai ke he tau lapa maka veo tuga ne poaki mai he Iki.

18Ko e mena ia, ne omaoma ai au ke he leo he Agaaga, ne totō e au e tau lau ulu a Lapana mo e hio e au e ulu haana ke he pelu ni haana.

19Ka mole ia he hio e au e ulu haana, ne akiaki e au e tau tapulu ha Lapana mo e tui ai e au; hanai ko e tau mena oti, mo e pipi e au e papatau haana ke he tino haaku.

20Kua mole e tau mena nai ti fina atu au ke he fale tanaki tupe ha Lapana. Ne hoko atu au ke he fale tanaki tupe ha Lapana, kitia la, ne kitia e au e fekafekau ha Lapana ne toka ai e tau ki ke he fale tanaki tupe haana. Ne fifitaki e au e leo ha Lapana mo e poaki atu au ki a ia ke o a maua ke he fale tanaki tupe.

21Ne manatu a ia ko au ko e haana a Iki ko Lapana ha kua kitia e ia e tau tapulu, mo e pelu kua pipi ke he pula haaku.

22Ne vagahau a ia ki a au ke he tau patu ha Iuta, ha kua iloa e ia ne fina atu e iki haana, ko Lapana, mo e api mo lautolu he po ia.

23Ne vagahau au ki a ia tuga a Lapana.

24Ne tala age au ki a ia kua lata ke uta e au e tau lapa maka veo; ke ta atu e au ke he haaku a lafu taokete kua nonofo mo e leo ki a au mai i tua he pa.

25Ne ui au ki a ia ke mui mai ki a au.

26Kua manatu a ia kua vagahau au hagaao ke he tau matakainaga he Lotu, mo e ko au mooli ko Lapana, ko e mena ia, ne mui mai ai a ia ki a au.

27Ne vagahau tumau a ia ki a au hagaao ke he tau patu a Iuta ha magaaho ne o ai a maua hagaao atu ke he tau matakainaga haaku i tua he pa.

28Ne hoko ai, ko e magaaho ne kitia e Lamana a au a ti matakutaku a ia, pihia mo Lemuela, mo Samu foki. ti fehola a lautolu mai i mua haaku ha kua manatu a lautolu ko au, ko Lapana, kua tamate e ia a au ti kumi foki a ia ke tamate foki a lautolu.

29Ne hoko ai, ne ui atu au ki a lautolu, ti logona e lautolu e leo haaku, ti nakai fehola foki a lautolu mai i mua haaku.

30Ne hoko ai, ko e magaaho ne kitia he fefafekau ha Lapana e tau matakainaga haaku ne vivivivi a ia, mo e amanaki ke hola atu a ia mai i mua haaku mo e liu atu ki Ierusalema.

31Ko au ko Nifai, kua tino lahi, kua malolo lahi foki mai he Iki, ko e mena ia, ne taofi e au e fekafekau ha Lapana ke nakai maeke ia ia ke hola.

32Ne hoko ai, ne vagahau au ki a ia, ka eke ke fanogonogo a ia ke he tau kupu haaku, mo e tuga kua moui e Iki, mo e tuga foki kua moui au to fakahao e mautolu e moui haana.

33Ne vagahau au ki a ia, mo e omonuo ke aua neke matakutaku; mo e kua lata ia ia ke eke mo tagata ataina ke o atu a ia mo mautolu ke he tutakale.

34Ne vagahau pehe au ki a ia kua pehe age: Ko e finagalo he Iki ki a mautolu ke taute e mena nai. Kua lata nakai ke omaoma fakamakutu e mautolu e tau poakiaga he Iki? Ko e mena ia, kia hau a koe mo e o atu mo mautolu ke he tutakale ke he matua ha mautolu to nofo ai a koe mo mautolu.

35Ti hoko ai, ne mafanatia a Sorama he tau kupu ne vagahau e au. Ko Sorama ko e higoa a ia he fekakekau; ne mavehe ai a ia to o hifo o mautolu ke he tutakale ke he haaku a matua. Ne omonua foki a ia to nonofo a ia mo mautolu mai he magaaho na.

36Ne manako a mautolu ke nofo a ia mo mautolu ha ko e mena nai, ke aua ia neke iloa he tau Iutaia e fenoga ha mautolu ke he tutakale, neke mumui mai a lautolu mo e fakaotioti a mautolu.

37Ti hoko ai, ko e magaaho ne omonuo ai a Sorama ki a mautolu, ne oti ai ha mautolu a matakutaku ha ko ia.

38Ti hoko ai, ne uta ai e mautolu e tau lapa maka veo, mo e fekafekau a Lapana, mo e o kehe ai ke he tutakale, mo e fenoga atu ai ke he fale ie he matua taane ha mautolu.