1Ti ko au, ko Nifai, kua fakaoti ha ne fai e haaku a tau perofetaaga ki a mutolu ko e haaku a tau matakainaga fakahelehele. Kua maeke ni ia au ke tohi e gahoa he tau mena, kua iloa e au to hoko mai; kua maeke ni ia au ke tohi e falu a tau kupu gahoa mai he haaku a tehina, ko Iakopo.

2Ko e mena ia, kua lata tuai e tau kupu ne tohi e au, ko e falu a tau kupu gahoa ni kua manako au ke vagahau atu mai he tau fakaakoaga ha Keriso; ko e mena ia, to vagahau fakamitaki atu e au ki a mutolu, ke mukamuka mo e maama tuga e haaku a tau perofetaaga.

3Ha kua fiafia e agaaga haaku ke he tau mena kua mitaki mo e mukamuka ke maama; ha kua phia ni e puhala kua taute he iki ko e Atua haana gahua ke he tau fanau he tau tagata. Ha kua foaki he Iki ko e Atua e maama ke maama ai; ha kua vagahau atu a ia ke he tau tagata ke he vagahau kua maama ki a lautolu.

4Ko e mena ia, kua manako au ke manatu e mutolu ne vagahau ai au ke he taha perofeta, ne fakakite he Iki ki a au, ke papatiso e ia e Mamoe he Atua, ke uta kehe ai e tau hala he lalolagi.

5Ti ko e hanai, kaeke kua lata ke papatiso ke he vai e mamoe he Atua kua tapu, ke fakakatoatoa ai e tau mahani tututonu, Oi ti kua mua atu e mahuiga ki a tautolu ke papatiso ha kua nakai tapu a tautolu, hanai kia papatiso kehe vai.

6Ti, kua ole atu au ki a mutolu, ko e haaku a tau matakainaga fakahelehele na e, kua fakakatoatoa kia he Mamoe he Atua e tututonu he magaaho kua papatiso a ia ke he vai?

7Kua iloa nakai e mutolu na tapu a ia? Ka e pete ni kua tapu a ia, kua fakakite atu e ia ke he tau fanau he tau tagata, kua fakatokolalo a ia he tino ki mua he Matua, mo e fakamooli ke he Matua to omaoma e ia e haana a tau poakiaga.

8Ko e mena ia, ka mole atu e papatiso a ia ke he vai kua haele hifo e Agaaga Tapu tuga e lupe, ki luga ia ia.

9Ti fakakite ai foki e ia ke he tau fanau he tau tagata kua hako e puhala mo e lautote e gutuhala, kua lata ke huhu atu ai a lautolu, kua eke a ia mo fakafifitakiaga ma lautolu.

10Ti pehe mai a ia ke he tau fanau he tau tagata: Kia mumui mai ki a au. Ko e mena ia, ma haaku a tau matakainaga fakahelehele na e maeke nakai ia tautolu ke mumui ki a Iesu, ka nakai omaoma ke he tau poakiaga he Matua?

11Ti ne tali mai pehe e Matua: kia tokihala a mutolu, Kia tokihala a mutolu, mo e papatiso ke he higoa he haaku a Tama fakahelehele.

12Ti ne hoko mai foki e leo he Tama ki a au, ne pehe mai: Ko ia kua papaitso ke he higoa haaku, to foaki he Matua e Agaaga Tapu ki a ia, ke tuga a au nai; ko e mena ia, kia mumui mai ki a au, mo e taute e tau mena ne kitia e mutolu kua taute e au.

13Ko e mena ia ma haaku a tau matakainaga fakahelehele na e, kua iloa e au kaeke ke mumui a mutolu ke he Tama, mo e tau loto katoa, mo e nakai mahani fakatupua po ke loto fakavai ki mua he Atua, ka e loto fakamooli ni, mo e fakatokihala mai he ha mutolu a tau hala ke fakamooli ke he Matua kua manako a mutolu ke nikiti ki luga e higoa a Keriso mo e papatiso, hanai, ke mumui ke he Iki ko e Fakamoui ha mutolu, ke he vai, ke tuga mo e haana a kupu, kitia la, to moua e mutolu e Agaaga Tapu; hanai ti hoko mai ai e papatiso ke he afi mo e Agaaga Tapu; to maeke ai a mutolu ke vagahau ke tuga e tau vagahau he tau agelu, ke nava mo e fakaheke ki a ia ko e Tama Tapu a Isaraela.

14Ka e kitia la, ma haaku a tau matakainaga fakahelehele na e, ne hoko mai pehe e leo he Tama ki a au, kua pehe mai: Ka mole he fakatokihala a mutolu mai he tau hala ha mutolu, mo e fakamooli foki ke he Matua kua manako a mutolu ke omaoma ke he tau poakiaga haaku, ke papatiso ke he vai mo e moua e papatisoaga he afi mo e Agaaga Tapu, mo e maeke ke vagahau atu mo e alelo foou, hanai ke tuga mo e gahua he tau agelu, ti ka eke ke mole ia ti fakatikai e mutolu au, kua mitaki ni ia mutolu ke nakai iloa e mutolu au.

15Ti logona e au e taha leo pehe mai he Matua: Hanai, kua mooli mo e tonu e tau kupu he haaku a Fakahele. Ko ia ke fakauka ke hoko atu ke he fakaotiaga ko ia haia ka fakamoui.

16Ti ko e magaaho nai ma haaku tau matakainaga fakahelehele na e, kua iloa e au e mena nai, ka eke kua nakai fakatumau e tagata ke he fakaotiaga ke muitua fakamitaki ke he puhala he Tama he Atua moui, to nakai fakamoui a ia.

17Ko e mena ia, kia taute e mutolu e tau mena ne tala atu e au kua kitia e au ka taute he Iki ko e Fakamoui ha mutolu; ha kua fakakite mai e ia ki a au. Ke iloa ai e mutolu e gutuhala ke huhu atu ki ai. Ha ko e gutuhala ke huhu atu ki ai a mutolu ko e tokihala mo e papatiso ke he vai haia; ka oti ia ti hoko mai ai e fakamagaloaga he tau hala ke he afi mo e Agaaga Tapu.

18Ati o ai a mutolu ke he puhala ko e mena pukilu mo e lautote kua hoko atu ke he moui tukulagi; hanai, ne huhu atu a mutolu ke he gutuhala; mo e taute ai tuga mo e tau poakiaga he Matua mo e Tama; ti moua e mutolu e Agaaga Tapu ko e fakamooliaga haia ke he Matua mo e Tama, ke fakakatoatoa ai he maveheaga ne taute e ia, kaeke ke huhu atu ke he gutuhala to moua ai e mutolu.

19Ko e magaaho ia, ma haaku tau matakainaga fakahelehele na e, ka moua e mutolu e puhala ke he hala pukilu mo e lautote, to huhu atu au ki a mutolu, kua mafola kia e gahua ha mutolu? Kitia la, kua tala atu au ki a mutolu, Nakai; ha kua nakai hohoko ni a mutolu ke he mena nai ha ko e tua ha mutolu ke he kupu ha Keriso, mo e ha mutolu a tua malolo ki ia ia, mo e falanaki atu ke he tau mitaki haana ne mua ue atu ke momoui ai.

20Ko e mena ia, kua lata ke fakatumau fakalahi ki a Keriso, mo e amaamanaki ke moua e fakaalofa ke he Atua mo e tau tagata oti. Ko e mena ia kaeke ke fakatumau a mutolu mo e kai fiafia ai ke he tau kupu ha Keriso, fakauka atu ke he fakahikuaga, kitia la, kua pehe mai e Matua: To moua e mutolu e moui tukulagi.

21Kitia la he magaaho nai ma haaku tau matakainaga fakahelehele, na e, ko e puhala haia; kua nakai fai puhala foki po ke ha higoa foki ke fakamomoui ai e tau tagata ke he kautu he Atua. Kitia la, ko e fakaakoaga haia ha Keriso, ko e fakaakoaga mooli ni a ia he Matua, mo e Tama, mo e Agaaga Tapu, kua taha ni a lautolu ke he tukulagi. Amene.