1Ma haku tau matakainaga, kua liu ui atu au ki a mutolu ke fanogonogo mai, ha kua fai kupu foki au ke fakamatala atu; he kitia la, kua manatu au ke fakailoa atu ki a mutolu falu a mena kua lata ka hohoko mai.

2Ti ko e tau kupu kua manako au ke fakailoa atu ki a mutolu ko e tau kupu mai he taha agelu he Atua. Kua pehe mai a ia: Ala mai, ti ofo au, kua tu mai e agelu ki mua haaku.

3Ne pehe mai a ia: Ala mai, kia fanogonogo mai a koe ke he tau kupu ka tala atu e au ki a koe; Kitia la, kua hau au ke fakailoa atu ki a mutolu e tau tala mitaki ke olioli ai a mutolu.

4Ha kua logona he Atua ha mutolu a tau liogi, ko e ha mutolu foki a mahani mitaki, ko e mena ia kua fakafano mai e ia au ke fakailoa atu ki a mutolu kua tata mai e tau magaaho ke fiafia ai a mutolu; kua fakafano mai au ke fakailoa atu ki a koe kia olioli ai a koe; mo e fakailoa ai e koe ke ke haau a tau tagata, kia puke ai foki a lautolu ke he fiafia.

5He kitia la, kua tata mai foki e magaaho, nakai mamao foki, ko e malolo, he Iki Mua Ue Atu kua pule ai, mai i tuai pihia ke he magaaho nai, mai he tukulagi ke he tukulagi ai ni, to hifo mai he lagi ke he fanau he tau tagata mo e nofo foki a ia ke he faituga mai he kelekele, to fina atu ke he tau tagata mo e taute ai loga e tau mana, ke fakamomoui e tau tagata gagao, fakamomoui a lautolu kua mamate, fakaala e tau matapouli, fakafano e tau kulikuli mo e hafagi e tau teliga tuli, mo e fakamomoui foki a lautolu kua moua ai he tau gagao kehekehe.

6To vega kehe foki e ia e tau temoni po ke tau agaaga kelea kua nonofo ai i loto he tau fanau he tau tagata.

7Ti kitia la, to moua e ia e tau kamatamata loga, mo e mamahi foki ke he tino, hoge, fia inu, mo e mategugu, kua mua atu ke he mamahi ke moua he tagata, ka ko e mate ni, kitia la, kua tafe mai e toto he tau pupu oti he tino, he to lahi foki e tupetupe haana ke he tau mahani kelea mo e tau mahani fakalialia he haana a tau tagata.

8To fakahigoa a ia ko Iesu Keriso, ko e tama he Atua, ko e Matua he lagi mo e lalolagi, ko e Tufuga he tau mena oti mai he kamataaga; ko e haana a matua fifine foki to ui ai haana higoa ko Maria.

9Ti kitia la, to hau a ia, ke he haana a tau tagata, ke moua ai he tau fanau he tau tagata e fakamouiaga ke he haana a higoa; ka mole atu e tau mena na to pehe ni a lautolu ko ia ni ko e tagata mo e pehe, kua ha ha ia ia e tiapolo, ti fahi ai a ia, mo e fakasatauro ai.

10To liu tau mai a ia ke he aho ke tolu aki mai he mate; ti kitia la kua tu a ia ke fakafili e lalolagi, ti kitia la, kua eke ai e tau mena nai, ke hoko mai ai e fakafiliaga kua tonu ke he tau fanau he tau tagata.

11Kitia la, ko e haana toto ke palepale aki e tau hala ha lautolu kua veveli ha ko e holifono a Atamu, ne kua mamate ai mo e nakai iloa e amaamanakiaga he Atua ki a lautolu, po ko lautolu kua hala mo e nakai iloa e lautolu.

12Ka e fakalofa te, fakalofa te, ki a ia kua totoko atu ke he Atua! To nakai fai puhala foki ke moua ai e fakamouiaga ka ko e tua mo e tokihala ni ki a Iesu Keriso.

13Kua fakafano mai he Iki ko e Atua haana a tau perofeta tapu, ke he tau fanau he tau tagata ke fakamatala atu e tau mena nai ke he lalolagi oti, ko lautolu kua tua to hau a Keriso, ko lautolu haia ka fakamagalo ha lautolu a tau hala, ti moua ai e fiafia, kua mua atu, tuga ni kua ha ha i ai a ia mo lautolu.

14Pete ia, kua kitia he Atua e haana a tau tagata kua lahi e mao he tau ua ha lautolu, ko e mena ia kua tuku mai ai e ia e fakatufono tuga e tau fakatufono a Mose.

15Ne ha ha i ai loga e tau fakamailoga, tau mena ke ofo ai, mo e falu foki, tau ata, ne fakakite e ia ki a lautolu hagaao ke he haana a haele mai; ti vagahau foki e tau perofeta tapu ki a lautolu hagaao ke ke haana a haele mai; ka e pete ia ne fakamao ni ha lautolu a tau loto, mo e nakai maama kua nakai fai aoga e fakatufono a Mose kaeke ke nakai ha i ai e lukutoto he haana a toto.

16Ti pihia ni, kaeke kua maeke he tau fanau ikiiki, ke hala a lautolu mo e nakai maeke ke laveaki ai; ka e pehe atu au, kua fakamonuina a lautolu; he kitia la, tuga ni ia Atamu, mo e mena kua veveli ai a laua, pihia ni ke he toto a Keriso kua laveaki ai, ha ko e tau hala ha laua.

17Ko e mena ia foki, kua fakailoa atu ki a mutolu, kua nakai fai higoa foki po ke ha puhala foki, po ke falu a mena ke hoko mai ai e laveakiaga ke he fanau he tau tagata, ka e kua maeke ni ke he higoa ha Keriso ko e Iki ko e Atua Mua Ue Atu.

18Kitia la, kua fakafili e ia, ti kua tonu foki e haana a fakafiliaga; ti nakai maeke ke malaia ai e tama tote ka mate ai ke he haana a vaha tote; ka ko e tau tagata kua inu ni a lautolu ke he malaia ke he tau agaaga ni ha lautolu, a to mahani fakatokolalo a lautolu, he tuga e tau fanau ikiiki, mo e tua ai pehe ko e laveakiaga ne ha i ai, pihia ai nai, mo e to hoko mai foki ha ko e lukutoto a Keriso, ko e Iki Mua Ue Atu.

19Ko e tagata ke he tino ko e fi a ia ke he Atua, ko e mena ia tali he veliaga a Atamu, to pihia a to tukulagi ai ni, a to omaoma a ia ke he tau mena he Agaaga Tapu, mo e tuku kehe e tino he tagata mo e eke ai a ia mo taha tagata tapu ha ko e lukutoto ha Keriso ko e Iki, mo e tuga ai foki e tama tote, omaoma, mahani molu, fakatokolalo, fakauka, loto fakaalofa, mo e talia e tau mena oti kua manako e Iki ki ai, ti foaki atu ai ki a ia tuga e tama tote kua omaoma a ia ke he haana a matua taane.

20Kua pehe atu au, to hoko mai e magaaho, to iloa ai e Fakamoui ke he tau kautu oti, tau tagata, tau alelo kehekehe mo e tau tagata.

21Kitia la ka hoko mai e magaaho na, to nakai hao taha ki mua he Atua, ka ko lautolu ni e tau fanau ikiiki, mo lautolu kua tua mo e tokihala ke he higoa he Iki ko e Atua Mua Ue Atu.

22Ti pihia ke he magaaho nai, ha kua fakaako ai e koe haau a tau tagata, e tau mena ne kua poaki atu ai he Iki ko e haau a Atua ki a koe, pete ni ia kua mea kia a lautolu ki mua he Atua, ka fakalata ni ke he tau kupu kua vagahau atu e au ki a koe.

23Ti kua vagahau atu e au e tau kupu nai ne poaki mai he Atua ki a au:

24Ti pihia he vagahau mai he Iki: to tutū a lautolu mo e eke ai mo tau fakamooli makaukau ke he tau tagata nai, ke he aho he fakafiliaga; ha ko e mena ia, to fakafili ni a lautolu e tau tagata oti ke lata ni mo e ha lautolu a tau gahua, ko e mitaki po ke kelea.

25Kaeke kua kelea a lautolu, kua hagaao a lautolu ke kitia ha lautolu a tau hala mo e tau mena fakalialia ke memege ai a lautolu i mua he Iki ke he mena kua ha ha i ai e matematekelea, mo e malaia kua mua ue atu, kua nakai maeke ke liu mai ai taha; ko e mena ia, kua inu ni a lautolu ke he mena ke malaia e tau agaaga ha lautolu.

26Ko e mena ia, kua inu ai a lautolu mai he kapiniu he ita he Atua kua nakai ha ha i ai ha tonu ki a lautolu, tuga kua fakatikai ai e veliaga ha Atamu ha kua kai e ia e fua akau tapu; ko e mena ia, to nakai fai fakaalofa ki a mutolu tukulagi.

27Ko e ha lautolu a malaia to tuga ni e loloto afi mo e taio, ko e haana a kaka kua nakai fakaai ke ta mate ai, mo e haana a ahua ia, kua ahua ki luga tukulagi ni. Kua pihia e poakiaga he Atua ki a au. Amene.