1Ko e magaaho nai ma haku matakainaga fakahelehele na e, kua totou e au e tau mena nai, kia iloa ai e mutolu e tau maveheaga he Iki ne mavehe e ia mo e tau magafaoa oti a Isaraela.

2Ne kua vagahau a ia ke he tau tagata Iutaia, mai he gutu he haana a tau perofeta tapu, mai he kamataaga ke hoko mai, ke he taha atuhau ke he taha atuhau, a to hoko mai e magaaho kia liu fakatu a lautolu ke he lotu mooli mo e fuifui he Atua; ko e magaaho ia to fakamaopoopo mai a lautolu ki kaina ke he tau fonua ha lautolu he maveheaga mo e nonofo mau ai ke he ha lautolu a tau fonua oti he maveheaga.

3Kitia la ma haku matakainaga fakahelehele, kua vagahau atu e au ki a mutolu e tau mena nai kia fiafia a mutolu, mo e haga ki luga ha mutolu a tau ulu tukulagi, ha ko e tau monuina ka fakamonuina mai he Iki ko e Atua ha mutolu a tau fanau.

4He iloa e au kua lahi e kumikumi ha mutolu, he tokologa ia mutolu, ke iloa e tau mena ka hohoko; ko e mena ia kua iloa e au, kua iloa e mutolu ko e ha talu a tau kakano to popo ia mo e mamate; ka e pete ia to kitia e lautolu e Atua ke he tau tino ha lautolu.

5Hanai, kua iloa e au kua iloa e mutolu to fakakite a ia ke he tino ki a lautolu i Ierusalema, ko e mena ne o mai ai a tautolu; ha kua lata ni ke ha ha i ai ia lautolu; ha kua tonuhia ke he Tufuga ne mua ke tokanoa e ia a ia ke fekafekau ke he tau tagata ke he tino mo e mate ai ma e tau tagata oti kana, kia maeke ai he tau tagata oti ke fekafekau ki a ia.

6To hoko ai e mate ke he tau tagata oti, kia fakakatoatoa e fakatokaaga he fakaalofa noa he Tufuga ne mua, kua lata ni ke ha ha i ai e malolo he liu tu mai, ti ko e liu tu mai kua lata ke moua he tau tagata ha ko e veliaga; ko e veliaga, kakano ko e holifono; ha kua veli e tagata kua vega kehe a ia mai i mua he Iki.

7Ko e mena ia, kua lata ni ke ha ha i ai e lukutotoaga kua nakai fai fakaotiaga — kaeke kua nakai fai lukutotoaga ko e mena popo kua nakai maeke ke tuku ai e nakai popo. Ko e mena ia, ko e fakafiliaga fakamua ne hoko mai ke he tagata kua lata ni ke nakai fai fakaotiaga. Kaeke ke pihia, ko e tino nai kua tuku ai ke popo mo e mavalavala ke he kelekele, mo e nakai maeke ke liu matike ai.

8Oi ko e pulotu he Atua, haana a fakaalofa noa! He kitia la, kaeke ke nakai liu tu mai e tino ko e ha talu tau agaaga to fekafekau atu ke he agelu ia ne to mai i mua he Atua Tukulagi, ti eke ai mo tiapolo, mo e nakai liu tu mai.

9Ti ko e ha talu a tau agaaga to tuga a ia, kua eke a tautolu mo tiapolo, kua vega kehe mai i mua he ha tautolu a Atua, mo e nofo mau ai mo e matua he pikopiko, ke he fakaatukehe, ke tuga a ia; hanai, ki a ia ne fakahehe ha lautolu a tau matua uluaki, ko ia ne fakafaliu e ia a ia ke tuga e agelu he maama, mo e fakalagalaga e tau fanau he tau tagata ke taute ai e tau kau fakagalogalo ke kelipopo tagata mo e loga he tau lagatau fufu pouli uli.

10Oi kua lahi ni e mitaki he ha tautolu a Atua, ko ia ne tauteute e puhala ke hao ai a tautolu mai he lima he manu kelea nai; hanai, ko e manu kelea ia, ko e mate mo teoli, ne fakahigoa e au ko e mate ke he tino, mo e mate foki ke he agaaga.

11Ha ko e puhala he fakahaoaga mai he ha tautolu a Atua, ko e Tama Tapu a Isaraela, ko e mate nai, ne vagahau atu ai e au, ko e mate ke he tino nai, to liuaki mai a lautolu ne mamate; ko e mate ke he tukuaga a ia.

12Ti ko e mate nai ne vagahau atu e au, ko e mate ke he agaaga, to liuaki mai a lautolu ne mamate; ko e mate ke he agaaga ko teoli haia; ko e mena ia, ko e mate mo teoli to liuaki mai a lautolu ne mamate, to liuaki mai foki e teoli e tau agaaga ne lili ai, ko e tukuaga foki to liuaki mai e tau tino ne lili ai, ti ko e tau tino mo e tau agaaga he tau tagata to liu fakalataha ai e taha ke he taha, ti ko e malolo ia he liu tu mai, mai ia he Tama Tapu a Isaraela.

13Oi, kua mua atu ni e fakatokaaga he ha tautolu a Atua! Ha kua ha ha ke he taha lima e parataiso he Atua ke liuaki mai e tau agaaga ne tututonu; ti ko e agaaga mo e tino kua liu ke fakalataha ai, ti ko e tau tagata oti kua nakai maeke ke popo mo e tukulagi ai ni, ko e tau agaaga kua momoui, mo e katoatoa ai e tau loto matala ke tuga a tautolu ke he tino nai, kaeke ni kua katoatoa ha tautolu a loto matala.

14Ko e mena ia, to iloa foki e tautolu ha tautolu a tau mahani kelea oti, mo e ha tautolu a tau mahani ne nakai mea, mo e nakai fai tapulu; ti ko lautolu ne tututonu to iloa foki e lautolu ha lautolu a fiafia, mo e tututonu, kua — tapulu ai ke he mea, hanai, kua peleue ai ke he totutonu.

15To hoko ai, ko e magaaho ka mole ai he tau tagata oti e mate fakamua mo e hoko atu ke he moui, pihia ke hoko atu ke he tau tino nakai mamate, to tutu ai foki ki mua he nofoa fakafili he Tama Tapu a Isaraela; ti hoko agataha e fakafiliaga ti fakafili ai a lautolu ke he fakafiliaga tapu he Atua.

16Ti tuga ni he iloa ai kua moui e Iki, ha kua pehe mai e Iki ko e Atua, ti ko e haana a kupu tukulagi, to nakai mole atu ia, ko lautolu kua tututonu to tututonu agaia ni, ti ko lautolu ne nonofo ke he tau mahani kiva to tumau agaia ke kiva, ko e mena ia, ko lautolu ne nonofo mo e kiva ko e tiapolo a ia mo e haana a tau agelu; to o atu a lautolu tukulagi ke he afi; kua tauteute ma lautolu; ti ko e ha lautolu a matematekelea kua tuga ni ke he afi mo e taio kua lupa hake tukulagi mo e nakai fai fakaotiaga.

17Oi ke he lahi ue atu mo e fakafiliaga he ha tautolu a Atua! Ha kua fakahoko e ia haana a tau talahauaga oti ti kua fakakite atu he haana a gutu ti ko e haana a fakatufono to fakakatoatoa ni.

18Ka e kitia la, ko e tau tututonu, ko e tau tagata tapu he Tama Tapu a Isaraela, ko lautolu ia ne fakauka ke he tau akau fakalava he lalolagi, mo e fakavihia ke he ma ha ko e mena ia, to moua e lautolu e kautu he Atua, ne tauteute ma lautolu tali mai he fakaveaga he lalolagi, to katoatoa tukulagi ha lautolu a fiafia.

19Oi ke he lahi ue atu he fakaalofa noa he ha tautolu a Atua ko e Tama Tapu a Isaraela. Ha kua fakahao e ia haana a tau tagata tapu mai he manu kelea ia ko e tiapolo, ko e mate, mo teoli, mo e afi mo e taio ko e matematekelea kua nakai fai fakaotiaga.

20Oi ke he lahi ue atu, mo e fakatapuina he ha tautolu a Atua! Ha kua iloa e ia e tau mena oti, kua nakai ha ha i ai ha mena ne nakai iloa e ia.

21Ti ne hifo mai a ia ke he lalolagi ke hao ai e tau tagata kaeke ke fanogonogo a lautolu ke he haana a leo; he kitia la, ne mamahi a ia ma e tau tagata oti, hanai, ko e tau mamahi he tau tagata momoui oti kana, tau taane fakalataha mo e tau fifine mo e tau fanau, ko lautolu oti mai he magafaoa a Atamu.

22Kua fakauka a ia ke mamahi pehe nai ke hoko e tau tagata oti ke liu tutu mai, kia tutu oti a lautolu ki mua haana ke he aho lahi he fakafiliaga.

23Ti poaki a ia ke he tau tagata oti kua fakatokihala mo e papatiso ke he haana a higoa, mo e tua fakamooli ke he Tama Tapu a Isaraela, ka nakai pihia to nakai hao atu a lautolu ke he kautu he Atua.

24Ti kaeke ke nakai fakatokihala a lautolu mo e tua ke he haana a higoa, mo e papatiso ke he haana a higoa mo e fakauka ke he fakahikuaga, to mamate a lautolu; ha kua vagahau mai pihia e Iki ko e Atua ko e Tama Tapu a Isaraela.

25Ko e mena ia, ne kua tuku mai e ia e fakatufono; ti kaeke ne nakai fai fakatufono ne tuku mai, kua nakai fai fakahala; ti kaeke ne nakai fai fakahala, ne nakai fai hokotaki ti a ne nakai fai hokotaki ko e fakalofa noa he Tama Tapu a Isaraela to moua e ia a lautolu, ha ko e haana a lukutoto ma lautolu; ha ko e haana a malolo; a ti fakahao ai a lautolu.

26Ha ko e lukutoto ke taui aki e malolo he fakafiliaga ki a lautolu oti ne nakai moua e fakatufono, kia hao mai a lautolu mai he manu kelea na, ko e mate mo teoli, mo e tiapolo, mo e loloto he afi mo e taio, ko e matematekelea nakai fai fakahikuaga; ti liuaki a lautolu ke he Atua ne foaki age e moui ma lautolu, ko ia ko e Tama Tapu a Isaraela.

27Ka e oi te ki a ia ne moua e fakatufono, hanai, ne ha ha i ai e tau poakiaga oti he Atua, ke tuga a tautolu, ti holifono e tau poakiaga ia, mo e moumou e tau aho ke gahua ai, kua hagahagakelea ha tautolu a tuaga.

28Oi ke he tau lagatau he patu kelea! Oi ke he tau mena nakai aoga, mo e ukiuki, mo e tau mena fakagoagoa he tau tagata! Ha ko e mena ka fakaako a lautolu ti manatu a lautolu kua loto matala a lautolu, ti nakai fanogonogo atu a lautolu ke he tau hatakiaga he Atua, ka kua tuku kehe e lautolu, he manatu a lautolu kua iloa e lautolu, ko e mena ia, ko e ha lautolu a iloilo ko e goagoa a ia ti nakai moua ai e lautolu ha mena. Ti to mamate a lautolu.

29Ka ko e ako mena ko e mena mitaki lahi kaeke ke fanogonogo ke he tau hatakiaga he Atua.

30Ka e oi te ki a lautolu ne muhu koloa, ko e muhu koloa ia ke he tau mena he lalolagi. Ha kua muhu koloa a lautolu ti fakavihia e lautolu a lautolu ne mativa, mo e eke fakakelea a lautolu ne fakatokolalo, ti ko e ha lautolu a tau loto kua toka ke he ha lautolu a tau koloa uho; ko e mena ia kua Atua a lautolu ke he tau koloa uho. Ti kitia la, to mamate foki a lautolu fakalataha mo e ha lautolu a tau koloa.

31Ti oi te ke he tau teliga tuli ne nakai logona; ha ko e mena to mamate a lautolu.

32Oi te ke he tau mata pouli ne nakai kitia; ha ko e mena to mamate foki a lautolu.

33Oi te ki a lautolu ne nakai peritome ke he ha lautolu a tau loto, ha ko e mena kaeke ke iloa e lautolu ha lautolu a tau mena kelea to keli aki a lautolu ke he aho fakahiku.

34Oi te ke he tagata fati piko, ha ko e mena to liti hifo a ia ki teoli.

35Oi te ke he tagata kelipopo tagata pauaki, to mate a ia.

36Oi te ki a lautolu ne mahani feuaki ha ko e mena to tolo hifo a lautolu ki teoli.

37Hanai, oi te ki a lautolu ne hufeilo ke he tau tupua kua ta, ha ko e tiapolo he tau tiapolo kua fiafia lahi ki a lautolu ia.

38Ti oi te ki a lautolu oti ne mamate mo e ha lautolu a tau agahala; ha ko e mena to liliu atu a lautolu ke he Atua, mo e kitia ke he haana a fofoga, mo e tumau ni ke he ha lautolu a tau agahala.

39Oi ma haku tau matakainaga fakahelehele na e, kia manatu e kelea he holifono ke he Atua Tapu, mo e kelea foki he mui atu ke he tau fakahekeheke he patu ta lagatau. Manatu ka toka e loto ke he lalolagi ko e mate a ia, ko e toka e loto ke he tau mena he agaaga ko e moui tukulagi a ia.

40Oi ma haku tau matakainaga fakahelehele, kia fanogonogo mai ke he haaku a tau kupu. Manatu ke he lahi ue atu he Tama Tapu a Isaraela. Aua neke pehe kua vagahau vale atu au ki a mutolu; he kaeke ke pihia a mutolu, kua amuamu a mutolu ke he mena mooli, ha kua vagahau e au e tau kupu he ha mutolu a Tufuga. Kua iloa e au kua uka e tau kupu mooli ke he tau tagata oti kua nakai mahani mea; ka kua nakai matakutaku a lautolu ne tututonu, ha kua fiafia a lautolu ke he mena mooli ti nakai malutu a lautolu ia.

41Oi ma haku tau matakainaga fakahelehele na e, kia o mai ke he Iki, ko ia ne Tapu. Manatu ko e tututonu e haana a tau puhala. Kitia la, kua pukilu e puhala ma e tagata, ka kua tu mo e hako ki mua haana, ti ko ia e Tama Tapu a Isaraela ne leoleo e gutu pa; ti nakai fakagahua e ia ha tagata gahua ke he mena ia; ti nakai fai puhala kehe foki ko e gutu pa ia ni; ha kua nakai maeke ke fakavai ki a ia, ha ko e haana a higoa ko e Iki ko e Atua.

42Ti ko hai ni ke tukituki atu, to hafagi atu ki a ia; ti ko e tau loto matala mo e tau ako mena, mo lautolu ne muhu koloa, ne kua hakehake ha ko e tau fakaakoaga, mo e tau iloilo, mo e tau koloa — hanai, ko lautolu ia kua vihiatia e ia; kaeke ke nakai tuku kehe e lautolu e tau mena na mo e manatu e lautolu ko e tau goagoa a lautolu ki mua he Atua, mo e o he toka ke he mahani fakatokolalo, to nakai hafagi atu e ia ki a lautolu na.

43Ka ko e tau mena ha lautolu ne lotomatala mo lautolu ne tokaga to fufu tukulagi mai ia lautolu na — hanai, ko e fiafiaaga ne tauteute ai ma e tau tagata tapu.

44Oi ma haku tau matakainaga fakahelehele na e, kia manatu haaku a tau kupu. Kitia la, kua akiaki e au haaku a tau tapulu mo e lulululu ai ki mua ha mutolu; kua liogi au ke he Atua he haaku a fakamouiaga kia kikite fakalahi mai a ia ki a au; ko e mena ia ki a iloa ai e mutolu ke he aho fakahiku, ka fakafili ai e tau gahua he tau tagata oti kana, kua fakamooli he Atua a au ne lulu kehe e au ha mutolu a tau mahani kelea mai he haaku a agaaga, mo e tu au mo e kikila ki mua haana, mo e uta kehe ia au ha mutolu a toto.

45Oi ma haku tau matakainaga na e, kia haga kehe mai he ha mutolu a tau hala; kia lulu kehe e tau filifili haana ne lili mauokafua ai a mutolu; kia o mai a ke he Atua ha ko ia ko e maka he ha mutolu a fakamouiaga.

46Kia tauteute ha mutolu a tau agaaga ma e aho fulufuluola na ka tuku atu ai e fakafiliaga ki a lautolu ne tututonu, ko e aho ia he fakafiliaga, ke aua neke memege a mutolu ha ko e matakutaku lahi, ke aua neke manatu oti e mutolu e tau agahala ha mutolu, mo e uka ke pehe atu Tapu, Tapu e haau a tau fakafiliaga ma Iki na e, ko e Atua Mua Ue Atu — ka kua iloa e au haaku a tau agahala; ne holifono au, ti kua hala ai au; ti kua moua ai au he tiapolo, ti kua nofo ai au ke he haana a matematekelea.

47Ka e kitia la, ma haku tau matakainaga, kua tonuhia ni ke fafagu e au a mutolu ke he kelea mooli he tau mena nai? Liga fakalaga nakai e au a mutolu a ne mai kua mea ha mutolu a tau manamanatuaga? Liga fakamaama nakai e au ki a mutolu tuga mo e maamaaga he mena mooli, a ne mai kua hao a mutolu mai he hala?

48Kitia la, a ne tapu a mutolu, a kua vagahau atu au ke he tau mena fakatapuina; ha kua nakai tapu a mutolu ti ono mai a mutolu ki a au ko e faiaoga ha mutolu, kua tonuhia ni ki a au ke fakaako atu e fakahikuaga he agahala.

49Kitia la, kua vihiatia lahi e haaku a agaaga ke he agahala, ka kua olioli e haaku a agaaga ke he tututonu; to fakaheke ai ke he higoa tapu he haaku a Atua.

50Kia o mai a ma haku tau matakainaga ko mutolu oti kua fia inu, kia o mai a mutolu ke he tau vai; ti ko ia kua nakai fai tupe, kia hau a ke fakatau mo e kai ai; hanai, kia o mai a ke fakatau e uaina mo e huhu, nakai fai tupe mo e nakai fai fakatau ke lata ai.

51Ko e mena ia, aua neke fakamole e tau tupe ke he tau mena kua nakai aoga, po ke ha mutolu a tau gahua ke he tau mena nakai fai mafola ai. Ki a fanogonogo fakamakutu mai ki a au, mo e manatu e tau kupu ne kua vagahau atu e au; ti o mai a ke he Tama Tapu a Isaraela, mo e kai fiafia ai ke he tau mena kua nakai popo, po ke kelea, kia gako mo e fiafia ai ha mutolu a tau agaaga.

52Kitia la, ma haku tau matakainaga fakahelehele na e, kia manatu e tau kupu he ha mutolu a Atua; kia liogi mau atu ki a ia he tau aho taki taha, mo e fakaaue atu ke he haana a higoa tapu ke he po. Kia olioli ha mutolu a tau loto.

53ti kitia la, kua lahi ni e tau mavehega he Iki, ti lahi foki e haana a fakatokolalo ke he tau fanau he tau tagata; ha ko e haana a lahi ue atu, haana a fakaalofa noa, ne kua mavehe mai a ia ki a tautolu to nakai uta kehe oti ha tautolu a tau fanau, mai he tino nai, ka to leveki e ia a lautolu; ti ko e tau atuhau a mui to eke a lautolu mo la tututonu mai he magafaoa a Isaraela.

54Ti ko e magaaho nai ma haaku tau matakainaga, to vagahau atu foki au ki a mutolu; ke he aho a pogipogi to fakakite atu e au e haaku a tau kupu ne toe. Amene.