1Ko e magaaho nai ma haku tama, kua lahi haaku a tau mena kua manako ke tala atu ki a koe kehe mai he tau mena ne vagahau e au ke he haau a taokete; he kitia la, kua kitia nakai e koe e mahani mitaki he haau a taokete, haana mahani fakamooli, mo e haana a makaukau ke omaoma e tau poakiaga he Atua? Kitia la, nakai kia kua taute e ia e fakafifitakiaga mitaki maau?

2Ha kua nakai fakateliga a koe ke he tau kupu ne vagahau e au ke tuga e haau a taokete, he magaaho ne ha ha i ai a koe mo e tau tagata Sorama. Ko e mena nai ne ai fiafia ai au ki a koe; Ne lahi e hakehake haau ha ko e haau a malolo mo e haau a iloilo.

3Nakai oti ia ma haku tama. Ne taute e koe e taha mena kua fakamomoko lahi ki a au; ne tiaki e koe e fekafekauaga, ka e fina atu a koe ke he motu ko Silona tata atu ke he tuutaaga he motu he tau Lamana he muitua ke he fifine fakataka ko Isapela.

4Hanai, ne fofo he fifine ia e tau loto he tokologa; ka e nakai lata ke pihia a koe ma haku tama. Kua lata ia koe ke gahua ke fekafekau ke he kotofaaga ne kotofa a koe ki ai.

5Nakai kia iloa e koe ma haku tama, ko e tau mena nai ko e mena fakalialia a ia ki mua he Iki; hanai, kua mua he fakalialia ke he tau hala oti; ka ko e fakamaligi toto po ke fakatikai e Agaaga Tapu kua mua atu.

6He kitia la, kaeke ke fakatikai e koe e Agaaga Tapu ka kua fita he hufia ai ia koe, ti iloa e koe kua fakatikai e koe, kitia la, ko e agahala ia kua nakai fai fakamagaloaga; hanai, ti ko e ha taha ke kelipopo tagata ke he maama mo e iloilo ke he Atua, to nakai mukamuka ke moua e ia e fakamagaloaga; hanai, kua tala atu au ki a koe ma haku tama, to nakai mukamuka he tagata ia ke moua e faka-magaloaga.

7Ti ko e magaaho nai ma haku tama, kua manako au ki mua he Atua kua nakai hala a koe ke he agahala kua lahi pehe na. To nakai fakaloaloa atu haaku a tau tala ha ko e haau a tau agahala, ke fakamomoko e haau a agaaga, kaeke ko e nakai ko e mena mitaki maau ni.

8Ka e kitia la, kua nakai maeke ke fufu e koe haau a agahala mai he Atua; ka nakai fakatokihala a koe to tumau e tau mena na mo fakamooliaga ki a koe ke he aho fakahiku.

9Ko e magaaho nai ma haku tama, kua manako au ke tokihala a koe mo e tiaki e koe haau a tau hala, mo e ua liu ke muitua ke he tau mena ne kitia he tau mata haau, ka e kalo kehe a koe mai he tau mena oti ia; ka nakai eke pihia e koe to nakai fakaai a koe ke moua e kautu he Atua. Oi, ki a manatu, ti uta mo koe, ti kalo kehe a koe mai he tau mena na.

10Ti poaki atu au ki a koe kia fina atu a koe ke he haau a lafu taokete mo e pulega mo laua e haau a tau gahua; he kitia la, ko e fuata tote a koe, ti kua kitia ai kua lata ke lagomatai ai he haau a lafu taokote. Ti fanogonogo ke he ha laua a tau hatakiaga.

11Ua toka noa e koe a koe ke futiaki he tau mena nakai aoga mo e fakagoagoa; ua toka e tiapolo ke futiaki haau a loto ke mui atu ke he tau fifine fakataka kelea. Kitia la, ma haku tama na e, kua ta mai e koe e tau mahani kelea ke he tau Sorama; ha ko e magaaho ne kitia ai e lautolu e haau a tau mahani ti nakai tua a lautolu ke he haaku a tau kupu.

12Ti kua pehe mai e Agaaga he Atua ki a au he magaaho nai: Poaki ke he haau a tau fanau ke mahani mitaki, neke futiaki e lautolu e tau loto he tokologa ke he mate; ko e mena ia kua poaki atu au ma haku tama, ka ko e matakutaku ke he Atua, kia toka a e koe haau a tau mahani kelea.

13Ka kia haga atu ke he Iki mo e haau a manamanatuaga katoa, haau a fakamakamaka mo e malolo katoa; aua ia neke futiaki kehe e koe e tau loto ke tokologa ke he tau mahani kelea; ka kia liu atu a koe ki a lautolu, mo e fakakite atu haau a tau lekua mo e tau mahani hepehepe ne taute e koe.

14Aua neke kumi atu ke he tau koloa po ke tau mena fakateaga he lalolagi nai; he kitia la to nakai maeke e tau mena ia ke uta ai mo koe.

15Ko e magaaho nai ma haku tama, to vagahau atu au hagaao ke he haele mai ha Keriso. Kitia la, kua tala atu au ki a koe ko ia haia ha haele mai ke uta kehe e tau hala he lalolagi; hanai, to haele mai a ia ke ta mai e tala mitaki he fakamouiaga ke he haana a tau tagata.

16Ti ko e magaaho nai ma haku tama, ko e fekafekau ia hanai ne kotofa a koe ki ai ke fakamatala atu e tala mitaki nai ke he tau tagata, ke tauteute ha lautolu a tau manamanatuaga; ke hoko mai ai e fakamouiaga ki a lautolu ia, kia tauteute e lautolu e tau manamanatuaga he ha lautolu a tau fanau ke logona e kupu he magaaho ka haele mai a ia.

17Ti ko e magaaho nai to fakailoa atu e au ke he manamanatuaga haau hagaao ia ke he mena nai. Kitia la kua ofo ai a koe ko e ha kua fakakite tuai ai e tau mena nai ka e nakai la hoko mai ia. Kitia la, kua tala atu au ki a koe, nakai kia mahuiga e agaaga ke he magaaho nai ke he agaaga he magaaho he haana a haele mai.

18Nakai kia kua lata ke fakakite e fakatokaaga he lukutotoaga ke he tau tagata nai katoa mo e ha lautolu a tau fanau?

19Nakai kia mukamuka he magaaho nai ke fakafano mai he Iki haana a agelu ke fakakite mai e tala mitaki ki a tautolu ti pihia ke he ha tautolu a tau fanau, po ke magaaho ka mole ai haana a haele mai?