1Ko e mooli ke tala atu e au ki a mutolu, kua tuku atu e au e fakamailoga, kia iloa e mutolu e magaaho ka amaamanaki e tau mena nai ke tutupu mai — ke fakapotopoto mai e au haaku a tau tagata mai he ha lautolu a nonofoaga mavehevehe ha kua leva ma magafaoa a Isaraela na e, ti liu fakatu foki a Siona haaku ia lautolu.

2Ti kitia la, ko e mena ia hanai kua tuku atu ai e au ke eke mo fakamailoga ki a mutolu — ha ko e mooli ke tala atu e au ki a mutolu ka tuogo ai e tau mena nai kua fakamatala atu e au ki a mutolu, katoa foki mo e falu a mena ka fakamatala atu hagaao ki a au, ki a mutolu, ke he magaaho nai ki a au, mo e malolo he Agaaga Tapu ka foaki ki a mutolu hagaao ke he Matua, to fakailoa atu ai ke he tau Tagata Kehe ki a maeke ai ia lautolu ke iloa ai ke he tau tagata nai, ko lautolu ne toe mai he magafaoa a Iakopo, mo e iloa foki ke he tau tagata nai ka fakamavehevehe ai e lautolu.

3Ko e mooli, ko e mooli, ke tala atu e au ki a mutolu, to fakailoa atu e tau mena ia ki a lautolu hagaao ke he Matua, to moua mai foki he Matua, mai ia lautolu ki a mutolu.

4Ha kua pulotu ni ke he Matua ke fakatu ai a lautolu ke he motu nai, to fakatu foki a lautolu ko e motu tokanoa ha ko e malolo he matua, ki a maeke ai he tau mena nai ke hohoko mai ia lautolu ke he tau tau ne toe he ha mautolu a tau fanau, ke fakamooli aki e maveheaga he Matua ne mavehe e ia mo e haana a tau tagata, ma magafaoa a Isaraela na e;

5Ko e mena ia ka hohoko mai e tau gahua nai katoa mo e tau gahua foki ka eke ai e mautolu a mui he tau aho ka ta mai ai he tau Tagata Kehe ke he ha mutolu a tau fanau, ka nonofo ai ke he pouli ha ko e tau mahani kelea.

6Ha kua pihia e finagalo he Matua ke hohoko mai ai e tau mena ia he tau Tagata Kehe, ke maeke ai ia ia ke fakakite atu ai e ia haana a malolo ke he tau Tagata Kehe, ha ko e kakano nai, kaeke ke nakai fakamaō e tau loto ha lautolu, ke maeke ai ia lautolu ke tokihala mo e o mai ki a au mo e papatiso ke he haaku a higoa mo e iloa mo e maama ai foki e alito he haaku a evagelia ke maeke ai ia lautolu ke totou fakalataha ni mo e haaku a Evagalia ke maeke ai ia lautolu ke totou fakalataha ni mo e haaku a tau tagata, ma fale a Isaraela na e;

7Hanai, ka hoko mai e magaaho, to iloa ai he tau fanau ha mutolu e tau mena ia — to eke e mena ia mo fakamailoga ki a lautolu, kia maeke ai ia lautolu ke iloa kua kamata tuai e gahua he Matua ke fakakatoatoa ai ke he maveheaga ne taute e ia ke he tau tagata ha ha i ai ke he magafaoa a Isaraela.

8Ka hoko mai foki e aho ia, to hoko ai, to pa he tau patuiki ha lautolu a tau gutu; ha kua kitia e lautolu e tau mena ne nakai talahau atu ki a lautolu; to manamanatu foki a lautolu ke he tau mena ne nakai logona ai e lautolu.

9Ha ko e aho ia, to taute he Matua e taha gahua ha ko au, ko e gahua ia foki ke ofo lahi ai a lautolu: Ka e ha ha i ai e falu ia lautolu to nakai tua ki ai, pete ni he fakamatala atu he taha tagata e mena ia ki a lautolu.

10Ka e kitia la, to ha i ai he lima haaku e moui he haaku a fekafekau a ti nakai fakamamahi e lautolu a ia ne fakamaama atu ki a lautolu ka to matematekelea a ia ha ko lautolu. Ka e pete ia to fakamalolo e au a ia, ha ko e mena to fakakite atu e au ki a lautolu, kua mua atu e haaku a pulotu ke he lagatau he tiapolo.

11Koe mena ia, to hoko ai e magaaho, ko lautolu kua nakai tua ke he haaku a tau kupu, ko au ko Iesu Keriso, ka fakatu mai he Atua a ia ke he tau Tagata Kehe, mo e age foki ki a ia e malolo ke takitaki mai a lautolu ke he tau Tagata Kehe. (To taute pihia tuga ni ne talahau e Mose), to uta kehe mai a lautolu he haaku a tau tagata he maveheaga.

12Ko e haaku a tau tagata foki kua toe mai he magafaoa a Iakopo, to ha i ai a lautolu ke he tau Tagata Kehe, hanai to fakalataha mo lautolu ke tuga e leona mo e tau manu he vao, tuga ne punua leona ke he tau fuifui mamoe, ka eke ke fina atu ai a ia mo e taholi ai e ia mo e hehe ai, to nakai ha i ai foki taha ke laveaki mai a lautolu.

13To lagaaki hake e ha lautolu a tau lima ki luga ia lautolu kua totoko ki a lautolu, ko e ha lautolu a tau fi foki, to vevehe kehe mai ia lautolu.

14Hanai, Oi te ke he tau Tagata Kehe kaeke ke nakai tokihala a lautolu, ha ko e mena, to hoko mai e aho ia, kua pihia mai e Matua, ke uta kehe e au ha mutolu a tau tolofonua ia mutolu, to fakaoti foki e au ha mutolu a tau kariota;

15To uta kehe foki e au e tau maaga ke he ha mutolu a motu, mo e moumou oti ai e ha mutolu a tau taue.

16To fakaoti foki e au e tau lagatau fakataulaatua ke he ha mutolu a motu, to nakai tuai ha ha foki i ai ia mutolu e tau tagata ke talahau e tau mena ka tutupu ka e nakai la hohoko mai.

17To fakaoti foki e au e ha mutolu a tau tupua kua ta katoa mo e ha mutolu a tau tupua kua tutu hake ki luga, kia nakai tuai hufeilo a mutolu ke he tau mena kua tufuga ai he ha mutolu a tau lima;

18To uta kehe foki e au e ha mutolu a tau ulu akau mai ia mutolu, ti moumou ai foki e ha mutolu a tau maaga.

19To hoko ai to fakaoti ai e tau pikopiko mo e tau fakavai, mo e tau mahekeheke, mo e taufetoko, mo e tau lagatau kelea he tau ekepoa, mo e tau mahani feuaki oti.

20Ti to hoko ai e magaaho kua pihia mai e Matua, ko lautolu ka nakai tokihala ke he aho ia, mo e o mai ke he haaku a Tama Fakahele, ko lautolu, haia ka vevehe kehe e au mai he haaku a tau tagata, ma Isaraela na e;

21To fakahoko atu e au ki luga ha lautolu e malaia mo e ita lahi, ke tuga ni ke hoko atu ai ki luga ia lautolu ne pouli agaia e tau mena nai kua nakai logona a lautolu ha mena pihia ke he fakamua.

22Kaeke ke tokihala a lautolu mo e fanogonogo ke he haaku a tau kupu, mo e nakai fakamao e tau loto ha lautolu to fakatu e au haaku a lotu ki a lautolu to o mai foki a lautolu ki loto he maveheaga mo e totou fakalataha ai a lautolu mo e tau tagata kua toe mai ia Iakopo, kua age e au ki ai e motu nai ke eke ma lautolu.

23To lagomatai e lautolu haaku a tau tagata, ne toe mai ia Iakopo, to pihia atu foki a lautolu ki a lautolu oti mai he magafaoa a Isaraela ka o mai ai, kia maeke ai ia lautolu ke ta e maaga, ko e maaga ia foki to ui ai ko Ierusalema Foou.

24Ti ko e magaaho ia foki to lagomatai e lautolu haaku a tau tagata kia fakamaopoopo mai ai e Ierusalema foou a lautolu ia kua nonofo mavehevehe ai ki luga he fuga kelekele he tau motu kehe.

25Ko e magaaho ia to hifo mai ai e pule mai he lagi ki a lautolu, to ha ha i ai foki au he vaha loto ha lautolu.

26To kamata ai e gahua he Matua ke he aho ia, ko e magaaho haia ka fakamatala atu ai e evagelia nai ke he faoa ne toe he tau tagata nai. Ko e mooli, ke tala atu e au ki a mutolu, ke he aho ia to kamata ni e gahua he Matua ki a lautolu ne fakamavehevehe kehe ai he haaku a tau tagata, hanai, to kamata, foki e gahua he Matua ke he tau magafaoa ne galo, ne uta kehe ai he Matua i Ierusalema.

27Hanai, to kamata he Matua e gahua ki a lautolu oti ko e haaku a tau tagata ne fakamavehevehe kehe ai, ka foa ai e puhala ke o mai aki a lautolu ki a au, kia maeke ai ia lautolu ke ui atu ke he Matua ke he haaku a higoa.

28Hanai, ko e magaaho ia to kamata ai he Matua e haana a gahua ke he tau motu oti ke foa ai e puhala ke fakamaopoopo mai aki e haana a tau tagata ke he motu kua foaki atu ma lautolu.

29To o atu ai a lautolu mai he tau motu oti, ka e nakai o atu fakatepetepe a lautolu, ti nakai o atu a lautolu mo e fehola, ha ko e mena to haele atu ai au ke takitaki a lautolu kua pihia mai e Matua, to eke foki au mo muiaki kau ha lautolu.