1Ko e magaaho nai kua hoko atu ai ne tokologa ne logona e tau kupu a Samuela, ko e Lamana, ne fakamatala e ia mai i luga he fuga pa he maaga. Ti koe tokologa ne tua ke he haana a kupu ne o atu mo e kumi atu ki a Nifai; ti ko e magaaho ne o atu a lautolu mo e moua a ia, ne vetevete e lautolu ki a ia ha lautolu a tau hala mo e nakai fakatikai ai, mo e fakakite kua manako a lautolu ke papatiso ke he Iki.

2Ka ko e tokologa ha lautolu ne nakai tua ke he tau kupu a Samuela ne ita a lautolu ki a ia; mo e tauliti maka a ia ki luga he fugapa, mo e tokologa ne fana aki e tau matafana fiti a ia he tu mai a ia he fugapa; ka kua ha ha ia ia e Agaaga he Iki, kua nakai maeke ke lauia a ia he tau maka mo e tau matafana ha lautolu.

3Ko e magaaho ia, ha kua kitia e lautolu e mena nai, kua nakai maeke ia lautolu ke fakalauia a ia, kua tokologa atu kua tua ke he haana a tau kupu, kua o atu ai a lautolu ki a Nifai ke papatiso ai.

4Kitia la, ha ne papatiso e Nifai, mo e perofeta a ia, mo e fakamatala,ke fakatokihala e tau tagata, mo e fakakite ai e tau fakamailoga moe tau mena ofoofogia, mo e taute ai e tau mana ke he tau tagata, ke iloa ai e lautolu kua tata ke liu mai a Keriso —

5Tala age ai e tau mena kua tata ke fakahoko, ka kia iloa mo e manatu ke he tau magaaho ia ne kua fita he fakailoa tuai ki a lautolu, mo e amanaki kia tua a lautolu; ko e mena ia ko e tokologa ne tua ke he tau kupu ha Samuela ne o atu ki a ia mo e papatiso ai, ha kua o mai mo e fakatokihala mo e vetevete ai ha lautolu a tau hala.

6Ka ko e tokologa a lautolu ne nakai tua ke he tau kupu a Samuela; ko e mena ia ko e magaaho ne kitia ai e lautolu kua nakai maeke ke lauia a ia he tau maka mo e tau matafana ha lautolu; ne ui atu a lautolu ke he ha lautolu a tau takitaki mo e pehe: Kia uta e tagata nai moe lili a ia, kitia la kua ha ha ia ia e tiapolo ti koe malolo he tiapolo kua ha ha ia ia kua nakai maeke ia mautolu ke fakapakia a ia aki e tau maka mo e tau matafana; ko e mena ia kia uta a ia, lili mo e uta kehe a ia.

7Ti ko e magaaho ne o atu a lautolu ke taofi ia ia, kitia la, ne hopo hifo a ia mai he fuga pa mo e hola kehe a ia mai he motu ha lautolu, hanai, ke hoko atu ke he haana a motu, mo e kamata a ia ke fakamatala mo e perofeta ke he haana ni a tau tagata.

8Ti kitia la, ne nakai liu logona foki a ia ke he tau Nifai ti pihia e tau mena ne hoko ke he tau tagata he magahala ia.

9A ti fakaoti pihia e tau tau ke valugofulu ma ono aki tali mai he pule he tau iki fakafili ke he tau tagata Nifai.

10Ti fakaoti pihia foki e tau ke valugofulu ma fitu aki he pule ai e tau iki fakafili, ko e tokologa he tau tagata kua tumau ni ke he ha lautolu a fakatokoluga mo e mahani kelea, mo e tokofiha ne o atu fakahakohako ki mua he Atua.

11Ti pihia foki ke he magahala he tau ke valugofulu ma valu aki, he pule he tau iki fakafili.

12Ti tote lahi e hikiaga he tau mena he tau tagata, ka kua maō fakahaga a lautolu kehe tau mahani kelea, mo e taute fakahaga atu e lautolu e tau mena kua kehe ia mai he tau poakiaga he Atua, he tau ke valugofulu ma hiva aki he pule he tau Iki fakafili.

13Ka e hoko ai ke he tau ke hivagofulu aki he pule he tau Iki fakafili, kua fakakite ai e tau fakamailoga lalahi ke he tau tagata, mo e tau mena ofoofogia, mo e kamata ke fakahoko ai e tau kupu he tau perofeta.

14Ne fakakite ai e tau agelu ke he tau tagata, ko e tau makoi, mo e fakakite ai ki a lautolu e tau tala fiafia ke olioli ai; ti ko e tau ia kua kamata ke fakahoko e tau mena ne talahau mai ai he tau tohi.

15Pete ia, kua kamata e tau tagata ke fakamao ha lautolu a tau loto, a lautolu oti, ka ko e tokofiha ni ne malolo ha lautolu a tua, he tau Nifai mo e tau Tamana, mo e kamata a lautolu ke tua ke he ha lautolu a tau malolo mo e ha lautolu a tau iloilo mo e pehe:

16Koe falu a mena liga kua talahau hako e lautolu, mai he tau mena loga; ka e kitia la, kua iloa e tautolu ko e tau mena lalahi mo e tau gahua mitaki nai to nakai fakahoko ai, he tau mena kua talahau mai.

17Ti kamata a lautolu ke fakakakano mo e tau fetoko a lautolu ni mo e pehe:

18Kua nakai fai mena kua pihia ke ha ha i ai taha tuga a Keriso ke hau ai; kaeke ke pihia, ti ko ia ko e tama he Atua, ko e Matua he lagi mo e lalolagi, tuga ne kua talahau ai, ti ko e ha kua nakai fakakite ai e ia a ia ki a tautolu tuga ki a lautolu kua haha i ai ki Ierusalema?

19Hanai, ko e ha kua nakai fakakite ai e ia a ia ke he motu nai tuga ke he motu ko Ierusalema?

20Kitia la, kua iloa e tautolu ko e taha talahauaga kelea, kua tala fakaholo ai ki a tautolu mai he tau matua ha tautolu, ke pehe ia ke tua a tautolu ke he falu a mena lalahi mo e tau gahua mitaki ka fakahoko ai, ka e nakai hoko kia tautolu, ka e hoko ke he taha motu mamao, ko e motu nakai iloa e tautolu; ko e mena ia ke toka e lautolu a tautolu ke goagoa, ha kua nakai maeke ke kitia mata e tautolu kua mooli e tau mena ia.

21Ti pihia, ko e tau lagatau mo e tau gahua fakapouli haana e tiapolo, kua fakakite ai falu a lagatau kua nakai maeke ke maama ia tautolu, ka kia toka mau ki lalo a tautolu ke fekafekau ke he ha lautolu a tau kupu, mo e fekafekau foki ki a lautolu, ha kua tua a tautolu ki a lautolu ke fakaako a tautolu; mo e toka ai a tautolu ke goagoa ka fakatokolalo a tautolu ki a lautolu, ke he tau aho oti he ha tautolu a tau momoui.

22Mo e loga atu foki e tau mena kua manatu he tau tagata ke he tau loto ha lautolu, ko e tau mena goagoa mo e nakai aoga; ka kua faguna ai a lautolu, ha kua fakalagalaga mau e Satani a lautolu ke taute e tau mena kelea tumau; hanai, ne fai fano ai a ia mo e uta fano ai e tau tala pikopiko mo e tau fetoko ke he motu katoa, kia fakamao e ia e tau loto he tau tagata ke he tau mena mitaki mo e tau mena ke hoko mai.

23Mo e nakai mailoga e tau fakamailoga mo e tau mena ofoofogia kua fakakite ai ke he tau tagata he Iki, mo e tau mana loga kua taute ai, ne taofi ai e Satani e tau loto he tau tagata he motu katoa.

24Ti fakaoti pihia e tau ke hivagofulu aki he pule he tau iki fakafili ke he tau tagata Nifai.

25Ti fakaoti pihia e tohi a Hilamani, kua tohia he tau fakamauaga a Hilamani mo e haana a tau fanau.