1Ti hoko ai he magaaho nai, kua mole he vagahau ai e Alama e tau kupu nai ki a lautolu, ne nofo hifo a ia ke he kelekele, ti tu ai a Amuleka mo e kamata a ia ke fakaako atu ki a lautolu, kua pehe atu:

2Ma haku tau matakainaga kua manatu au kua nakai maeke ke nakai iloa e mutolu e tau mena kua fakakite atu hagaao ia ke he haele mai ha Keriso, ne kua fakaako atu e maua ko ia ko e Tama he Atua; hanai, kua iloa e au he kua lahi mahaki e fakaako atu he tau mena nai ki a mutolu ke he fakamua to fehola kehe a mutolu mai ia mautolu.

3Ti, ke lata ai mo e ha mutolu a fatuakiloto ke he haaku a matakainaga fakahele ke fakailoa atu e ia ki a mutolu e mena kua lata ia mutolu ke taute, ha ko e ha mutolu a tau matematekelea; ti kua vagahau atu ai e ia ki a mutolu ke tauteute ha mutolu a tau manamanatuaga; hanai, ti hataki e ia a mutolu ke he tua mo e fakauka —

4Hanai, pihia ke maeke ke tua ha mutolu ke to ai e kupu ke he tau loto ha mutolu, ke maeke ia mutolu ke taute ai e fakatai ke iloa ai e haana a mitaki.

5Ti kua kitia ai e maua ko e huhu lahi he tau manamanatuaga ha mutolu ko e kupu kia ko e Tama he Atua, po ke ko e mena to nakai fai Keriso.

6Ti kitia foki e mutolu ne kua fakakite fakatonu he haaku a matakainaga ki a mutolu, ke he tau mena loga, ko e kupu kua ha ha ia Keriso ke hoko atu ke he fakamouiaga.

7Ne fakakite mai he matakainaga haaku e tau kupu a Seno, ko e lukutotoaga to moua mai he Tama he Atua, ti pihia foki e tau kupu a Senoka; ti ne ole fakatokolalo foki a ia ki a Mose, ke fakaite fakatonu kua mooli e tau mena nai.

8Ti ko e magaaho nai, kitia la, to fakamooli atu au ki a mutolu kua mooli e tau mena nai. Kitia la, kua tala atu au ki a mutolu, kua iloa e au to haele mai a Keriso ke he tau fanau he tau tagata, ke fua e ia e tau agahala he haana a tau tagata, mo e to fakamagalo e ia e tau hala he lalolagi; ha kua vagahau pihia e Iki ko e Atua.

9Ha kua tonuhia ni ke hoko ai e laveakiaga; ha kua fakakite ai ke he fakatokaaga lahi he Atua Tukulagi kua lata ke ha ha i ai e laveakiaga, neke mahaikva e tau tagata oti kana; hanai, kua maō oti a lautolu; hanai, kua veveli oti a lautolu mo e galo noa ai, mo e mahaikava oti ni, ka ko e laveakiaga hokoia kua tonuhia ke fakahoko.

10Ha kua tonuhia ke ha ha i ai e laveakiaga lahi fakahiku; hanai, nakai ko e poa he tagata, po ke ha manu, po ke ha manu lele, ha ko e nakai koe poa tagata; ka ko e poa nakai fai fakahikuaga ko e poa tukulagi.

11Kua nakai ha ha i ai ha tagata kua maeke ke eke mo poa haana a toto ke magalo ai e tau hala he taha. Ti kaeke he magaaho nai ke kelipopo tagata e taha, kitia la, to maeke nakai he fakatufono, ha koe fakatufono tonu, ke uta kehe e moui he haana a matakainaga? Kua tala atu au ki a mutolu, Nakai.

12Ka kua manako e fakatufono ke he moui haana ne kelipopo; ko e mena ia ka nakai lata ke pehe ko e ha mena noa ni ka e nakai ko e laveakiaga kua nakai fai fakaotiaga ke hukui aki e tau hala he lalolagi.

13Ko e mena ia, kua tonuhia ke ha ha i ai e laveakiaga lahi fakahiku; ti hoko ai, po ke tonuhia ke hoko ai, kia fakaoti e fakamaligi toto; ke fakakatoatoa ai e fakatufono a Mose; hanai, to fakakatoatoa e tau mena oti e tau mena ikiiki mo e kiliiku, mo e nakai fai ke mole kehe.

14Ti kitia la, ko e kakano haia he fakatufono, ko e tau mena oti kua hagaao atu ke he laveakiaga lahi fakahiku; ti ko e laveakiaga lahi fakahiku ko e Tama he Atua, hanai, nakai fai fakaotiaga mo e tukulagi.

15Ti pihia to ta mai e ia e fakamouiaga ki a lautolu oti ka tua ke he haana a higoa; ko e fakatokaaga pauaki he laveakiaga fakahiku, ke fakahoko mai ai e fakaalofa noa, ke mahala ai e fakafiliaga mo e ta mai ai e kakano ke he tau tagata ke tua a lautolu ti fakatokihala.

16Ti pihia e fakamafolaaga he fakaalofa noa e pule he fakafiliaga, mo e takai ia he tau lima he fakamaluaga, ka ko ia ne nakai fakagahua e tua ke fakatokihala kua tokaveli noa a ia ke he fakatufono ne hagaaki lahi ke he fakafiliaga; ko e mena ia, ko ia ni ne ha ha i ai e tua ke fakatokihala kua hoko ki ai e fakatokaaga lahi mo e tukulagi he fakamouiaga.

17Ko e mena ia kia tuku atu he Atua ki a mutolu ma haku tau matakainaga, kia kamata a mutolu ke fakagahua ha mutolu a tua ke he fakatokihala, kia kamata ai a mutolu ke ui atu ke he haana a higoa fakatapuina, kia fakaalofa mai a ia ki a mutolu;

18Hanai, kia tagi atu ki a ia ke fakaalofa mai; ha kua lahi ni a ia ke hao ai a mutolu.

19Hanai, kia fakatokolalo a mutolu, mo e fakatumau ke liogi atu ki a ia.

20Kia tagi atu ki a ia ka ha ha he tau fonua ha mutolu, hanai ha ko e ha mutolu a tau fuifui manu.

21Kia tagi atu ki a ia he tau fale ha mutolu, hanai, ha ko e ha mutolu a kaina katoa, ke he magaaho pogipogi, magaaho la mo e magaaho afiafi.

22Hanai, kia tagi atu ki a ia ha ko e malolo he ha mutolu a tau fi.

23Hanai, kia tagi atu ki a ia ha ko e tiapolo, ko ia ko e fi he tau mena tututonu oti kana.

24Kia tagi atu ki a ia ha ko e ha mutolu a tau fua he fonua, kia monuina ai a mutolu.

25Kia tagi atu ha ko e tau fuifui manu he fonua, kia fakaloga ai.

26Nakai ko e ia ni; kua lata ke liligi mai ha mutolu a tau agaaga ke he tau liu fale mo e tau mena galo, mo e tau tutakale ha mutolu.

27Hanai, ti ko e magaaho ka nakai tagi atu a mutolu ke he Iki, kia puke ha mutolu a tau loto, ke he tau liogi ki a ia ma e ha mutolu a moui mafola, pihia ma e mafola ha lautolu ne tata atu ki a mutolu.

28Ti kitia la he magaaho nai, ma haku tau matakainaga fakahelehele, kua tala atu au ki a mutolu, aua neke manatu a mutolu ko e fakaoti ia; ka mole atu he taute e mutolu e tau mena na ka e kaeke ke vega kehe e mutolu a lautolu ne matematekelea, mo e nakai fai tapulu, mo e nakai ahiahi ke he tau gagao mo e foaki atu ma lautolu ha mutolu a tau mena, kaeke kua fai, ma lautolu kua matematekelea — kua tala atu au ki a mutolu, ka nakai taute e mutolu e tau mena nai, kitia la, kua nakai aoga ha mutolu a au liogi, nakai fai mena ke moua e mutolu, kua tatai a mutolu mo e tau tagata pikopiko kua fakatikai e tua.

29Ko e mena ia, ka nakai manatu e mutolu ke mahani fakaalofa, kua tuga e tau otaota a mutolu kua lulu kehe ai he tau tagata eke lapatoa, (kua nakai fai aoga) kua taholi he tau tagata.

30Ko e magaaho nai ma haku tau matakainaga, kua manako au, ha kua moua e mutolu loga e tau fakamooliaga, kitia ai foki kua fakamooli mai he tau tohi e tau mena nai, kia o mai a mutolu mo e ta mai e tau fua ke he fakatokihalaaga.

31Hanai, kua manako au kia o mai a mutolu mo e toka ia e fakamao he ha mutolu a tau loto; he kitia la, ko e magaaho nai mo e aho nai e ha mutolu a laveakiaga; ti ko e mena ia, kaeke ke fakatokihala mo e nakai fakamao ha mutolu a tau loto, ko e magaaho nai ni ke moua ai e fakatokaaga ma e fakamouiaga mo e ta mai ai ki a mutolu.

32He kitia la, ko e mouiaga nai ko e magaaho haia ke tauteute ai e tau tagata ke feleveia ai mo e Atua, hanai, ko e tau aho he mouiaga nai ko e tau aho haia ma e tau tagata ke gahua ai.

33Ti ko e magaaho nai, tuga ne kua vagahau atu e au, ne kua nakai maeke ke pihia a mutolu; ha ko e agaaga ia ne toka ai ke he tau tino ha mutolu he magaaho ne toka ai e mutolu e mouiaga nai, ko e agaaga taha ia ni ka ha ha i ai e malolo ke pule ke he tau tino ha mutolu he lalolagi tukulagi ia.

34To nakai maeke a mutolu ke pehe, ka hoko ai e fakalavelave kelea na, to tokihala au, to liu au ke he haaku a Atua. Nakai, kua nakai maeke ke pihia a mutolu; ha ko e agaaga ia ne toka ai ke he tau tino ha mutolu he magaaho ne toka ai e mutolu e mouiaga nai, ko e agaaga taha ia ni ka ha ha i ai e malolo ke pule ke he tau tino ha mutolu he lalolagi tukulagi ia.

35He kitia la, kaeke kua fakaholo e koe e aho he haau a fakatokihalaaga ke hoko ke he mate, kitia la, kua eke a koe mo fekafekau ke he agaaga he tiapolo, mo e fakamau e ia a koe maana, ko e mena ia, kua uta kehe ai e Agaaga he Iki mai ia koe, kua nakai fai nofoaga a ia ia koe, ti kua pule katoatoa e tiapolo ki a koe; ko e fakahikuaga a ia he tau tagata kelea.

36Ti kua iloa e au e mena nai, ha kua pehe mai e Iki to nakai nofo a ia he tau faituga kua nakai fakatapuina, ka e to nofo a ia he tau loto ha lautolu ne tututonu; hanai, ti ne pehe mai foki a ia to nonofo hifo e tau tututonu he haana a kautu, mo e nakai o kehe ai; ka to hina ai ha lautolu a tau tapulu ha ko e toto he Punua Mamoe.

37Ti ko e magaaho nai, ma haku tau matakainaga fakahelehele, kua manako au ke manatu e mutolu e tau mena nai, mo e tauteute e mutolu ha mutolu a fakamouiaga mo e matakutaku ki mua he Atua, mo e ua liu ke fakatikai to haele mai e Keriso.

38Mo e ua fetoko atu foki ke he Agaaga Tapu, ka kia moua ai e mutolu, mo e uta e mutolu e higoa a Keriso; kia fakatokolalo a mutolu ke hoko ke he kelekele, mo e tapuaki atu ke he Atua, ke he ha mena ni kua ha ha i ai a mutolu, ke he agaaga mo e mooli, mo e nonofo ai mo e fakaaue he tau aho taki taha, ma e loga he tau fakaalofa mo e tau monuina kua tuku mai e ia ki a mutolu.

39Hanai, kua tala atu au ki a mutolu, ma haku tau matakinaga, kia mataala a mutolu ke liogi tumau, ke ua futiaki he kamatamata he tiapolo a mutolu, ke aua neke mahala a mutolu ia ia, ke ua eke a mutolu mo haana a tau fekafekau ke he aho fakahiku, he kitia la, kua nakai fai palepale mitaki a ia ma mutolu.

40Ti ko e magaaho nai ma haku tau matakainaga fakahelehele, kua hataki atu au ki a mutolu, kia fakauka, ke fakauka ke he tau mena uka oti kana; ke ua tauui atu ki a lautolu ne vega kehe a mutolu ha ko e ha mutolu a nonofogati, neke hala ai a mutolu tuga a lautolu ia;

41Ka kia moua e mutolu e fakauka, mo e fakauka ke he tau mena uka ia, mo e amaamanakiaga malolo to okioki mai a mutolu ke ha mutolu a tau matematekelea a taha aho.