1Ne hoko ai, he magaaho ne oti ai e tau fakamatalaaga a Iesu ke he tau mena pihia, ne ono fano a ia ke he lanu tagata, mo e pehe atu ki a lautolu; Kitia la, kua fanogonogo mai tuai a mutolu ke he tau mena ne fakaako atu e au fakamua, to haele hake au ke he haaku a Matua. Ko e mena ia, ko ia ke tokaloto ai haaku a tau kupu nai mo e taute ai foki, ko ia haia ka lagaaki hake e au ke he aho fakahiku.

2Ne hoko ai, he oti e vagahau e Iesu e tau kupu ia, ne fioia e ia ne ha ha i ai e falu ia lautolu ne ofo lahi mo e manamanatu ke he haana finagalo ke he fakatufono a Mose, ha ko e mena nakai maama ia lautolu e tau kupu, kua mole tuai e tau mena tuai, ti kua fakafoou e tau mena oti.

3ti pehe atu a ia ki a lautolu, aua neke ofo a mutolu he pehe atu au kua mole e tau mena tuai, kua fakafoou e tau mena oti.

4Kitia la, ke tala atu e au ki a mutolu kua katoatoa tuai e fakatufono ne foaki age kia Mose.

5Kitia la, ko au haia ne foaki mai e fakatufono, ti ko au foki haia ne mavehe mo e haaku a tau tagata ko Isaraela, ha ko e mena ia, kua katoatoa ai e fakatufono ia au, ha ko e mena hoko mai tuai au ke fakakatoatoa e fakatufono, hanai, kua oti tuai a ia.

6Kitia la, nakai moumou e au e tau perofeta, ha ko e tau perofetaaga kua nakai la fakakatoa ia au, ko e mooli, ke tala atu e au ki a mutolu, to fakakatoatoa e tau mena oti na.

7Ha kua pehe atu au ki a mutolu kua mole tuai e tau mena tuai, nakai ko e mena ia ke fakaoti ai e au e tau mena ia hagaao ke he tau mena ne tatali.

8Ha ko e mena kitia la, nakai la katoatoa mai tuai e maveheaga ia ne mavehe e au mo e haaku a tau tagata, ka ko e fakatufono ne age ki a Mose ko e fakaotiaga a ia, ia au.

9Kitia la, ko au ko e fakatufono mo e maama. Kia onoono mai ki a au mo e fakatumau a to hoko ke he fakahikuaga, to momoui a mutolu, ha ko e mena ko ia ke fakatumau a ti hoko ke he fakahikuaga to foaki atu e au ki a ia e moui tukulagi.

10Kitia la, kua foaki atu e au ki a mutolu e tau poakiaga, hanai, kia omaoma e haaku a tau poakiaga. Ti ko e mena nai ko e fakatufono mo e tau perofeta, ha ko e mena talahau fakamooli a lautolu ki a au.

11Ne hoko ai, ne vagahau e Iesu e tau kupu ia, ne pehe age a ia ki a lautolu e tokohogofulu ma ua ia ne fifili e ia.

12Ko mutolu ko e haaku a tau tutaki, kua eke a mutolu mo maama ke he tau tagata nai ko e taha magafaoa ne toe mai he magafaoa a Iosefa.

13Kitia la, kua eke e motu nai ma mutolu, kua foaki mai ai he matua ki a mutolu.

14Nakai la fai poaki au mai he Matua ke fakailoa pihia atu au ke he ha mutolu a tau matakainaga i lerusalema.

15Nakai la fai poaki mai foki ki a au mai he Matua ke fakailoa age ki a lautolu hagaao ai ke he tau magafaoa foki he fale a Isaraela ne uta kehe ai he Matua mai he motu ia.

16Ka ko e mena nai ni ne kua poaki mai ai he Matua ki a au ke fakailoa age ki a lautolu.

17Kua fai mamoe kehe au, nakai ha ha he lotopa nai, ko lautolu foki kua lata ke takitaki mai e au, to fanogonogo foki a lautolu ke he leo haaku a ti taha ai e fuifui mamoe, mo e leveki mamoe ne tokotaha.

18Hanai, ha ko e mao he tau ua mo e tau loto nakai tua, ne nakai maama e lautolu haaku a tau kupu, ko e mena ia ne poaki mai ai ki a au ke aua neke fakailoa atu foki ki a lautolu ha mena foki ke he mena nai.

19Ka ko e mooli, ke tala atu e au ki a mutolu, kua poaki mai he Matua ki a au, a ti fakailoa atu ai e au ki a mutolu, ne vevehe kehe a mutolu mai ia lautolu ha ko e ha lautolu a mahani kelea; ko e mena ia, ne nakai iloa e lautolu a mutolu ha ko e ha lautolu a tau mahani kelea.

20Ko e mooli, ke liu tala atu e au ki a mutolu, ko e falu foki a magafaoa kua vevehe kehe tuai he Matua ia lautolu, ha ko e ha lautolu a mahani kelea ni kua nakai iloa ai e lautolu a lautolu.

21Ko e mooli, ke tala atu e au ki a mutolu, ko mutolu haia ne pehe ai au, kua fai mamoe kehe au, nakai ha ha he lotopa nai ko lautolu foki kua lata ke takitaki mai e au, to fanogonogo foki a lautolu ke he leo haaku; a ti taha ai e fuifui mamoe, mo e leveki mamoe ne tokotaha.

22Ti nakai maama e lautolu au; piko ni a lautolu ko e tau Tagata Kehe ne tala age e au ki a lautolu ha ko e mena nakai maama e lautolu, to liliu e tau Tagata Kehe ha ko e ha lautolu a tau fakamatalaaga.

23Ti nakai maama foki e lautolu au ne pehe atu au, ki a lautolu, to fanogonogo foki a lautolu ke he leo haaku; ne nakai maama e lautolu au to nakai fai magaaho ke fanogonogo mai e tau tagata kehe ke he leo haaku — ti nakai fakakite foki e au, au ki a lautolu ka ko e fakakite ni he Agaaga Tapu ki a lautolu.

24Ka e kitia la, kua logona fakalataha e mutolu haaku a leo, mo e kitia au, ti ko mutolu ko e tau mamoe haaku, ti kua totou auloa a mutolu mo e veveheaga ne kua tuku mai he Matua ki a au.