1Kitia la, kua hoko ai e magaaho he mole atu e vagahau e Iesu e tau kupu ia ne liu ono atu a ia ke he lanu tagata, ti pehe a ia ki a lautolu, kitia la, kua hoko mai tuai haaku a magaaho.

2Kua fioia e au a mutolu kua lolelole ti nakai maeke ia mutolu ke maama oti e haaku a tau kupu kua poaki mai he Matua ki a au ke tala atu ki a mutolu ke he magaaho nai.

3Ko e mena ia kia o atu a a mutolu ke he ha mutolu a tau kaina, mo e manamanatu ke he tau mena ia ne tala atu e au, mo e ole atu ke he Matua ke he haaku a higoa kia maama ai a mutolu, mo e tauteute ai foki e mutolu ha mutolu a tau loto manamanatu ke lata mo e a pogipogi ka liu mai ai au ki a mutolu.

4Ka ko e magaaho nai, kua haele atu au ke he Matua, kua haele atu foki au ke fakakite age au ke he tau magafaoa ne galo ha Isaraela, ha ko e mena nakai galo a lautolua ke he Matua, ha kua fioia ni e ia po ke mena fe ne uta e ia a lautolu ki ai.

5Ne hoko mai, mole he vagahau pihia a Iesu ne ono fano foki a ia ke he lanu tagata, a ti kitia ai e ia kua hihina tuai ha lautolu a tau mata kua onoono fakamakamaka atu ai a lautolu ki a ia, kua loto a lautolu ke ua fano kehe tuai a ia.

6Ti tala age a ia ki a lautolu, kitia la, kua hofihofi e fakaalofa haaku ki a mutolu.

7Kua fai tagata gagao nakai ia mutolu? Ta mai a lautolu ki hinai. Kua fai tagata nakai ia mutolu kua kulikuli, po ke matapouli, po ke kunekune, po ke nakai katoatoa, po ke lepela, kua momoho, po ke teliga tuli, po ke ha gagao? Ta mai a lautolu ki hinai, ke fakamalolo e au a lautolu, ko e mena kua fakaalofa lahi au ki a mutolu, mo e puke namo ni e haaku a loto ke he fakaalofa noa.

8Ha ko e mena fioia e au a mutolu kua fia manako a mutolu ki a au ke fakakite atu ki a mutolu e tau mena ia ne taute e au ke he ha mutolu a tau matakainaga ha ha i Ierusalema, ha kua kitia atu e au ha mutolu a tua kua lata ai ke fakamalolo e au a mutolu.

9Ne hoko ai, he oti e vagahau pihia haana ne fakatau o atu ai e lanu tagata katoa mo e ha lautolu a tau tagata gagao, mo lautolu ne matematekelea mo e ha lautolu a tau kulikuli, mo e tau matapouli, mo e tau kuhukuhu, mo lautolu oti kua kafokia ha ko e tau gagao, a ti fakamalolo e ia a lautolu taki tokotaha.

10Ti tukutuku hifo a lautolu oti kana ko lautolu ne fakamalolo katoa mo lautolu ne malolo tuai, ke he haana a tau hui mo e hufeilo atu ki a ia, ko lautolu oti ne maeke, ha ko e tokologa he lanu tagata, ne figita haana a tau hui, kua holoholo ai foki haana a tau hui ke he ha lautolu a tau hihina mata.

11Ne hoko ai, ne poaki e ia, ke ta mai e lautolu ha lautolu a tau fanau ikiiki.

12A ti ta mai e lautolu ha lautolu a tau fanau ikiiki mo e fakanonofo takai ia ia, kua tu a Iesu ke he lotouho ti fakaata he lanu tagata a to maeke oti ia lautolu ke ta mai ki a ia.

13Ne hoko ai, kua ta mai a lautolu oti, ne tu a Iesu ke he vaha loto ne poaki a ia ke he lanu tagata kia fakatokotui hifo a lautolu ke he kelekele.

14Ne hoko ai, ne fakatokotui a lautolu ke he kelekele, ti oi agataha a Iesu ke he loto, ti pehe a ia: Ma Matua na e, kua fakaatukehe e loto haaku ha ko e mahani kelea he tau tagata he magafaoa a Isaraela.

15Ko e magaaho ne vagahau e ia e tau kupu ia ti fakatokotui foki a ia ke he kelekele, kitia la, ne liogi a ia ke he Matua, ka e nakai maeke e tau kupu haana ne liogi ke tohi ai, ne logona he lanu tagata mo e fakamooli ki ai.

16Ti kua fakamooli mai pehe e lautolu, Nakai la kitia ia po ke logona ai foki ha teliga he tali mai, e falu a mena lalahi mo e fakaofoofogia tuga mo e tau mena ne kitia mo e logona atu ai e mautolu a Iesu ne vagahau age ke he Matua;

17Ti nakai fakaai ha alelo ke vagahau, po ke ha tagata ke tohi hifo, nakai fakaai foki ha loto he tau tagata ke maama e tau mena lalahi mo e ofoofogia tuga mo e tau mena ne kitia mo e logona ai e mautolu a Iesu he vagahau, ke he haana a Matua, nakai fakaai taha ke fioia e olioli he tau loto ha mautolu ke he magaaho ia ne logona ai e mautolu a ia he liogi ke he Matua ma mautolu.

18Ne hoko ai, he oti tuai e liogi Iesu ke he Matua, ti matike ai a ia, ka e kua lahi e olioli he tau loto he lanu tagata mo e ofo lahi a lautolu.

19Ne hoko ai, ne vagahau age a Iesu ki a lautolu, mo e poaki atu a ia ki a lautolu ke mamatike.

20Ti mamatike a lautolu mai he kelekele kua pehe age a ia ki a lautolu: Uhoaki a mutolu ha ko e ha mutolu a tua, Hanai kitia la, kua katoatoa haaku a fiafia.

21Kua vagahau e ia e tau kupu nai, ti tagi a ia, kua fakamooli ki ai foki e lanu tagata, ne uta e ia ha lautolu a tau fanau ikiiki takitokotaha mo e fakamonuina a lautolu, mo e liogi a ia ke he Matua ma lautolu.

22Ka mole he taute pihia ai e ia, a ti liu foki tagi a ia.

23Ne vagahau atu a ia ke he lanu tagata, kua pehe age ki a lautolu, Kitia la ko e ha mutolu a tau fanau ikiiki.

24Ha ne kikite atu a lautolu ti hahaga hake ai ha lautolu a tau mata ke he lagi, kua kitia e lautolu e lagi kua maihi ai, mo e tau agelu ha ne o hifo mai ai he lagi kua tuga ne tutu a lautolu he afi, ti o hifo mai ai a lautolu mo e tatakai ai a lautolu he tau fanau ikiiki, kua takai ai a lautolu ke he afi, kua fakaako e tau agelu ki a lautolu.

25Ne kitia mo e logona he lanu tagata, kua fakamooli foki a lautolu ki ai ti kua iloa e lautolu kua mooli e ha lautolu a fakamooliaga, ha ko e mena takitokotaha a lautolu oti mo e kitia mo e logona foki ni he tagata ki a ia ni. Ti ko e katoatoa ia lautolu ne kitia mo e logona ai ko e toko ua e afe mo e lima e teau e tau tagata, ko e tau taane, katoa mo e tau fifine mo e tau fanau.