1Mole atu he vagahau e Iesu e tau kupu nai, ti vagahau atu a ia ke he haana a tau tutaki takitokotaha mo e pehe atu ki a lautolu, ko e heigoa kia e tau mena kua manako mai a mutolu ki a au, ka fano au ke he Matua?

2Ti vagahau atu a lautolu oti pehe, kae nakai vagahau ai e toko tolu: Manako a mautolu, kaeke ke mole atu e tau tau he moui fakatagata, mo e fakaoti ai foki e ha mautolu a gahua fekafekauaga, tuga ne ui mai ai e koe a mautolu, kua lata nai ke mafiti e ha mautolu a haele atu ki a koe ke he haau a kautu.

3Ti vagahau atu ai a ia ki a lautolu: Uhoaki a mutolu ha kua manako mai a mutolu ke he mena nai mai ia au; ko e mena ia, ka mole atu e fitu hogofulu ma ua e tau tau ha mutolu, to o mai a mutolu ke he haaku a kautu; ti ko au foki ke okioki ai a mutolu.

4Ti mole atu ai e vagahau haana ki a lautolu na, ti haga atu a ia ki a lautolu toko tolu, mo e vagahau atu ai ki a lautolu: ko e heigoa kia e mena ka eke e au ma mutolu ka liu atu au ke he haaku a Matua?

5Ti momoko ai e ha lautolu a tau loto, ha kua nakai maeke ia lautolu ke vagahau atu ki a ia e mena ne manako a lautolu ki ai.

6Ti pehe atu a ia ki a lautolu kitia la, kua iloa e au e tau manamanatuaga ha mutolu, ti kua manako mai a mutolu ke he mena ne manako ki ai foki a Ioane ne Ofania e au, ne gahua a ia fakalataha mo au ke he haaku a lotu fakamua, ne manako a ia pehe na, fakamua a ia to lagaaki hake ai he tau Iutaia a au ki luga.

7Ko e mena ia, to lahi e monuina ha mutolu, ha ko e mena to nakai logona ai e mutolu e mate; ka e to monuina a mutolu ke kitia e tau gahua loga he Matua ke he tau fanau he tau tagata, pihia ni ke he katoatoaaga he tau mena oti, tuga kua fioia ki ai e Matua, ka haele mai au mo e haaku a lilifu mo e tau malolo oti he lagi.

8To nakai fakauka ai a mutolu ke he tau mamahi he mate; kaeke ke liu haele mai au he haaku a lilifu, to liliu ai a mutolu tuga e kemo he mata mai he tino fakatagata ke he tino nakai mate; ti to fakamonuina ai a mutolu ke he kautu he haaku a Matua.

9Ti pehe foki, to nakai moua ai a mutolu ha mamahi, ke he magaaho ka momoui ai a mutolu ke he tino, po ke momoko foki ka e ko e momoko ni ha ko e tau hala he lalolagi; ti ko e tau mena oti nai, ka eke ai e au ha ko e tau mena kua manako mai ki ai a mutolu ia au; ha kua manako a mutolu ke ta mai ai e mutolu e tau monuina he tau tagata ki a au, he magaaho ne tu agaia ai e lalolagi.

10Ti ko e mena nai ke puke namo ai e ha mutolu a fiafia; mo e nonofo ai a mutolu ke he kautu he haaku a Matua; hanai, to puke namo ai ha mutolu a fiafia tuga e katoatoaaga he fiafia ne tuku mai he Matua ki a au; ti eke ai a mutolu tuga a au, ti eke ai foki au ke tuga e Matua; ti ko e Matua mo au kua taha ni;

11Ti fakamooli ai he Agaaga Tapu e Matua mo au; ti foaki mai ai he Atua e Agaaga Tapu ke he tau fanau he tau tagata, ha ko au.

12Ti hoko ai, kua mole atu he vagahau e Iesu e tau kupu nai, ti aamo atu e matalima haana ki a lautolu taki toko taha, ka e tokanoa ai e toko tolu ne manako ke nonofo leva ai, ti fano kehe ai a ia.

13Kitia la, kua mahafagi ai e lagi mo e ta hake atu ai a lautolu ke he lagi, ti kitia mo e logona ai e tau mena kua nakai maeke ke talahau.

14Ti kua fakatapu ai mo e nakai maeke ai a lautolu ke talahau; po ke age foki ki a lautolu e malolo, ke maeke ai a lautolu ke talahau e tau mena ne kitia mo e logona ai e lautolu;

15Ti pete ni kua ha ha ke he tino po ke nakai ke he tino a lautolu, kua nakai maeke ke talahau ai ha kua tuga ke he kitiaaga ha lautolu, kua fai liliuaga a lautolu, kua liliu kehe a lautolu mai he tino mo e kakano nai ke he tino nakai mate, ke maeke ai ia lautolu ke kitia ai e tau mena he Atua.

16Ka ne hoko ai, ne liu foki a lautolu gahua fakamatala ke he lalolagi; pete ia ne nakai maeke a lautolu ke fakamatala ai e tau mena kua logona mo e kitia ai e lautolu, ha ko e poakiaga nai ne foaki atu ki a lautolu ke he lagi.

17Ti ko e ai nai, nakai iloa ko e tau tagata momoui a lautolu po ke tau tagata kua moua e lautolu e tau tino nakai mate, tali mai he aho ne fakaliliu ai, kua nakai maama ki a au;

18Ka e pihia e lahi he mena ne iloa e au, tuga foki mo e fakamauaga ne kua foaki mai — ne o atu ai a lautolu ke he motu katoa, mo e fakamatala ai ke he tau tagata oti, mo e fakapotopoto mai e tokologa ke he lotu ne kua tua ke he tau fakamatalaaga ha lautolu; kua papatiso foki e lautolu ti tokologa ai a lautolu kua papatiso ne moua ai e Agaaga Tapu.

19Ti ne tuku ai a lautolu ke he fale puipui, e lautolu ne nakai tutaki ke he Lotu. Ti nakai maeke ai foki he tau fale puipui ke taofi a lautolu na, ha kua maihi ua ai e fale puipui.

20Ti tolo hifo a lautolu ke he kelekele; kua ta ai e lautolu e kelekele aki e kupu he Atua, kua pihia ai ti ko e haana a malolo ne laveaki ai a lautolu mai he tau pahua he kelekele; ti ko e mena ia kua nakai maeke ia lautolu ke keli e tau luo ke maeke ke taofi ai a lautolu.

21Ti laga tolu foki ne tolo atu ai a lautolu ke he afi puhopuho mo e nakai haofia ai a lautolu.

22Ti laga ua foki ne tolo atu ai a lautolu ke he ana he tau manu favale; kitia la ne fefeua a lautolu mo e tau manu tuga ni e mukemuke mo e punua mamoe, ti nakai ni haofia ai foki.

23Ti hoko ai, ne o atu ai a lautolu ke he tau tagata Nifai, mo e fakamatala atu e evagelia a Keriso ke he tau tagata oti he motu; ti liliu ai a lautolu ke he Iki, mo e tutaki fakalataha ai ke he Lotu a Keriso, ti pihia e fakamonuinaaga he tagata he atu hau na ke tuga mo e tau kupu a Iesu.

24Ti ko au ko Moromona, kua fakaoti ai e tau fakamatalaaga ke he tau mena nai, he magaaho nai.

25Kitia la, ne amanaki au ke tohi ai e tau higoa ha lautolu kua nakai hoko atu ki ai e mate ka kua taofi mai he Iki; ti ko e mena ia kua nakai tohi ai e au, ha kua fufu ia mai he lalolagi.

26Ka e kitia la, ne kua kitia e au a lautolu ti fakamatala mai a lautolu ki a au.

27Ti kitia la, to ha ha i ai a lautolu ke he tau Tagata Kehe, to nakai iloa ai he tau Tagata Kehe a lautolu.

28To ha ha i ai foki a lautolu ke he tau tagata Iutaia to nakai iloa foki he tau tagata Iutaia a lautolu.

29Ti ka hoko ai e magaaho kua kitia ai he Iki kua lata ke he haana a loto matala, to fakamatala atu a lautolu ke he tau fanau oti a Isaraela, kua mavehevehe fano ai ke he lalolagi katoa, ko e tau kautu oti, tau vagahau mo e tau leo kehekehe mo e tau tagata foki, to ta mai ai, mai ia lautolu ki a Iesu e tokologa he tau agaaga, mo e fakakatoatoa ai e tau manako ha lautolu ti pihia foki ha ko e malolo he agaaga he Atua kua ha ha i ai ia lautolu.

30Ti eke ai a lautolu ke tuga e tau agelu he Atua, ti kaeke ke liogi atu a lautolu ke he Matua ke he higoa a Iesu, to maeke ia lautolu ke fakakite atu ai a lautolu ke he ha tagata kua kitia ai e lautolu kua mitaki.

31Ko e mena ia, to eke ai e lautolu e tau mena lalahi mo e tau gahua ke ofo ai, fakamua to hoko mai ai e aho lahi ke tutu oti ai e tau tagata ki mua he nofoa fakafili ha Keriso.

32Hanai, pihia foki ni ke he tau Tagata Kehe, to ha ha i ai foki e taha mena lahi mo e gahua ke ofo ai, ka eke ai e lautolu, fakamua to hoko mai ai e aho he fakafiliaga.

33Ti kaeke kua ha ha ia mutolu e tau tohi oti, kua talahau mai ai e tau gahua mitaki a Keriso kua pehe ai e tau kupu a Keriso, to iloa ai e mutolu to hohoko mai ai e tau mena oti nai.

34Ti Oi te ki a ia kua nakai fanogonogo ke he tau kupu a Keriso, mo lautolu foki ne kotofa e ia mo e fakafano atu ki a lautolu, ko lautolu kua nakai tohia e tau kupu a lesu mo e tau kupu ha lautolu ne fakafano atu e ia, ti to nakai talia foki e ia a lautolu ke he aho fakahiku;

35Ti ne lauka ni ia lautolu na ke ua fanau mai ai. Ha kua manatu kia e mutolu kua maeke ke uta kehe ai e fakafiliaga he Atua kua hukia a ia, ne kua taholi hifo ai he tau hui he tau tagata, ke fakahoko ai e fakamouiaga?

36Ti ko e magaaho nai kitia la, ha kua vagahau atu au, hagaao ia ki a lautolu ne fifili he Iki, Hanai, pihia ni mo lautolu toko tolu ne kua hamutia ai ke he lagi, ne nakai iloa ai e au, kua fakamea kia a lautolu mai he tau tino fakalalolagi ke he tau tino nakai mate —

37Ka e kitia la, tali mai he tohitohi ai au, ne ole atu au ke he Iki ti ne fakakite mai ai ki a au kua lata ke fai liliuaga ke he tau tino ha lautolu, kaeke ke nakai pihia kua pauaki ke logona ai e lautolu e mate.

38Ko e mena ia, ke nakai lauia ai a lautolu ke he mate, ne ha ha i ai e taha liliuaga ke he tau tino ha lautolu, ke aua ia neke matematekelea ai a lautolu ke he mamahi po ke momoko, ka e ko e momoko ni ha ko e tau hala he lalolagi.

39Ko e liliuaga nai to nakai tatai ai mo e mena ka hoko ai ke he tau aho fakamui; ka e ne ha ha i ai e liliuaga ne hoko ki a lautolu, kia nakai maeke foki ia Satanai ke pule atu ki a lautolu, mo e nakai maeke foki ke kamatamata e ia a lautolu; ti ne faka tapu ai a lautolu ke he tino, kua tapu ai a lautolu mo e to nakai maeke foki he tau malolo he lalolagi ke taofi ai a lautolu.

40Ti to nonofo pehe nai a lautolu a to hoko mai ai e aho he fakafiliaga a Keriso; ti ka hoko atu ke he aho na, to kehe lahi foki e liliuaga ke he tau tino ha lautolu, ti huhu atu ai a lautolu ke he kautu he Matua mo e nakai liliu mai ai ki fafo, ka to nonofo fakalataha ai mo e Atua tukulagi ke he lagi.