1Ne hoko ai, ko e magaaho nai ko Alama ko ia ne hola kehe mai he tau fekafekau he patuiki ko Noa, kua tokihala mai a ia he haana tau hala; mo e fai fano ai a ia ke he tau tagata mo e kamata ai ke fakaako atu e tau kupu ha Apinatai —

2Hanai, ke lata mo e tau mena ne nakai la hohoko mai, katoa foki mo e liu tu mai ha lautolu ne mamate, mo e fakamouiaga he tau tagata, to fakahoko mai ai ha ko e malolo, mo e tau matematekelea, moe matulei ha Keriso, mo e haana liu tu mai mo e haele atu ke he lagi.

3Ko lautolu oti ne manako ke logona haana a tau kupu, ne fakaako atu e ia. Ne fakaako fufu ai e ia ke aua neke iloa ai he patuiki. Ne kua tokologa kua tua ke he haana a tau kupu.

4Ne hoko ai, ko e tokologa ia lautolu kua talia ke he haana a tau kupu ne o atu ai a lautolu ke he matakavi ne higoa ko Moromona, ne kua fakahigoa he patuiki, kua katofia ai mo e fonua ne kua ha ha i ai e loga he tau manu favale ke he loga e tau magaaho mo e tau vaha.

5Ne ha ha i ai i Moromona e taha vaipuna kua tavana, ti nofo ai a Alama ke he mena ia, ne ha ha i ai foki ke he kauvai e potopoto akau ikiiki, ne fakamumuli ai a ia ke he mena na ke he maama he aho, ka o atu ai e tau fekafekau he patuiki ke kumi atu ki a ia.

6Ne hoko ai ne tokologa e tau tagata kua tua ke he haana a tau kupu mo e o atu ai ke fanogonogo ki a ia ke he mena ia.

7Ne hoko ai, mole atu e loga he tau aho, ne kua tokologa lahi ai kua fakapotopoto ai ke he matakavi na ne higoa ko Moromona, ke fanogonogo ke he tau kupu ha Alama. Hanai ko lautolu ne kua fakapotopoto kua tua ke he haana a tau kupu, kua o atu ke fanogonogo ki a ia. Ne fakaako e ia a lautolu, mo e fakamatala atu a ia ki a lautolu ke tokihala, mo e fakamanatu ai ti tua foki ke he Iki.

8Ne hoko ai, ne pehe atu a ia ki a lautolu, kitia la, ko e vaipuna ha Moromona ia hanai, (ko e higoa a ia) ko e mena ia ha kua fiafia a mutolu ke o mai ki loto he fuifui he Atua, mo e fakahigoa ai ko e haana a tau tagata, mo e talia ke felagomataiaki ha mutolu a tau kavega.

9Hanai, kua talia foki ke fakatutuku fakalataha mo lautolu kua fakatutuku, hanai, kia fakamafanatia atu ki a lautolu kua lata ke fakamafanatia, mo e eke ai mo tau fakamooli he Atua ke he tau magaaho oti mo e tau mena oti, mo e tau mena oti kua ha ha i ai a mutolu, pihia ni a to hoko ke he mate, to fakamomoui ai he Atua a mutolu, mo e totou fakalataha mo lautolu he liu tu mai fakamua, ke moua ai e mutolu e moui tukulagi —

10Ko e mena, ia kua pehe atu ai au ki a mutolu, kaeke ko e mena kua manako ki ai e tau loto ha mutolu, po ke heigoa kia e mena kua totoko ki ai a mutolu ha ko e papatisoaga ke he higoa he Iki, mo e eke ai e fakamooliaga ki mua haana mo e taute ai e maveheaga mo ia, to fekafekau atu a mutolu ki a ia mo e omaoma ke he haana a tau poakiaga ke maeke ai ke liligi fakalahi mai e ia haana agaaga ki luga ia mutolu?

11Ko e magaaho ne logona ai he tau tagata e tau kupu nai, ne patipati ai e tau lima ha lautolu he fiafia mo e pehe: Ko e mena haia kua manako e tau loto ha mautolu ki ai.

12Ne hoko ai ke he magaaho ia, ne toto ai e Alama a Helama, ko ia ko e taha mai ia lautolu fakamua, ne ta atu e ia mo e tutū ai i loto he vai mo e pehe atu: Ko e Iki na e kia liligi mai e koe haau a agaaga ke he haau a fekafekau nai ke maeke ai ke taute e ia e gahua mo e tapu ke he haana a loto.

13Mole atu he vagahau e ia e tau kupu nai, ti haele hifo ai e agaaga he Atua ki a ia, mo e pehe mai a ia: Helama, kua papatiso e au a koe ha kua moua e au e pule mai he Atua Malolo, ke eke ia mo fakamooliaga ha kua taute e koe e maveheaga ke fekafekau atu ki a ia a to hoko e mate ke he haau a tino, kia liligi mai foki e Agaaga he Iki ki a koe, mo e foaki atu ai ki a koe e moui tukulagi, ha ko e fakamouiaga a Keriso, ne kua tauteute ai e ia mai he fakaveaga he lalolagi.

14Kua mole atu e vagahau e Alama e tau kupu nai, a ti tanumia fakalataha ai a Alama mo Helama ke he vai; mo e o hake mai a laua mai he vai kua fiafia ai ha kua puke namo ai ke he Agaaga.

15Ti liu atu a Alama mo e ta atu foki taha ke ua aki ke he vai, mo e papatiso ai tuga ni a ia fakamua, ka ko ia, ne nakai liu tanumia foki a ia ke he vai.

16Ne papatiso e ia ke he puhala nai a lautolu oti ne kua o atu ke he matakavi na ko Moromona, ti ko e katoa ha lautolu ko e ua e teau mo e fa, hanai ne kua papatiso ai ke he vai ko Moromona, kua puke namo ai foki a lautolu ke he fakalofa noa he Atua.

17Ti fakahigoa ai a lautolu ko e lotu he Atua, po ke lotu ha Keriso, ke kamata mai he magaaho ia a to hau ai fakahaga. Ne hoko ai, ko e ha tagata kua papatiso ai ha ko e pule mo e malolo he Atua kua maeke ai ke tutaki a ia kehe haana a lotu.

18Ne hoko ai, ne moua e Alama e pule he Atua ke fakauku e tau Ekepoa; ko e taha e ekepoa ke he taki lima hogofulu ne fakauku e ia ke fakamatala ki a lautolu mo e fakaako foki ke he tau mena he kautu he Atua.

19Ne poaki atu a ia, ki a lautolu ke aua neke fakaako ha mena kehe ka ko e tau mena ni ne fakaako e ia, mo e tau mena ne vagahau mai he tau gutu he tau perofeta tapu.

20Hanai, ne poaki atu foki a ia ke aua neke fakamatala ai foki ha mena ka e fakaako ni ke he fakatokihala mo e tua ke he Iki, ke fakamomoui e haana tau tagata.

21Ne poaki atu a ia ki a lautolu ke aua neke taufetoko e taha ke he taha ka kua lata ke ono ki mua ke taha ni e tua mo e papatisoaga, ti fakamau ai fakalataha ha lautolu a tau loto ke he fakaalofa he taha ke he taha.

22Ti pihia e haana a poakiaga ki a lautolu ke fakamatala. A ti eke ai a lautolu mo tau fanau he Atua.

23Ti poaki foki a ia ki a lautolu ke manatu e Aho Sapati ke fakatapu ai, mo e manatu e tau aho oti ke fakaaue ke he Iki ko e ha lautolu a Atua.

24Ti poaki foki a ia ke he tau ekepoa ne kua kotofa e ia, ke gahua fakamalolo a lautolu ke he ha lautolu ni a tau lima ke momoui ai a lautolu.

25Ti kua taha pauaki e aho mai he vaha tapu kua tuku kehe, ke maeke ai ia lautolu ke fakamaopoopo ke fakaako e tau tagata, mo e liogi ke he Iki ko e ha lautolu a Atua, kia fakapotopoto ai fakalataha tumau a lautolu ke he tau magaaho kua pule a lautolu ki ai.

26Ti ko e tau ekepoa ke aua neke falanaki ke he tau tagata ke leveki atu ki a lautolu; ka ko e tau gahua ha lautolu ke moua ai e monuina mai he Atua, ke tupu malolo ai ke he Agaaga, ke moua ai e pulotu he Atua, ke fakaako atu mo e pule malolo mai he Atua.

27Ti kua liu foki a Alama poaki ke he haana a tau tagata he lotu ke foaki atu ha lautolu a tau koloa ke lata mo e ha lautolu a tau mena moua, kaeke kua lahi haana a tau mena moua kua lata ke foaki atu fakalahi, ti ko ia ne tote kua lata ke tote foki, ti ko ia ne ai fai kua lata ke foaki atu ki a ia.

28Ti pihia kua lata ni ke foaki e lautolu ha lautolu a tau mena kua moua ke he tau loto fiafia ha lautolu, mo e ha lautolu a tau loto mitaki ki mua he Atua, mo e pihia foki ke he tau ekepoa ne kua lata ki ai; hanai, mo e pihia foki ki a lautolu kua manako lagomatai ai, mo e nonofogati e tau agaaga.

29Ne pehe atu a ia ki a lautolu, ha ko e poaki he Atua; ti ne o fakahako ai a lautolu ki mua he Atua, mo e foaki atu ai e taha ke he taha e tau mena he tino mo e tau mena he agaaga ke lata ai mo e ha lautolu a tau momoui mo e ha lautolu a tau manako.

30Ne hoko ai, ne eke ai e tau mena oti nai i Moromona, hanai, ke he tapa vai a Moromona, ke he ulu vao motua ne tata ke he vai a Moromona; hanai, ke he fonua i Moromona, ke he tau vai a Moromona, ke he vao motua a Moromona, ko e fulufuluola ha a ia ke he tau mata ha lautolu ne kua iloa ai e Fakamoui; hanai, ti ko e monuina ha a ia ha lautolu, ha ko e mena to lologo mo e fakaheke tukulagi a lautolu ki a ia.

31Ko e tau mena nai ne taute ai ki luga he tau katofia he fonua, nakai iloa ai he patuiki.

32Ne hoko ai, kitia la, kua iloa ai he patuiki kua o fano e tau tagata ti fakafano atu e ia haana a tau fekafekau ke kitekite atu ki a lautolu. Kua hoko ai ke he aho ne fakapotopoto ai a lautolu ke logona e tau kupu he Iki, ne iloa ai he patuiki e nonofoaga ha lautolu.

33Ne pehe ai e patuiki, kua fakaohooho e Alama e tau tagata ke totoko atu ki a ia; ko e mena ia ne fakafano atu ai e ia haana a tau kautau ke fakaotioti a lautolu.

34Ne hoko ai, ne iloa ai e Alama mo e tau tagata he Iki kua o mai e tau kautau he patuiki; ko e mena ia, kua uta e lautolu e ha lautolu a tau fale ie mo e ha lautolu a tau magafaoa mo e o atu ai ke he tutakale.

35Ti ko e katoa ha lautolu ko e fa e teau lima hogofulu e tagata.