1Ti kitia la, kua tala atu e au ki a mutolu, kaeke kua kitia he Iki ke he haana a lotomatala, ko e tau talahauaga nai, to hoko atu ai foki ke he tau Tagata Kehe tuga mo e haana a tau kupu, ti iloa ai e mutolu, ko e maveheaga ne eke ai he Matua mo e tau fanau Isaraela, hagaao ia ke he liuakimaiaga ha lautolu ke he motu mooli ha lautolu kua kamata tuai ke fakamooli ai.

2Ti iloa agataha e mutolu ko e tau kupu he Iki, ne vagahau mai ai he tau perofeta tapu to fakamooli oti ai; ti nakai lata ke pehe mai a mutolu kua fakatuai e liu haele mai haana ke he tau fanau Isaraela.

3Ti aua neke manatu hifo a mutolu ke he tau loto ha mutolu kua kelea e tau kupu nai, kua vagahau mai, ha ko e mena kitia la, to manatu he Iki e maveheaga haana, ne kua eke ai mo e haana a tau tagata mai he magafaoa a Isaraela.

4Ti ka kitia e mutolu e tau talahauaga nai kua fakamooli atu ki a mutolu, kua nakai lata ia mutolu ke fakavihia atu ke he tau gahua he Iki, ha ko e pelu he haana a fakafiliaga kua toka ke he haana a lima matau; kitia la, ko e aho na, kaeke ke fakavihia ai e mutolu e haana a tau gahua, to eke ai e ia e taha mena ke uta kehe ai a mutolu.

5Oi te ki a ia kua fakavihia atu ke he tau gahua he Iki; hanai Oi te ki a ia ka fakatikai a Keriso mo e haana a tau gahua!

6Hanai, Oi te ki a ia ka fakatikai e tau fakakiteaga he Iki, mo e pehe ai kua nakai gahua e Iki ke he fakakiteaga po ke ke he perofeta, po ke ke he tau mena fakaalofa, po ke ke he tau vagahau kehekehe, po ke fakamalolo ai po ke ke he malolo he Agaaga Tapu!

7Hanai, Oi te foki ki a ia ka pehe mai he aho na, ke moua taha palepale, kua nakai fai mena ne taute e Iesu Keriso; ha ko ia ka eke e tau mena nai, kua tatai ni a ia mo e tama he tiapolo, ha kua nakai ha ha ia ia e fakaalofa noa ke tuga mo e tau kupu ha Keriso.

8Hanai, kua nakai lata ke miha, po ke fakavihia, po ke fefeua atu ke he tau tagata Iutaia, po ke falu foki ne toe mai he fale a Isaraela; ha ko e mena kitia la, kua manatu he Iki e haana a maveheaga ki a lautolu, ti to eke ai pihia e ia ki a lautolu tuga he mavehe atu ai e ia.

9Ko e mena ia, kua nakai lata ke liliu ai e mutolu e lima matau he Iki ke he faahi hema, mo e nakai maeke ai ia ia ke fakagahua e fifiliaga haana ke he fakakatoatoaaga he maveheaga ne eke ai e ia ke he magafaoa a Isaraela.