1Ti ko e magaaho nai ma haku tama, pehe nai falu a mena foki kua manako au ke tala atu ki a koe; he iloa e au kua tupetupe haau a manatu ke he tutu mai ha lautolu kua mamate.

2Kitia la, kua tala atu au ki a koe, kua nakai fai liu tu mai, po ke pehe, ke he falu a kupu, nakai maeke e tino nai ke liliu ke he tino nakai mate, ko e mena popo nakai maeke ke faliu ke nakai popo — a to mole atu a haele mai ha Keriso.

3Kitia la, ko ia ke fakahoko mai e liliu tu mai ha lautolu kua mamate. Ka e kitia la, ma haku tama, nakai la hoko ia ke he liu tu ia kua ha ha i ai loga e tau mena galo ne kua toka ai, ne nakai iloa ai he ha tagata ka ko e Atua hokoia ni. Ka to fakakite atu e au taha e mena ne ole fakamakamaka au ke he Atua ke fakailoa mai ki a au hagaao ia ke he liu tu mai.

4Kitia la, to hoko ai e magaaho to liliu tutu mai e tau tagata oti mai he mate. Ko e magaaho ke hoko ai e mena na, nakai iloa he ha tagata taha; ka kua iloa ni he Atua e magaaho ia.

5Ko e lagataha, po ke lagaua aki, po ke tolu aki, ke liliu mai ai e tau tagata mai he mate, nakai lekua ia; ha kua iloa he Atua e tau mena oti na; ka kua mafola ni ki a au ke iloa to pihia — to haha i ai e magaaho kua fakatoka ke liliu tutu mai e tau tagata oti mai he mate.

6To fai magaaho he vaha loto he mate mo e magaaho ke liliu tutu mai ai.

7Ti kua ole au he magaaho nai ke iloa ko e fefe e tau agaaga he tau tagata mai he magaaho ka mamate ai to hoko e magaaho ke liliu tutu mai ai?

8Po ke lagafiha ke liliu mai ai e tau tagata nakai lekua ia; ha ko e mena nakai taha e magaaho ke mamate ai, nakai lekua e mena ia; kua tatai ni mo e taha e aho ia ke he Atua, ka kua fuafua ni e magaaho ke he tau tagata.

9Ko e mena ia, kua fakatoka e magaaho ke liliu tutu mai e tau tagata oti mai he mate; to fai vaha he magaaho ka mate ai mo e magaaho ke liu tu mai ai. Ti ko e magaaho nai ko e heigoa e mena ka hoko ke he tau agaaga he tau tagata, ko e mena ia kua ole fakamakamaka au ke he Iki ke iloa e au; ti ko e mena nai kua iloa e au.

10Ti ka hoko ke he magaaho ke liliu tutu mai, to iloa e lautolu kua iloa he Atua e tau magaaho oti kua fakatoka ai ma e tau tagata.

11Ti, hagaao ia ke he agaaga he vaha loto he mate mo e liu tu mai — Kitia la, ne kua fakailoa mai he agelu ki a au, ko e tau agaaga oti, he magaaho to toka ai e tau tino nai, hanai, ko e tau agaaga oti, ko e mitaki po ke kelea, kua uta ia ki kaina ke he Atua ne foaki e moui ma lautolu.

12Ti ko e magaaho ia ka hoko ai, ko e tau agaaga ha lautolu ne tututonu to hoko ai ke he fiafiaaga, kua fakahigoa ai ko parataiso, ko e okiokiaga, ko e mafola, to okioki a lautolu mai he tau mena uka oti mo e tau fakalavelave oti mo e tau fakaatukehe oti.

13Ti to hoko ai, ko e tau agaaga he tau tagata kelea, hanai, kua kelea — he kitia la, kua nakai ha ha i ai ha veveheaga po ke ha vala he Agaaga he Iki; he kitia la, ne fifili e lautolu e tau gahua kelea ka e nakai ko e mitaki; ko e mena ia ne hufia a lautolu he agaaga he tiapolo, mo e pule ai ki a lautolu — to vega kehe a lautolu ia ki fafo ke he pouli kikio; to ha ha i ai e tagi mo e tagi aue, mo e konokonoi he tau nifo, ti pihia ha ko e ha lautolu a tau mahani kelea, ne mumui mo e fekafekau ke he finagalo he tiapolo.

14Ti pihia e talahauaga ke he tau tagata mahani kelea, hanai, ke he pouli, kua kelea mo e matakutakuina ha kua vela e vale mo e ita he Atua ki a lautolu; to tumau pihia a lautolu ti pihia foki e tau tututonu i parataiso a to hoko ke he liu tutu mai ha lautolu.

15Ko e magaaho nai, kua maama ai ke he falu e fiafiaaga nai mo e matematekelea nai ke he tau agaaga to hoko e liu tu mai, ko e liu tu mai fakamua haia. Hanai, to pehe au to fakahigoa ia ko e liu tu mai, ko e nikiti ki luga he agaaga po ke agaaga kua tuku ia ke he fiafiaaga po ke matematekelea, ke tuga ia mo e tau kupu kua vagahau mai.

16Ti kitia la, kua liu foki talahau mai, kua ha ha i ai e liu tu mai fakamua, ke liu tu mai a lautolu oti ne ha ha i ai, kua ha ha i ai, ne nakai la fanau mai, to hoko atu ke he liu tu mai a Keriso mai he mate.

17Ti, ua manatu a tautolu ko e liu tu mai fakamua nai, kua fakakite ai pehe nai, kua maeke ke pehe ko e liu tu mai he tau agaaga ke he veveheaga he fiafiaaga po ke matematekelea. Kua manatu kia a koe kua pihia e kakano he mena nai?

18Kitia la kua tala atu au ki a koe, Nakai ko e kakano ko e liu fakalataha e agaaga mo e tino, ha lautolu mai ia Atamu ke hoko mai ke he liu tu mai ha Keriso.

19Ko e tau agaaga mo e tau tino ha lautolu kua fakakite atu po ke liu fakalataha ai he taha e magaaho, ko e tau tagata kelea mo e tau tagata tututonu, kua ai pihia atu au; kua mitaki ni ke pehe to o mai oti a lautolu; ke he falu a kupu, to hoko ai e liu tu mai ki a lautolu to fakamui ki a lautolu kua mamate he mole atu e liu tu mai a Keriso.

20Nakai kua pehe ia ma haku tama ko e ha lautolu a liu tu mai to hoko ia ka liu tu mai a Keriso; ka e kitia la, kua fakakite e au e haaku manatu, ko e tau agaaga mo e tau tino to liu fakalataha ai, ha lautolu ne tututonu, he liu tu mai a Keriso mo e haana a haele hake ke he lagi.

21Kaeke ke huhu pehe to hoko kia e mena ia ke he haana a liu tu mai po ke fakamui, kua nakai tala atu e au; ka kua pehe ni au to ha ha i ai e vaha tali he magaaho ne mate ai mo e magaaho ke liu tu mai ai e tino ti ko e agaaga to nofo ia ke he fiafiaaga po ke matematekelea a to hoko e magaaho ne fakatoka he Atua ke o mai ai a lautolu ne mamate mo e liu fakalataha ai, e agaaga mo e tino, m e ta mai ai mo e tu ki mua he Atua, mo e fakafili ai ke lata mo e ha lautolu a tau gahua.

22Hanai, ko e ta maiaga a ia he liuaki mai he tau mena ne vagahau mai he tau gutu he tau perofeta.

23To liuaki mai e agaaga ke he tino, mo e tino ke he agaaga; hanai, ko e tau alaga mo e tau tutaki toliuaki ai ke he tino; hanai, pihia ke he ha lauulu taha to nakai galo ia; ka to liuaki mai e tau mena oti ke he ha lautolu a talagaaga mo e tokaaga, kua katoatoa mo e mitaki.

24Ti ko e magaaho nai ma haku tama, ko e liuaki maiaga haia ne talahau mai he tau gutu he tau perofeta —

25Ti ko e magaaho ia ka kikila mai ai a lautolu ne tututonu he kautu he Atua.

26Ka e kitia la, ko e mate kua kelea ka hoko ai ke he tau tagata kelea; ha koe mena to mamate a lautolu ke he tau mena he tututonu; ha kua nakai mea a lautolu, ti nakai maeke he ha mena kua nakai mea ke moua e kautu he Atua; ka kua vega kehe mo e fakatoka ke kai ai ke he tau fua he ha lautolu a tau fakauka po ke tau gahua, ko e tau mena kelea; mo e inu ke he tau kele ke kapiniu kona.