1Ti hoko ai, ne o atu a lautolu, mo e kamata ke fakamatala e kupu he Atua ke he tau tagata, kua huhu atu ke he ha lautolu a tau fale tapu, mo e ha lautolu a tau fale, hanai, ti hoko foki e fakamatala ha lautolu ke he tau puhala tu.

2Ti hoko ai, ha kua gahua lahi a lautolu ke he tau tagata, ne kamata agataha ke kautu ai ia lautolu e vahega tagata mativa; ha kua kitia la, ne vega kehe a lautolu mai he tau fale tapu ha kua gatu fua ha lautolu a tau tapulu —

3Ko e mena ia kua nakai talia a lautolu ke huhu atu ke he ha lautolu a tau fale tapu ke tapuaki ke he Atua, kua totou ni kua kiva; ko e mena ia kua mativa foki, hanai kua totou pehe he ha lautolu a tau matakainaga ko e tau otaota, ko e mena ia, kua mativa mo e tau koloa fakalalolagi; mo e kua mativa foki ke he ha lautolu a tau loto.

4Ko e magaaho nai, ha ne fakaako atu mo e vagahau atu a Alama ke he tau tagata ke he mouga ko Onita, ne o atu ki a ia e moto tagata ko lautolu ia ne tutala a tautolu ki ai, ne mativa ke he tau loto, ha ko e ha lautolu a nonofogati ke he tau mena he lalolagi.

5Ti o mai a lautolu ki a Alama, ti ko ia ne tu i mua ia lautolu ne pehe atu ki a ia: Kitia la, ko e heigoa ha lautolu nai, ko e haaku a tau matakainaga ke taute, ha kua fakavihia a lautolu he tau tagata oti ha kua nonofogati, hanai, mua atu e tau ekepoa; he vega kehe e lautolu a mautolu mai he tau fale tapu ha mautolu ne gahua lahi a mautolu ke tufugatia ke he tau lima ha mautolu; ne vega kehe e lautolu a mautolu ha kua nonofogati lahi a mautolu; ti kua nakai fai mena ke tapuaki atu ai a mautolu ke he ha mautolu a Atua; ti kitia la, ko e heigoa e mena ke taute e mautolu?

6Ko e magaaho, ne logona ai e Alama e mena nai, ne fuluhi e ia a ia, ke haga atu haana a mata ki a ia, ti fofoga e ia mo e fiafia lahi ha kua fofoga e ia ko e ha lautolu a tau matematekelea a ti kua loto fakatokolalo mooli ai a lautolu ti kua mautali ai a lautolu ke logona e kupu.

7Ko e mena ia ne nakai liu vagahau atu a ia ke he taha moto tagata; ka ne fakaloa atu e ia haana a lima, mo e tagi atu ki a lautolu ne fofoga e ia kua loto holoilalo mooli mo e pehe atu ki a lautolu:

8Kua kitia atu e au kua tokolalo ha mutolu a tau loto; ti kaeke ke pihia, kua uhoaki a mutolu.

9Kitia la, kua pehe mai ha mutolu a matakainaga, ‘Ko e heigoa ha mautolu ke taute? — ha kua vega kehe a mautolu mai he ha mautolu a tau fale tapu, kua nakai maeke ia mautolu ke tapuaki atu ke he ha mautolu a Atua.

10Kitia la kua tala atu au ki a mutolu, kua manatu kia a mutolu kua nakai maeke ia mutolu ke tapuaki ke he Atua ka ko e taute hokoia ni i loto he tau fale tapu?

11Ti nakai ko e ia ni, kua huhu atu au, kua manatu kia a mutolu kua nakai lata ke tapuaki ke he Atua ka ko e laga taha ni he faahi tapu?

12Kua tala atu au ki a mutolu, kua mitaki ni kua vega kehe a mutolu mai he ha mutolu a tau fale tapu, kia loto fakatokolalo ai a mutolu, mo e loto matala ai a mutolu; ha kua lata ke fakaako a mutolu ke loto matala; ha kua vega kehe a mutolu, mo e vihiatia ai he tau matakainaga ha mutolu a mutolu ha ko e ha mutolu a nonofogati, a ti moua, ai e mutolu e loto fakatokolalo; ha kua lata ni ke moua e mutolu e fakatokolalo.

13Ti ko e magaaho nai, ha kua fakatokolalo ha ko e matematekelea a mutolu, uhoaki a mutolu; ha ko e tagata he taha magaaho, ka hoko pihia ke nofo fakatokolalo ha ko e matematekelea, kua kumi e ia e fakatokihalaaga; ko e magaaho nai, ke mooli, ko e ha tagata kua tokihala to moua e ia e fakaalofa noa; ti ko ia ke moua e fakaalofa noa mo e fakauka ke he fakahikuaga, ko ia foki ke moua e fakamouiaga.

14Ti ko e magaaho nai, tuga kua tala atu e au ki a mutolu ha kua nonofo fakatokolalo a mutolu ha ko e matematekelea, kua fakamonuina ai a mutolu, nakai kia manatu a mutolu kua mua atu e monuina ha lautolu kua fakatokihala ha ko e kupu?

15Hanai, ko ia kua mahani fakatokolalo fakamooli, mo e fakatokihala ha ko e haana a tau hala, mo e fakauka ke hoko ke he fakahikuaga to fakamonuina a lautolu ia — hanai kua mua e fakamonuinaaga ki a lautolu ne nonofo fakatokolalo ha ko e ha lautolu a nonofogati.

16Ko e mena ia, uhoaki a lautolu ne loto fakatokolalo ka e nakai fai mena ke lata ai ke pihia; po kua pehe, e talahauaga ki ai, uhoaki a ia kua tua ke he kupu he Atua, mo e papatiso mo e nakai uka ke he loto, hanai, mo e nakai ta mai ke iloa e kupu, po ke ha ko e matematekelea a ti iloa ai e kupu to tua agataha ki ai.

17Hanai, kua tokologa ne pehe mai: Kaeke ke fakakite mai e koe ki a mautolu e taha fakamailoga mai he lagi, to maeke ke iloa maaliali ai e mautolu; to tua a mautolu.

18Kua huhu atu au he magaaho nai, ko e tua nakai a ia? Kitia la kua tala atu e au ki a mutolu, Nakai; ha ko e mena kaeke ke iloa he tagata e taha mena kua nakai fai kakano ke tua a ia, ha kua iloa tuai e ia.

19Ti ko e magaaho nai, kua lahi fefe e malaia haana ne iloa e finagalo he Atua mo e nakai taute mai ia ia ne tua ni hokoia, po kua fai kakano a ti tua ai, ka kua veli ke he hala?

20Ti ko e mena nai kia fuafua ni e mutolu. Kitia la kua tala atu e au ki a mutolu kua ha i ai ke he taha lima tuga ni kehe taha; ti pihia ke he tau tagata taki tokotaha ke lata mo e haana a gahua.

21Ti ko e magaaho nai, ne vagahau au hagaao ke he tua, nakai ke iloa ai fakatonu e tau mena; ko e mena ia kaeke kua ha ha ia mutolu e tua, kua amaamanaki a mutolu ke he tau mena nakai kitia, ka kua mooli.

22Ti ko e magaaho nai, kitia la, kua tala atu au ki a mutolu, kua manako au ke manatu e mutolu, kua fakaalofa e Atua ki a lautolu oti kua tua ke he haana a higoa; Ko e mena ia kua manako a ia, fakamua, kia tua a mutolu, hanai pihia ke he haana a kupu.

23Ko e magaaho nai, kua tuku mai haana a tau kupu mai he haana a tau agelu ke he tau tagata, hanai, nakai ni ke he tau tagata taane ka e pihia ke he tau fifine foki. Nakai ko e ia ni; kua tuku foki e tau kupu ke he tau fanau ti fakagogoa ai e tau lotomatala mo e tau pulotu ke he loga e tau magaaho.

24Ti ko e magaaho nai ma haku tau matakainaga fakahelehele, tuga ni kua manako a mutolu ke iloa ia au po ke heigoa ha mutolu ke taute ha kua hukia a mutolu mo e vega kehe — ko e magaaho nai kua nakai manako au ke manatu a mutolu kua amanaki au ke fakafili a mutolu fakalata ke he mena mooli —

25Ha kua nakai manatu a ko mutolu oti kua loto fakatokolalo ha ko e matematekelea, ha kua mooli kua tua au kua ha ha i ai falu ia mutolu kua loto fakatokolalo ni kehe ha mena fe ni kua ha ha i ai a lautolu.

26Ko e magaaho nai, tuga ne vagahau ai e au hagaao ia ke he tua — nakai ko e iloilo katoatoa — pete ia kua ha ha i ai he tau kupu. Kua nakai iloa fakatonu ai e mutolu ke he mogo fakapa, ke maaliali, tuga ni ke he tua — nakai ko e iloilo kua katoatoa.

27Ka e kitia la, kaeke ke mataala mo e fakaalaala ha mutolu a tau alaga, ke fakatai e haaku a tau kupu, mo e tua pete ni he tote, hanai, pete ni ke kamata aki e manako ke tua, kia eke e manako ia ke gahuahua ia koe, a to tua ai a koe, ke maeke ia koe ke fai magaaho ma e haaku a tau kupu.

28Ko e magaaho nai to fakatai e tautolu e kupu ke he tega akau. Ko e magaaho ka eke ke fakatoka ai e mutolu ke to ai e taha tega akau kehe ha mutolu a tau loto, kitia la, kaeke ko e tega mooli, po ke tega mitaki, ti nakai tiaki ai e mtolu ha ko e ha mutolu a nakai tua, mo e totoko e mutolu e Agaaga he Iki, kitia la to kamata ai ke koloputa i loto ia mutolu, ti kaeke ke logona e mutolu e koloputa ia, to pehe ai a mutolu ki a mutolu ni — Liga ni ko e tega akau mitaki a nai, po ke kupu mitaki a nai ha kua kamata ke fakalaulahi ai haaku a agaaga, hanai, kua kamata ke fakafiafia haaku a maamaaga, hanai kua kamata ke eke mo mena lolo ia ki a au.

29Ti kitia la, he magaaho ia nakai kia eke e mena ia mo mena ke fakatupu aki haau a tua? Kua tala atu e au ki a mutolu, Hanai; pete ia ne nakai la tupu ia ke katoatoa e iloilo.

30Ka e kitia la, ha ne koloputa e tega akau, mo e kamata ai ke goto, mo e kamata ke tupu to pehe ai a mutolu kua mitaki e tega ia; he kitia la, ne koloputa ai, ti goto, mo e kamata ai ke tupu.

31Ti ko e magaaho nai, kitia la, kua mooli kia a mutolu kua mitaki e tega akau nai? Kua tala atu au ki a mutolu, Hanai; ha ko e tau tega oti to tupu mai ai e akau, ne fua mai ai e tega ia.

32Ko e mena ia, kaeke ke tupu e tega, kua mitaki ia, kaeke ke nakai tupu, kitia la, kua nakai mitaki ia, ko e mena ia kua liti ai ke he vao.

33Ti ko e magaaho nai, kitia la, ha kua taute e mutolu e fakatai ia, ti ne to ai e tega akau, ti ne koloputa mo e goto ai, mo e kamata ai ke tupu, ti iloa ai ni kua mitaki e tega ia.

34Ti ko e magaaho nai, kitia la, kua katoatoa nakai ha mutolu a tau mena iloa? Hanai, kua katoatoa ha mutolu a iloilo ke he mena ia, ti ko e ha mutolu a tua kua pihia ha kua iloa e mutolu, ha kua iloa e mutolu kua koloputa ha mutolu a tau agaaga ha ko e kupu, ti iloa foki e mutolu kua goto ai, ti kua kamata ha mutolu a maamaaga ke eke mo mena ke fiafia ai a mutolu, mo e kamta ke fakalaulahi ai ha mutolu a tau manamanatuaga.

35Oi, ka pihia kua nakai kia mooli e mena ia? Kua tala atu au ki a mutolu, Hanai, ha ko e maama haia; ti ko e ha mena kua maama, kua mitaki, ha kua mahino, ko e mena ia kua iloa ai e mutolu kua mitaki, ti kitia la he magaaho nai, ka mole atu he fakatai e mutolu e maama nai kua katoatoa ai nakai ha mutolu a iloa?

36Kitia la, kua tala atu e au ki a mutolu, Nakai; ti kua nakai lata ke fakatoka kehe ha mutolu a tua, ha kua fakagahua ni e mutolu ha mutolu a tua ke to aki e tega akau ke taute e fakatai ke iloa ko e mitaki nakai e tega ia.

37Ti kitia la, ha kua kamata e akau ke tupu, to pehe a mutolu; Kia leveki fakamitaki e tautolu, ke hokohoko, mo e tupu ai mo e moua e tautolu e tau fua mai ai! Ti kitia la he magaaho nai, kaeke ke leveki fakamalolo a tautolu ki ai to hokohoko, mo e tupu, ti fua mai ai tuai.

38Ka e kaeke ke tiaki e mutolu e akau, mo e nakai manatu ke leveki ki ai, kitia la to nakai hokohoko; ti kaeke ke vela mai e la mo e mahunu ai, to fifigo ni ha ko e mena nakai ha ha i ai ha hoko, to huo ni e mutolu mo e tiaki.

39Ti nakai pehe e mena ia kua nakai mitaki e tega akau ia, ti nakai pehe kua nakai manako ke he tau fua mai ai; ka kua pihia ha kua talu ē e kelekele ha mutolu, ti nakai leveki ke fagai e mutolu e akau, ko e mena ia kua nakai maeke ke moua mai e mutolu ha fua mai ai.

40Ti pihia, ka nakai fagai e mutolu e kupu, mo e haga atu e mata mo e tua ke he tau fua mai ai, to nakai maeke ke tau ai e mutolu ha fua mai he akau he moui.

41Ka e kaeke ke fagai e mutolu e kupu, hanai, fagai e akau he magaaho ne kamata ai ke tupu, aki e tua mo e makau, mo e fakauka, mo e amanaki ke he tau fua mai ai, to hokohoko ai ni, ti kitia la, to eke ia mo taha akau ke tupu hake ke he moui tukulagi.

42Ti ha ko e ha mutolu a makau mo e ha mutolu a tua, mo e ha mutolu a fakauka ke he kupu kua fagai ai, ke maeke ke hokohoko i ia mutolu, kitia la, to hoko ai to tau ai e mutolu e tau fua, kua mua he mitaki, kua mua he humelie ke he tau mena humelie oti, ti mua e hina ke he tau mena oti kua hina, hanai, kua mua he mea ke he tau mena oti kua mea; to kai ai a mutolu ke he tau fua akau ia a to makona ai, mo e nakai hoge ai, mo e nakai fia inu.

43Ko e magaaho ia ma haku tau matakainaga to helehele e mutolu e tau palepale he ha mutolu a tua, ha mutolu a makau, mo e fakauka, mo e fakahautoka, mo e fakatalitali ke he akau ke ta mai ai ki a mutolu e tau fua.