Ko e Tohi a Alama

1Ti ne hoko ai, ne kamata a Alama ke fakamatala e tau kupu he Atua ke he tau tagata, ki a lautolu ke he motu ko Sarahema fakamua, ti mai he matatepu ia ke he motu katoa.

2Kua pehe e tau kupu ne vagahau e ia ke he tau tagata kua ha ha i ai he lotu ne fakatu tuai ke he maaga ko Sarahema, ke tuga mo e haana ni a fakamauaga, kua pehe:

3Ko au, ko Alama, nukua moua e au e kotofaaga mai he haaku a matua taane, ko Alama, ke eke mo ekepoa ne mua ki luga he lotu he Atua, ko ia foki ne ha ha i ai e pule mo e malolo mai he Atua ke taute e tau mena nai, kitia la, kua tala atu e au e tau mena nai, ki a mutolu, ne kamata e ia ke fakatu e lotu ke he motu ne ha ha i ai he tau katofia he motu ko Nifai; hanai, ko e motu ne fakahigoa ai ko e motu ko Moromona; hanai, ti papatiso foki e ia e haana a tau matakainaga ke he tau vai i Moromona.

4Kitia la, kua tala atu e au ki a mutolu, ne fakahao a lautolu mai he tau lima he tau tagata he patuiki ko Noa, ha ko e fakaalofa noa mo e mana he Atua.

5Ti kitia la, kua mole e mena ia ne nonofo paea a lautolu ha ko e tau lima he tau Lamana he magaaho ne nonofo a lautolu ke he tutakale; hanai, kua tala atu au ki a mutolu ne nonofo paea a lautolu, ka e liu foki e Atua ke fakahao a lautolu mai he fakapaeaaga ha ko e malolo he haana a tau kupu; ti o mai a mautolu ke he motu nai, mo e kamata a mautolu ke fakatu e lotu he Atua ke he motu nai.

6Ti ko e magaaho nai, kitia la, kua tala atu au ki a mutolu, ma haaku tau matakainaga na e; ko mutolu kua tutaki ke he lotu nai, kua manamanatu nakai a mutolu ke he fakapaeaga he ha mutolu a tau mamatua. Hanai, mo e manamanatu nakai a mutolu ke he fakaalofa noa, moe fakauka haana ki a lautolu? Ti mua atu foki, kua manamanatu nakai a mutolu ke he fakahaoaga he ha lautolu a tau agaaga mai i teoli?

7Kitia la, ne fakakehe e ia ha lautolu a tau loto; hanai, ne fakaofo e ia a lautolu mai he pulumohea, ti aala a lautolu ke he Atua. Kitia la, ne ha ha i ai a lautolu ke he pouli; ka e pete ia, ne kua kikila e tau loto ha lautolu ke he maama he kupu tukulagi; hanai, ne viko takai a lautolu he tau pipi he mate, mo e tau filifili ha teoli, ko e mateaga tukulagi ne kua tatali mai ki a lautolu.

8Ti kua huhu atu au ki a mutolu, ko e haaku tau matakainaga na e, po ke mamate nakai a lautolu? Kitia la, kua tala atu au ki a mutolu nakai, ne nakai mamate a lautolu.

9Ti liu foki au ke huhu atu ki a mutolu, po ke ne mumutu nakai e tau pipi he mate, mo e vevete nakai e tau filifili lapatoa ha teoli ne viko ia lautolu? Kua pehe atu au ki a mutolu, Hanai, ne vetevete a lautolu, mo e fakalahi atu e tau agaaga ha lautolu, mo e uhu ai e lautolu e tau lologo fakaaue. Kua tala atu au ki a mutolu kua hao a lautolu.

10Ko e magaaho nai, kua huhu atu au ki a mutolu ko e heigoa e haoaga ha lautolu? Hanai, ke he tau mena fe ne maeke ai a lautolu ke amaamanaki ke hao ai? Ko e heigoa e kakano ne vevete ai e tau pipi he mate, hanai pihia mo e tau toua lapatoa ha teoli?

11Kitia la, kua maeke ia au ke tala atu ki a mutolu — Ne tua nakai e matua taane haaku, ko Alama, ke he tau kupu ne fakamatala e Apinatai? Ko ia ko e perofeta tapu nakai? Ne vagahau nakai e ia e tau kupu he Atua ti tua nakai e matua haaku, ko Alama?

12Ti ko e tua haana ne hiki lahi ai haana loto. Kitia la, kua tala atu e au ki a mutolu, kua mooli e tau mena oti nai.

13Ti kitia la ne fakamatala e ia e tau kupu ke he tau mamatua ha mutolu ti hiki ai foki e tau loto ha lautolu, mo e fakatokolalo ai a lautolu mo e falanaki a lautolu ke he Atua mooli kua moui. Ti kitia la, ne tua a lautolu ke hoko ke he magaaho fakahiku; ti hao ai a lautolu.

14Ko e magaaho nai, kitia la, kua ole atu au ki a mutolu, ko e haaku a tau matakainaga he lotu na e, kua fanau mai he agaaga nakai a mutolu ke he Atua? Kua moua nakai e mutolu haana a fakatai ke he tau fofoga ha mutolu? Kua moua nakai a mutolu e hikiagaa ke he tau loto ha mutolu?

15Kua tua nakai a mutolu ke he lukutotoaga mai ia ia ne eke a mutolu? Kua hagaao ki mua nakai a mutolu mo e mata kua tua, mo e kitia e tino fakatagata nai kua liu tu mai, mo e tino nakai popo, ko e tau mena popo kua tu mai mo e nakai popo ke tu ki mua he Atua ke moua e fakafiliaga ke lata ai mo e tau gahua ne taute e mutolu ke he tino fakatagata.

16Kua pehe atu au ki a mutolu, kua logona nakai ke he haau a tau manamanatuaga, e leo he Iki kua vagahau atu ki a koe, ke he aho ia, kia hau a koe ki a au, ko koe kua monuina, ha ko e mena kitia la, ko e tau gahua haau ko e tau gahua he tututonu ke he lalolagi?

17Po kua manamanatu a mutolu kua maeke a mutolu ke pikopiko a mutolu ke he Iki ke he aho ia, mo e pehe atu — Ma Iki na e ko e tau gahua ha mautolu ko e tau gahua he tututonu ke he lalolagi — ti fakahao e ia a mutolu?

18Po ke pehe, ke manamanatu a mutolu kua tutu a mutolu ki mua he fakafiliaga he Atua mo e tau loto kua puke he momoko mo e fakaatukehe ha kua manatu e mutolu e tau mena kelea oti ha mutolu hanai, ko e maama katoatoa ke he ha mutolu a tau gahua kelea oti, hanai, mo e maama ne totoko a mutolu ke he tau poakiaga he Atua?

19Kua tala atu au ki a mutolu po ke maeke nakai a mutolu ke onoono atu ke he Atua ke he aho ia mo e loto meā mo e tau lima mea? Kua tala atu au ki a mutolu kua maeke nakai a mutolu ke nikiti hake e tau ulu ha mutolu mo e fakatai he Atua kua mau ai ke he tau mata ha mutolu?

20Kua tala atu au ki a mutolu kua maeke nakai a mutolu ke manatu to hao a mutolu ka e ne fakalolelole a mutolu ke eke mo tau fekafekau ke he tiapolo.

21Kua tala atu au ki a mutolu to iloa e mutolu ke he aho ia ni kua nakai maeke a mutolu ke hao; ha ko e mena kua nakai maeke e taha tagata ke hao a to unu ai e tau tapulu haana ke hina, hanai, ko e haana a tau tapulu to fakameā a to meā he tau kiva ha ko e toto haana ne hagaao ki ai e tau kupu he tau mamatua, ko ia to hau ke lukutoto e haana a tau tagata mai he tau hala ha lautolu.

22Ko e magaaho nai kua ole atu au ki a mutolu, ko e haaku tau matakainaga na e, po ke fefe e tau loto ha mutolu takitokotaha, kaeke ke tutu mai a mutolu ki mua he fakafiliaga he Atua mo e kiva agaia e tau tapulu ha mutolu mo e toto pihia mo e tau mena pilo oti? Kitia la ko e heigoa kia e fakamooli he tau mena na ki a mutolu?

23Kitia la, nakai kia to fakamooli ko mutolu ko e tau tagata kelipopo tagata, hanai, mo e pehe foki kua hala a mutolu ke he tau mena kelea oti kana?

24Kitia la, ko e haaku a tau matakainaga na e, kua manatu kia a mutolu kua maeke e tagata pihia ke nofo ke he kautu he Atua fakalataha mo Aperahamo, mo Isaako pihia mo Iakopo, mo e tau perofeta tapu oti, ko lautolu ia kua fakameā e tau tapulu mo e nakai fai ila kua meā mo e hina.

25Kua tala atu au ki a mutolu, Nakai; kua eke e mena ia ke ui pikopiko ai a ia ne tufugatia a tautolu mai he kamataaga ti kaeke ne pikopiko, a ia mai he kamataaga kua manatu kia kua maeke e tagata pihia ke nofo ke he kautu he lagi; ka kua tolo ki tua a lautolu ha ko e mena ko lautolu ko e tau fanau he kautu he tiapolo.

26Ko e magaaho nai, kitia la, kua tala atu au ki a mutolu, ko e haaku a tau matakainaga na e, kaeke ne kua logona e mutolu kua hiki e tau loto ha mutolu, mo e logona e mutolu ke lologo ai e tau lologo fakaaue mo e fakaalofa, kua ole atu au, kua logona nakai pihia he magaaho nai?

27Ne o nakai mo e fakahakohako a mutolu ki mua he Atua? Kua maeke nakai a mutolu kaeke ke pehe kia mutolu ke mamate a mutolu ke he magaaho nai, kia iloa e mutolu ki a mutolu ni nakai kua mahani fakatokolalo a mutolu ke tuga kua lata? Kua fakameā nakai e tau tapulu ha mutolu ke he toto ha Keriso ko ia ke haele mai ke fakamomoui e tau tagata haana mai he ha lautolu a tau hala?

28Kitia la kua aaki nakai e tau mahani fakatokoluga ha mutolu kua tala atu au ki a mutolu kaeke kua nakai pihia, ti kua nakai amaamanaki a mutolu ke feleveia mo e Atua. Kitia la kua lata a mutolu ke tauteute fakaave; ha ko e mena kua tata mai e kautu he lagi, ti ko e tagata pihia to nakai moua e moui tukulagi.

29Kitia la, kua pehe au ki a mutolu, kua ha ha i ai nakai ia mutolu e taha kua nakai aaki kehe e mahani mahekeheke haana? Kua tala atu au ki a mutolu, ko e tagata pihia kua nakai tauteute a ia; ti kua loto au ke tauteute fakaave e tagata pihia, ha ko e mena kua tata lahi mai e magaaho mo e nakai iloa e ia ko e magaaho fe e magaaho tonu ia, ha ko e tagata pihia to nakai maeke ke pehe kua nakai fai hala a ia.

30Ti pehe foki ke tala atu e au ki a mutolu, kua ha ha i ai kia ia mutolu e taha tagata kua fa va ke he haana a matakainaaga po kua tuku ki ai e tau ekefakakelea loga?

31Oi te fakaalofa ke he taha kua pihia; ha ko e mena kua nakai tauteute e tagata pihia, ti kua tata mai e magaaho kua lata ke tokihala e tagata ia, po kua nakai maeke a ia ke hao ai!

32Hanai, oi te ki a mutolu oti kua taute e tau mahani kelea; kia tokihala, kia tokihala, ha kua vagahau tuai e Iki ko e Atua!

33Kitia la, kua uina a ia ke he tau tagata oti ha kua fakaloa atu e tau lima he fakaalofa noa haana ki a lautolu mo e pehe a ia: Kia tokihala, a to talia e au a mutolu.

34Hanai, kua vagahau pehe: Kia o mai a mutolu ki a au ti kai a mutolu ke he akau he moui; Hanai to kai mo e inu noa a mutolu ke he aleto mo e vai he moui.

35Hanai, o mai a mutolu ki a au mo e ta mai e mutolu e tau gahua he tututonu, to nakai hahala ki lalo a mutolu mo e tolo a mutolu ke he afi.

36Ha ko e mena kitia la, kua tata mai e magaaho ko ia ke nakai ta mai e tau fua mitaki po ko ia kua nakai gahua ke he tau gahua he tututonu, ko lautolu ia kua fai kakano ke tagi mo e tagi aue.

37Oi te ki a mutolu kua taute e tau mahani kelea; ko mutolu kua fakaikaluga ke he tau mena fakateaga he lalolagi, ko mutolu ne pehe kua iloa e tau puhala he tututonu ka e pete ia kua hehe tuai e puhala, tuga mo e tau mamoe kua nakai fai leveki mamoe, mo e nakai logona kua ui atu taha leveki mamoe ki a mutolu mo e ui agaia a ia ki a mutolu, ka kua nakai omaoma a mutolu ke he haana a leo.

38Kitia la, kua tala atu au ki a mutolu, ko e leveki mamoe mitaki kua ui atu ki a mutolu; hanai ke he higoa haana ni kua ui e ia a mutolu, ko e higoa haana ko Keriso; ti kaeke ke nakai fanogonogo a mutolu ke he leo he leveki mamoe mitaki, ke he higoa kua ui a mutolu, kitia la, nakai ko e tau mamoe he leveki mamoe mitaki a mutolu.

39Ko e magaaho nai kaeke nakai ko e tau mamoe he leveki mamoe mitaki a mutolu ko e fuifui mamoe fe a mutolu? Kitia la kua tala atu au ki a mutolu, ko e tiapolo ko e leveki mamoe ha mutolu, ti ko mutolu ko e haana fuifui mamoe; ti ko hai ke nakai talia e mena nai? Kitia la, kua tala atu au ki a mutolu ko ia ke nakai talia e mena nai, ko ia ko e tagata pikopiko mo e tama he tiapolo.

40Ha ko e mena kua tala atu au ki a mutolu, ko e tau mena mitaki kua mai he Atua ia, mo e tau mena kua kelea kua mai he tiapolo ia.

41Ko e mena ia, kaeke kua ta mai he tagata e tau gahua mitaki, kua fanogonogo a ia ke he leo he leveki mamoe mitaki ti kua mui atu a ia ki a ia; ka ko ia kua ta mai e tau gahua kelea, ko ia ke eke mo tama he tiapolo, ha kua fanogonogo a ia ke he leo haana, a ti mui atu a ia ki a ia.

42Ti ko ia kua taute pihia to moua e haana a palepale mai ia ia; ko e palepale, kua moua e ia ko e mate; ke he tau mena he tututonu, kua mate ke he tau gahua mitaki oti kana.

43Ko e magaaho nai, ma haaku a tau matakainaga na e, kua loto au ke fanogonogo a mutolu ki a au, ha kua vagahau au mo e agaaga malolo; kitia la, kua vagahau fakamitaki au ki a mutolu ke nakai maeke ia mutolu ke hehe, ha kua vagahau au ke tuga mo e tau poakiaga he Atua.

44Ha ko e mena, kua kotofa au ke vagahau pihia ke tuga mo e feua tapu he Atua, kua ha ha i ai ia Iesu Keriso; hanai, kua poaki mai ki a au ke tu mo e fakamooli atu ke he tau tagata nai, e tau mena ne vagahau tuai he tau mamatua ha tautolu, hagaao ke he tau mena ka hoko mai.

45Kua nakai kuenaia. Kua manatu kia a mutolu kua iloa e au e tau mena nai, ia au ni? Kitia la, kua fakamooli atu au ki a mutolu kua iloa e au ko e tau mena ne vagahau e au ko e tau mena mooli. Ti manamanatu la a mutolu kua iloa fefe e au kua mooli e tau mena nai?

46Kitia la, kua tala atu au ki a mutolu kua iloa e au e tau mena nai mai he Agaaga Tapu he Atua. Kitia la, ne fakakanopogi mo e liogi au ke he loga e tau aho ke iloa e au e tau mena nai. Ko e magaaho nai kua iloa e au ki a au kua mooli e tau mena nai; ha kua fakailoa mai he Iki ko e Atua e tau mena nai mai he haana a Agaaga Tapu; ti ko e mena nai ko e agaaga he fakakiteaga kua ha ha i a au.

47Ko e mena ia foki, kua tala atu au ki a mutolu ne kua fakakite mai ki a au ko e tau kupu ne vagahau mai he tau mamatua ha tautolu kua hako mo e mooli, ke tuga ni e agaaga he perofetaaga kua ha ha ia au, kua moua foki e mena nai mai he fakakiteaga he Agaaga he Atua.

48Kua tala atu e au ki a mutolu, kua iloa e au kua mooli e tau mena oti ka vagahau atu e au ki a mutolu hagaao ke he tau mena i mua; ti kua tala atu e au ki a mutolu kua iloa e au to haele mai a Iesu Keriso, hanai, Ko e Tama, ko e Tama Fua Taha he Matua, kua puke ke he fakaalofa noa mo e mooli. Kitia la ko ia kua hau ke uta kehe e tau hala he lalolagi, hanai, ko e tau hala he tau tagata takitokotaha kua tumau mo e tua ke he haana a higoa.

49Ko e magaaho nai kua tala atu au ki a mutolu, ko e mena ia ko e feua kua kotofa au ki ai, hanai, ke fakamatala ke he haaku a tau matakainaga fakahelehele, hanai, pihia mo lautolu oti kua nonofo ke he motu; hanai, ke fakamatala ki a lautolu oti kana, ko e tau momotua pihia mo e tau ikiiki ko e tau fekafekau fakalataha mo e tau tagata tokanoa; hanai, kua tala atu au ki a mutolu, ko e taui momotua, mo e tau mamatua pihia mo e atu hau tutupu hake; hanai, ke tagi atu ki a lautolu ke tokihala a lautolu mo e liu fanau fakafoou.

50Hanai, kua pihia mai e Agaaga; kia tokihala a, a mutolu oti kua ha i ai ke he lalolagi katoa, ha ko e mena kua tata mai e kautu he lagi; hanai kua haele mai e tama he Atua mo e katoatoa haana a lilifu, mo e haana a malolo, mo e mana, pihia mo e pule katoatoa. Hanai ma haaku tau matakainaga fakahelehele na e, kua pehe atu au ki a mutolu, kua pehe mai e Agaaga: Kitia la, ko e lilifu he Patuiki he lalolagi katoa; ko e Patuiki foki he lagi, mo e pehe foki, to kikila atu ke he tau fanau oti he tau tagata.

51Mo e pehe mai foki e Agaaga ki a au, hanai, kua tagi mai ki a au ke he leo lahi mo e malolo: Ki a fano a koe mo e vagahau atu ke he tau tagata nai — Ki a tokihala a a mutolu ha ko e mena kaeke ke nakai tokihala a mutolu kua nakai fakaai a mutolu ke moua e kautu he lagi.

52Ku apehe foki kua tala atu e au ki a mutolu kua pehe mai e Agaaga: Kitia la, kua fakatoka tuai e toki ke he matapatu he akau; ti ko e tau akau takitokotaha kua nakai fua mai e tau fua mitaki to hahala ki lalo mo e tolo ai ke he afi, hanai, ko e afi kua nakai maeke ke mate, ko e afi kaka tumau. Kitia la ti manatu ko e Tama Tapu kua vagahau mai.

53Ko e magaaho nai, ma haaku a tau matakainaga fakahelehele na e, kua pehe atu au ki a mutolu, maeke nakai ia mutolu ke totoko ke he tau mena nai; hanai, maeke nakai ia mutolu ke tuku kehe e tau men nai mo e taholi ai e Tama Tapu ki lalo he tau alohui ha mutolu; hanai maeke nakai a mutolu ke fakahakehake e tau loto ha mutolu; hanai, to tumau agaia nakai a mutolu ke tui e tau tapulu tau uka, mo e toka e tau loto ke he tau mena fakateaga he lalolagi, ko e tau koloa ha mutolu.

54Hanai, to tumau kia a mutolu ke manatu kua mua e mitaki he taha ke he taha; hanai, to tumau kia a mutolu ke ekefakakelea e tau matakainaga ha mutolu, kua mahani fakatokolalo mo e mumui ke he feua tapu he Atua, ti kua ta mai a lautolu ke he lotu nai, fakatapu ai a lautolu mai he Agaaga Tapu, mo e taute foki e lautolu e tau gahua ke lata mo e fakatokihalaaga ha lautolu —

55Hanai, to tumau kia a mutolu ke fuluhi e tau tua ha mutolu ki a lautolu kua mativa, mo e nonofogati mo e taofi mau e tau koloa ha mutolu mai ia lautolu?

56Ko e mena fakahiku, ko mutolu oti kua tumau ke he tau mahani kelea ha mutolu, kua tala atu e au ki a mutolu ko lautolu a nai ka hahala ki lalo mo e tolo ke he afi kaeke ke nakai tokihala fakaave a lautolu.

57Ko e magaaho nai, kua tala atu e au ki a mutolu oti kua manako ke mumui atu ke he leo he leveki mamoe mitaki, kia o mai a mutolu mai ia lautolu kua mahani kelea, mo e nonofo kehe a mutolu, mo e aua neke piki a mutolu ke he tau mena kiva ha lautolu; kitia la, to uta kehe e tau higoa ha lautolu, mo e nakai lafi fakalataha e tau higoa ha lautolu kua mahani kelea mo lautolu kua tututonu, ke maeke ke fakakatoatoa e tau kupu he Atua ne pehe: Ko e tau higoa he tau tagata kelea to nakai lafi ia mo e tau higoa he haaku a tau tagata.

58Ha ko e mena ko e tau higoa he tau tagata tututonu to tohi ai ke he tohi he moui, ki a lautolu ia foki to tuku ki ai e au e tufaaga ke he lima matau haaku. Ti ko e magaaho nai, ma tau matakainaga na e, ko e heigoa ha mutolu a talahauaga ke he tau mena nai? Kua tala atu e au ki a mutolu, ka fai talahauaga a mutolu ki ai kua nakai fai kakano ia, ha ko e mena to fakakatoatoa e tau kupu he Atua.

59Ko hai ha mutolu a tau leveki mamoe kua ha ha i ai e loga a tau mamoe ka e nakai leveki a lautolu, mo e nakai maeke ke huhu atu e tau luko favale mo e moumou e fuifui mamoe? Ti kitia la kaeke ke hū atu e taha luko ke he fuifui mamoe haana nakai kia vega kehe e ia? Hanai, ko e fakahikuaga kaeke ke maeke ia ia, to tamate e ia e luko na.

60Ko e magaaho nai kua tala atu e au ki a mutolu kua ui atu e leveki mamoe mitaki ki a mutolu; ti kaeke ke omaoma a mutolu ke he leo haana to ta mai e ia a mutolu ke he lotopa, mo e eke mo mamoe haana a mutolu; ti kua poaki mai a ia ki a mutolu to nakai maeke ke huhu mai e tau luko favale ki a mutolu, to nakai fakaotioti ai a mutolu.

61Ko e magaaho nai, ko au, ko Alama, kua poaki atu au ki a mutolu ke he vagahau haana ne poaki mai ki a au, kia omaoma a mutolu ke he tau kupu ne vagahau atu e au ki a mutolu.

62Kua vagahau au ha ko e poakiaga ki a mutolu kua tutaki ke he lotu; ki a lautolu foki kua nakai tutaki ke he lotu kua vagahau au ke uiina atu ki a mutolu pehe: O mai kia papatiso a mutolu ke he tokihala, ke maeke foki a mutolu ke kai ai he fua mai he akau he moui.