1Ko e mooli, ko e mooli ke tala atu e au ki a mutolu kua fai mamoe kehe au nakai ha he motu nai, nakai foki ha he motu ko Ierusalema, nakai ha i ai foki ke he tau hala he motu ia ne fano au ke fekafekau atu ki ai.

2Ha ko lautolu kua tala atu e au ki a mutolu, ko lautolu haia kua nakai la logona e lautolu e haaku a leo; nakai la fai magaaho foki ne fakakite ai au ki a lautolu.

3Ka kua moua e au e poaki mai he Matua kia fano au ki a lautolu, to fanogonogo a lautolu ke he haaku a leo, mo e totou fakalataha ai foki a lautolu mo e haaku a tau mamoe, kia taha ai e fuifui mamoe mo e leveki mamoe ne tokotaha, ko e mena ia kua fano au ke fakakite e au, au ki a lautolu.

4Kua poaki atu au ki a mutolu ki a tohi e mutolu e tau kupu nai ka mole atu au, ti kaeke kua nakai ole atu ke he Matua ke he haaku a higoa e tau tagata haaku i Ierusalema, ko lautolu haia ne kitia au mo e fakalataha mo au ke he haaku a fekafekauaga ke moua e lautolu e iloaaga ki a mutolu mai he Agaaga Tapu, mo e iloilo foki ke he tau magafaoa foki kua nakai iloa e lautolu, ti to fakamau e tau kupu nai ke tohi e mutolu, to fakakite atu foki ke he Tau tagata Kehe, ha ko e fakakatoatoaaga foki he Tau tagata Kehe, ke maeke e tau tagata ha lautolu i Ierusalema, ko lautolu ne fakamavehevehe atu ai ki luga he fuga kelekele ke he lalolagi ha ko e ha lautolu a nakai tua, ke ta mai a lautolu ki loto he lotopa, po ke maeke ai ia lautolu ke hohoko atu ai ke he maamaaga ki a au, ko e ha lautolu a Fakamoui.

5Ti ko e magaaho ia to fakamaopoopo ai e au a lautolu mai he tau faahi ne fa he lalolagi; koe magaaho ia foki ke fakamooli ai e au e maveheaga ne eke he Matua mo e tau tagata oti he magafaoa a Isaraela.

6Uhoaki e Tau Tagata Kehe ha ko e ha lautolu a tua ki a au mo e Agaaga Tapu, ko e Agaaga Tapu ke fakamooli ai ki a lautolu au pihia mo e Matua.

7Kitia la, ha ko e ha lautolu a tua ki a au, kua pihia mai e Matua, ha ko e ha mutolu a nakai tua, ma magafaoa a Isaraela na e, ke he tau aho fakamui to hoko atu e mena mooli ke he Tau Tagata Kehe, kia iloa ai e lautolu e katoatoaaga he tau mena nai.

8Ka e oi te, kua pihia mai e Matua, ke he Tau Tagata Kehe kua nakai ha i ai e tua — ha ko e mena pete ni he o mai a lautolu ki luga he motu nai mo e fakamavehevehe ai haaku a tau tagata ha ha i ai ke he magafaoa a Isaraela; mo e vega ai foki ki fafo haaku a tau tagata ha ha i ai ke he magafaoa a Isaraela, mo e taholi ai foki e lautolu a lautolu ki lalo.

9Ha ko e fakaalofa noa he Matua ke he Tau Tagata Kehe, mo e tau fakafiliaga foki he Matua ki luga he haaku a tau tagata ha ha i ai ke he magafaoa a Isaraela, ko e mooli, ko e mooli, ke tala atu e au ki a mutolu, ka mole atu e tau mena oti nai, to eke foki e au ke he haaku a tau tagata ha ha i ai ke he magafaoa a Isaraela mo e fakamatematekelea ai mo e mamate ai, mo e vega ai ki fafo mai ia lautolu, kua fakavihia e lautolu a lautolu, mo e eke a lautolu mo fakalialia, mo e amuamu atu ki a lautolu.

10Kua pihia, he poaki mai he Matua, ke tala atu e au ki a mutolu: Ko e aho ia ka agahala ai e Tau Tagata Kehe ke he haaku a evagelia mo e fakatokoluga ai ha lautolu a tau loto ki luga he tau kautu oti kana mo e tau tagata oti he lalolagi katoa, mo e pehe ai a lautolu ke he tau puhala pikopiko oti, mo e tau puhala oti foki he mahani lagatau kelea, moe mahani matahavala mo e tau mahani fakavai kua puke foki ke he mahani kelipopo tagata moe mahani feuaki, mo e tau gahua galo kua fakavihia he Atua; kaeke kua taute e lautolu e tau mena oti ia, mo e nakai talia e fakakatoatoaaga he haaku a evagelia, Kitia la, kua pehe mai e Matua, to uta kehe e au e fakakatoatoaaga he haaku a evagelia, mai ia lautolu.

11Ka ko e magaaho ia ke manatu ai e au haaku a maveheaga ne mavehe e au mo e haaku a tau tagata, mo e magafaoa a Isaraela na e, to ta mai ai e haaku a evagelia ki a lautolu.

12To fakakite e au ki a koe, e magafaoa a Isaraela na e, to nakai fai pule e tau Tagata Kehe ki luga ia mutolu, ka to manatu e au haaku a maveheaga ki a koe, ma magafaoa a Isaraela na e, a ti hoko atu a koe ke he maama he fakakatoatoaaga he haaku a evagelia.

13Ka ko e Tau Tagata Kehe, kaeke ke tokihala a lautolu, mo e liliu mai ki a au, kua pihia mai e Matua, kitia la to totou fakalataha a lautolu mo e haaku a tau tagata, ma magafaoa a Isaraela na e.

14To nakai toka foki e au haaku a tau tagata ha ha i ai ke he magafaoa a Isaraela ke o atu ki a lautolu mo e taholi hifo ai a lautolu ki lalo, kua pihia mai e Matua.

15Ka nakai haga mai a lautolu ki a au, mo e fanogonogo ke he haaku a leo to toka e au a lautolu, ke taholi ai, ko e mooli, to toka e au haaku a tau tagata, ma magafaoa, a Isaraela na e, ke o atu ki a lautolu, mo e taholi ai a lautolu ki lalo ti eke a lautolu mo masima kua galo haana kona, kua nakai fai mena kua aoga e masima ia ki ai, ka e tolo ni ki fafo, mo e taholi ai he haaku a tau tagata, ma magafaoa a Isaraela na e.

16Ko e mooli, ko e mooli, ke tala atu e au ki a mutolu, ne pihia he poaki mai he Matua ki a au, ke age e au e motu nai ke he tau tagata nai ke eke ai ma lautolu.

17Ti fakamooli ai e tau kupu he perofeta ko Isaia, kua pehe mai;

18Ko e tau leo he haau a tau tagata foki, kua leo lalahi a lautolu, kua kalaga fakalataha a lautolu, ha ko e mena to kitia mata e lautolu ka liuaki mai e Iehova a Siona.

19Kia kalaga fiafia fakalataha a mutolu ko e tau mena malolo i lerusalema, ha kua fakamafana e Iehova haana motu, kua laveaki e ia a Ierusalema.

20Kua fakaolo mai e Iehova e haana lima tapu ki mua he tau motu oti, ti kitia he tau kalakala oti he lalolagi e fakamouiaga he Atua.