1Ne hoko ai, ne poaki e Iesu ke he haana a tau tutaki ke ta mai a aleto mo e uaina ki a ia.

2Ha ne o atu agaia a lautolu ke moua mai he aleto mo e uaina, a ti poaki a ia ke he lanu tagata ke nonofo hifo a lautolu ke he kelekele.

3Kua liliu mai tuai e tau tutaki mo e aleto mo e uaina, ti toto e ia e aleto mo e tofitofi mo e fakamonuina ai; mo e age ai ke he haana a tau tutaki mo e poaki ai ki a lautolu ke kai ai.

4Kua kai e lautolu, kua makona, ti poaki a ia ke tufatufa ai e lautolu ke he lanu tagata.

5Kua kai e lautolu, kua makona, ti pehe age a ia ke he haana a tau tutaki. Kitia la to taha ia mutolu ka fakauku, ko ia foki ke foaki e au ki ai e malolo kia tofitofi e ia e aleto, mo e fakamonuina ai, to age foki e ia ke he tau tagata he haaku a lotu, ki a lautolu oti kua tua mo e papatiso ai ke he haaku a higoa.

6Kua lata a mutolu ke taute tumau e mena nai, ke tuga ni ne taute e au, ke tuga ni ne tofitofi e au e aleto mo e fakamonuina ai, mo e foaki atu ai ki a mutolu.

7Ti kia eke e mutolu e mena nai ke fakamanatu aki e haaku a tino, kua fakakite atu e au ki a mutolu. To eke e mena nai mo fakamooliaga ke he Matua kua manatu tumau e mutolu au. Kaeke foki ke manatu tumau e mutolu au to fakalataha e Agaaga haaku mo mutolu.

8Ne hoko ai, mole atu he vagahau e ia e tau kupu ia, ne poaki e ia ke he haana a tau tutaki ke inu e lautolu e uaina he kapiniu, mo e age foki e lautolu ke he lanu tagata ke inu foki e lautolu.

9Ne hoko ai ne taute pihia ai e lautolu, ne inu a lautolu, ti makona ai. Ne age foki e lautolu ke he lanu tagata, ne inu a lautolu ti makona ai foki a lautolu.

10Kua taute pihia he tau tutaki, kua pehe age a Iesu ki a lautolu: Uhoaki a mutolu ha ko e mena nai ne taute ai e mutolu, ha kua eke e mena nai mo fakakatoatoaaga he haaku a tau poakiaga, kua eke foki e mena nai mo fakamooliaga ke he Matua kua loto a mutolu ke taute e tau mena ia ne kua poaki atu ai e au ki a mutolu.

11Kia taute pihia tumau e mutolu ki a lautolu kua tokihala mo e papatiso ai ke he haaku a higoa, kia taute foki e mutolu e mena nai ke manatu ke he haaku a toto, ne fakamaligi e au ma mutolu, kia maeke ai ia mutolu ke fakamooli ke he Matua kua manatu tumau e mutolu au. Kaeke foki ke manatu tumau e mutolu au, to fakalataha e Agaaga haaku mo mutolu.

12Kua foaki atu foki e au ki a mutolu e poakiaga kia taute tumau e mutolu e tau mena nai. Kaeke foki ke fakatumau a mutolu kehe tau mena nai, uhoaki a mutolu, ha ko e mena kua fakave a mutolu i luga he haaku a maka.

13Ka ko lautolu mai ia mutolu kua lafi atu po ke uta kehe ha mena ka taute e lautolu mai he tau mena nai kua fakatu ha lautolu a fakaveaga he oneone, ti to mai e uha, mo e tafe mai e tau vai mo e agi mai e tau matagi to veveli ai a lautolu, kua mahafagi mai foki e tau gutuhala a teoli ke tali ai a lautolu.

14Ha ko e mena ia, uhoaki a mutolu kaeke ke omaoma a mutolu ke he haaku a tau poakiaga, ne poaki mai he Matua ki a au ke foaki atu e au ki a mutolu.

15Ko e mooli, ko e mooli ke tala atu e au ki a mutolu, kua lata ke mataala mo e liogi tumau a mutolu neke kamatamata a mutolu he tiapolo, ti moua e ia a mutolu.

16Tuga foki ne liogi au ma mutolou kia pihia foki a mutolu mo e liogi he haaku a lotu, mo e haaku a tau tagata kua tokihala mo e papatiso ke he haaku a higoa. Kitia la, ko au ko e maama mo e fakafifitakiaga ma mutolu.

17Ne mole atu he vagahau e Iesu e tau kupu ia ke he haana a tau tutaki, ne haga atu foki a ia ke he lanu tagata, kua pehe age ki a lautolu;

18Kitia la, ko e mooli, ko e mooli, ke tala atu e au ki a mutolu, kua lata ia mutolu ke mataala mo e liogi tumau, neke kamatamata a mutolu, ha ko e mena manako a Satani ki a mutolu, ke lūlū a mutolu tuga ne saito.

19Ko e mena ia kia liogi tumau a mutolu ke he Matua ke he haaku a higoa.

20Ko e tau mena oti foki kua ole atu e mutolu ke he Matua ke he haaku a higoa, kua tonu, mo e tua to moua ai, kitia la, to foaki atu ia ki a mutolu.

21Kia liogi a mutolu mo e ha mutolu a tau magafaoa ke he Matua, ke he haaku a higoa hokoia, kia monuina ai ha mutolu a tau hoana mo e tau fanau.

22Hanai foki, kitia la, kia fakapotopoto fakalataha tumau a mutolu. Hanai, aua neke taofi ha tagata ka hu atu ki a mutolu ke he ha mutolu a fakapotopotoaga kia toka a lautolu ke o atu ki a mutolu, mo e ua hataki a lautolu.

23Ka kia liogi a mutolu ma lautolu mo e ua vega a lautolu ki fafo, kaeke foki ke o mai a lautolu ki a mutolu, kia liogi a mutolu ma lautolu ke he Matua ke he haaku a higoa.

24Ko e mena ia, kia toto hake a e mutolu ha mutolu a maama kia kikila atu ai ke he lalolagi, Kitia la, ko e maama ka toto hake ai e mutolu, ko au haia ko e tau mena haia ne kitia mai e mutolu au ne taute. Kitia la ne kitia e mutolu au ne liogi ke he Matua, kua fakamooli oti a mutolu ki ai.

25Kua kitia foki e mutolu kua poaki atu e au ke ua o kehe taha ia mutolu ka e o mai ki a au, kia maeke ai ia mutolu ke omaoma mai mo e kitia, kia eke pihia foki e mutolu ke he lalolagi. Ko ia ka holifono e poakiaga nai to matematekelea ai a ia mo e uta ai foki ke he kamatamata.

26Ne hoko ai, mole atu he vagahau e Iesu e tau kupu ia, ne liu onoono foki ke he haana a tau tutaki ne fifili e ia, kua pehe age ki a lautolu:

27Kitia la, ko e mooli, ko e mooli, ke tala atu e au ki a mutolu, kua tuku atu e au taha foki e poakiaga ki a mutolu ti fano au ke he haaku a Matua, ke fakakatoatoa foki e falu foki a poakiaga ne foaki mai e ia ki a au.

28Ke aua neke toka ai e mutolu taha ke kai fakahanoa ai e aleto mo e inu ai ke he toto ka tauteute ai e mutolu;

29Ha ko e mena ko ia ke kai mo e inu haaku a kakano mo e toto, kae nakai lata haana a tau mahani kua kai mo e inu ai a ia he malaia ke he haana agaaga, ha ko e mena ia ke iloa e mutolu e tagata he haana a tau mahani nakai aoga ke kai mo e inu haaku a tino mo e toto, kia taofi e mutolu a ia.

30Ka e pete ia aua neke vega e mutolu a ia ki fafo, ka e fekafekau atu ki a ia mo e liogi maana ke he Matua ke he haaku a higoa. Kaeke ke tokihala a ia mo e papatiso ke he haaku a higoa, ti talia agataha e mutolu a ia mo e age ki a ia haaku a tino mo e toto.

31Kaeke ke nakai tokihala a ia to nakai totou fakatalaha ai a ia mo e haaku a tau tagata, aua neke moumou e ia haaku a tau tagata, ha ko e mena, kitia la, kua iloa e au haaku a tau mamoe kua tokogaogao a lautolu.

32Ka e pete ia, aua neke vega e mutolu a ia ki fafo he ha mutolu a tau sunako, po ke tau mena kua hufeilo ai a mutolu ka ko e tau tagata ka pihia kia tumau ni mo e fekafekau atu ki ai, ha ko e mena, nakai fioia e mutolu a lautolu po ke liliu mai nakai a lautolu mo e tokihala mo e o mai ki a au mo e tau loto katoa, moe fakamalolo e au a lautolu, ti eke a mutolu mo puhala ke ta mai ki a lautolu e fakamouiaga.

33Ko e mena ia kia leveki e mutolu e tau kupu ia ne poaki atu e au ki a mutolu, kia aua neke malaia ai a mutolu, Oi te ki a ia ka fakamalaia he matua.

34Ko e mena ia kua tuku atu e au e tau poakiaga nai ki a mutolu ha ko e tau taufetoko ne ha ha ia mutolu. Uhoaki a mutolu ka nakai ha ia mutolu e taufetoko.

35Ko e magaaho nai ko e haele atu fai au ke he Matua, ha ko e mena aoga ki a mutolu ke fano au ke he Matua.

36Ne hoko ai, mole atu he vagahau e Iesu e tau kupu ia, ti aamo a ia ke he tau tutaki ne fifili e ia takitokotaha; kua aamo atu a ia ki a lautolu oti mo e vagahau age foki ki a lautolu.

37Ka e nakai logona he lanu tagata haana a tau kupu ne vagahau ai e ia, a ti nakai fakamooli ai e lautolu, ka e fakamooli mai he tau tutaki ne age e ia ki a lautolu e pule ke foaki atu e Agaaga Tapu, to fakakite atu foki e au ki a mutolu ke he tau magaaho ne toe kua mooli e talahauaga ia.

38Ne hoko ai ne aamo atu a Iesu ki a lautolu oti, ne hoko mai e aolu mo e maluia ai e lanu tagata. Kua nakai maeke ia lautolu ke kitia a Iesu.

39Kua maluia pihia a lautolu he aolu, ti haele kehe ai a Iesu mai ia lautolu. Ne haele hake a ia ke he lagi. Ne kitia he tau tutaki a ia ne liu haele hake ai ke he lagi mo e fakamooli ki ai.