Ko e Tohi a Hilamani

1Ti ko e magaaho nai kua hoko ai ke he tau ke vaelugofulu ma ono aki, kua tumau agaia e tau Nifai ke he tau mahani kelea, ko e mooli, ko e tau mahani kelea lahi, ka ko e tau Lamana kua malolo lahi he leveki e tau poakiaga he Atua, kua tohia ai he tau fakatufono a Mose.

2Ti kua hoko ai ke he tau nai kua ha ha i ai taha ko Samuela, ko e Lamana, ne hoko mai ai ke he motu ko Sarahema, mo e kamata ai ke fakamatala atu ke he tau tagata. A ti hoko ai ne fakamatala ai a ia ke he loga he tau aho, ke fakatokihala e tau tagata, ti vega kehe e lautolu a ia, ti kua amanaki a ia ke liu atu ke he haana a motu.

3Ka e kitia la, kua hoko mai e leo he Atua ki a ia, kua lata ia ia ke liu foki, mo e perofeta ke he tau tagata e tau mena oti kua fakakite ai ke he haana a loto.

4A ti hoko ai kua nakai talia e lautolu ke liu atu a ia ke he maaga; ko e mena ia kua fina atu a ia ki luga he fuga pa, mo e fakaloa atu haana a lima mo e fakaleo lahi, mo e perofeta atu ke he tau tagata e tau mena oti kua fakakite he Iki ke he loto haana.

5Mo e pehe atu a ia ki a lautolu kitia la, ko au ko Samuela, ko e Lamana, kua vagahau atu e tau kupu he Iki kua fakakite mai e ia ke he loto haaku; ti kitia la kua fakakite mai e ia ke he loto haaku ke vagahau atu ke he tau tagata, kua tautau ai e pelu he fakafiliaga i luga he tau tagata nai; to nakai mole atu e fa e teau he tau tau to to ai e pelu he fakafiliaga ki luga he tau tagata nai.

6Hanai, ko e malaia kua lahi kua fakatalitali mai ke he tau tagata nai, to fakahoko fakamooli ke he tau tagata nai, to nakai fai mena ke laveaki e tau tagata nai ka ko e fakatokihala ni mo e tua ke he Iki ko Iesu Keriso, to mooli ni ke hoko mai ke he lalolagi, to matematekelea ai ke he loga e tau mena to mate foki a ia mo e haana a tau tagata.

7Ti kitia la, ko e agelu he Atua ne kua fakakite mai ki a au, mo e ta mai ai e ia e tala fiafia ke he haaku a agaaga. Ti kitia la ne kua fakafano mai au ki a mutolu ke fakakite atu ai foki ki a mutolu, ke moua ai foki e mutolu e tala fiafia; ka e kitia la kua nakai talia e mutolu au.

8Ko e mena ia, kua pehe mai e Iki: ha koe tau loto mao he tau tagata Nifai, kaeke ni ke nakai fakatokihala to uta kehe e au haaku a tau kupu mai ia lautolu, to uta kehe haaku a Agaaga mai ia lautolu, to nakai fakauka foki au ki a lautolu, to fakaohooho foki e au e tau loto he ha lautolu a tau matakainaga ki a lautolu.

9To nakai mole atu e fa e teau he tau tau to fakahoko ai e au ke malaia a lautolu, hanai, to aahi atu au ki a lautolu ke he pelu, mo e hoge mo e tatalu.

10Hanai, to aahi au ki a lautolu ke he haaku a ita lahi, mo e to ha ha i ai a lautolu he atu hau ke fa aki ka momoui ai, a lautolu ko e tau fi ha mutolu ke kitia e ha mutolu a mahaikava; to hoko mai mooli e tau mena nai ka nakai fakatokihala, kua pihia mai e Iki; ko lautolu mai he atu hau ke fa aki to aahi atu ke he ha mutolu a fakaotiotiaga.

11Kaeke ke tokihala mo e liliu atu ke he ha mutolu a Iki ha mutolu a Atua to fuluhi kehe e au haaku a ita, kua pihia e Iki: hanai,kua pihia mai e Iki, uhoaki a lautolu ka fakatokihala mo e fuluhi mai ki a au, ka e oi te ki a ia kua nakai fakatokihala.

12Hanai, oi te ke he maaga lahi ko Sarahema; kitia la ha ko lautolu kua tututonu a ti hao ai; hanai, oi te ke he maaga lahi nai, ha kua kitekite ki ai,kua pihia mai e Atua, kua tokologa, hanai, kua mua atu he tokologa ke he maaga lahi nai, kua fakamao ha lautolu a tau loto ki a au, kua pihia mai e Atua.

13Ka e uhoaki a lautolu ka fakatokihala ha ko lautolu ia to fakahao ai e au. Ka e kitia la kaeke ne nakai ha ha i ai taha kua tututonu i loto he maaga lahi nai, kitia la to fakato hifo e au taha afi mai he lagi mo e moumou ai e maaga.

14Ka e kitia la, ke lata ai mo lautolu kua tututonu kua fakahao ai. Ka e kitia la, to hoko mai e magaaho, kua pihia mai e Iki, ko e magaaho ke vega kehe ai e mutolu a lautolu ne tututonu mai ia mutolu, ko e magaaho ia to momoho ai ti fakaotioti ai; hanai, oi te ke he maaga lahi nai, ha ko e mahani kelea mo e fakalialia kua ha ha i ai.

15Hanai, mo e oi te ke he maaga ko Kiteona ha ko e mahani kelea mo e fakalialia kua ha ha i ai.

16Hanai, moe oi te ke he tau maaga oti kua ha ha i ai ke he motu, kua puke ki ai e tau Nifai, ha ko e mahani kelea mo e fakalialia kua ha ha i ai.

17Mo e kitia la, to hoko ai e malaia ke he motu, kua pihia mai e Iki he tau Iki, ha ko e tau tagata kua ha ha i ai ke he motu, hanai, ha ko e ha lautolu a mahani kelea mo e fakalialia.

18A to hoko ai, kua pihia mai e Iki he tau Iki, hanai, ko e ha lautolu a Atua ue atu mo e Atua mooli, ko e ha tagata kua fufu haana a tau koloa uho he kelekele to nakai liu ke moua ai, ha ko e malaia lahi kua ha ha i ai ke he motu, ka ko ia ni kua tututonu mo e fufu atu e ia ke he Atua.

19Ha ko au, kua pihia mai e Atua, ke fufu mai ha lautolu a tau koloa uho ki a au, mo e to malaia a lautolu kua nakai fufu mai e tau koloa uho ki a au; to nakai fai koloa uho ke fufu mai ki a au ka ko lautolu kua tututonu; ti ko ia kua nakai fufu e tau koloa uho kia au, to malaia a ia, mo e haana a tau koloa uho, to nakai fai ke fakahao mai ai, ha ko e malaia kua ha ha i ai ke he motu.

20To hoko ai e aho to fufu e ha lautolu a tau koloa uho, ha kua toka ha lautolu a tau loto ke he tau koloa; ha kua toka ha lautolu a tau loto ke he tau koloa, to fufu e au ha lautolu a tau koloa uho he magaaho ke fehola ai a lautolu mai he tau fi; ha kua nakai fufu mai ki a au, kia malaia a lautolu ti pihia foki mo e ha lautolu a tau koloa uho; ti ko e aho ia ke malaia ai a lautolu kua pihia mai e Iki.

21Kitia la a mutolu, e tau tagata he maaga lahi nai, ti fanogonogo ke he haaku a tau kupu; hanai, kia fanogonogo ke he tau kupu he Iki; kitia la, kua pehe mai a ia kua malaia a mutolu ha ko e ha mutolu a tau koloa, ti kua malaia foki ha mutolu a tau koloa ha kua tokaloto ki ai a mutolu, mo e nakai fanogonogo ke he tau kupu haana ne foaki mai e tau mena ia ki a mutolu.

22Kua nakai manatu e mutolu e Iki ko e ha mutolu a Atua ke he tau mena kua fakamonuina aki e ia a mutolu, ka kua manatu mau ni a mutolu ke he tau koloa ha mutolu, nakai fakaaue ke he Iki ha mutolu he tau mena ia; hanai, kua nakai tuku atu e tau loto ha mutolu ke he Iki, ka kua puke namo ke he fakatokoluga, mo e fakahekeheke, kua puke namo ke he tau mahekeheke, tau fetoko, tau loto kelea, tau ekefakakelea mo e tau kelipopo tagata, mo e tau mahani kelea oti kana.

23Ha koe mena nai a ti fakalaga ai he Atua ke hoko mai ai e taha malaia ke he motu, pihia foki ke he tau koloa ha mutolu, ha ko e ha mutolu a tau mahani kelea.

24Hanai, oi te ke he tau tagata nai, ha ko e magaaho nai kua hoko ki ai, kua vega kehe e mutolu e tau perofeta, mo e amuamu ki a lautolu, mo e tau liti maka a lautolu, mo e keli a lautolu, mo e taute e tau mena kelea loga ki a lautolu tuga he taute ai i tuai.

25Ti ko e ai nai ka vagavagahau a mutolu, mo e pehe mai: Kaeke ne nonofo a tautolu he tau magahala he tau matua ha tautolu i tuai, a kua nakai keli e tautolu e tau perofeta; nakai tau liti maka e tautolu a lautolu mo e vega kehe ai.

26Kitia la, kua mua atu ha mutolu a kelea ia lautolu ia, ha kua mouini e Iki, kaeke kua hau ai e taha perofeta ki a mutolu moe fakakite ai ki a mutolu e kupu he Iki, mo e fakamooli ai ke he tau agahala mo e tau mahani kelea ha mutolu, kua ita a mutolu ki a ia moe vega kehe a ia, mo e kumikumi ai e tau puhala loga ke mate ai a ia, hanai, to pehe ai a mutolu ko ia koe perofeta pikopiko, mo e tagata hala, mai he tiapolo, ha kua fakamooli a ia ke he tau gahua kelea ha mutolu.

27Ka e kitia la, kaeke ke hau ha tagata ki a mutolu mo e pehe ai: Taute e mena nai, kua nakai fai kelea; taute e mena na mo e nakai matematekelea ai a mutolu; hanai, mo e to pehe a ia: Taute e tau mena kua manako ki ai e tau loto ha mutolu; hanai, taute e tau mena kua manako ki ai e tau mata ha mutolu, mo e taute ha mena he tau mena kua loto ki ai a mutolu — ti kaeke ke hau ha tagata mo e vagahau pihia ki a mutolu, to fiafia a mutolu ki a ia, mo e pehe ko ia ko e perofeta.

28Hanai, to tuku e mutolu a ia ki luga, to foaki e mutolu maana ha mutolu a tau mena; to foaki e mutolu maana ha mutolu a tau auro, mo e ha mutolu a tau ario, to fakatapulu e mutolu a ia aki e tau tapulu tau uka; ha kua vagahau e ia e tau kupu fakahekeheke ki a mutolu, mo e pehe a ia kua mafola e tau mena oti, ti to nakai kumi kelea a mutolu ki a ia.

29Oi koe atu hau kelea mo e uka a mutolu; ko e tau tagata kafilo moe fakatokoluga a mutolu, to loa fefe he manatu e mutolu ke fakauka ai e Iki ki a mutolu? Hanai, to loa fefe ke toka e mutolu a mutolu ke mumui atu ke he tau takitaki fakagoagoa moe matapouli? Hanai, to loa fefe ke fifili a mutolu ke he tau mena he pouli ka e nakai ko e maama?

30Hanai, kitai la, ko e ita he Iki ki a mutolu kua kamata; kitia la kua kaiaalu e ia e motu ha ko e ha mutolu a tau hala.

31Ti kitia la, kua hoko e magaaho kua kaiaalu e ia ha mutolu a tau koloa loga, mo e momole, mo e nakai maeke ia mutolu ke taofi ai; ko e tau aho matematekelea to nakai maeke ia mutolu ke taofi ai.

32Ti ko e tau aho matematekelea ha mutolu to tagi atu a mutolu ke he Iki; to tagi mo e noa a mutolu, ha ko e ha mutolu a fakahala kua hoko mai ki a mutolu, mo e ha mutolu a mateaga kua fakamooli ni; ti koe aho ia ke tagi mo e tagi hake ai a mutolu kua pihia mai e Iki he tau Iki, ti ko e aho ia ke tagi aue ai a mutolu mo e pehe:

33A ne mai ne fakatokihala au, mo e nakai keli mate e tau perofeta, mo e tau liti maka a lautolu, mo e vega kehe a lautolu. Hanai, ko e aho ia to pehe a mutolu: Oi a ne mai ne manatu e mautolu e Iki ha mautolu a Atua ke he tau aho ne tuku mai ai e ia ha talu tau koloa loga, a ko e nakai momole noa ai mo e galo kehe ai ia tautolu; kitia la, ko e ha talu tau koloa loga kua galo kehe ia mai ia tautolu.

34Kitia la kua toka he mena nai taha koloa gahua ti ko e a pogipogi kua galo kehe; kitia la koe ha talu tau pelu kua uta kehe ia he aho kua manako a tautolu ke fakaoga ai ke tau.

35Hanai, kua fufu e tautolu ha talu tau koloa uho ka kua mamulu kehe ia mai ia tautolu, ha ko e malaia ke he motu.

36Oi, a ne mai ne fakatokihala a tautolu he aho ne hoko mai ai ki a tautolu e kupu he Iki; kitia la kua malaia e motu, kua momole e tau mena oti, kua nakai maeke ia tautolu ke taofi ai.

37Kitia la kua takai ia tautolu e tau temoni, hanai, kua viko takai ia tautolu e tau agelu haana ne kumi ke moumou he tau agaaga ha tautolu. Kitia la, kua lahi ni ha talu a tau kelea. Ma Iki na e, nakai kia maeke ia koe ke fakahaga kehe haau a ita mai ia mautolu? To pihia ha mutolu a tau vagahau he tau aho ia.

38Ka e kitia la, ko e ha mutolu a tau aho gahua ke tauteute kua mole ia; kua fakaholoholo ni e mutolu ha mutolu a aho he laveakiaga a ti kua to mui tukulagi ai ni, ti ko e ha mutolu a mateaga kua mooli ni; hanai ha kua kumi atu a mutolu he tau aho oti he ha mutolu a tau momoui, ke he tau mena kua nakai maeke ia mutolu ke moua; kua kumi a mutolu ke he fiafia he taute e tau mena kelea, ko e mena ia kua hepe ia mai he tututonu kua ha ha i ai he ha tautolu a Ulu Tukulagi Ue atu.

39Oi ko mutolu e tau tagata he motu, ke logona e mutolu haaku a tau kupu. Mo e kua liogi au kia haga kehe ia e ita he Iki mai ia mutolu, mo e kia tokihala a mutolu ke momoui ai.