1Ko e magaaho nai ma haku tama, kua fai talahauaga au hagaao ia ke he liuakimaiaga ne kua talahau mai; he kitia la, kua ha ha i ai falu kua fakaliliu kehe e tau tohi, ti kua o kehe mamao ha ko e mena nai. Ti kitia e au kua tupetupe foki haau a manatu ha ko e mena nai. Ka e kitia la, to fakamaama atu e au ki a koe.

2Kua tala atu au ki a koe ma haku tama, ko e fakatokaaga he liuakimaiaga kua taute pauaki ke lata mo e fakafiliaga he Atua; ha kua lata he tau mena oti ke liuaki mai ke he tokaaga tonu fakamua. Kitia la kua taute pauaki mo e tonu, ke lata ai mo e mana mo e liu tu mai ha Keriso, ke liuaki mai e agaaga he tagata ke he tino, mo e tau faahi oti he tino ke liuaki ke he tuaga.

3Ti kua pauaki foki ke lata mo e fakafiliaga he Atua kia fakafili e tau tagata oti ha ko e ha lautolu a tau gahua; ti kaeke ne mitaki ha lautolu a tau gahua he mouiaga nai, mo e loto mea a lautolu, kua lata foki ke liu moua e lautolu e tau mena mitaki he aho fakamui.

4Ti kaeke ne kelea ha lautolu a tau gahua to liuaki ni ki a lautolu e kelea. Ko e mena ia, to liuaki e tau mena oti ke lata ai, ko e tau mena oti ke he tuaga fakamua — ko e tino mate ke nikiti ke he tino nakai mate, ko e mena popo ke he nakai popo — nikiti hake ke he fiafiaaga kua nakai fai fakaotiaga ke moua e kautu he Atua, po ke matematekelea kua nakai fai fakaotiaga ke moua e kautu he tiapolo, ko e taha he taha lima, koe taha he taha —

5Ko ia ne nikiti hake ke he fiafiaaga ke lata mo e haana manako ke he fiafiaaga, po ke mitaki ha ko e haana manako ke he mitaki; ti ko e taha ke he matematekelea ha ko e haana manako ke he matematekelea, ti tuga ni moe haana a manako ke eke mena kelea ke he aho loa to pihia ni haana a palepale ka hoko ke he po.

6Ti pihia ke he taha lima. Ti kaeke ne tokihala a ia mai he haana a tau hala, mo e manako ke he tututonu he tau aho oti he haana a moui to pihia ni e haana a palepale ke he tututonu.

7Ko lautolu ia hanai kua lukutoto he Iki; hanai, ko lautolu ia haia kua uta ai mo e fakahao mai he po ne nakai fakaoti e pouli; ti pihia a lautolu ko e tutu po ke veveli; he kitia la, ko lautolu ni ke fakafili a lautolu, koe taute e tau mena mitaki po ke tau mena kelea.

8Ti ko e tau fakatokaaga he Atua kua nakai maeke ke fakahui; ko e mena kua tauteute e puhala ko e ha taha kua finagalo to hu atu ki ai mo e moui ai.

9Ti kitia la he magaaho nai ma haku tama ua hopo e koe e taha mena foki ke kelea ai ke he haau a Atua ha ko e tau fakatufono ia, ne kua kitia e koe ko e hagaao a ia ke he hala.

10Ua manatu, ha kua talahau mai e liuakimaiaga to liuaki mai a koe mai he hala ke he fiafiaaga. Kitia la, kua tala atu au ki a koe, ko e mahani kelea to nakai fakaai ke pehe koe fiafiaaga.

11Ti ko e magaaho nai ma haku tama, ko e tau tagata oti ha ko e ha lautolu ni a ia, po ke pehe atu au, ha ko e ha lautolu a talagaaga kua ha ha i ai a lautolu mo e Atua he lalolagi, ti kua o kehe a lautolu mai he tau puhala he Atua; ko e mena ia kua ha ha ia lautolu ke he mena kehe mai he puhala he fiafiaaga.

12Ti kitia la he magaaho nai, ko e kakano kia he kupu liuaki mai, ke uta taha mena he haana a tuaga pauaki moe liu fakatu ai ke he tuaga kehe, po ke tuku ia ke he mena kehe mai he fakamua?

13Oi, ma haku tama na e, kua nakai pihia; ka ko e kakano he kupu liuakimaiaga, ke liuaki mai e kelea ke he kelea, fakalalolagi ke he fakalalolagi, po ke faka-tiapolo ke he faka-tiapolo — ko e mitaki ke he mena kua mitaki; ko e tututonu ke he mena kua tututonu; ko e tonu ke he mena kua tonu; ko e fakaalofa noa ke he fakaalofa noa.

14Ko e mena ia ma haku tama, kitia la kia fakaalofa atu a mutolu ke he ha mutolu a tau matakainaga, taute e tonu, fifili mo e tututonu, moe taute mau e tau mena mitaki; ti kaeke ke taute e mutolu e tau mena oti nai to moua e mutolu ha mutolu a palepale; hanai, to liuaki mai foki e fakaalofa noa ki a mutolu; to liuaki mai foki e tau mena tonu ki a mutolu; to moua e mutolu e fakafiliaga tonu ke liuaki mai foki ki a mutolu; ti to liu moua foki e palepale mitaki ma mutolu.

15Ha ko e tau mena ne fakafano atu e mutolu to liliu mai ia ki a mutolu, ti kua liuaki mai; koe mena ia ko e kupu liuakimaiaga ko e kakano katoatoa kua fakahala ai a ia ne agahala, mo e nakai fakaai ke fakahao ai.