1Hanai, kitia la, ke tala atu e au ki a mutolu, kua lata ki a mutolu ke kumikumi ke he tau mena nai, hanai, ko e poaki hanai kua tuku atu e au ki a mutolu, kia kumikumi fakamakutu a mutolu ke he ta mena nai, ha ko e mena talahaua e tau kupu a Isaia.

2Ha ko e mena kua mooli, ne pipiki atu ai e talahau haana ke he tau mena oti hagaao ke he haaku a tau tagata ha ha ke he magafaoa a Isaraela; ko e mena ia kua lata tonu ki a ia ke vagahau foki ke he tau Tagata Kehe.

3Ko e tau mena oti foki ne talahau e ia, ne tutupu po ke nakai la hoko ia, to pihia ni tuga ni he vagahau ai e ia.

4Ko e mena ia kia fanogonogo a mutolu ke he haaku a tau kupu, kia tohi foki e mutolu e tau mena ne tala atu e au ki a mutolu, ke lata ai mo e magaaho mo e finagalo he Matua, to hoko atu ai e tau mena ia ke he tau Tagata Kehe.

5Ti ko lautolu ka fanogonogo ke he haaku a tau kupu mo e tokihala, mo e papatiso, ko lautolu ia ka fakamoui. Kia kumikumi a mutolu ke he tau perofeta ha kua tokologa a lautolu ne talahau e tau mena nai.

6Ne hoko ai, mole atu he vagahau e Iesu e tau kupu nai kua liu vagahau foki ki a lautolu pehe, ka oti he fakamatafeiga atu e ia ki a lautolu e tau tohi oti ne kua moua ai e lautolu, ne pehe a ia ki a lautolu; Kitia la, ko e falu a tohi foki kua loto au ke tohi e mutolu kua nakai la ha ha ia mutolu.

7Ne hoko ai, ne tala age e ia ki a Nifai, pehe; Ta mai la e tohi na kua fakamau e mutolu.

8Kua ta mai e Nifai e tau tohi mo e tuku ai ki mua haana. Ne onoono a ia ki a lautolu ti pehe mai:

9Ko e mooli, ke tala atu e au ki a mutolu, ne poaki au, ke he haaku a fekafekau ko Samuela ko e tagata Lamana, ke fakamooli e ia ke he tau tagata nai pehe, ke he aho ia ke fakalilifu ai he Matua haana a higoa ki a au, ha ha i ai e tokologa e tau tagata tapu ke mamatike mai ia lautolu kua mamate, mo e fakakite e au a lautolu ke he tokologa mo e fekafekau a lautolu ki a lautolu. Ti tala age e ia ki a lautolu, ne pihia nakai?

10Kua tala age haana a tau tutaki, kua pehe age ki a ia, hanai ma Iki na e, ne perofeta mooli e Samuela ke tuga e tau kupu haau, ti ko e hanai kua fakamooli tuai.

11Ti pehe age a Iesu ki a lautolu, ko e heigoa kia e mena ne kua nakai la tohi ai e mutolu e mena nai, ne mamatike e tokologa he tau tagata tapu mo e fakakite a lautolu ke he tokologa mo e fekafekau a lautolu ki a lautolu.

12Ne hoko ai, ne manatu e Nifai ne nakai la tohia ia e tau mena nai.

13Ne hoko ai, ne poaki e Iesu ke tohi e tau mena ia, a ti tohi ai ia ke tuga ne poaki e ia.

14Ne hoko ai, kua fakamatafeiga fakalataha e Iesu e tau tohi oti ne kua tohi e lautolu, ne poaki e ia ki a lautolu kia fakaako atu e lautolu e tau mena ne fakamatala atu e ia ki a lautolu.