1Ti ko e magaaho nai ma haku tama, kua kitia e au kua fai mena foki kua tupetupe ki ai haau a manatu, ha kua nakai maeke ke maama ia koe — hagaao ia ke he fakafiliaga he Atua hagaao ke he fakahalaaga he tagata agahala; ha kua lahi a koe ke manatu pehe kua nakai tonu e fifiliaga kua pehe, kua hagaao ni e tagata agahala ke he moui fakaatukehe.

2Ti ko e magaaho nai, kitia la ma haku tama, to fakamaama atu e au e mena nai ki a koe. He kitia la, ne mole atu he fakafano kehe he Iki ko e Atua ha tautolu a tau matua uluaki mai he fonua ko Etena ke fakamolu e kelekele, ne ta mai ai a laua — hanai, ne uta e ia e tagata, mo e tuku e ia he faahi uta he fonua ko Etena. Ko e Kerupi, mo e pelu puhopuho kua vikotafeliuaki ai ke leveki e akau he moui —

3Ko e magaaho nai kua kitia ai e tautolu koe tagata kua tuga mo e Atua, kua iloa e mitaki mo e kelea; ti kaeke ke fakaolo atu haana a lima mo e uta foki e ia mai he akau he moui ti kai ai mo e moui tukulagi, a ti tuku ai he Atua e Kerupi mo e pelu puhopuho ke aua neke kai ai e ia e fua he akau —

4Ti kitia ai e tautolu, ne fai magaaho ne tuku ai kehe tagata ke tokihala, hanai, taha magaaho ke gahua, taha magaaho ke tokihala mo e fekafekau ke he Atua.

5He kitia la, kaeke ne fakaolo atu e Atamu haana a lima he magaaho ia ni, mo e kai ai he akau he moui, ne kua moui tukulagi ni a ia ke lata ai mo e kupu he Atua, kua nakai fai magaaho ke tokihala, hanai, kua eke e kupu he Atua mo mena noa, ti ko e fakatokaaga lahi ma e fakamouiaga kua eke mo mena kua nakai aoga.

6Ka e kitia la, ne fakatoka mai tuai kia mate e tagata — ko e mena ia, ha kua uta kehe a ia mai he akau he moui, kua lata ni ke uta kehe mai he fonua — ti galo tukulagi ai e tagata, hanai, ko e veliaga haia he tagata.

7Ti kitia ai e koe he magaaho nai, ne vevehe kehe ai e tau matua uluaki ha tautolu ke he tino nai ti pihia foki ke he agaaga mai i mua he Iki; ti kitia ai e tautolu ne eke a laua mo tau tagata kua muitua ni ke he tau mena kua finagalo a laua ki ai.

8Kitia la he magaaho nai, kua nakai lata ke liuaki mai e tagata mai he mate he tino, ha ko e mena ia ke moumou aki e fakatokaaga ma e fiafiaaga.

9Ko e mena ia, tuga ni kua nakai maeke ke mate e agaaga, ti ko e veliaga a ti hoko ai e mate ke he agaaga fakalataha moe mate ke he tino, kua pehe kua uta kehe a lautolu mai mua he Iki, kua tonuhia ni ke liuaki mai e tagata mai he mate nai he agaaga.

10Ko e mena ia, ha ko e tau tino nai mo e tau manako, kua tuga e tiapolo, kua pauaki ke pihia, ko e magahala ke gahua kua pehe ia ko e magaaho a ia ke tauteute ai, kua eke ni mo magaaho tauteute.

11Ti manatu he magaaho nai ma haku tama, kaeke ne nakai ha ha i ai e fakatokaaga ke he lukutotoaga, (kaeke ke fakatoka kehe) ko e magaaho ni ka mamate ai kua fakaatukehe ai e tau agaaga, ha kua uta kehe mai i mua he Iki.

12Ti ko e magaaho nai, kua nakai fai puhala ke liu moua ai e tau tagata mai he veliaga ia, ko e mena ne uku ni he tagata ha ko e haana a nakai omaoma;

13Ko e mena ia, ke lata ai mo e fakafifiliaga tonu, kua nakai maeke ke taute ai e fakatokaaga he lukutotoaga ka e maeke ni ka fakatokihala e tau tagata he magaaho gahua nai, hanai, he magaaho ke tauteute ai nai, he kaeke ke nakai ha ha i ai e tau mena nai, to nakai maeke ke fakahoko ai e fakaalofa noa ke moumou aki e gahua he fakafifiliaga tonu. Ti ko e magaaho nai nakai maeke e gahua he fakafifiliaga tonu ke moumou, kaeke ke pihia, kua nakai ui e Atua ko e Atua.

14Ti kitia ai e tautolu koe veliaga he tagata haia, moe putoia ai he fakafifiliaga, hanai ko e fakafifiliaga he Atua, ne fakafano kehe ai tukulagi e tagata mai i mua he Atua.

15Ti ko e magaaho nai, ko e fakatokaaga he fakaalofa noa kua nakai maeke ke taute ai a to hoko ai e fakamafolaaga ti ko e mena ia ne fakamafola ai he Atua e tau agahala he lalolagi, ke fakahoko e fakatokaaga he fakamafolaaga, ke mafola ai e tau mena he fakafifiliaga, ke eke ai e Atua mo Atua tututonu, Atua fifili tonu, mo e Atua foki he fakaalofa noa.

16Ko e mena ia, kua nakai maeke ke hoko e fakatokihala ke he tau tagata a to fai fakahalaaga, kua tukulagi foki e mena ia tuga ni e moui he agaaga ne kua lata ke pihia, kua fakamau ke he taha faahi ia he fakatokaaga ma e fiafiaaga, ko e mena kua tukulagi ia tuga ni e moui he agaaga.

17Ko e mena ia, kua maeke fefe he tagata ke fakatokihala a to fai agahala a ia? Maeke fefe ia ia ke agahala kaeke kua nakai ha ha i ai e fakatufono? Maeke fefe ke fai fakatufono ka e nakai ha ha i ai ha fakahalaaga?

18Ko e mena ia, ne ha ha i ai e fakahalaaga kua fakamau, mo e fakatufono hako ne kua tuku mai, ne ta mai ai foki e logonaaga he tokihala ke he manamanatuaga he tagata.

19Ko e mena ia, kaeke ne nakai fai fakatufono ne tuku mai — kaeke kua keli popo tagata e taha tagata kua lata ke mate a ia, to matakutaku nakai a ia neke mate a ia kaeke kua kelipopo tagata a ia?

20Ti pehe foki, kaeke ne nakai fai fakatufono ke lata ai mo e tagata agahala to nakai matakutaku e tau tagata ke hala.

21Ti kaeke ne nakai fai fakatufono ne tuku mai, ti agahala e tau tagata ko e heigoa ha fakafifiliaga tonu ke taute po ke fakaalofa, ha kua nakai fai aoga e tau mena ia ke he tagata?

22Ka ne ha ha i ai e fakatufono ne tuku mai, mo e fakahalaaga ne fakatoka, mo e fakatokihalaaga ne tauteute, ko e fakatokihalaaga ha ko e fakaalofa noa, ka nakai pihia, kua moua ai he fakafiliaga e tagata mo e muitua ai ke he fakatufono, ti ko e fakahikuaga he fakatufono ko e fakahala, kaeke ke nakai pihia kua moumou e tau gahua he fakafiliaga ti fakaoti ai nakai eke e Atua mo Atua.

23Ka e nakai pihia, nakai fakaoti ai e Atua mo Atua, kua moua ai he fakaalofa noa a lautolu kua fakatokihala, kua hoko ai e fakaalofa noa ha ko e fakamafolaaga ti ko e fakamafolaaga ne fakahoko mai ai e liu tutu mai ha lautolu kua mamate; mo e liuaki mai ai e tau tagata ki mua he Atua; ti liuaki pihia a lautolu ki mua he Atua, ke fakafili ai ke lata mo e ha lautolu a tau gahua, ke tuga mo e fakatufono mo e fakafiliaga.

24He kitia la, kua ha ha i ai e fakafiliaga ke he haana a tau mena oti, ti ha ha i ai e fakaalofa noa ke he tau mena oti, ti pihia ko lautolu ni kua fakatokihala fakamooli ka hao ai.

25Ka e fefe, jua manatu kia a mutolu kua fofo ia he fakaalofa noa e fakafiliaga? Kua tala atu au, Nakai; kua nakai pihia. Ka pihia, kua fakaoti ai, nakai eke e Atua mo Atua.

26Ti pihia e ta maiaga he Atua haana a tau fakatokatokaaga lalahi mo e tukulagi, ne tauteute mai tuai he kamataaga he lalolagi. Ti pihia e mouaaga he fakamouiaga mo e lukutotoaga he tau tagata, ti pihia foki e ha lautolu a fakaotiaga mo e matematekelea.

27Ko e mena ia, ma haku tama na e, ti ko e ha tagata kua manako ke inu kua maeke ke inu ke he tau vai he moui; ti ko lautolu kua nakai manako ke o mai, kua nakai fakahala a lautolu ke o mai, ka ko e aho fakahiku to liuaki ki a ia, ke lata mo e haana a tau gahua.

28Ti kaeke ni ne manako a ia ke taute e tau mena kelea, mo e nakai fakatokihala a ia he haana a vaha, kitia la, to tuku atu e kelea ki a ia, ke tuga mo e liuakimaiaga he Atua.

29Ti ko e magaaho nai, ma haku tama, kua manako au ke ua liu a koe ke tupetupe foki ke he tau mena nai, ka ko e haau a tau hala ni kia tupetupe a koe ki ai, kia tupetupe ai a koe ke hoko ke fakatokihala.

30Ma haku tama na e, kua manako au kia aua ia neke fakatikai e koe e fakafiliaga he Atua. Ua lali a koe ke fai talahauaga fakamolemole ke he ha mena tote he haau a tau holifono, mo e fakatikai ai e fakafiliaga ha Atua; ka kia tokaloto e koe e fakafiliaga he Atua, haana a fakaalofa noa, haana a fakauka, kia pule ai ke he haau a loto; kia ta hifo ai a koe ke he kelekele he loto holoilalo.

31Ti ko e magaaho nai ma haku tama na e, kua kotofa a koe he Atua ke fakamatala e kupu ke he tau tagata nai. Ma haku tama na e, kia fano a koe ha haau a puhala, kia fakamatala e kupu mo e fakamooli mo e loto matala, kia ta mai ai e koe e tau agaaga ke he fakatokihalaaga, kia eke ai e fakatokaaga ma e fakaalofa noa ki a lautolu. Kia foaki atu he Atua ki a koe ke tuga mo e haaku a tau kupu. Amene.