1Ko e magaaho nai, ma haku tau matakainaga fakahelehele, kua tala atu au ki a mutolu kaeke ke nakai fakatokihala a mutolu to toka mo e gatigati ai ha mutolu a tau fale.

2Hanai, ka nakai tokihala a mutolu, to fakatagi ai ha mutolu a tau fifine ke he aho ke fakahuhu tama ai; to lali a mutolu ke fehola ka to nakai ha ha i ai ha mena ke fakamalu ai; hanai, ti oi te ki a lautolu kua fatu, ha kua mamafa a lautolu mo e nakai fahia, ko e mena ia to taholi ai ki lalo mo e mamate ai.

3Hanai, oi te ke he tau tagata nai kua fakahigoa ai ko e tau tagata Nifai ka nakai fakatokihala, he magaaho ka kitia ai e lautolu e tau fakamailoga mo e tau mena ofoofogia nai ka fakakite ki a lautolu; kitia la, ha ko lautolu koe tau tagata fifili he Atua; hanai,ko e tau tagta Nifai ne fakaalofa a ia ki a lautolu, mo e hataki foki a ia ki a lautolu; hanai, ko e tau aho ne mahani kelea ai a lautolu ne hataki e ia a lautolu ha ko e haana fakaalofa ki a lautolu.

4Ka e kitia la ma haku tau matakinaga, ko e tau Lamana ne fakavihia e ia ha ko e ha lautolu a tau gahua kelea tumau, ha kua pihia e tau mahani kelea he tau matua ha lautolu mai i tuai. Ka e kitia la, ko e fakamouiaga kua hoko mai ki a lautolu ha ko e fakamatalaaga he tau Nifai; ti ko e mena nai a ti fakaloaloa ai he Atua ha lautolu a tau aho.

5Ti manako au ke iloa e mutolu, kua tokologa a lautolu kua ha ha i ai ke he tau kotofaaga, ti kua o atu a lautolu fakahakohako ki mua he Atua, mo e omaoma a lautolu ke he haana a tau poaki mo e haana a tau fakatufono, mo e haana a tau fakafiliaga tuga kua toka ai ke he tau fakatufono a Mose.

6Hanai, kua tala atu au ki a mutolu, kua tokologa a lautolu kua taute e mena nai kua lali a lautolu mo e nakai lolelole he fakamakamaka ke ta mai a lautolu ne toe agaia, ke lotomatala ai ke he mena mooli; ti ko e mena ia kua tokologa kua tutaki kia lautolu he tau aho oti.

7Ti kitia la, kua iloa e mutolu a mutolu, kua kitia mata e mutolu, kua tokologa ne iloa e mena mooli, mo e iloa e tau aga kelea moe fakalialia he tau matua ha lautolu, mo e ne fakaako foki ke tua ke he tau kupu tohi tapu, hanai,ko e tau perofetaaga he tau perofeta tapu, kua tohia, ke takitaki aki a lautolu ke tua ke he Iki, ke fakatokihala ai, ha koe tua ia mo e fakatokihala ke moua e hikiaga ke he tau loto ha lautolu —

8Ko e mena ia, ka tokologa ni kua hoko ke he mena nai, kua iloa e mutolu, kua malolo moe tumau ke he tua, ke he mena kua fakatokanoa ai a lautolu.

9Ti iloa ai foki e mutolu ne kua tanu ai ha lautolu a tau kanavaaku tau, ti matakutaku a lautolu ke lagaaki foki neke agahala ai a lautolu; hanai, kua kitia e mutolu kua matakutaku a lautolu ke hala, kitia la to fakauka a lautolu ke taholi ai ki lalo moe kelipopo ai he tau fi, mo e nakai lagaaki ha lautolu a tau pelu ke tau atu, ha ko e ha lautolu a tua ki a Keriso.

10Ti ko e magaaho nai, ha ko e ha lautolu a taofimau ke he tau mena ia kua tua a lautolu ki ai, ha koe ha lautolu a tua malolo ha kua fakamaama ki a lautolu, kitia la to fakamonuina he Iki a lautolu mo e fakaloaloa ha lautolu a tau aho, mo e nakai fakauka ai ke he ha lautolu a tau mahani kelea.

11Hanai, pete ni he liu tua ha lautolu a tua, to fakaloaloa he Iki ha lautolu a tau aho, a to hoko mai ai ke he magaaho ne talahau ai he tau matua ha tautolu, mo e talahau ai foki he perofeta ko Seno, mo e loga foki he tau perofeta, hagaao ia ke he fakahaoaga he ha tautolu a tau matakainaga, ko e tau Lamana, ke liu lotomatala ai ke he mena mooli —

12Hanai, kua tala atu e au ki a mutolu, ko e tau magaaho fakamui, ko e tau maveheaga he Iki kua fakahoko atu ke he ha tautolu a tau matakinaga, ko e tau Lamana, mo e nakai kelea ia, to tutuli fano ai a lautolu ke he lalolagi, to kumi ki ai ke kelipopo, to keli ai mo e fakamavehevehe fano, to nakai fai mena ke malu ai, ka to fakaalofa ni e Iki ki a lautolu.

13Ti pihia he fakakite ai he perofetaaga, to ta mai a lautolu ke lotomatala ai ke he mena mooli, ko e loto matala ke he ha lautolu a Fakamoui, ko e ha lautolu a takitaki lahi mo e leveki mamoe mooli, mo e totou ai ke he haana a tau mamoe.

14Ko e mena ia kua tala atu au kia mutolu, kua laukauka a lautolu ia mutolu ka nakai tokihala a mutolu.

15Kitia la, ne fakakite e tau gahua lalahi ki a lautolu, ko e tau mena kua fakakite ki a mutolu, hanai, ko lautolu haia ne liutua ha lautolu a tua ha ko e tau aga he ha lautolu a tau matua, kua kitia foki e mutolu to nakai liu foki a lautolu ke liu tua ha lautolu a tua.

16Ko e mena ia, kua pihia mai e Iki: to nakai kelipopo oti a lautolu, ka to taute e au ke he pulotu haaku, ko e taha aho to liliu mai a lautolu ki a au, kua pihia mai e Iki.

17Ti kitia la, he magaaho nai, kua pihia mai e Iki, hagaao ia ke he tau tagata Nifai; ka nakai fakatokihala, mo e omaoma ke taute haaku a finagalo, to fakaotioti ai e au, kua pihia mai e Iki, ha ko e ha lautolu a nakai tua, nakai mailoga e tau gahua lalahi mo e loga ne taute e au ia lautolu; ti tuga ni he mooli kua moui e Iki, ti pihia e tau mena nai, kua pihia mai e Iki.