1Ne hoko ai e magaaho, kua haele hake tuai a Iesu ke he lagi, kua mavehevehe fano ai e lanu tagata, kua taki taha e tagata mo e uta e ia haana a hoana mo e tau fanau mo e liliu atu ai ke he haana ni a kaina.

2Kua fakapuloa fakaave ke he tau tagata ka e nakai la pouli ia pehe ne kitia he lanu tagata a Iesu, mo e fekafekau a ia ki a lautolu. To fakakite foki a ia a pogipogi ke he lanu tagata.

3Hanai, ne tukuogo ni ke he po katoa e tala ki a Iesu, kua malolo a lautolu ke fakahoko atu ke he tau tagata e tala ia, ne ha ha i ai e tokologa kua gahua fakamalolo a lautolu he po katoa ia ke maeke ke hohoko atu ai ke he pogipogi hake ke he mena ke fakakite ai e Iesu a ia ke he lanu tagata.

4Ne hoko ai, ko e pogipogi hake kua maopoopo e lanu tagata, kitia la ko Nifai mo e haana a matakainaga, ko Matonaiha, mo Kumeni, mo Kumenonohi, mo Ieremia, mo Semonono, mo Iona, mo Setekaia, mo Isaia — ko e tau higoa hana he tau tutaki ne fifili e Iesu — Ne hoko ai ne o atu a lautolu mo e tutu ke he uho tonu he lanu tagata.

5Ti kitia la, kua to lahi e tokologa he lanu tagata, ti vevehe e lautolu a lautolu ke he hogofuluma ua e matakau.

6Ne fakaako he tokohogofulu ma ua e lanu tagata, kitia la, ne fakatokotui foki a lautolu e lanu tagata ke he fuga kelekele, mo e liogi ke he Matua ke he higoa a Iesu.

7Ne liogi foki e tau tutaki ke he Matua ke he higoa a Iesu. Ne hoko ai, ne mamatike a lautolu mo e fekafekau atu ke he tau tagata.

8Kua oti tuai he fekafekau atu a lautolu mo e tau kupu ia ni ne talahau e Iesu — nakai fai mena ne kehe mai he tau kupu ne talahau e lesu — kitia la, ne liu a lautolu mo e fakatokotui foki mo e liogi ke he Matua ke he higoa a Iesu.

9Ne liogi a lautolu ke he mena kua manako mooli a lautolu ki ai; kua manako a lautolu ke moua ai e Agaaga Tapu.

10Kua mole atu he liogi pihia a lautolu, ti o hifo a lautolu ke he kau vai, kua mumui atu e lanu tagata ki a lautolu.

11Ne hoko ai, ne hifo a Nifai ke he vai mo e papatiso ai.

12Ne hake mai a ia i loto he vai mo e kamata ke papatiso, ne papatiso e ia a lautolu oti ne fifili e Iesu.

13Ne hoko ai, kua oti a lautolu he papatiso ai, kua ohake mai oti i loto he vai, ti ha ha i ai e Agaaga Tapu ki luga ia lautolu, kua puke a lautolu ke he Agaaga Tapu mo e afi.

14Ti kitia la, ne takai ai ia lautolu tuga ni ke he afi, ne hifo mai ai he lagi, ne kitia ai he lanu tagata mo e fakamooli foki a lautolu ki ai, kua haele mai foki e tau agelu he lagi mo e fekafekau ki a lautolu.

15Ne hoko ai, ha ne fa e fekafekau e tau agelu ke he tau tutaki, kitia la ne haele mai a Iesu mo e tu ai ke he vaha loto mo e fekafekau atu ki a lautolu.

16Ne hoko ai, ne vagahau atu a ia ke he lanu tagata mo e poaki ki a lautolu ke liu foki fakatokotui a lautolu ke he kelekele, ne poaki foki e ia haana a tau tutaki ke fakatokotui foki a lautolu ke he kelekele.

17Ne hoko ai, kua fakatokotui oti a lautolu ke he kelekele, ne poaki e ia haana a tau tutaki ke liogi a lautolu.

18Ti kitia la, ne kamata a lautolu ke liogi, kua liogi a lautolu ki a Iesu mo e ui a ia ko e ha lautolu a Iki mo e ha lautolu a Atua.

19Ne hoko ai, ne toka e Iesu a lautolu mo e fano kehe fakatote ki tua mai ia lautolu mo e tukutuku hifo a ia ke he kelekele mo e pehe a ia he vagahau;

20Ma Matua na e, kua fakaaue atu au ki a koe ha kua foaki e koe e Agaaga Tapu ki a lautolu nai ne fifili e au. Ti ha ko e ha lautolu a tua ki a au ne fifili ai e au a lautolu mai he lalolagi.

21Ma Matua na e, kua liogi atu au ki a koe ke foaki foki pihia e koe e Agaaga Tapu ke he tau tagata oti kua tua ke he ha lautolu a tau kupu.

22Ma Matua na e, ne tuku age e koe ki a lautolu e Agaaga Tapu ha kua tua a lautolu ki a au; kua kitia e koe ha ha i a lautolu e tua ki a au ha kua logona e koe a lautolu, ti kua liogi a lautolu ki a au, kua taute pihia e lautolu ha kua ha ha i ai au mo lautolu.

23Koe magaaho nai, ma Matua na e, kua liogi au ki a koe ma lautolu, kua liogi foki au ma lautolu oti kua tua ke he ha lautolu a tau kupu, kia maeke ia lautolu ke tua ki a au, kia maeke ai ia au, ke ha ha i ai ia lautolu ke tuga a koe, ma Matua na e, kua ha ia au, kia maeke ke taha ni a lautolu.

24Kua liogi pihia a Iesu ke he Matua, ti hoko atu a ia ke he haana a tau tutaki. Kitia la, ne liogi fakamakamaka agaia a lautolu ki a aia, nakai fakaloga foki e ha lautolu e tau kupu ha ko e mena ne kua tuku age ki a lautolu e tau kupu kua lata ke liogi atu ai ti kua puke ni ha lautolu a tau loto.

25Ne hoko ai, ha ne liogi a lautolu ki a ia ti fakamonuina e Iesu a lautolu, kua mamali atu haana fofoga ki a lautolu, kua kikila atu foki e maama he haana fofoga ki a lautolu, kitia la kua hina a lautolu tuga mo e haana fofoga mo e haana a tau tapulu. Kitia la, ko e hina ne kua hina mai ai a lautolu, kua mua atu ke he tau hina oti, hanai nakai fakaai foki ke fai mena he lalolagi kua hinavake tuga e hina ia.

26Ne pehe age a Iesu ki a lautolu, kia liogi pihia, ka e pete ia ne nakai oti ha lautolu a liogi.

27Ne haga kehe a ia mai ia lautolu, mo e fano fakatote ai ke he taha mena mo e tukutuku hifo ai ke he kelekele. Ne liu foki liogi a ia ke he Matua, kua pehe mai:

28Ma Matua na e, kua fakaaue atu au ki a koe ha kua fakamea e koe a lautolu ne fifili e au ha ko e ha lautolu a tua, kua liogi au ma lautolu mo lautolu foki ka tua ke he ha lautolu a tau kupu, kia mea ai foki a lautolu ha ko au, moe tua ke he ha lautolu a tau kupu tuga ni a lautolu kua fakamea ai ha ko au.

29Ma Matua na e, nakai liogi au ma e lalolagi ka ko lautolu kua foaki mai e koe ki a au mai he lalolagi ha ko e ha lautolu a tua, kia maeke ai ia lautolu ke fakamea ai ha ko au, kia maeke ai foki ia au ke ha ai ia lautolu tuga a koe, ma Matua na e, kua ha i ai ia au, kia taha a tautolu, kia lilifu ai au ha ko lautolu.

30Ko e magaaho ne vagahau ai e Iesu e tau kupu ia, ti liu atu foki a ia ke he haana a tau tutaki, kitia la, kua liogi fakamakamaka mo e nakai fakaoti ai ha ko ia. Ne mamali foki a ia ki a lautolu, kitia la, kua hina a lautolu ke tuga a Iesu.

31Ne hoko ai, ne fano kehe fakatote foki a ia ki tua mo e liogi ke he Matua;

32Ti nakai maeke he alelo ke talahau ai e tau kupu ne liogi ai e ia, nakai maeke foki ke tohi he tagata e tau kupu ne liogi e ia.

33Ka e logona he lanu tagata mo e fakamooli ki ai ti hafagi ha lautolu a tau loto mo e maama ai a lautolu ke he ha lautolu a tau loto e tau kupu ne liogi e ia.

34Ka e pete ia, kua to lahi e hokulo mo e ofo e tau kupu ne liogi e ia, ko e mena ia kua nakai maeke e tau kupu ia ke tohi ai, nakai maeke foki a lautolu ke talahau ai ke he ha tagata.

35Ne hoko ai, kua oti tuai ha Iesu a liogi, kua hoko atu foki a ia ke he haana a tau tutaki, kua pehe age ki a lautolu: Nakai kitia e au e ha tua kua pehe nai ke he tau tagata luta oti, ko e mena ia ne nakai maeke ia au ke fakakite ki a lautolu e tau mana mua ue atu ha ko e ha lautolu a nakai tua.

36Ko e mooli, ke tala atu e au ki a mutolu, nakai fai taha ia lautolu ne kitia e tau mena mua ue atu tuga kua kitia e mutolu, nakai fai foki ia lautolu ne logona e tau mena kua mua ue atu tuga kua logona e mutolu.