1Ne hoko ai, ne poaki e ia ki a lautolu ke tohi e lautolu e tau kupu ne tuku age he Matua ki a Malaki ka tala age e ia ki a lautolu. Ne hoko ia, kua tohia e tau kupu ia, ti fakamatafeiga e ia ki a lautolu. Hanai e tau kupu ia ne tala age e ia ki a lautolu, kua pehe mai: Ne pehe mai e Matua ki a Malaki — Kitia la, kua fakafano atu e au haaku a uta-fekau, ke tauteute e ia e puhala ki mua haaku, to hoko fakalutukia mai foki e Iki ke he haana faituga ko ia ne kumi ai e mutolu, ko e agelu he maveheaga haia, ko ia kua fiafia a mutolu ki ai, kitia la, to haele mai ni a ia, kua pihia mai e Iki he tau Iki.

2Ka ko hai ke fakauka ai ke he aho ka haele mai ai a ia? Ko hai foki ke tu atu ka fakakite mai a ia? Ha ko ia kua tuga e afi he tagata hakahaka lapatoa, kua tuga foki e moli he tagata unu.

3Kua nofo a ia po ke tagata kua tunu mo e fakamea e ario, to fakamea ai e ia e fanau a Levi, to uta kehe foki e ia e kelekele ia lautolu tuga he eke ke he auro mo e ario, to ta atu ai e lautolu e tau poa ke he Iki kua eke mo e mahani tututonu.

4To mitaki ai ke he Iki e poa a Iuta mo Ierusalema, tuga ne tau aho i tuai, tuga ne tau tau fakamua.

5To fakatata ai au ki a mutolu ke he fakafiliaga, to mafiti foki au ke eke mo fakamooli ki a lautolu kua eke e tau lagatau he tau taulaatua, mo lautolu kua faivao, mo lautolu kua omonuo pikopiko, mo lautolu kua fofo e palepale he tagata gahua tupe, kua fakakavega atu foki ke he fifine takape, mo e tau fanau tokaveli, katoa mo lautolu kua vega e tau tagata kehe, mo lautolu kua nakai matakutaku ki a au, kua pihia mai e Iki he tau Iki.

6Ha ko au ko e Iki, nakai ni hiki haaku a mahani, ko e mena ia kua nakai fakaoti ai a mutolu ko e fanau a Iakopo.

7Kua o kehe a mutolu mo e tau fakatufono haaku, mo e nakai omaoma a mutolu ki ai, tali mai he tau aho he tau matua ha mutolu. Kia liliu mai a mutolu ki a au, ti liu atu au ki a mutolu, kua pihia mai e Iki he tau Iki. Ka kua pehe mai a mutolu, ko e heigoa e mena ke liliu atu ai a mautolu?

8Ko e mena fofo kia he tagata e tau mena he Atua? Ka ko mutolu, kua fofo e mutolu haaku a tau mena. Ka ku a pehe mai a mutolu, ko e heigoa kia e tau mena haau kua fofo e mautolu? Kua fofo e mutolu e tau mena ne hogofulu aki he ha mutolu a tau mena katoa mo e tau poa.

9Kua malaia lahi ni a mutolu, ko e motu oti ni, ha kua fofo e mutolu haaku a tau mena.

10Kia ta mai e mutolu e tau mena ke hogofulu aki ha mutolu a tau mena oti kana ke he fale kua tatanaki ai e tau mena, kia ha i ai e tau mena kai ke he haaku a fale, mo e kamatamata mai ai e mutolu au ke he tau mena na, kua pihia mai e Iki he tau Iki, po ke hafagi nakai e au e tau pa he lagi ma mutolu, mo e liligi atu e au e monuina ma mutolu, a to lahi ue atu ni to nakai fahia a mutolu ke fakaaoga.

11To akonaki atu e au a ia ne kai e tau mena, ha ko mutolu, ti nakai moumou ai e ia e tau fua he fonua ha mutolu, ti nakai mokulu mataali e tau fua he tau vine ke he ha mutolu a tau fonua, kua pihia mai e Iki he tau Iki.

12to fakamonuina atu e tau motu oti ki a mutolu, ha ko e mena to eke a mutolu mo motu mitaki, kua pihia mai e Iki he tau Iki.

13Kua mamafa ha mutolu a tau kupu ki a au, kua pihia mai e Iki ka kua pehe mai a mutolu, ko e heigoa kia ha mautolu a tau kupu ne vagahau atu ai ki a koe?

14Kua pehe age a mutolu, nakai aoga ke fekafekau ke he Atua, ko e heigoa foki e mena kua moua e tautolu he omaoma ke he haana a maveheaga mo e o fano a tautolu mo e fakaatukehe ki mua he Iki he tau Iki.

15Ti ko e magaaho nai, kua talahau ai e tautolu kua fiafia a lautolu kua fakatokoluga; hanai kua ati hake ai foki a lautolu kua mahani kelea, kua kamatamata a lautolu ke he Atua, ka e hao ni a lautolu.

16Ti fevagavagahau aki a lautolu ne matakutaku ke he Iki, kua hagaao mai foki e Iki mo e fanogonogo mai, ti tohi ai e tohi ke fakamanatu ai, ki mua haana, ma lautolu ne matakutaku ke he Iki, mo e manamanatu ai ke he haana higoa.

17To eke foki a lautolu maaku, kua pihia mai e Iki he tau Iki ke he aho ia ka fakamaopoopo ai e au haaku a tau koloa uho, to fakaalofa foki au ki a lautolu tuga he fakaalofa e tagata ke he haana tama taane kua fekafekau ki a ia.

18Ti liliu atu ai a mutolu mo e kitia kua kehe e tagata mahani tututonu, kehe e tagata mahani kelea, kua kehe a ia kua fekafekau ke he Atua, mo ia kua nakai fekafekau ki a ia.