1Ko e magaaho nai, kua vagahau atu au ki a koe, ma Iosefa ko e haaku a tama fakahiku. Ne fanau a koe ke he tutakale fakalataha mo e haaku a tau matematekelea; Hanai, ne fanau he matua fifine a koe ke he tau aho ne momoko lahi mahaki ai e loto haaku.

2Kia fakatapu foki maau, he Iki e motu nai, ko e motu kua mua ue atu ke nonofo ai a koe mo e tau fanau ka tutupu mai ia koe, mo e tau matakainaga haau ke nonofo tukulagi ai a mutolu kaeke ke omaoma a mutolu ke he tau fakatufono he Tama Tapu a Isaraela.

3Ko e magaaho nai ma losefa, ko e haku tama fakamui, ne ta mai e au a koe mai he tutakale mo e haaku a tau matematekelea, kia fakamonuina he Atua a koe ke he tukulagi, to nakai fakaotioti ai e haau a tau fanau.

4Kitia la, na tupu mai a koe ia au; ko au ne tupu mi ia Iosefa, ko ia ne fakapaea atu ki Aikupito. Ne lalahi foki e tau maveheaga he Iki ne taute e ia ki a Iosefa.

5Ko e mena ia, ne kitia mooli e Iosefa e tau aho he magahala nai ha tautolu. Ti ne moua ai e ia e maveheaga mai he Iki, to fakatu he Iki ki luga e la akau tututonu ke he magafaoa a Isaraela mai he haana a tau fanau; nakai ko e Mesia ka ko e la akau ka papaki kehe ai, pete ni ia to manatu ni ke he tau maveheaga he Iki ke fakakite atu ai e Mesia ki a lautolu ke he tau aho fakamui ke he agaaga malolo, ke takitaki mai aki a lautolu mai he pouli ke he maama — hanai, mai he pouli kikio mo e paeaaga ke he tokanoaaga.

6Ha ko e mena fakamooli mai ai e losefa pehe; To fakatu ki luga he Iki ko e haaku a Atua e perofeta, ti to eke a ia mo perofeta fifili ke he haaku a tau fanau.

7Hanai, ne pehe mai mooli a Iosefa: Kua pehe mai e Iki ki a au: To fakatu hake e au e taha perofeta mai he tau fanau haau; ti to talahaua a ia mai he tau fanau haau. Ki a ia, to poaki atu au ke eke ai e tau gahua ma e tau fanau haau, ko e haana a tau matakainaga, ko e tau mena mahuiga lahi a ia ki a lautolu, ke maeke ai ia lautolu ke moua e iloilo ke he tau maveheaga ne taute e au mo e haau a tau mamatua.

8Ti, to poaki atu au ki a ia ke aua neke eke e ia ha mena taha, ka e to eke ni e tau mena ka poaki e au ki a ia. To talahaua ai ni a ia ki mua haaku; ha kua maeke a ia ke eke ai e haaku a finagalo.

9To talahaua a ia ke tuga a Mose, ne vagahau atu e au, to fakatu atu e au a ia ki a koe, ke laveaki e haaku a tau tagata, ko e magafaoa a Isaraela na e.

10To fakatu hake e au a Mose, ke laveaki e haana tau tagata mai he motu ko Aikupito.

11Ka e to fakatu hake e au e taha perofeta mai he haau a tau fanau; ti to foaki atu e au ki a ia e malolo ke ta mai haaku a tau kupu ke he tau fanau haau — mo e nakai ta mai ai e kupu haaku ni hokoia, he vagahau mai he Iki, ka kia fakamafokifoki ha lautolu a tau loto ke he kupu haaku, kua moua tuai e lautolu.

12Ko e mena ia, to tohi ai he tau fanau haau; ti to tohi ai foki he tau fanau a Iuta; mo e tau mena ka tohi ai he tau fanau haau, mo e tau mena foki ke tohi ai he tau fanau a Iuta, to tutupu fakalataha mo e kautu ai, ke he tau fakaakoaga hepehepe mo e tuku ki lalo e taufetoko, mo e fakatu ai agataha e mafola, ke he vaha loto he tau fanau haau mo e takitaki mai a lautolu ke he loto matala ke he tau mamatua ha lautolu ke he tau aho fakamui, mo e iloa ai foki e haaku a tau maveheaga, he vagahau mai he Iki.

13Mai he lolelole to fakamalolo a ia, he aho na ka kamata ai e haaku a gahua ke he haaku a tau tagata ke he liu atiaga haau ma magafaoa a Isaraela na e, he vagahau mai he Iki.

14Ne perofeta mai pihia a Iosefa, pehe: Kitia la, to fakamonuina he Iki e perofeta ia, mo e to malaia a lautolu kua kumi ke fakaoti a ia ha ko e maveheaga nai, ne moua e au mai he Iki, ke he tau fanau haaku, to fakakatoatoa. Kitia la, kua tua mooli au ke he fakakatoatoaaga he maveheaga nai.

15To ui ai e higoa haana ke he haaku a higoa; ti ko e higoa ia foki he haana a matua taane. To to eke ai foki a ia tuga au nai; ha ko e mena ka ta mai ai he Iki, mo e foaki mai ai he lima haana ke he malolo mooli he Iki, ke takitaki mai haaku a tau tagata ke he moui tukulagi.

16Hanai, ne perofeta mai a Iosefa pehe: Kua iloa mooli e au e mena nai, tuga kua iloa mooli e au e maveheaga ki a Mose; ha kua tala mai he Iki ki a au, to laveaki e au e tau fanau haau to hoko ke he tukulagi.

17Ne pehe mai e Iki: To fakatu e au e taha Mose mo e to foaki e au e malolo ki a ia ke he tokotoko; to foaki atu e au ki a ia e fakafiliaga ke he tohi; Pete ia to nakai fakamukamuka e au e haana a alelo, ke vagahau e ia e tau mena loga; ha kua nakai manako au ke mahifi a ia ke vagahau. Ka e to tohi ai e au ki a ia e haaku a fakatufono, ke he matalima haaku, mo e to eke ai foki e au taha ke vagahau maana.

18Ti vagahau mai foki e Iki ki a au pehe: To fakatu hake e au e taha mai he tau fanau haau; to eke ai taha mo vagahau maana. Kitia la, to foaki e au ki a ia ke maeke ai a ia ke tohi e tau mena mai he fanau haau, ke he tau fanau haau; ti ko e tagata vagahau he tau fanau haau ke fakailoa ai.

19Ti ko e tau kupu ka tohi ai e ia, ko e tau kupu kua iloa tonuhia e au, kua lata mo e tau fanau haau. Ti to tuga ni kua tagi mai he kelekele e haau a tau fanau ki a lautolu to toka ai he tau kupu mukamuka kua fakaaoga e lautolu.

20To tagi mai a lautolu he kelekele; Hanai, ke fakatokihala e tau matakainaga ha lautolu, pete ni he loga e tau hau kua mole atu ia lautolu. To hoko ai, ko e tagi ha lautolu to toka ai he tau kupu mukamuka kua fakaaoga e lautolu.

21Ha ko e tua ha lautolu to vagahau e au ke he gutu haaku e tau kupu ha lautolu ke he tau matakainaga ha lautolu, ko e tau fanau haau; Ti ko e lolelole he tau kupu ha lautolu to fakamalolo ai e au ke he tua ha lautolu; ke he fakamanatuaga he maveheaga haaku, ne eke ai mo e tau mamatua haau.

22Hanai, kitia la, ma haku tama ko Iosefa, ne pihia e perofetaaga he matua taane haaku i tuai.

23Ko e mena ia, ha ko e maveheaga nai, kua fakamonuina ai a koe; to nakai fakaoti e tau fanau haau, ha ko e mena to fanogonogo a lautolu ke he tau kupu he tohi.

24To tu mai taha kua malolo ia lautolu, kua malolo ke taute e tau mena kua mitaki, pihia ke he tau kupu mo e gahua, to eke ai a ia mo kanavaakau ke he lima he Atua, mo e tua fakalahi, ke eke ai e tau mena lalahi ke ofo ai mo e eke ai foki e taha mena lahi ki mua he Atua, ke liu ati hake e magafaoa a Isaraela, ti pihia ke he tau fanau he tau matakainaga haau.

25Hanai, uhoaki a koe ma Iosefa. Kitia la kua tote a koe; ko e mena ia, kia fanogonogo a koe ke he tau kupu he haau a taokete ko Nifai, to hoko ai ki a koe tuga mo e tau kupu kua vagahau atu e au. Kia manatu e tau kupu he matua taane haau to mate.