1Ne hoko ai, kua fakakite mai pehe he ha mautolu a fakamauaga mo e iloa ai e mautolu kua mooli e ha mautolu a fakamauaga, kitia la, ko e tagata tututonu ne leveki e tau tohi ia — ha kua taute mooli e ia e loga e tau mana ke he higoa a Iesu; ti nakai fai tagata ne maeke ke eke ha mana ke he higoa a Iesu ka ko ia ne kua mea e loto mai he haana ni a tau hala.

2Ne hoko ai, kaeke kua nakai fai hepe ne taute he tagata nai ke he totouaga he tau magaaho, kua mole atu tuai e tau ke tolugofulu ma tolu aki.

3Ti kamata e tau tagata ke onoono moe amaamanaki lahi ke he fakamailoga ne kua fakailoa mai he perofeta ko Samuela ko e tagata Lamana, hanai, ko e magaaho haia ke ha ha i ai e pouli ke he fuga kelekele ke he tolu ai e tau aho.

4Ti kamata agataha e tau tagata ke fakauaua mo e taufetoko, pete ni he loga e tau fakamailoga kua tuku mai.

5Ne hoko ai ke he tau ke tolugofulfu ma fa aki ke he mahina fakamua, ke he aho ke fa aki he mahina, ne to e taha afa lahi, nakai la kitia e ha mena pihia ke he motu tali mai he kamataaga.

6Ne ha ha i ai e taha matagi malolo, mo e pakū lahi he lagi kua matakutakuina mo e lulululu ai e lalolagi katoa tuga ke vehevehe ai.

7Ko e aho ia kua malolo atu e uhila ki luga he motu nakai la kitia e lautolu e ha uhila pihia tali mai he tau momoui ha lautolu.

8Ti vela agataha e maaga ko Sarahema.

9Ti tomo ai e maaga ko Moronai ke he tahi, ti tomo fakalataha foki moe tau tagata kua ha ha i ia.

10Kua tanumia ai he tau kelekele e maaga ko Moronaiha ti eke ai agataha e tuaga he maaga ia mo taha mouga lahi.

11Ti lahi foki e malona he motu kehe faahi toga.

12Ka e kitia la, ne mua ue atu e kelea e moumouaga he motu kehe faahi tokelau, kitia la, kua liliu kehe etufuga he kelekele katoa ha koe matagi malolo moe tau tiotio, mo e tau pakū he lagi mo e tau kapa he uhila, mo e lulululuaga he kelekele katoa.

13Ne malona ai e tau puhala tu, mo e kelea ai e tau hala tu molemole ti tule ai foki e tau mena ne molemole.

14Ne loga e tau maaga talahaua ne kua tomo, mo e loga foki ne vela ai, loga foki ne lulululu ai mo e veveli ke he kelekele e tau fale mo e mamate ai oti e tau tagata ha ha i ai ti tokanoa ai e tau maaga fonua ia ne tutu ai e tau maaga na.

15Ka e toe agaia ni e falu a maaga, ka kua lahi e malona, mo e tokologa foki a lautolu ne kua mamate ai.

16Ti fai tagata foki ne uta he tau tiotio, nakai iloa foki he taha e utaaga ha lautolu, ka kua iloa ne kua uta kehe ai.

17Ti kua malona e fuga kelekele katoa ha ko e tau matagi lalahi mo e tau kapa he uhila mo e lulululu he kelekele.

18Kitia la, ne maihi ua e tau maka, ne malipilipi foki ki luga he fuga kelekele katoa, ti ko e tau valavala maka ni ne toe mo e tafola ai, ha ha i ai e tau maihi mo e tau avamaka i luga he motu katoa.

19Hoko ai e magaaho, ne fakaoti ai e malolo he tau paku lagi mo e tau kapa mai he uhila mo e afa, mo e matagi lahi — kitia la, kua lata mo e tolu e mata hola ne tupu ai e tau mena ia, ka e pehe mai e falu kua molea e tolu e matahola, ka e pete ia ne tutupu e tau mena lalahi mo e matakutakuina na ke he tolu e tau matahola, kitia la, ne pouligia ai e motu.

20Ne hoko ai, kua ha ha i ai e pouli kikio ki luga he motu, ti ko lautolu nakai haofia, kua logona e aafu he pouli.

21Kua nakai fai maama ai, ha koe pouli, nakai fai lamepa po ke tau hulu; nakai fai afi foki ke tafu aki ha lautolu a tau gaafi momo ikiiki, ti ko e mena ia kua nakai fai maama ai;

22Ti nakai fai maama ne kitia ai, po ke ha afi po ke ha kikila po ke la po ke mahina, po ke tau fetu kua pouli tatago e motu katoa.

23Ne hoko ai pehe kua pouli tatago ai ke he tolu e tau aho mo e nakai fai maama ne kitia ai. Kua ha ha i ai e momoko lahi mo e tagi tautau mo e tagi aue he tau tagata, hanai kua lahi e tagi he tau tagata ha ko e pouli mo e matematekelea lahi kua hoko mai ki a lautolu.

24Ke he taha mena, ne logona ai a lautolu ne tagi, mai pehe Oi fakaalofa te a ne mai ne tokihala tuai a tautolu fakamua to hoko mai e aho matakutakuina nai po kua hao mai e ha tautolu a tau matakainaga moe nakai vela a lautolu ke he maaga lahi ia ko Sarahema.

25Ke he taha mena foki, ne logona ai a lautolu ne tagi mo e pehe mai. Oi te fakaalofa a ne mai ne tokihala tuai a tautolu fakamua to hoko mai e aho lahi mo e matakutakuina nai, mo e nakai kelipopo po ke tauliti maka e tau perofeta mo e vega kehe ai a lautolu, a kua hao mai e ha tautolu a tau matua fifine mo e tau tama fifine fulufuluola mo e tau fanau mo e nakai tanumia a lautolu ke he maaga lahi na ko Moronaiha. Ti pihia e tau tagi mo e matematekelea he tau tagata.