1Ko e magaaho ia ke hoko ai e tau mena kua tohia: kua pehe mai, kia lologo a koe, ko e fifine tufua kua nakai fanau; kia leo lahi a, mo e kalaga fiafia a koe kua nakai mamahi he fanau — ha kua pehe mai e Iki kua mua he tokologa e tau fanau he fifine nofo noa, ke he tau fanau he fifine ne fai taane.

2Kia fakalaulahi a e mena kua tu ai haau a fale ie, kia toho e mutolu e tau ie puiupui he tau mena kua nonofo ai a mutolu, aua neke fakatoe ha mena, kia fakaloloa e koe haau a tau toua, mo e fakamau e koe haau a tau fao.

3Ha ko e mena to tolomaki a koe ke he faahi matau mo e faahi hema, ko e fanau haau foki to eke e lautolu e tau Tagata Kehe ma lautolu ti nonofo ai a lautolu ke he tau maaga toka noa.

4Aua neke matakutaku a koe, ha ko e mena nakai ma a koe, aua foki neke fakahahaku a koe, ha ko e mena nakai fakama a koe; ha ko e mena to nimo ia koe e ma he haau a vaha fuata, to nakai manatu foki e koe ke he ma he haau a vaha fuata, to nakai liu manatu foki e koe ke he ma he haau a nofo takape.

5Ha ko ia ne eke a koe, ko e taane haau haia, ko e Iki he tau Iki, ko e haana higoa haia, ko e haau a Fakamoui foki, ko e Tama Tapu a Isaraela — ko e Atua he lalolagi katoa ko e haana a higoa haia.

6Ha kua ui he Iki a koe, tuga ne fifine kua tiaki, kua loto mamahi, ko e hoana kua fuata agaia, ka kua tiaki a ia, kua pihia mai e haau a Atua.

7Ko e magaaho kiliiku ne tiaki ai e au a koe, ka ko e fakaalofa lahi ni to fakapotopoto mai ai e au a koe.

8Kua pehe mai haau a fakamoui ko e Iki, kua fufu fakaku haaku a mata ha ko e haaku a ita ki a koe, ha ko e fakaalofa tukulagi to fakaalofa atu ai au ki a koe.

9Ha kua tuga ne fakapuke ke he vaha ia Noa e tau mena nai ki a au, ne omonuo ai e au ke nakai liu ia lofia foki e lalolagi ke he fakapuke tuga he vaha ia Noa, kua omonuo pihia a au ke nakai ita au ki a koe.

10Ha ko e mena to mole atu e tau mouga, to uta kehe ai foki e tau matiketike, ka ko e haaku a totonu to nakai mole atu ia ia koe, mo e maveheaga ke he haaku a tau tagata to nakai uta kehe ia, kua talahau mai he Iki ko ia kua fakaalofa atu ki a koe.

11Ko koe na, kua matematekelea, kua tokia he afa, kua nakai mafanatia! Kitia la, to ati hake ai e au haau a tau maka ke he tau vali kua mitaki, mo e fakave ai e au a koe aki e tau maka safaira.

12To eke ai e au haau a tau fakamaama ke he tau maka pihi, mo e haau a tau gutupa ke he tau maka uho kula, mo e haau a tau katofia oti ke he tau maka fulufuluola.

13To fakaako ke he Iki haau a tau fanau oti, to lahi e mafola he tau fanau haau.

14To fakamau ai a koe ke he mahani tututonu, to mamao mo koe e favale, ha ko e mena to nakai matakutaku a koe; to mamao foki ia koe e matakutaku ke he mate ha ko e mena to nakai fakatata mai ia ki a koe.

15Kitia la, to fakapotopoto atu a lautolu ke tau ki a koe ka e nakai fakapotopoto ai a lautolu ha ko au, ko lautolu oti ke fakapotopoto atu ke tau ki a koe, to kaumahala a lautolu ha ko koe ni.

16Kitia la, ko au ne eke e tagata eke lapatoa, kua uloulo e ia ke he tau maka kaka ke he afi, mo e taute ai e kanavaakau ma e haana a gahua, ko au foki ne eke a ia ne moumou ki a fakaoti ai.

17Ko e tau kanavaakau oti kua taute ke tau ki a koe, nakai kautu ia, ko e tau alelo oti ke taufetoko mo koe ke he fakafiliaga to fakahala ai e koe; ko e tufaaga hana he tau fekafekau he Iki, ko e ha lautolu a tututonu foki mai ia au ia, kua talahau mai ai he Iki.