Ko e Veveheaga 11
Ko e tau fakafili mo e ha lautolu a palepale — Ko e Tau tupe mo e tau puhala fuafua he tau Nifai — Kua fakagoagoa a Siseroma e Amuleke.
1Kua ha ha i ai e fakatufono, po ko lautolu kua kotofa ke eke mo fakafili, ke lata ai mo e tau magaaho kua gahua ai a lautolu ke fakafili ai a lautolu kua tutu ki mua ke moua e fakafiliaga.
2Kaeke ne kaitalofa e taha tagata ke he taha tagata foki, ti nakai totogi e kaitalofa ia, ti kua hokotaki ke he fakafili; ti fakafili foki he fakafili ke lata mo e fakatufono, ti fekau e ia e tau leoleo ke ta mai e tagata ia ki mua haana; kua fakafili foki e ia a ia ke tuga mo e fakatufono mo e tau tala hagaao ki a ia, kua taute ia ke totogi he tagata e haana a kaitalofa, po ke uta kehe e haana a tau koloa ke lata ai, po ke vega kehe a ia mai he nonofoaga he tau tagata, kua higoa a ia ko e kaiha mo e fofo mena.
3Ne moua he fakafili e haana a palepale ke lata mo e magaaho haana — taha e senine auro he aho, po ke taha e senuma ario ko e mena ia kua tatai mo e senine he auro; kua lata e tupe ia mo e fakatufono kua fakamau.
4Kua fakahigoa pehe e tau vala kehekehe he auro, mo e ha lautolu a ario ke tuga mo e ha lautolu a uho. Kua fakahigoa i he tau Nifai e tau tupe nai ha kua nakai tatai e tauteaga he tupe ha lautolu mo e tauteaga he tupe he tau Iutaia kua ha ha i ai i Ierusalema; nakai fua mena foki a lautolu ke tuga mo e tau tagata Iutaia; ka kua fakakehe ai ha lautolu a tauteaga he tupe pihia mo e puhala fuafua mena ke lata ai mo e tau manatu mo e tau momoui he tau tagata ke he tau atuhau oti; a to hoko mai ke he magahala he pule he tau iki fakafili ne fakatu ai he patuiki ko Mosaia.
5Kua pehe e taueaga he tupe — ko e senine auro, ko e seona auro, ko e suma auro mo e limana auro.
6Ko e senuma ario, ko e amuna ario, ko e eseroma ario mo e onasi ario.
7Ko e senuma ario kua tatai mo e taha senine auro, kua tatai ia mo e taha e fuaaga he tau tega palī, po ke taha e fuaaga he tau tega kehekehe oti.
8Ko e taha e seona auro ko e ua ia e tau senine.
9Ko e taha e suma auro kua ua e seona.
10Ko e taha e limana auro kua tatai ia mo e tau mena oti ia e katoatoa.
11Koe amuna ario kua tatai mo e ua e tau senuma.
12Ko e eseroma kua tatai mo e fa e tau senuma.
13Ti ko e onasi kua tatai mo e tau mena oti ia e katoatoa.
14Kua pihia e totouaga he ha lautolu a tau numela ikiiki ke he ha lautolu a tauteaga tupe —
15Ko e sipilona ko e hafa e senuma; ko e mena ia kua tatai e taha e sipilona mo e hafa e fuaaga he tau tega pali.
16Ko e sipiluma ko e hafa e sipilona.
17Ko e lea ko e hafa e sipiluma.
18Kua pihia e tau numela ke lata ai mo e ha lautolu a tauteaga he tupe.
19Ko e anisiona auro ko e tolu e sipilona.
20Ti, ko e ha lautolu a amaamanakiaga ke muhu mena, ha kua moua e lautolu e ha lautolu a palepale ke lata ai mo e ha lautolu a tau gahua, ko e mena ia foki, ne fakalagalaga e lautolu e tau tagata ke taufetoko mo e falu a mena ke lata ai mo e tau mahani kelea, ke maeke a lautolu ke lahi e gahua, ke moua e tau tupe ke lata ai mo e tau fakafiliaga kua tutu ki mua ha lautolu; ti ko e kakano ia ne uhu e lautolu e tau tagata ke vihiatia ki a Alama mo Amuleke.
21Ne kamata e tagata nai ko Siseroma, ke huhū age ki a Amuleke mo e pehe age: Tali mai la e koe e falu a huhū ka huhū atu e au ki a koe? Ko Siseroma ko e tagata kua iloilo lahi ke he lagatau ia he tiapolo ke maeke ia ia ke moumou ai e tau mena mitaki; ko e mena ia, ne pehe age a ia ki a Amuleke: Tali mai nakai e koe e tau huhū haaku ka huhū atu e au ki a koe?
22Ne tala age a Amuleke ki a ia: Hanai, kaeke kua lata e mena ia mo e agaaga he Iki kua ha ha ia au; ha ko e mena to nakai vagahau kehe au mai he agaaga he Iki. Ti pehe a Siseroma ki a ia: Kitia la, hanai e ono e onati ario, to foaki atu e au e tau mena oti nai ki a koe kaeke ke fakatikai e koe kua moui ai e Tagata Mua Ue Atu.
23Ne pehe a Amuleke ki a ia; Ko koe ko e tama ha teoli, ko e ha kua kamatamata ai e koe au? Iloa nakai e koe kua nakai talia e tau tagata tututonu ke he tau kamatamata pihia?
24Tua kia a koe kua nakai fai Atua? Kua tala atu e au ki a koe, Nakai, kua iloa e koe kua fai Atua, ka kua mua atu e fakaalofa haau ke he tau koloa haau ka e nakai fakaalofa a koe ki a ia.
25Ko e magaaho nai kua pikopiko a koe, ki mua he Atua, ki a au. Pehe mai a koe ki a au — Kitia la hanai e ono e onati, ko e tau mena uho lahi, to foaki atu e au ki a koe — ka ko e loto haau to nakai foaki mai e koe e tau mena nai ki a au; ne ha ha i ai ni he loto haau e amanakiaga ke fatipiko au ke he Atua moui mo e mooli, ke maeke ia koe ke fakakelea ai au. Ha ko e mena kelea lahi nai, to moua e koe haau a palepale.
26Ti pehe a Siseroma ki a ia: Kua pehe kia a koe kua ha ha i ai e Atua mooli mo e moui?
27Ne tala age a Amuleke pehe: Hanai, kua fai Atua mooli mo e moui.
28Ko e magaaho nai ne pehe a Siseroma; Kua loga kia e Atua?
29Ne tala age a ia: Nakai.
30Ne liu pehe atu a Siseroma he magaaho nai ki a ia: Iloa fefe e koe e tau mena nai?
31Ti pehe age a ia: Ko e agelu ne fakailoa mai e tau mena nai ki a au.
32Ne liu pehe foki a Siseroma ki a ia: Ko hai a ia ka haele mai?
33Ti tali age a ia pehe: Hanai.
34Ne liu pehe foki a Siseroma: Laveaki nakai e ia a lautolu fakalataha mo e ha lautolu a tau hala? Ne taliage a Amuleke mo e pehe age ki a ia: Kua tala atu e au ki a koe to nakai pihia; ha ko e mena to nakai maeke a ia ke liu tua ha kupu haana.
35Ne pehe age a Siseroma he magaaho nai, ke he tau tagata: Kia manatu e mutolu e tau mena nai; ha ko e mena ne tala mai a ia kua ha ha i ai taha ni e Atua ka e pehe foki a ia to haele mai e tama he Atua, ka e o nakai laveaki e ia e haana a tau tagata — ke tuga kua fai pule a ia ke poaki ke he Atua.
36Ne liu tala age a Amuleke ki a ia ke he magaaho nai: Kitia la kua pikopiko a koe, ha kua tala mai a koe ne vagahau au ke tuga kua ha ha ia au e pule ke poaki ke he Atua ha kua vagahau e au to nakai laveaki e ia e haana a tau tagata fakalataha mo e ha lautolu a tau hala.
37Kua liu foki tala atu e au ki a koe kua nakai maeke ia ia ke laveaki a lautolu ka e ha ha i ai ia lautolu a tau hala; ha ko e mena kua nakai maeke au ke fakatikai e haana a tau kupu, ti tala mai e ia kua nakai maeke e ha mena kua nakai mea ke moua e kautu he lagi; ko e mena ia maeke fefe a mutolu ke laveaki kaeke ke nakai hohoko a mutolu ke he kautu he lagi? Ko e mena ia, kua nakai maeke a mutolu ke hao ai kaeke kua ha ha i ai ia mutolu e tau hala.
38Ne liu vagahau foki a Siseroma ki a ia mo e pehe age: Ko e Tama he Atua, ko ia kia ko e Matua Tukulagi?
39Ne tali age a Amuleke ki a ia: Hanai, ko ia ko e Matua Tukulagi ha ha he lagi mo e lalolagi, mo e tau mena oti kua ha ha i ai; ko ia ko e kamataaga mo e fakaotiaga; ko e fakamua mo e fakamui;
40Ti to haele mai a ia ke he lalolagi mo e lukutoto e ia e haana a tau tagata; to fua foki e ia e tau holifono ha lautolu ia kua tua ke he haana a higoa; ko lautolu ia ke moua e moui tukulagi, ti to nakai hoko e laveakiaga ki a taha foki.
41Ha ko e mena ia, to tumau ni e tau tagata mahani kelea ke tuga kua nakai ha ha i ai e lukutotoaga, ka ko e veveteaga ni he pipi he mate; ha ko e mena kitia la, to hokomai e aho to liu tutu mai e tau tagata oti mai he mate mo e tutu a lautolu ki mua he Atua mo e moua ai e lautolu e fakafiliaga ke lata ai mo e ha lautolu a tau gahua.
42Kua ha ha i ai e mate kua fakahigoa ai ko e mate fakalalolagi; ti ko e mate ha Keriso to vevete ai e tau pipi he mate fakalalolagi nai, ke liu tutu mai e tau tagata oti kana mai he mate fakalalolagi nai.
43To liu fakalataha ai e tino mo e agaaga ke eke mo tino katoatoa; to liu mau ai e tau faahi tino oti mo e katoatoa ai, ke tuga ni mo e tau tino ha tautolu he magaaho nai; to tutu ai a tautolu ki mua he Atua, mo e maama e tautolu tuga kua maama e tautolu ke he magaaho nai, mo e maama fakatonu e tautolu ha tautolu a tau hala oti.
44Ko e mena ia, to hoko e liliu tutu mai ai ke he tau tagata oti kana, ko e tau fuakau mo e tau fuata, ko e tau fekafekau mo e tau tagata tokanoa, pihia e tau taane mo e tau fifine, tatai foki e tau tagata kelea mo e tau tagata tututonu; mo e nakai galo foki e ha fulu ulu taha mai he ulu he ha taha tagata; ka e to liu mau ai e tau mena oti ke he haana a tuaga ke tuga mo e tauteaga he magaaho nai, ke he tino mo e ta mai ai mo e tutu ki mua he laulau fakafili ha Keriso Ko e Tama, mo e Atua ko e Matua, pihia mo e Agaaga Tapu, ko e Atua taha Tukulagi, ke moua ai e fakafiliaga ke tuga mo e ha lautolu a tau gahua, ko e mitaki po ke kelea.
45Kitia la ne vagahau atu au ki a mutolu hagaao ke he mate ke he tino fakalalolagi, pihia mo e liu tu mai he tino fakalalolagi. Kua tala atu au ki a mutolu kua tu mai e tino fakalalolagi ke he tino nakai mate, po ke mai he mate, mai foki he mate fakamua ke he moui, ke nakai liu ke mate foki, kua liu fakalataha e tau agaaga mo e ha lautolu a tau tino mo e nakai liu vevehe kehe ai, kua katoatoa fakaagaaga mo e nakai mate, kua nakai maeke foki ke kitia ai e tau mena kelea.
46Ko e magaaho ne fakaoti ai e Amuleke e haana a tau kupu nai, kua liu kamata ai e tau tagata ke ofo lahi, mo e kamata foki a Siseroma ke vivivivi. Kua pihia e fakaotiaga he tau kupu ha Amuleke, po kua pihia ni e tau kupu kua tohia ai e au.