1Kua fenoga e tau tutaki a Iesu mo e fakamatala ai e tau mena ne logona mo e kitia e lautolu, kua papatiso foki e lautolu ke he higoa a Iesu, kua maopoopo fakalataha ai e tau tutaki, kua kau fakalataha a lautolu ke he liogi mo e fakakanopogi.

2Kua liu foki fakakite atu ai e Iesu a ia ki a lautolu, ha koe mena ne liogi a lautolu ke he Matua ke he haana a higoa, ti haele mai ai a Iesu mo e tu ke he vaha loto ha lautolu, kua pehe mai a ia ki a lautolu, ko e heigoa ha mutolu kua loto ke tuku atu e au ma mutolu?

3Ti pehe age a lautolu ki a ia: Ma Iki na e, kua loto a mautolu ke tala mai e koe ki a mautolu e higoa ke fakahigoa aki e mautolu e lotu nai, ha ko e mena ha ha i ai e tau taufetoko ke he tau tagata hagaao ke he mena nai.

4Ti tala age e Iki ki a lautolu: Ko e mooli, ko e mooli, ke tala atu e au ki a mutolu, ko e heigoa e mena kua loma mo e taufetoko ai e tau tagata ha ko e mena nai?

5Nakai kia totou e lautolu e tau tohi kua pehe mai, kua lata ia mutolu ke tuku ki luga e mutolu e higoa ha Keriso, ko e haaku a higoa haia? Ha ko e mena ko e higoa ia ka fakahigoa aki a mutolu ke he aho fakamui;

6Ti ko ia kua tuku ki luga e ia e higoa haaku mo e tumau a to hoko ke he fakahikuaga ko ia haia ke fakamoui ke he aho fakahiku.

7Ko e mena ia, ko e tau mena oti ka taute e mutolu, kia taute e mutolu ke he haaku a higoa; ko e mena ia, kia fakahigoa e mutolu e lotu ke he haaku a higoa; kia ui atu foki a mutolu ke he Matua ke he higoa haaku ke fakamonuina e ia e lotu ha ko au.

8Ti maeke fefe ke eke mo lotu haaku, kaeke ke nakai ui aki e haaku a higoa? Ha ko e mena kaeke ke ui aki e higoa a Mose, ti ko e lotu ni a Mose, kaeke ke ui aki foki e higoa he taha tagata ti ko e lotu ni he tagata, kaeke ke ui aki e higoa haaku, ti ko e haaku a lotu haia kaeke ke fakave e lautolu ki luga he haaku a evagelia.

9Ko e mooli ke tala atu e au ki a mutolu, kua fakave ai a mutolu ki luga he haaku a evagelia; ko e mena ia kia fakahigoa e mutolu e tau mena oti kua fakahigoa e mutolu ke he haaku a higoa; ko e mena ia, ke ui atu a mutolu ke he Matua ha ko e lotu, kaeke ko e higoa haaku kua ui atu ai e mutolu, to logona he Matua a mutolu.

10Kaeke foki kua fakave e lotu ke he haaku a evagelia to fakakite mai he Matua haana ni a tau gahua ki ai.

11Kaeke kua nakai fakave ai ke he haaku a evagelia, ka e fakave ai ke he tau gahua he tau tagata, po ke tau gahua he tiapolo, ko e mooli ke tala atu e au ki a mutolu ha i ai ia lautolu e fiafia ha ko e ha lautolu a tau gahua ke he vaha, ka e ha ha i ai e magaaho ke hoko mai ai e fakahikuaga to hahala a lautolu mo e tolo ke he afi, ko e mena ia kua nakai fakaai taha ke liu mai ai.

12Ha kua muitua atu ha lautolu a tau gahua ki a lautolu, ha ko e ha lautolu a tau gahua kua hahala ai a lautolu; ko e mena ia kia manatu e tau mena kua tala atu e au ki a mutolu.

13Kitia la, kua foaki atu tuai e au ki a mutolu haaku a evagelia, ko e evagelia hanai ne foaki e au ki a mutolu — ne haele mai au ke he lalolagi ke taute e finagalo he haaku a Matua, ha kua fakafano mai au he haaku a Matua.

14Ti ne fakafano mai he haaku a Matua au kia tuku ai au ki luga he satauro, ti mole he tuku hake au ki luga he satauro, kua maeke ai ia au ke ta mai e tau tagata oti ki a au, ki a tuga ne tuku hake au he tau tagata, kua pihia foki ka tuku hake he Matua e tau tagata, ke tutu ai ki mua ia au ke fakafili ai a lautolu ke lata mo e ha lautolu a tau gahua ko e mitaki po ke kelea.

15To e kakano ia ne kua tuku hake ai au; ha ko e mena ia, ke lata ai mo e malolo he Matua, to ta mai e au e tau tagata oti ki a au, ki a fakafili a lautolu ke lata mo e ha lautolu a tau gahua.

16To hoko ai, ko ia kua tokihala mo e papatiso ke he haaku a higoa to fakakatoatoa ai, kaeke foki ke tumau a ia a to hoko ke he fakahikuaga, kitia la, ko ia ha ia ka totoku e au ki mua he haaku a Matua ke he aho ia ka tu au ke fakafili e lalolagi.

17Ka ko ia kua nakai tumau a to hoko ke he fakahikuaga, ko ia ha na ka hio mo e liti ke he afi, ko e mena ia kua nakai fakaai ke liliu mai ai a lautolu ha ko e fakafiliaga he Matua.

18Koe kupu hanai ne foaki mai e ia ke he tau fanau he tau tagata. Ko e kakano haia kua fakamooli e ia e tau kupu kua foaki mai tuai e ia, ti nakai pikopiko foki a ia, ka e fakamooli ni ke he haana a tau kupu oti.

19Nakai maeke ke he ha mena nakai mea ke hoko atu ai ke he haana a kautu, ko e mena ia to nakai hao atu ha mena ke he haana a okiokiaga ka ko lautolu ni kua fakamea ai ha lautolu a tau tapulu ke he haaku a toto, ha ko e ha lautolu a tua mo e fakatokihalaaga mai he ha lautolu a tau hala oti, mo e ha lautolu a fakatumau ke he fakahikuaga.

20Hanai, e poakiaga kia tokihala a mutolu ko e tau tagata oti he lalolagi, mo e o mai ki a au ke papatiso ai, ke he haaku a higoa, kia maeke ai ia mutolu ke fakatapu ai ke moua e Agaaga Tapu kia maeke ia mutolu ke tutu mo e nakai fai ila ki mua haaku ke he aho fakamui.

21Ko e mooli, koe mooli ke tala atu e au ki a mutolu, ko e haaku a evagelia hana; kua iloa e mutolu e tau mena kua lata ke taute ke he haaku a lotu; ha ko e tau gahua ne kitia e mutolu au ne taute, ki a ataute pihia e mutolu, ha ko e tau mena ia ne kitia e mutolu au ne taute, kia taute pihia foki e mutolu.

22Ko e mena ia, kaeke ke taute e mutolu e tau mena ia, uhoaki a mutolu, ha ko e mena to tuku hake ai a mutolu ke he aho fakamui.

23Ki a tohi e tau mena ne kua mamata a mutolu ki ai mo e logona fola, kae nakai ko e tau mena kua fakataputapuina ai.

24Ki a tohi e tau gahua he tau tagata nai, ko e tau mena ia, kua tohi i tuai mo e fakamau ai ko e tau mena ne nakai la tohi ia.

25Kitia la, mai he tau tohi kua tohi tuai, moe tau tohi ne nakai la tohi ia ka fakafili ai e tau tagata nai, ha ko e mena ko e tau tohi ia ke iloa ai ha lautolu a tau gahua ke he tau tagata.

26Kitia la, kua tohi he Matua e tau mena oti; ko e mena ia, mai he tau tohi ka tohi ai to fakafili ai e lalolagi.

27Kia iloa foki e mutolu, to eke a mutolu mo tau iki fakafili he tau tagata nai, ke lata ai mo e fakafiliaga ka foaki atu e au ki a mutolu ko e fakafiliaga ia he tututonu. Ko e mena ia, ko e fefe e tau mahani kua lata ia mutolu ke taute? Ko e mooli ke tala atu e au ki a mutolu, kia tuga au a mutolu.

28Ko e magaaho nai, kua haele atu ne fai au ke he Matua. Ko e mooli ke tala atu e au ki a mutolu, ko e tau mena oti ka ole atu e mutolu ke he Matua ke he haaku a higoa to foaki mai ai ki a mutolu.

29Ko e mena ia, ki a ole atu a mutolu, ti moua mai ai e mutolu; kia tukituki atu a mutolu, ti vevete mai ai ki a mutolu, ha ko ia ka ole to moua e ia, to vevete mai foki ki a ia kua tukituki atu.

30Kitia la he magaaho nai, kua to lahi e fiafia haaku, kua katoatoa ni, ha ko mutolu mo e atu hau nai, hanai, kua fiafia foki e Matua, pihia foki mo e tau agelu tapu oti, ha ko mutolu mo e atu hau nai, ha ko e mena nakai galo taha ia lautolu.

31Kitia la, kua loto au ke maama e mutolu, ha ko e mena hagaao au ki a lautolu he atu hau nai kua momoui ke he magaaho nai, ti nakai galo taha ia lautolu, ti katoatoa ni e haaku a fiaifa ha ko lautolu.

32Ka e kitia la, kua momoko ai au ha ko e atu hau ke fa aki mai he atu hau nai, ha kua takitaki fakahehe fano a lautolu mo e fakapaea ai he tama he malaia, ha ko e mena to fakafua atu e lautolu au ke he ario mo e auro, ti ko e mena ia to fakaotioti he tau moko, mo e maeke ai foki he tau tagata kaiha ke fofo ai. Ti ke he aho na, to aahi atu au ki a lautolu, mo e liu tuku atu ai ha lautolu a tau gahua ki luga he ha lautolu a tau ulu.

33Ne hoko ai, ne fakaoti e Iesu e tau kupu nai haana, ti pehe age a ia ke he haana a tau tutaki, kia huhu atu a mutolu ke he gutuhala pukilu, ha ko e mena pukilu e gutuhala, ti lautote foki e hala ke pu atu ke he moui, kua tokogaogao foki a lautolu ke moua ai; ka e pulahi e gutuhala, ti laulahi foki e hala ke pu atu ke he mate, kua tokologa foki a lautolu kua fenoga atu ai, a to hoko mai e po, ti nakai maeke ha tagata ke gahua.