1Ne hoko mai pehe ne fakapotopoto ai e lanu tagata tokologa mo e lahi, he tau tagata Nifai, ke he tau kalakala he faituga ha he fonua ko Ponitifulu. Ti kua fetutala aki a lautolu ko e taha ke he taha ke he tau mena fakaofo, mo e lahi ne kua tupu mo e liliuaga kua hoko.

2Kua fetutalaaki foki a lautolu ke he tagata nai ko Iesu Keriso kua fakakite mai i tuai e fakamailoga ke he haana a matulei.

3Ha ne fetutala ai a lautolu, taha ke he taha, ti logona ai e leo tuga ne mai ai he lagi; ti feono fano e ha lautolu a tau mata, ha kua nakai maama e lautolu e leo ne logona ai; nakai koe leo vale foki, po ke leo lahi, pete ni a ia, kua nakai tau maleku ai e leo tote na ne tuina a lautolu ne logona ai, ke he uho he tau loto ha lautolu, kia lahi ni mo e nakai toe ha faahi tino ha lautolu mo e vivivivi; hanai ne tuina e tau agaaga ha lautolu, ti kamata agataha e tau loto ha lautolu ke velagia ai.

4Ne hoko ai pehe, ne liu logona foki e lautolu e leo, ka e nakai maama ia lautolu.

5Ne liu logona e lautolu ke lagatolu aki e leo, a ti hafagi ai e tau teliga ha lautolu ke fanogonogo ki ai, ti kua haga atu e ha lautolu a tau mata ke he leo mo e haga ai ke he lagi ne hoko mai ai e leo.

6Kitia la, ko e lagatolu ia a ti maama ai e lautolu e leo ne logona, kua pehe mai ki a lautolu.

7Kitia la, haaku a Tama Fakahele haana kua fiafia na au ki a ia, ki a ia kua fakaheke ai e haaku a higoa — kia fanogonogo mai a ki a ia.

8Ne hoko ai, ne kua maama ia lautolu ti liu haga hake foki e tau mata ha lautolu ke he lagi, ti kitia la, ne kitia e lautolu e Tagata ha ne haele hifo mai he lagi; ti tapulu a ia ke he tapulu tea. Ne haele hifo a ia mo e tu ke he vaha loto ha lautolu, ti haga atu e tau mata he lanu tagata katoa ki a ia, ne nakai maeke a lautolu ke fakamaga ha lautolu a tau gutu nakai ni ko e taha ke he taha, ti nakai iloa foki e lautolu e kakano he mena nai, ha kua manatu a lautolu, ko e agelu kua tu mai ki a lautolu.

9Ne hoko ai ne fakaolo atu e ia haana lima mo e vagahau ke he tau tagata, kua pehe atu.

10Kitia la, ko au ko Iesu Keriso ne talahau ai he tau perofeta to haele mai ke he lalolagi.

11Kitia la, ko au ko e maama mo e moui he lalolagi. Kua inu tuai e au e kapiniu kona ia ne foaki mai he haaku a Matua ki a au mo e fakalilifu e au e haaku a Matua ha kua fua e au e tau hala he lalolagi, ti ko e mena ia ne fakamamahi ai au, ha ko e finagalo he haaku a Matua ke he tau mena oti mai he kamataaga.

12Ne hoko ke he magaaho ne oti ai he vagahau e Iesu e tau kupu nai kua veveli e lanu tagata katoa ke he kelekele, ha kua manamanatu laia a lautolu ne kua perofeta mai tuai ki a lautolu to fakakite mai e Keriso a ia ni ki a lautolu ka mole e haana haele hake ke he lagi.

13Ne hoko ai, ne vagahau e Iki ki a lautolu kua pehe mai: —

14Mamatike a a mutolu mo e o mai ki a au, kia maeke ia mutolu ke tuku mai e ha mutolu a tau lima ke he haaku a kahokaho, mo e amoamo foki e mutolu e mena ne pao ai e tau fao ke he haaku a tau lima mo e haaku a tau hui, kia maeke ia mutolu ke iloa ko au ko e Atua a Isaraela, mo e Atua foki he lalolagi katoa, kua keli popo tuai ma e tau hala he lalolagi.

15Ne hoko ai pehe ne o atu e lanu tagata mo e tuku atu ha lautolu a tau lima ke he haana a kahokaho mo e amoamo e tau mena ne pao aki ai e tau fao ke he haana a tau lima mo e haana a tau hui. Ne eke pihia e lautolu, mo e o atu takitokotaha a to oti a lautolu, ti kitekite atu a lautolu mo e ha lautolu a tau mata mo e aamo atu foki mo e ha lautolu a tau lima a ti iloa maaliali ai e lautolu, mo e talahau fakatonu ai, ko ia mooli haia ne kua tohia ai he tau perofeta to haele mai.

16Magaaho, ne oti ai e o atu ha lautolu oti mo e kitia fakatonu ai e lautolu, ti tauui auloa ai a lautolu ke he taha ni e leo kua pehe mai.

17Hosana! Fakaheke ke he higoa he Atua Tokoluga Mua Ue Atu! A ti veveli hifo ai a lautolu ke he tau hui ha Iesu mo e hufeilo atu ki a ia.

18Ne hoko ai, ne vagahau a ia ki a Nifai (ha kua ha ha i ai a Nifa) mo e poaki ki a ia ke hau a ia ki mua.

19Ne matike a Nifai mo e fina atu, mo e tukutuku hifo a ia ki mua he Iki mo e figita e ia haana a tau hui.

20Ne poaki e Iki ki a ia ke matike, ti matike a ia mo e tu ki mua haana.

21Ne pehe atu e Iki ki a ia, kua foaki atu e au ki a koe e malolo kia papatiso e koe e tau tagata nai ka liu haele atu foki au ke he lagi.

22Ti liu foki e Iki mo e ui atu ke he falu foki mo e pihia atu foki a ia ki a lautolu he vagahau, mo e foaki atu e ia ki a lautolu e malolo ke taute aki e papatisoaga. Ti pehe atu a ia ki a lautolu: Ko e puhala nai ke papatiso ai e mutolu; kia aua neke fai taufetoko ai a mutolu.

23Kua mooli kua tala atu e au ki a mutolu, ko ia kua tokihala mai he haana a tau hala ha ko e ha mutolu a tau kupu, mo e manako a ia ke papatiso ke he haaku a higoa, ko e puhala pehe nai to papatiso e mutolu a lautolu — Kitia la, to o hifo a mutolu mo e tutu ke he vai mo e ppatiso e mutolu a lautolu ke he haaku a higoa.

24Kitia la, ko e tau kupu hanai ke vagahau e mutolu. To ui atu ki a lautolu ke he ha lautolu a tau higoa mo e pehe atu:

25Nukua moua e au e pule nai mai ia Iesu Keriso, kua paptiso e au a koe ke he higoa he Matua, mo e Tama, mo e Agaaga Tapu. Amene.

26Ti ko e magaaho ia to fakatanumia ai e mutolu a lautolu ke he vai mo e liu ta hake mai i loto he vai.

27Kia mumui atu a mutolu ke he puhala nai ka paptiso e mutolu ke he haaku a higoa, kitia la kua mooli kua tala atu e au ki a mutolu kua taha ni e Matua, mo e Tama, mo e Agaaga Tapu, ti ko au ha i loto he Matua, mo e Matua foki ha i loto ia au, ti kua taha ni a maua mo e Matua.

28Tuga mo e puhala nai ne poaki atu e au ki a mutolu ke papatiso ai. Kia aua neke fai taufetoko a mutolu, tuga fakamua nakai lata foki ke taufetoko a mutolu ke he tau mena he haaku a evagelia, tuga ne eke ai e mutolu i tuai.

29Ko e mooli, ko e mooli, kua tala atu e au ki a mutolu, ko ia kua ha ha i ai e agaaga taufetoko, to nakai mai ia au e tagata ia, ka ko Satani ko e matua he mahani taufetoko ia, ti kua fakaohooho e ia e tau loto he tau tagata ke tau fetoko ai a lautolu mo e ita, ko e taha ke he taha.

30Kitia la, nakai ko e fakaakoaga haaku a ia ke fakaohooho e tau loto he tau tagata ke he ita, ko e taha ke he taha, ka ko e haaku a fakaakoaga pehe kua lata e tau mena pihia ke fakaoti.

31Kitia la, ko e mooli, ko e mooli kua tala atu e au ki a mutolu, to talahau e au haaku evagelia.

32Ti ko e haaku a evagelia hanai, ko e evagelia foki kua foaki mai he Matua ki a au, ti kua fakamooli e au e Matua mo e fakamooli mai he Matua au, ti kua fakamooli he Agaaga Tapu a maua mo e Matua, kua poaki mai he Matua ke he tau tagata oti, ke he tau motu oti, kia tokihala mo e tua mai ki a au.

33Ko ia ne tua ki a au mo e papatiso, to fakamoui a ia. Ko lautolu haia to eke ma lautolu e kautu he Atua.

34Ka ko ia ne nakai tua ki a au mo e nakai papatiso, to malaia a ia.

35Ko e mooli, ko e mooli, ke tala atu e au ki a mutolu, ko e haaku a evagelia haia, kua fakamooli atu e au a ia mai he Matua, ti ko ia kua tua ki a au, kua tua foki a ia ke he Matua. To fakamooli atu he Matua au ki a ia ha ko e mena to ahiahi atu a ia ki a ia mo e afi mo e Agaaga Tapu.

36Ko e puhala pihia ka fakamooli aki he Matua au, ka to fakamooli he Agaaga Tapu ki a ia a maua mo e Matua, ha kua taha ni a mautolu mo e Matua mo e Agaaga Tapu.

37Kua liu foki ke tala atu e au ki a mutolu, kia tokihala, mo e mahani po ke tama tote, mo e papatiso ke he haaku a higoa, neke nakai fakaai ia mutolu ke moua e tau mena nai.

38Kua liu foki ke tala atu e au ki a mutolu kia tokihala, mo e papatiso ke he haaku a higoa, mo e mahani po ke tama tote po kua nakai fakaai ia mutolu ke moua e kautu he Atua.

39Ko e mooli, ko e mooli ke tala atu e au ki a mutolu, ko e haaku a evagelia haia, ti ko lautolu kua fakave ki luga he mena nai, kua fakave ia ki luga he maka haaku, ti to nakai kautu ki a lautolu e tau gutuhala a teoli.

40Ko ia ka uta kehe po ke lafi ki ai ha mena ka talahau ke he tau mena nai, kua hau a ia mai he kelea, mo e nakai fakave foki a ia i luga he haaku a maka, ka kua fakave a ia ki luga he fakaveaga he oneone, ti mahafagifagi e tau gutuhala e teoli ke talia mai a lautolu pihia ka tafe mai e tau vai lele mo e agi mai e tau matagi mo e tanumia ai a lautolu.

41Ha ko e mena ia, kia o atu a ke he tau tagata nai, mo e talahau atu e tau kupu ne kua vagahau e au ke he tau matapoko oti he lalolagi.