Ko e Tohi a Mosaia

1Ne hoko ai e magaaho he mole atu he taute ai e saia e tau poaki tuga ne tuku age ai he haana matua taane, kua fakailoa atu a ia ke he motu katoa kua lata ke fakamaopoopo mai e tau tagata oti ke he faituga ke fanogonogo ke he tau kupu ke Patuiki ko Peniamina ka fakamatala atu ki a lautolu.

2Ti kua tokologa lahi kua fakapotopoto ai kua nakai maeke ke totou ai a lautolu; ha kua fakalahi ki luga e tokologa ha lautolu mo e tupu lahi ai ke he motu.

3Ne uta foki e lautolu e tau punua uluaki, mai he ha lautolu a tau fuifui manu mo taute e tau poa fakaaue tuga mo e fakatufono a Mose.

4Ti taute foki ke tuku atu ha lautolu a tau fakaaue ke he Atua, ha ko e takitakiaga mai ha lautolu he motu ko Ierusalema, mo e laveaki a lautolu mai he tau lima he tau fi, kua fifili ai e tau tagata mitaki ke eke mo tau takitaki, mo e fifili taha mai he tau tagata mitaki na ke eke mo pautiki, kua folafola ai e mafola ke he motu ko Sarahema, mo e fakaako atu ki a lautolu ke omaoma ke he tau fakatufono he Atua, ke fiafia ai mo e puke namo ai ke he fakaalofa ke he Atua mo e tau tagata oti kana.

5Ne hoko ai, kua fakapotopoto mai a lautolu ke he faituga, kua igatia a lautolu mo e fakatutu takai ai ha lautolu a tau fale ie, kua igatia ni e magafaoa mo e ha lautolu a fakapotopotoaga, ko e ha lautolu a tau hoana, tau fanau taane, tau fanau fifine, kamata mai he tau uluaki ke hoko atu ke he fakamuiaki, kua nonofo kehekehe ai e tau magafaoa taki taha.

6Kua fakatutu viko ai e lautolu ha lautolu a tau fale ie takai he faituga, fakahagaao atu e tau gutuhala ke he faituga, ke maeke ia lautolu ke nonofo ni ki loto he tau fale ie mo e fanogonogo atu ke he tau kupu ka vagahau ai he Patuiki ko Peniamina.

7Kua ha ha i ai e lanu tagata kua lahi ni, kua nakai maeke ai he Patuiki ko Peniamina ke fakamatala atu ki a lautolu ha kua ha ha i ai e tau kaupa he faituga, ko e mena ia kua fakailoa atu a ia pehe kua lata ke taute ai e taha kolo ke maeke ai he tau tagata oti ke logona haana a tau kupu kua lata ke fakamatala atu e ia ki a lautolu.

8Ne hoko ai, e magaaho kua kamata a ia ke fakamatala mai i luga he kolo ke he tau tagata, kua nakai logona oti e lautolu haana a tau kupu ha kua to lahi e tokologa e lanu tagata ko e mena ia ne poaki e ia ke tohi haana tau kupu mo e tufatufa atu ai ki a lautolu kua nakai hokotia ki ai e haana a leo ke logona ai foki a lautolu.

9Pehe nai e tau kupu ne tohi mo e fakamatala ai e ia: Ma haku tau matakainaga, kua fakapotopoto mai a mutolu katoa ke logona ai e tau kupu kua fakamatala ke he aho nai; ha kua nakai poaki atu au ki a mutolu kua tolo mai ke he aho nai ke o mai a mutolu ke fefeua e haaku a tau kupu ka kia fanogonogo mai a mutolu mo e hafagi mai ha mutolu a tau teliga kia logona fakalataha mo e ha mutolu a tau loto mo e maama ai, ha mutolu a tau manamanatuaga kia folafola ai ki a mutolu e tau mena galo he Atua.

10Kua nakai poaki atu au ki a mutolu ke tolo mai a mutolu ki hinai ke matakutaku a mutolu ki a au, po ke manatu a mutolu ko au kua mua atu au ke he ha tagata he lalolagi nai.

11Kua tatai ni au mo mutolu, kua fa lolelole ai kehe falu a magaaho; ke he tino mo e manamanatuaga, ne fifili e mutolu au, mo e fakauku he haaku a matua, mo e fifili ai he lima he Iki ke eke au mo pule mo e pautuiki ki a mutolu; ne leoleo mo e leveki au mai he haana a lima malolo ke gahua ma mutolu mo e haaku a loto katoa mo e malolo katoa tuga kua foaki mai he Atua ki a au.

12kua pehe atu au ki a mutolu, tuga ne kotofa ai au ke fakamole atu ai loga he haaku a tau aho ke gahua ma mutolu, ti hoko mai ke ke magaaho nai mo e nakai kumi atu au ke he tau auro mo e ario po ke falu a mena ke mau mena ai au mai ia mutolu;

13Nakai toka foki e au ke tuku atu a mutolu ke he tau fale puipui po ke fakatupa e taha ke he taha po ke kelipopo tagata, po ke fofo mena po ke faivao, po ke toka noa a mutolu ke eke e tau mena kelea, mo e fakaako ai a mutolu ke omaoma ke he tau poakiaga he Iki, ke he tau mena oti kua poaki atu e ia —

14Ko au foki, ne gahua au mo e fakamalolo ke fekafekau ki a mutolu ke nakai ha ha ki a mutolu ha mena ne higoa ko e tukuhau, mo e nakai fai mena fakamatematekelea ke tuku atu ai ki a mutolu — ti ko e tau mena oti nai ne fakamatala atu e au, kua eke a mutolu mo tau fakamooli ke he aho nai.

15Pete ia ma haku tau matakainaga na e, kua nakai taute e au e tau mena nai ke hula ai po ke tala atu e au ke tuku male atu; kua fakamatala atu au ki a mutolu e tau kupu oti nai kia iloa e mutolu kua maeke au ke tali atu mo e loto mea ke he Atua he aho nai.

16Kitia la, kua vagahau atu au ki a mutolu kua fakaaoga e au loga he haaku a tau aho ke he gahua ma mutolu, kua nakai manatu au ke fakatokoluga ai au, ha ko e mena kua fekafekau ni au ke he gahua he Atua.

17Ti kitia la kua tala atu e au e tau mena nai ke lotomatala ai a mutolu; ke iloa ai e mutolu kaeke kua fekafekau a mutolu ma e tau tagata ha mutolu, kua fekafekau atu ni a mutolu ke he Atua.

18Kitia la, kua fakahigoa e mutolu au ko e patuiki ha mutolu, ti kaeke ko au ne fakahigoa e mutolu ko e patuiki, kua gahua ke fekafekau atu ki a mutolu, ti nakai kia lata ke gahua a mutolu ke fekafekau e taha ke he taha.

19Ti kitia la foki, kaeke ko au, ne kua fakahigoa e mutolu ko e ha mutolu a patuiki, kua fakamole ai haaku a tau aho ke fekafekau ma mutolu, ti ko e fekafekau ia foki ke he Atua, kua nakai lata ke fakaaue mai a mutolu ki a au, Oi kua tonuhia ke fakaaue atu a mutolu ke he Patuiki ha ha he lagi!

20Ma haku tau matakainaga, kaeke kua tuku atu e tau fakaaue mo e nava kua ha ha i ai ke he tau loto ha mutolu ke he Atua ha ko ia ne tufugatia a mutolu, mo e takitaki mo e leveki a mutolu, ti eke ai e tau mena ke fiafia ai a mutolu mo e tuku atu ai e mafola ke nonofo fiafia ai e taha matakainaga mo e taha matakainaga.

21Kua tala atu au ki a mutolu, kaeke ke fekafekau a tautolu ki a ia ne tufugatia a tautolu mai he kamataaga, mo e leveki a mutolu ke he taha aho ke he taha aho, mo e tuku atu foki e fafagu ke momoui ai a mutolu mo e gahua mo e tau mena kua manako a mutolu ki ai, mo e lagomatai ai a mutolu he taha magaaho ke he taha magaaho — kua pehe au, kaeke ke fekafekau a mutolu ki a ia mo e tau loto katoa ha ko mutolu ko e tau fekafekau kua nakai fai palepale a mutolu.

22Kitia la, ko e haana ni a manako ki a mutolu ke omaoma ke he haana a tau poaki ti kua mavehe tuai e ia, kaeke ke omaoma a mutolu ke he haana a tau poaki to muhu mena a mutolu ke he motu, ti to nakai kalo kehe a ia mai he mena na kua mavehe mai e ia, ko e mena ia kaeke ke omaoma a mutolu ke he haana a tau poakiaga to fakamonuina e ia a mutolu mo e muhu mena ai.

23Ko e mena fakamua ne taute e ia, ne tufagatia e ia a mutolu mo e tuku atu foki e ia e moui, ko e mena ha nā kua kaitalofa a mutolu ki a ia.

24Ko e mena ke ua aki, tuga ia kua poaki mai e ia ki a mutolu kaeke kua omaoma a mutolu; ke he tau mena kua poaki mai e ia to fakamonuina e ia a mutolu ke he magaaho ia ni; ti ko e mena ia, kua fakapalepale e ia a mutolu. Ti ko mutolu kua fai kaitalofa agaia ni ki a ia, kamata ai nai ke hoko atu ke he tukulagi tukumuitea; ko e mena ia, ko e heigoa kia ha mutolu ke hula ai?

25Ti huhu atu au, kua fai talahauaga nakai a mutolu? Tali atu au, Nakai. Kua nakai maeke a mutolu ke pehe, ko mutolu kua tatai ni mo e efuefu he kelekele; ka ko mutolu kua tufuga ia mai he kelekele; ka e kitia la, ko e haana foki a ia, ko ia ne tufugatia a mutolu.

26Ti ko au foki, kua fakahigoa e mutolu, ko e patuiki, kua nakai mitaki ia mai ia mutolu, ha ko au foki mai he kelekele. Ti kitia e mutolu, kua motua tuai au, ti kua teitei tuai ke liu atu e tino mate nai ke he kelekele ko e matua fifine a ia.

27Ko e mena ia, kua vagahau atu au ki a mutolu, kua fekafekau au ki a mutolu, mo e manamanatuaga mea ki mua he Atua, pihia ni ke he magaaho nai, kua fakamaopoopo mai e au a mutolu, ke aua neke fai mena ke lauia ai au, mo e nakai hili ai foki ia au e tau toto ha mutolu ka tu ai au ki mua he fakafiliaga he Atua ke he tau mena kua poaki mai e ia ki a au ke lata ai mo mutolu.

28Kua tala atu au ki a mutolu ke fakamaopoopo mai a mutolu mo e fakamea ai foki e haaku a tau tapulu mai he tau toto ha mutolu, ke he magaaho nai, tuga kua amaamanaki ai au ke hifo ke he haaku a tukuaga, ke hifo ai au mo e mafola, ti haele atu ai e haaku a agaaga ke kau fakalataha mo lautolu ke lologo fakaheke ke he Atua eke mena tonu.

29Ti ko e mena ia kua fakamaopoopo ai e au a mutolu, ke fakailoa atu ai ki a mutolu, kua nakai tuai liu foki au ke eke ai mo faiaoga mo e patuiki ha mutolu.

30Ha ko e magaaho nai kua tutu ai haku tino katoa he lali ke vagahau atu ki a mutolu, kua iloa e au kua lagomatai he Atua au, mo e lagomatai mai e ia au, kua poaki a ia kia fakailoa atu e au ke he aho nai, ko e haaku a tama taane ko Mosaia kua kotofa e au a ia ke eke mo patuiki po ke takitaki ha mutolu.

31Ti ko e hanai ma haku tau matakainaga, kua lata ke tumau pihia ha mutolu a tau mahani mitaki. Kua omaoma a mutolu ke he haaku a tau poakiaga ti pihia foki mo e tau poakiaga he haaku a tau matua taane, ti muhu mena ai, ti nakai kaumahala a mutolu ke he lima he fi, pihia foki ni ka omaoma ke he tau poakiaga he haaku a tama taane, po ke tau poakiaga foki he Atua ka vagahau mai e ia ki a mutolu, to muhu mena ai a mutolu ke he motu mo e nakai fi malolo ai e fi ki luga ia mutolu.

32Ma haku tau tagata kia kalo kehe mai he tau mena ke tupu mai ai e tau fetoko ia mutolu, ti eke agataha a mutolu ke fanogonogo ke he agaaga kelea ne talahau mai he matua haaku ko Mosaia.

33Kitia la, kua ha ha i ai e tagi ki a lautolu kaeke kua fanogonogo a lautolu ke he agaaga kelea, kaeke ke omaoma a mutolu ki a ia to nonofo mo e mamate ai ke he tau hala, kua tatai ia mo e tagata kua inu ni e ia e mena ke kelea ai e haana a agaaga; to moua ai e ia e haana a fakahalaaga tukulagi, kua holifono e fakatufono he Atua, kua kehe ia mai he haana a lotomatala.

34Kua tala atu au, ki a mutolu kua nakai ha ha ia mutolu taha, ka ko e ha mutolu a tau fanau ni ne nakai la fakaako ai ke he tau mena nai, ka e ko e heigoa kia ha mutolu a lotomatala, kua ha ha ia mutolu e kaitalofa tukulagi ke he Matua ha ha he lagi, ke foaki atu oti ki a ia, e tau mena ha ha i ai ia mutolu, ti pihia ni, kua fakaako mai ai ke lata ma e tau lapa maka kua fakamau ai e tau fakakiteaga ne kua vagahau mai he tau perofeta tapu, pihia ke hoko mai ke he magahala ne toka ai he matua ha tautolu ko Lihai a Ierusalema.

35Ti pihia ni, mo e tau mena oti, kua vagahau mai ai he tau matua ha tautolu mai ke he magaaho nai. Ti kitia la foki, kua vagahau ni a lautolu ke he tau mena ne poaki atu he Iki ki a lautolu; ko e mena ia, kua mooli mo e tonu a lautolu.

36Ti ko e magaaho nai, kua vagahau atu au, ma haku tau matakainaga, ka mole atu he iloa mo e fakaako a mutolu ke he tau mena nai, ti kaeke kua holifono po ke o ke he tau puhala kehe tuga a ia ne vagahau atu e au. Ka o kehe a mutolu mai he Agaaga he Iki, to nakai fai mena ia mutolu ke takitaki atu a mutolu ke he puhala he lotomatala, ke moua ai e mutolu e monuina, muhu mena mo e puipui ai —

37Kua tala atu e au ki a mutolu, ko e tagata kua eke e tau mena nai, kua tatai ai mo lautolu ne totoko atu ke he Atua; ko e mena ia kua fanogonogo a ia ke he agaaga kelea, mo e eke ai mo fi ke he tau mena tututonu oti kana, ko e mena ia kua nakai fai mena e Iki ke nofo ai a ia, ha kua nakai nofo a ia ke he tau faituga kua nakai tapu.

38Ko e mena ia, kaeke ke nakai tokihala, e tagata ka e nofo ni ti mate mo e fi ke he Atua, ko e manako he fakafiliaga kua fafagu atu e haana a agaaga ke iloa ai e haana a kelea, mo e eke ai e mena ia, ke memege kehe a ia mai i mua he Iki, ti fakapuke ai e haana a fatafata ke he kelea, mo e mamahi, mo e tupetupe kua tuga ia mo e afi puhopuho, kua lupa hake tumau ke hoko ke he tukulagi tukuimuitea.

39Ti ko e magaaho nai, kua tala atu au ki a mutolu, kua nakai fai fakaalofa ke he tagata nai; ko e mena ia ko e haana a fakaotiaga kua tukulagi ni, ko e matematekelea kua nakai fai fakaotiaga.

40Oi, ma tau momotua na e, pihia foki mo mutolu ne fuata agaia, mo mutolu foki e tau fanau ikiiki ne maeke ke maama e haaku a tau kupu, kua vagahau fakamitaki atu au ke maama ai e mutolu e haaku a tau kupu, liogi au ke mataala a mutolu ke manatu ai e mutolu e tau matematekelea ka moua e lautolu kua holifono.

41Ti pehe foki, kua manako au ke onoono a mutolu ke he tau monuina mo e fiafia ka moua e lautolu kua omaoma ke he tau poakiaga he Atua. He kitia la, kua monuina a lautolu he tau mena oti. Ko e tau mena ne ua ko e tino mo e agaaga, ti kaeke ke tumau a lautolu ke hoko ke he fakaotiaga, to talia a lautolu ke he lagi, ke nonofo fakalataha mo e Atua, mo e moua ai e fiafia tukulagi. Oi kia manatu, manatu kua mooli e tau mena nai; ha kua vagahau mai he Iki ko e Atua.