1Ti ko au ko Nifai kua vagahau au ke he tau perofetaaga ne vagahau he haaku a matua taane, hagaao ki a Iosefa ne fakafua atu ki Aikupito.

2He kitia la ne perofeta mooli a ia hagaao ke he haana a tau fanau oti. Ti ko e tau perofetaaga ne tohi e ia kua nakai fai ne mua atu he tau mena ia.

3Ko e mena ia, kua mole atu e vagahau he matua taane haaku hagaao ia ke he tau perofetaaga ha Iosefa, ne ui atu a ia ke he tau fanau a Lamana, ko e haana a tau fanau taane mo e tau fanau fifine, mo e tala age a ia ki a lautolu pehe: Kitia la ma haaku tau fanau taane, mo e haaku tau fanau fifine; ko e tau fnau taane mo e tau fnau fifine he haaku a tama uluaki, kua manako au ke fanogonogo mai a mutolu ke he haaku a tau kupu.

4Ha kua tala mai e Iki ko e Atua pehe; Kaeke ke omaoma a mutolu ke he haaku a tau poakiaga to muhu mena a mutolu ke he motu nai; ti kaeke ke nakai omaoma a mutolu ke he haaku a tau poakiaga to uta kehe a mutolu mai i mua haaku.

5Ka e kitia la, ma haku tau fanau taane mo e haku tau fanau fifine, kua nakai maeke au ke hifo ke he haaku a tukuaga ka e nakai toka e au ha monuina ma mutolu; Ha ko e mena kitia la, kaeke ke tutupu hake a mutolu he puhala kua lata, to nakai maeke ke o kehe a mutolu mai he tau mena ia.

6Ko e mena ia, kaeke ke malaia a mutolu, kitia la, kua toka e au haaku a fakamonuinaaga mo mutolu, ke uta kehe e malaia ia mo e tuku atu ai ki luga he tau ulu he tau mamatua ha mutolu.

7Ko e mena ia, ha ko e haaku a tau fakamonuinaaga to nakai toka he Iki ko e Atua a mutolu ke mamate; ko e mena ia, to fakaalofa a ia ki a mutolu mo e tau fanau ha mutolu tukulagi.

8Ne hoko ai, ko e magaaho ne fakaoti ai he matua taane haaku e haana a tau vagahau ke he tau fanau taane mo e tau fanau fifine a Lamana, ne ui e ia e tau fanau taane mo e tau fanau fifine a Lemuela ke o mai ki mua haana.

9Ti ne vagahau a ia ki a lautolu kua pehe age: Kitia la, ko e haaku a tau fanau taane mo e haaku a tau fnau fifine; ko e fanau he haaku a tama taane ke ua aki; kitia la kua toka e au ma mutolu e fakamonuinaaga tuga ni e fakamonuinaaga ne tuku atu e au ke he tau fanau a Lamana; ko e mena ia, to nakai fakaotioti a mutolu; ka ko e fakahiku ni to fakamonuina e tau fanau ha mutolu.

10Ti hoko ai, mole atu e vagahau he matua taane haaku ki lautolu, kitia la, ne vagahau a ia ke he tau fanau taane a Isamaeli, hanai, pihia ki a lautolu oti he haana a fale.

11Mole atu e haana a vagahau ki a lautolu, ne vagahau a ia ki a Samu pehe; Uhoaki a koe mo e haau a tau fanau; ha ko e mena to moua e koe e motu nai tuga e taokete haau ko Nifai. Ti totou ai e haau a tau fanau fakalataha mo e haana a tau fanau to tatai a koe mo e haau a taokete, ti to monuina a koe ke he haau a tau aho.

12Ne hoko ai, mole atu he vagahau e matua taane haaku, ko Lihai ke he haana a magafaoa katoa, he fale, tuga mo e tau manatu kua ha ha i ai ke he haana a loto, mo e Agaaga he Iki kua ha ha i ai ki a ia, kua fuakau a ia. Ne hoko ai, ne mate a ia mo e tanu ai.

13Ne hoko ai, ne gahoa e tau aho he mate a ia, ti ita agataha a Lamana mo Lemuela mo e tau fanau taane a Isamaeli ki a au ha ko e tau tomatomaaga he Iki.

14Ha ko au ko Nifai, kua uka au ke vagahau ki a lautolu hagaao ia ke he haana a tau kupu; ha kua loga e tau mena ne vagahau e au ki a lautolu, ti pihia mo e haaku a matua taane to mate a ia; loga he tau talahauaga ia kua tohia ai he falu a lapa maka haaku, ti loga e tau mena ne tutupu i tuai kua fakamau ai ke he falu he tau lapa maka haaku.

15Ti ko e tau mena nai ne tohi e au ko e tau mena mai he haaku a agaaga e tau mena ia, mo e loga e tau kupu tohi ne tohia ai he tau lapa maka veo. Ha kua olioli haaku a agaaga ke he tau kupu tohi, mo e manamanatu lahi haaku a loto ki ai, mo e tohi ai e au ke fakaako mo e aoga ke he haaku a tau fanau.

16Kitia la, kua fiafia haaku a agaaga ke he tau mena he Iki; mo e manamanatu tumau haaku a loto ke he tau mena he Iki ne kitia mo e logona e au.

17Pete ni ia, kua nakai tumau ke he mitaki he Iki, kua fakakite mai ai ki a au e haana a gahua lafi mo e tau mena ke ofo ai, kua pehe e loto haaku: Oi, ko au ko e tagata kelea! Hanai, kua momoko haaku a loto ha ko e haaku a tino, mo e momoko haaku a agaaga ha ko e haaku a tau mahani kelea.

18Kua puipui ai au, ha ko e tau kamatamata mo e tau hala, kua tauhele mai mau ki a au.

19Ti ka manako au ke kolikoli, kua tagi aue haaku a loto ha ko e haaku a tau hala: pete ia, kua iloa e au a ia ke falanaki au ki ai.

20Ko e Atua ko e haaku a lagomatai, ne takitaki e ia a au mai he haaku a tau matematekelea he tutakale; ti ne leveki e ia au i luga he moana hokulo.

21Ne fakapuke e ia a au aki e haana fakaalofa, ke hoko ke he fakaotiaga he haaku a tino.

22Ne fakahakuhaku e ia e haaku a tau fi, mo e vivivivi a lautolu ki mua ia au.

23Kitia la kua logona e ia e haaku a tagi ke he aho, mo e foaki mai ai e iloilo ki a au ke he tau fakakiteaga kua kitia e au ke he po.

24Ti ko e aho kua fakamalolo ai au ke liogi ki a ia, Hanai ti fakafano e haaku a leo ki a ia i luga; mo e o hifo mai ai e tau agelu mo e fakaako ki a au.

25Ti, ki luga he tau pekau he haana a Agaaga kua uta ai e haaku a tino ki luga he tau tapunu mouga. Ti kitia ai he tau mata haaku e tau mena lalahi, hanai ko e tau mena kua mua atu ke he tagata; ko e mena ia ne tala mai ai ki a au ke aua neke tohi ai e tau mena na.

26Oi, kaeke ne kua kitia e au e tau mena lalahi, ti kaeke kua fakatokolalo e Iki ke he tau fanau he tau tagata, kua aahi e ia e tau tagata ke he fakaalofa noa, ko e ha kia kua tagi ai haaku a loto, mo e nofo loa ai haaku a agaaga ke he pahua he momoko, mo e otioti ai haaku tino, ti lolelole ai haku malolo ha ko e haaku a tau mamahi.

27Ti ko e ha kia kua kaumahala ai au ke he hala ha ko e haaku a tino? Hanai, ko e ha kua mahala ai au ke he tau kamatamata, ne tuku e ia kua kelea ke he loto haaku ke moumou ai e haaku a mafola, mo e fakamamahi ai e haaku a agaaga? Ko e ha kua ita ai au ha ko e haaku a fi?

28Kia ala mai a ma haaku a agaaga aua neke pehia kehe hala, kia kolikoli a ma haku loto ti aua neke toka he mena ke nofo ai e fi he haaku agaaga.

29Aua neke ita foki ha ko e haaku a tau fi. Aua neke fakalolelole e haaku a malolo ha ko e haaku a tau matematekelea.

30Kia kolikoli a haaku loto, mo e tagi atu ke he Iki, mo e pehe: Ma Iki na e, kua fakaheke au ki a koe ke he tukulagi, hanai, kua fiafia e haaku e agaaga ki a koe, ko e haaku a Atua ko e maka he haaku a fakamouiaga.

31Ma Iki na e, to fakamoui nakai e koe e haaku a agaaga? To laveaki nakai e koe au mai he tau lima he haaku a tau fi? To maeke nakai ia koe, ke taute au ke vivivivi au ka kitia e au e tau mena kelea?

32Kia pa tumau e tau gutuhala i teoli i mua haaku, ha ko e haaku a loto kua malipilipi ti fakatokolalo oki mo e haaku a agaaga! Oi ma Iki na e, kia aua neke pa mai e gutuhala he tututonu ki a au, ke fano ai au he puhala tokolalo ke pu atu ke he puhala tonu.

33Ma Iki na e, kia fakatapulu mai e koe au ke he tapulu tututonu haau! Ma iki na e, kia taute e koe e puhala ke maeke ai au ke hao mai he haaku a tau fi! Kia fakahako e koe e puhala ki mua haaku. Kia aua neke fakaalaia e haaku a puhala, ka kia fakaata e koe, mo e aua neke pa ai kia taute pihia ke he haaku a tau fi.

34Ma Iki na e, kua tua ni au ki a koe, ti to tua ni au ki a koe ke he tukulagi.

35Hanai, kua iloa e au to foaki fakalahi he Atua ki a ia kua ole. Hanai, to foaki mai he Atua ki a au, kaeke kua falanaki fakamooli; ko e mena ia to fakaheke atu ai haaku leo ki a koe; Hanai, to tagi atu au ki a koe, ko e haaku a Atua, ko e maka haia he haaku a tututonu. Kitia la, to fakaheke tukulagi e haaku a leo ki a koe, ko e haaku a maka mo e haaku a Atua tukulagi. Amene.