1Ne kua kitia ai e Alama kua fakamate a Siseroma ha ko e tau kupu a Amuleke, kua kitia e Siseroma kua moua e Amuleke a ia ke he haana a tau pikopiko mo e tau fakavai ke lali a ia ke fakakelea a ia, nukua kitia foki e ia ti kamata a ia ke vivivivi ha kua ofo e haana a tau manatu ke he haana a mahani kelea; ne kamata ai a Alama ke vagahau ki a ia, ke fakamooli ai e tau kupu ha Amuleke mo e fakamaama atu falu a mena, ko e fakamaamaaga mai he tau tohi e tau kupu ne nakai hoko ki ai a Amuleke.

2Ne logona he tau tagata e tau kupu ne vagahau e Alama ki a Siseroma; ha ko e mena tokologa e tau tagata ne o mai, ti pehe e tau kupu haana:

3Siseroma na e, nukua kitia a koe kua hele tuai a koe ke he haau a tau pikopiko mo e tau fakavai, nakai ni pikopiko a koe ke he tau tagata hokoia ka kua pikopiko a koe ke he Atua; kitia la, kua iloa e ia e tau manamanatuaga oti haau, mo e maama foki ia koe kua fakamaama mai he Agaaga haana e haau a tau manamanatuaga ki a maua.

4Ti iloa foki e koe kua iloa e maua ko e lagatau haau ko e lagatau fakavai, ke tuga mo e mahani fakavai he tiapolo, ke maeke ia koe ke fakapikopiko mo e fakavai e tau tagata nai ke totoko mai a lautolu ki a maua, ke ekefakakelea ki a maua mo e vega kehe e lautolu a maua —

5Ko e fakatokaaga a nai he haau a fi ti kua fakagahua e ia e haana a malolo ki loto ia koe. Kua loto au ke manatu e koe ko e tau kupu haaku kua vagahau atu ki a koe kua vagahau e au ke he tau tagata oti.

6Kitia la, kua tala atu e au ki a mutolu, ko e hele nai ko e hele he fi, ne tauteute e ia ke hele aki e tau tagata nai, ke maeke a ia ke ta mai a mutolu ke eke mo tau fekafekau ki a ia, ke viko a mutolu aki e haana a tau filifili, ke lili ai a mutolu tukulagi, ke he matematekelea, tuga mo e malolo he haana a fakapaeaaga.

7Ko e magaaho ne fakaoti ai e Alama e tau kupu nai, ne une ki mua e vivivivi ha Siseroma ha kua iloa tonu e ia e malolo he Atua; mo e iloa foki e ia kua iloa e Alama mo Amuleke a ia, ha kua iloa tonu e ia kua iloa e laua e tau manamanatuaga mo e tau amaamanakiaga he haana a loto; ha kua moua e laua e malolo ke maeke ke iloa e laua e tau mena nai ke tuga mo e agaaga he perofetaaga.

8Ne kamata a Siseroma ke huhu fakamakamaka atu ki a laua, ke maeke ia ia ke iloa atu foki e tau mena he kautu he Atua. Ti pehe age a ia ki a Alama: Ko e heigoa e kakano he tau kupu ne vagahau ai e Amuleke hagaao ke he liu tu mai he tau tagata mamate, ke liu tutu mai e tau tagata oti mai he mate, ko e tau tagata tututonu pihia mo e tau tagata nakai tututonu, mo e ta mai a lautolu ke tutu ki mua he Atua mo e moua ai e fakafiliaga ke lata ai mo e ha lautolu a tau gahua?

9Ko e magaaho ia ne kamata ai a Alama ke fakamaama atu ki a ia, mo e pehe age: Kua foaki age ke he tokologa ke iloa e tau mena galo he Atua; pete ia kua poaki mai ki a lautolu ia ke talahau ni ke he tau tama he tau tagata e maaga he kupu, ke lata ai mo e fanogonogo mo e omaoma ha lautolu ki a ia.

10Ko e mena ia ko ia ke fakamao haana a loto, ko ia foki ke moua e mena tote he tau kupu; ti ko ia ke nakai fakamao ai haana a loto, ki a ia kua foaki ai e lahi he kupu, a to foaki age ki a ia ke iloa ai e tau mena galo he Atua, a to maama katoatoa ai e ia.

11Ko lautolu ke fakamao ai ha lautolu a tau loto to moua ni e lautolu e mena tote a to nakai iloa e lautolu haana a tau mena galo; ti ko e magaaho ia kua fakapaea a lautolu ke he tiapolo, mo e takitaki e ia a lautolu ki lalo ke he mate. Kua pihia e kakano he tau kupu, ko e tau filifili ha teoli.

12Ne vagahau fakatonu foki a Amuleke hagaao ke he mate, mo e liu tu mai he tino mate ke he tino nakai mate, mo e tutuaga ki mua he laulau fakafili he Atua, ke moua ai e fakafiliaga ke lata ai mo e ha lautolu a tau gahua.

13Kaeke ne maō ai e tau loto ha tautolu, hanai, kaeke ne fakamao ai e tau loto ha tautolu ke he kupu, kua pihia ai ke nakai moua ai ki a tautolu, kua hagahaga kelea ai a tautolu, ha ko e mena to fakahala a tautolu.

14Ha ko e mena to fakahala ai a tautolu ha ko e ha tautolu a tau kupu, hanai, to fakahala a tautolu ha ko e ha tautolu a tau gahua oti; to nakai meā a tautolu; to fakahala foki a tautolu ha ko e ha tautolu a tau manamanatuaga; ti ko e tutuaga hagahaga kelea nai to nakai fakaai a tautolu ke haga hake ke he ha tautolu a Atua; to fiafia lahi a tautolu kaeke ke maeke ia tautolu ke poaki ke he tau maka mo e tau mouga ke mokulu hifo ki luga ia tautolu ke fakamumuli ai a tautolu mai i mua haana.

15Ka kua nakai maeke e mena ia; kua lata ke tutu a tautolu ki mua haana ke he haana a lilifu, mo e haana a pule, mo e haana a malolo, mo e haana a mana, mo e pule katoatoa, mo e fakamooli a tautolu mo e fakama tukulagi, kua tonu e haana a tau fakafiliaga; titonu e haana a tau gahua oti kana, mo e kua fakaalofa noa a ia ke he tau fanau he tau tagata, mo e kua ha ha ia ia e malolo ke fakahao ai e tau tagata oti takitokotaha, kua tua ke he haana a higoa mo e kua ta mai ai e tau fua kua lata mo e tokihalaaga.

16Ti kitia la, kua tala atu e au ki a mutolu, to hoko mai ai e taha mate, ko e mate ke ua aki; ko e mate ia ko e mate fakaagaaga; ke he magaaho ia ko ia ne mate ke he haana a tau hala ke tuga mo e mate ke he tino, to mate foki a ia fakaagaaga; hanai, to mate a ia ke he tau mena hagaao ke he tututonu.

17Ko e magaaho ia, ke moua ai e lautolu e fakamamahiaga ke he ha lautolu a tau loto ke tuga mo e afi mo e taio, kua lupa ki luga tukulagi tukumuitea; ke he magaaho ia to lili ai a lautolu ki lalo ke he mate tukulagi, ke tuga mo e malolo mo e fakapaeaaga ha Satani, kua pule a ia ki a lautolu ke he tau mena kua loto a ia ki ai.

18Ke he magaaho ia, to tala atu e au ki a mutolu, kua tatai a lautolu tuga kua nakai ha ha i ai e lukutotoaga; ha ko e mena nakai maeke a lautolu ke fakahao ai ke lata mo e fakafiliaga he Atua; ti nakai maeke foki a lautolu ke mamate ha ko e mena kua nakai fai mena kelea atu foki.

19Ne hoko ai ke he magaaho ne fakaoti ai e fakamatalaaga a Alama ke he tau kupu nai, kua kamata e tau tagata ke mua atu e ofo ha lautolu.

20Ne ha ha i ai e taha ko Anatona, ko ia foki ko e takitaki ne mua ha lautolu, ne tu ki mua a ia mo e pehe age a ia ki a ia: Ko e heigoa e mena nai ne vagahau mai e koe, ke liu tutu mai e tau tagata mo e liliu ai a lautolu mai he tino nai ke he tino nakai mate mo e to nakai hoko e mate ke he agaaga.

21Ko e heigoa e kakano he kupu tohi kua pehe ne tuku ai he Atua e kerupi moe pelu puhopuho ke he faahi uta he fonua i Etena, neke o atu e ha tautolu a tau mamatua fakamua ki ai mo e kai ai e fua mai he akau he moui, ti momoui tukulagi ai? Kua kitia ai e tautolu kua nakai fai puhala ke moua ai e laua e moui tukulagi.

22Ne tala age a Alama ki a ia: Ko e mena nai ne amanaki au ke fakamaama ki a mutolu, Kua maama ki a tautolu ne veli a Atamu ha kua kai e ia e fua akau ne fakatapu, ke tuga mo e kupu he Atua; kua maama foki ki a tautolu, ko e veliaga nai a ti galo noa ai mo e veveli ai e tau tagata oti kana.

23Kitia la, kua tala atu e au ki a mutolu ke he magaaho nai kaeke ne maeke a Atamu ke kai ai e fua mai he akau he moui ke he magaho ia, kua nakai hoko ai e mate, to eke e kupu mo mena noa, mo e eke mo tagata pikopiko e Atua ha kua pehe a ia: Kaeke ke kai e koe to mate mooli a koe.

24Ti kua iloa ai e tautolu kua hoko mai e mate ke he lalolagi, hanai, ko e mate ne talahau ai e Amuleke, ko e mate ke he tino; pete ia, kua ha ha i ai e taha magaaho kua foaki ke he tagata ke lata ke tokihala ai a ia ko e mena ia kua eke e mouiaga nai mo tiviaga; ko e magaaho ke tauteute ai ke feleveia mo e Atua; ko e magaaho ke tauteute ma e magaaho ka nakai fai fakaotiaga kua hagaao ki ai ha maua a tau talahauaga, ka mole atu e liu tu mai he mate.

25Ti, kaeke ne nakai fai fakatokaaga he lukutotoaga, ne tauteute mai tuai he fakaveaga he lalolagi, kua nakai fakaai ke fai liu tu mai he mate; ka ko e mena ne ha i ai e fakatokaaga ke he lukutotoaga, ke fakahoko ai e liu tu mai he mate, tuga kua talahau ki ai.

26Kitia la foki, kaeke ne maeke he tau mamatua fakamua ha tautolu ke o atu mo e kai ai ke he akau he moui to nonofo a laua ke he kelea tukulagi, ha kua nakai fai magaaho ke tauteute ai to eke e fakatokaaga he lukutotoaga mo mena kua nakai aoga ia ti eke e kupu he Atua mo mena noa, ha kua nakai fai kakano.

27Ka e kitia la, ne nakai pihia; ka kua kotofa tuai ke mamate ai e tau tagata; mo e ka mole atu e mate, ke o mai a lautolu ke he fakafiliaga, ko e fakafiliaga ne hagaao ha maua a talahauaga ki ai, ko e fakaotiaga haia.

28Kua mole atu he fifili he Atua e tau mena nai ke hoko ke he tau tagata, kitia la, kua iloa e ia kua lata ke iloa he tau tagata e tau mena ne kua kotofa e ia ma lautolu;

29Ko e mena ia, ne fakafano mai e ia e tau agelu ke tutala ai mo lautolu, mo e kitia foki he tau tagata e haana a lilifu.

30Ti kamata e tau tagata mai he magaaho ia ke ui atu ke he haana a higoa; ko e mena ia ne tutala ai e Atua mo e tau tagata, mo e fakailoa e ia ki a lautolu e fakatokaaga he lukutotoaga ne tauteute tali mai he fakaveaga he lalolagi; ne fakailoa e ia e tau mena nai ki a lautolu ke lata ni mo e ha lautolu a tua, mo e tokihala mo e ha lautolu a tau gahua tapu.

31Ko e mena ia, ne tuku mai e ia e tau poakiaga ke he tau tagata, ne kua holifono ai ke he tau poakiaga fakamua hagaao ke he tau mena fakalalolagi, ti tuga mo e tau Atua a laua, kua iloa e mitaki mo e kelea, kua maeke ia laua ke taute po kua hoko ki a laua e puhala ke gahua, ke tuga mo e ha laua a finangalo mo e ha laua a loto, ko e taute e mena kelea po ke taute e mena kua mitaki.

32Ko e mena ia, ne tuku mai he Atua e tau poakiaga ki a lautolu, he mole he fakailoa e ia e fakatokaaga he lukutotoag ki a lautolu, ke aua neke taute e lautolu e tau mena kelea, mo e moua ai e fakahalaaga ke he mate ke ua aki, ko e mate tukulagi hagaao ke he tau mena he tututonu; ha ko e mena nakai fai malolo e lukutotoaga ke he tau mena pihia, kua nakai fakaai ke moumou e tau gahua he fakafiliaga ke lata ai mo e tututonu mua ue atu he Atua.

33Ka e ne ui e Atua ke he tau tagata ke he higoa he haana a Tama (ko e puhala a ia he lukutotoaga he tau tagata ne fakatu mai tuai) mo e pehe mai: Kaeke ke tokihala a mutolu, mo e nakai fakamaō ai ha mutolu a tau loto, to fakaalofa au ki a mutolu, ke he haaku a Tama Fuataha:

34Ko e mena ia, ko ia ke tokihala, mo e nakai fakamao ai haana a loto, to fai tufaaga a ia ke he fakaalofa noa mai he haaku a Tama Fuataha, ke he fakamagaloaga he haana a tau hala; mo e to hoko mai a lautolu ke he haaku a okiokiaga.

35Ka ko ia ke fakamao ai e haana a loto mo e taute e tau mena kelea, kitia la, kuo omonuo au ke he haaku a ita to nakai hu mai a ia ke he haaku a okiokiaga.

36Ko e magaaho nai ma haku tau matakainaga na e, kitia la, kua tala atu e au ki a mutolu, kaeke ke fakamao ai e ha mutolu a tau loto to nakai huhu atu a mutolu ke he okiokiaga he Iki; ko e mena ia kua fakaita ai he tau mahani kelea ha mutolu a ia ke fakafano mai e ia e haana a ita lahi ki luga ia mutolu ke tuga mo e fakalagāaga fakamua, hanai, ke tuga mo e haana a tau kupu ke he fakalagāaga fakamui tuga foki mo e fakamua, ke he ha mutolu a mateaga tukulagi ke he ha mutolu a tau agaaga; ko e mena ia ke tuga mo e kupu haana, ke he mateaga fakamui, pihia mo e fakamua foki.

37Ko e magaaho nai, ma haku tau matakainaga, tuga kua maama ai ia tautolu e tau mena nai, mo e mooli e tau mena nai, kia tokihala a tautolu, mo e aua neke fakamao ai e ha tautolu a tau loto, ke nakai fakaita ai e tautolu e Iki ko e ha tautolu a Atua ke toho hifo haana a ita lahi ki luga ia tautolu ke he tau mena nai, ko e haana a tau poakiaga ke ua aki, kua tuku mai e ia ki a tautolu; ka kia huhu atu a tautolu ke he okiokiaga he Atua, kua tauteute tuai ke tuga mo e haana a kupu.