1Ti ko e magaaho nai kua hoko ai, ko Samuela, ko e Lamana ne perofeta a ia ke he loga atu he tau mena kua nakai maeke ke fakamau ai.

2Ti kitia la, ne pehe atu a ia ki a lautolu: Kitia la kua tuku atu e au ki a mutolu e taha fakamailoga, koe lima e tau tau ne toe, ti kitia la, to hau ai e Tama he Atua ke laveaki a lautolu oti kua tua ke he haana a higoa.

3Ti kitia la to tuku atu e au e mena nai mo fakamailoga ke he magaaho he haana a haele mai; ti kitia la, to ha ha i ai e tau maama lahi ke he lagi, ko e po ia to haele mai a ia, to nakai ha ha i ai e pouli, to tuga ni e aho ke he kitiaaga he tau tagata.

4Ko e mena ia, to taha ai e aho, mo e taha e po mo e taha e aho, to tuga ni ko e taha e aho mo e nakai fai po; ti koe mena ia mo fakamailoga ki a mutolu; ha ko e mena to iloa e mutolu ka hake mai e la mo e ka to ai foki; ko e mena ia ke iloa mooli ai to ha ha i ai ua e aho mo e taha e po; pete ia to nakai pouli ai e po; ti koe po ia to hoko ai e haana a fanau mai.

5Ti kitia la, to ha ha i ai e taha fetu foou ke hake mai, ha fetu kua nakai la kitia a mutolu ha mena pihia; ko e mena ia foki mo fakamailoga ki a mutolu.

6Ti kitia la nakai ko e ia ni, to ha ha i ai ke he lagi loga e fakamailoga mo e tau mena ke ofoofogia ai.

7To hoko ai, to ofo lahi ai a mutolu mo e manamanatu, pihia ai, to fakaveveli hifo ke he kelekele.

8To hoko ai, ko e ha taha kua tua ke he tama he Atua, to moua he tagata pihia e moui tukulagi.

9Ti kitia la, kua pihia he poaki mai he Atua ki a au, mai he agelu haana, kua lata ke hau au mo e tala atu e mena nai ki a mutolu; hanai, kua poaki mai e ia ke perofeta e au e tau mena nai ki a mutolu, hanai, kua pehe mai a ia ki a au: Tagi atu ke he tau tagata nai, fakatokihala mo e tauteute e puhala he Iki.

10Ti ko e magaaho nai, ha ko au ko e Lamana, mo e kua vagahau atu e au e tau kupu kua poaki mai he Iki ki a au, ti kua uka ia ki a mutolu, kua ita a mutolu ki a au mo e kumi a mutolu ke keli au, mo e vega kehe au mai ia mutolu.

11Ti to logona e mutolu haaku a tau kupu, ha ko e mena nai kua hake mai ai au ki luga he tau pa he maaga nai, kia logona ai e mutolu mo e iloa ai e tau fakafiliaga he Atua kua fakatalitali mai ki a mutolu ha ko e ha mutolu a tau mahani kelea, mo e iloa ai foki e mutolu e tau fakatokatokaaga he tokihala.

12Mo e iloa ai foki e mutolu e haele mai ha Iesu Keriso, ko e Tama he Atua, ko e Matua he lagi mo e lalolagi, ne eke e ia e tau mena oti mai he kamataaga; mo e iloa ai e mutolu e tau fakamailoga he haana a haele mai, ke mailoga ai mo e tua ai a mutolu ke he haana a higoa.

13Ti kaeke ke tua a mutolu ke he haana a higoa to fakatokihala a mutolu mai he ha mutolu a tau hala oti, ke maeke ai ke moua e fakamagaloaga mai ai, he haana a totouaga mitaki.

14Ti kitia la foki, taha fakamailoga ke tuku atu e au ki a mutolu, hanai, ko e fakamailoga ke he haana a mateaga.

15Ti kitia la, to mate mooli a ia ke fakahoko ai e laveakiaga; hanai, kua tonu ni ki a ia moe lata ai ke mate a ia, ke fakahoko atu ai e liu tutu mai ha lautolu kua mamate, ke maeke ai ke ta mai e tau tagata ki mua he Iki.

16Hanai, kitia la, ko e mate nai ke fakahoko mai ai e liu tu mai mo e fakamomoui e tau tagata oti mai he mateaga fakamua koe mateaga he agaaga; ha koe tau tagata oti, ha koe veliaga a Atamu, kua uta kehe a lautolu mai i mua he Iki, kua totou kua mamate, mai he na ua e tau mena koe tau mena he mouiaga nai mo e tau mena fakaagaaga.

17Ka e kitia la, ko e liu tu mai ha keriso, kua moui ai e tagata, hanai, pihia e tau tagata oti kana, mo e liuaki mai a lautolu ki mua he Iki.

18Hanai, mo e fakahoko mai ai e puhala he tokihala, ko ha i taha kua fakatokihala kua nakai uta kehe a ia mo e liti ke he afi; mo e hoko ai foki ki a lautolu e mate ke he agaaga, hanai, ko e mate ke lagaua aki, ha kua uta kehe foki a lautolu mai he tau mena he totouaga he tututonu.

19Ko e mena ia, kia tokihala a, tokihala a, a mutolu, neke, ha kua iloa e mutolu e tau mena nai mo e nakai taute ai, kua fakahala e mutolu a mutolu ke he fakahalaaga mo e tuku hifo a mutolu ke he mateaga nai ke lagaua aki.

20Ka e kitia la, tuga ia kua tala atu e au ki a mutolu, hagaao ia ke he taha fakamailoga, koe fakamailoga ia ke he haana a matulei, kitia la, ko e aho ia ka pehia ai a ia ke he mate, to fakapouli ai e la mo e nakai maeke ke tuku atu haana a maama ki a mutolu; ti pihia foki e mahina moe tau fetu; to nakai ha ha i ai ha maama ki luga he motu nai, pihia mai he magaaho ke matulei ai a ia, ke lata mo e tolu e aho, ke hoko ai ke he magaaho ke liu tu mai a ia mai he mate.

21Hanai, ke he magaaho tonu ka fakaoti ai haana a fafagu, to ha ha i ai e paku lagi mo e kapa e uhila ke he loga he tau matahola, to lulululu mo e talulu ai e kelekele, koe tau maka kua ha ha i ai ki luga he fonua pihia mo lalofonua, kua iloa e mutolu ke he magaaho nai ko e tau maka tu mau, to lipilipi ai.

22Hanai, to maihiihi ai, mo e to moua ke he tau ava maka mo e tau maihi mo e to gana fano ai ke he lalolagi oti, hanai, ki luga pihia mo lalo fonua.

23Ti kitia la, to ha ha i ai e tau afā lalahi, to loga he tau mouga ka ulu ai ki lalo, tuga ko e vahaloto he tau mouga, to ha ha i ai loga e tau maaga motu ko e vahaloto he tau mouga to tutu ai e tau mouga, kua tokoluga lahi.

24To loga e tau hala tu ka malona ai, mo e loga e tau maaga ka ulu moumou ai ki lalo.

25Tologa he tau tuagamau ka hafagifagi ai, mo e fakatoka mai e tokologa ia lautolu kua mamate; to tokologa e tau tagata tapu ka fakakite e lautolu a lautolu ke he tau tagata.

26Ti kitia la, kua vagahau mai pihia e agelu ki a au; ne pehe mai a ia ki a au kua lata ke ha ha i ai e paku lagi moe kapa ai e uhila ke he loga he tau matahola.

27Ti pehe mai a ia ki a au koe tau magaaho ia he paku lagi mo e uhila, mo e tau afa, to pihia e tau mena ia, to pouligia e lalolagi katoa ke lata ai mo e tolu e aho.

28Ti pehe mai e agelu ki a au to tokologa ka kitia ai e tau mena lalahi atu ke he tau mena nai, kua lahi ni, ke tua ai a lautolu koe tau fakamailoga mo e tau mena ke ofoofogia ai to hoko atu ai ke he fonua he motu nai, kua lahi ni, to nakai ha ha i ai taha mai he tau fanau he tau tagata ke nakai tua —

29Ko e mena ia kua pihia ai, ko e ha tagata kua tua to fakamoui ai, ti ko e ha tagata kua nakai tua, to ha ha i ai ni e fakafiliaga tonu ke hoko ki a lautolu; ti kaeke foki ke fakahala ai, kua fakahala ni e lautolu a lautolu.

30Ti koe magaaho nai kia manatu, kia manatu, ma haku tau matakainaga, ko e ha tagata kua mate, kua mate a ia, ia ia ni; ti ko ia kua taute mena kelea, kua taute e ia ki a ia ni; kitia la, kua toka noa a mutolu, kua ataina a mutolu ke gahua ma mutolu ni; kitia la kua foaki atu he Atua ma mutolu e iloilo ti kua fakatokanoa e ia a mutolu.

31Kua foaki atu e ia kia mutolu kia iloa ai e mutolu e mitaki mai he kelea, mo e foaki atu e ia ki a mutolu kia fifili ai e mutolu e moui po ke mate; kia taute e mutolu e mitaki ti liliu atu ai ke he mitaki, po ke mitaki ke liuaki atu ki a mutolu; po ke taute e mutolu e kelea, ti ko e tau kelea ke liuaki atu ki a mutolu.