Ko e Veveheaga 25
Kua matutaki atu e tau kupu a Malaki — Ko Elia mo e haana a fekafekauaga — Ko e aho he Iki ne mua ue atu mo e matakutakuina — Kia fakatai ke he tohi a Malaki 4.
1Ha ko e mena, kitia la, ko e hoko mai ne fai e aho ke huhunu ai tuga ne gutuumu, ti eke ai mo gutugutu saito a lautolu oti kua fakatokoluga, katoa mo lautolu oti kua mahani kelea, to huhunu ai foki a lautolu ke he aho ko e hoko mai ne fai, kua pihia mai e Iki he tau Iki, ti nakai toe ai ma lautolu taha vaka akau po ke taha la akau.
2Ka ko mutolu kua matakautaku ke he haaku a higoa, to tu hake ki a mutolu e Tama he Tututonu, ha ha i ai foki ke he haana a tau tapakau e fakamaloloaga, to o atu foki a mutolu mo e tutupu hake tuga ne tau punua povi ke he fale povi.
3Ti taholi ai e mutolu a lautolu ne mahani kelea, ha ko e mena to eke a lautolu mo efuefu i lalo he tau aloalohui ha mutolu ke he aho kua kotofa ai e au, kua pihia e Iki he tau Iki.
4Kia manatu a mutolu ke he fakatufono he haaku a fekafekau ko Mose, ne poaki atu au ki a ia i Horepa, ki a Isaraela oti, ko e tau fakatufono mo e tau fakafiliaga.
5Kitia la, to fakafano atu e au ki a mutolu e perofeta ko Elia, ka e nakai la hoko mai e aho he Iki, ne mua ue atu mo e matakutakuina.
6To fakamafoki ai e ia e tau loto he tau matua ke he fanau, mo e tau loto he fanau ke he ha lautolu a tau matua, neke fina atu au, mo e ta ai e au e motu ke he malaia.