1Kua hoko ai ke he magahala kua mole tuai e tau ke hivagofulu ma taha aki, ti kua ono teau foki e tau tau a ia tali mai he magahala ne toka ai e Lihai a Ierusalema, ti ko e tau foki a ia kua nofo a Lakonio ko e Iki Fakafili mo e kavana he motu katoa.

2Kua fano kehe tuai a Nifai, ko e tama ha Hilamani, mai he fonua a Sarahema, mo e tuku atu ai e ia ke he tama taane fakamua haana ko Nifai, ke leveki e tau lapa maka veo moe tau fakamauaga oti ne kua tohi tuai ai, mo e tau mena tapu oti foki ne kua toka ai tali mai he o kehe a Lihai mai i Ierusalema.

3Ne fano kehe ai a ia mai he motu na moe nakai iloa he taha e fanoaga haana po ke fano ki fe. Ka e hukui he haana a tama ko Nifai a ia ke he levekiaga mo e fakamauaga he tau lapa maka, ko e talahauaga he tau tagata nai.

4Ti hoko ai ke he magahala, ko e kamataaga he tau ke hivagofulu ma ua aki, kitia la, kua kamata ke fakakatoatoa e tau perofetaaga he tau perofeta, kua kamata foki ke hohokomai ai e tau fakamailoga lalahi mo e tau mana ke he tau tagata.

5Ka e ha ha i ai e falu a tagata ne kamata ke pehe, kua mole tuai e magaaho ke fakakatoa ai e tau kupu ne vagahau e Samuela ko e Lamana.

6Kua kamata foki a lautolu ke fiafia mo e hula ke he ha lautolu a tau matakinaga ne tua agaia, kua pehe mai, kitia la, kua mole tuai e magaaho, ka e nakai la fakakatoatoa ia e tau kupu ha Samuela, kua teao noa e ha mutolu a fiafia moe tua ke he mena nai.

7Ti hoko ai e magahala, kua fakatupu ai e lautolu e miha ke he motu katoa. Ti ko e tau tagata ne tua kua kamata agataha a lautolu ke maanu ai e tau loto neke ai fakahoko e tau mena na ne talahau mai.

8Ka e kitia la, ne onoono fakamakutu a lautolu ke he aho, mo e po, mo e aho ia to tuga ko e aho taha nakai fai pouli, ke iloa ai e lautolu kua nakai tua teao noa a lautolu.

9Kua hoko mai ke he magaaho ne kua fakatoka ai he tau tagata nakai tua e aho ke tamate ai a lautolu oti, ne tua ke he tau taofiaga ia, kaeke ke nakai hoko mai e fakamailoga ne fakailoa mai ai he perofeta ko Samuela.

10Ne hoko ai ke he magaaho, ne kitia ai e Nifai, ko e tama ha Nifai, e tau mahani kelea nai he haana a tau tagata, ne momoko lahi haana a loto.

11Ti hoko ai e magaaho; fano a ia mo e tukutuku hifo a ia ke he kelekele. Ne tagi fakamalolo a ia ke he haana a Atua ha ko e haana a tau tagata, hanai, ko lautolu kua teitei ke mahaikava ha ko e ha lautolu a tua ke he tala tu fakaholo he ha lautolu a tau mamatua.

12Ne hoko ai ke he magaaho, ne tagi fakamalolo a ia ke he Iki ke he aho katoa, a ti, kitia la, ne hoko mai e leo he Iki ki a ia, kua pehe mai.

13Ki a lagaaki hake haau a ulu mo e fiafia, kitia la, kua hoko mai tuai e magaaho; ko e po nai to fakakite mai e fakamailoga, mo e a pogipogi to hoko mai ai au ke he lalolagi, ke fakakite atu ke he lalolagi to fakahoko e au e tau mena oti ne vagahau e au he tau gutu he haaku a tau perofeta tapu.

14Kitia la, kua hoko atu au ke he haaku ni a tau tagata, ke fakahoko e tau mena oti ne kua fakailoa atu e au ke he tau fanau he tau tagata tali mai he fakaveaga he lalolagi, to taute foki e au e finagalo he Matua mo e Tama — ko e Matua ha ko au; ko e Tama ha ko e haaku a tino. Kitia la, kua hoko mai tuai e magaaho, ti koe po nai to fakakite mai ai e fakamailoga.

15Ne hoko ai e magaaho, kua fakakatoatoa e tau kupu ia ne hoko age ki a Nifai mo e hoko mai ai tuga ne talahau ai e tau kupu ia. Kitia la, ne hifo e la ke to ke nakai pouli ti kamata e tau tagata ke ofo ha kua nakai fai pouli ka kua hoko mai e po.

16Na tokologa ne nakai tua fakamua ke he tau kupu he tau perofeta, ne veveli a lautolu ke he kelekele tuga kua mamate, ha kua iloa e lautolu kua kaumahala tuai e ha lautolu a amanakiaga ke fakamahaikava ai a lautolu ne tua ke he tau kupu he tau perofeta, ha kua hoko mai e fakamailoga ne kua talahau mai i tuai.

17Ti kamata foki a lautolu keiloa kua ku lahi e tau magaaho ti fakakite mai e Tama he Atua, hanai, ko e tau tagata oti iluga he fuga kelekele, ko lautolu mai he faahi lalo ke he faahi uta, mai foki he motu he faahi tokelau ke he motu he faahi toga, kua ofo lahi a lautolu, a ti veveli oti ai ke he kelekele;

18Ha kua iloa e lautolu kua leva tuai he fa e perofeta he tau perofeta e tau mena nai, ti kua hoko mai tuai e fakamailoga ne talahau mai; ti kamata agataha a lautolu ke matakutaku ha ko e ha lautolu a tau mahani kelea mo e nakai tua.

19Ne hoko ai e magaaho, ne nakai ha ha i ai ha pouli ke he po katoa ia, ka e tuga kua tupou e la. Ne hoko ai e magaaho ne hake mai e la he mogo pogipogi, hake mai tuga ni ne fa mahani, ti iloa ai e lautolu koe aho ia ko e aho ke fanau mai ai e Iki ha koe fakamailoga na kua tuku mai.

20Ti kua hoko mai e magaaho, hanai e tau mena oti, katoa foki moe tau mena ikiiki, tuga ni mo e tau kupu he tau perofeta.

21Ti kua hoko mai e magaaho, kua fakakite mai foki e taha fetu foou tuga foki moe kupu kua talahau ai.

22Ti hoko ai e magaaho, kua kamata ai nai, ke ha ha i ai e tau pikopiko ne fakafano atu e Satani ke he tau tagata ke fakamaō aki ha lautolu a tau loto, kia nakai tua a lautolu ke he tau fakamailoga mo e tau mena tutupu fakaofo ne kitia e lautolu. Ka e pete ni e tau pikopiko mo e tau fakavai pihia ne mua e tokologa ha lautolu ne tua mo e liliu mai ke he Iki.

23Ti hoko ai e magaaho, kua fano a Nifai ke he tau tagata mo e falu kua tokologa foki, mo e papatiso ai a lautolu ke lata ma e fakatokihalaaga, ko e mena ia kua tokologa kua fakamagalo ai e tau hala. Ti ko e mena ia kua liu kamata foki e tau tagata ke moua ai e mafola ke he motu.

24Ne nakai ha ha i ai e tau taufetoko ha koe tokofiha ni ne kamata ke fakamatala atu, mo e lali foki ke fakamooli ke he tau tohi, kua nakai tuai aoga ke omaoma ke he tau fakatufono a Mose, Ti ko e mena ia ne hepe ai a lautolu he nakai maama mitaki ai ke he tau tohi.

25Ka e hoko ai e magaaho, kua nakai leva ti liliu mai ai a lautolu mo e iloa ai e ha lautolu a hehe, ha ko e mena ne fakailoa atu ki a lautolu kua nakai la fakakatoatoa e fakatufono ia, ti kua lata ke katoatoa e tau mena ha ai e magaaho, hanai, kua hoko mai e tau kupu ki a lautolu kua lata tonu ke fakakatoatoa, hanai, ko e taha ni e mena poke matapatu ke nakai mole ha mena tote maka haana a to fakamooli e tau mena oti. Ha ko e mena ia ko e tau ia ni ne iloa ai e lautolu e hepe ha lautolu, a ti talahau ai e lautolu e ha lautolu a tau mena kelea oti.

26Ti mole atu pihia e tau ke hivagofulu ma ua aki, ne ta mai ai e tau tala fiafia ke he tau tagata ha ko e tau fakamailoga ne hohoko mai tuga ni mo e tau kupu kua perofeta ai he tau perofeta tapu oti.

27Ne hoko ai e magaaho, kua mole foki e tau ke hivagofulu ma tolu aki moe mafola, kua ha i ai e matakau fofo mena ha Katianatoni, ko lautolu ne nonofo i luga he tau mouga, mo e fakakelea ai e lautolu e motu, ha ko e mena malolo e ha lautolu a tau nonofoaga mo e galo foki e tau fakamumuliaga ha lautolu, kua nakai maeke he tau tagata ke kau mahala ai a lautolu; ti ko e mena ia ne kelipopo tagata mo e fakamatematekelea e lautolu tokologa he tau tagata.

28Ne hoko e magaaho, he tau ke hivagofulu ma fa aki ne kamata a lautolu ke tokologa ha kua tokologa e tau tagata Nifai ne mahani totoko ne fehola mo e kau atu ki a lautolu, kua momoko lahi e mena nai ke he tau tagata Nifai ne toe hifo ke he motu.

29Ne momoko foki e tau taga ta Lamana; ha ko e mena nai, kitia la, kua tokologa e tau fanau ha lautolu kua tutupu hake mo e malolo a lautolu ha kua lalahi, mo e falanaki ni a lautolu ki a lautolu, ti fakahehe e falu ha lautolu he tau tagata Soloma hako e tau pikopiko mo e tau kupu fakavai a ti o kehe ai a lautolu mo e tutaki fakalataha mo e tau tagata kaiha a Katianatoni.

30Kua pihia e matematekelea foki he tau tagata Lamana moe kamata foki a lautolu ke liu ki tua e tau mahani tututonu ha ko e tau mahani kelea he atu hau foou na.