1Ne hoko ai, ne poaki a ia ke he lanu tagata ke fakaoti e liogi, kua pihia foki ke he haana a tau tutaki. Ka e poaki a ia ki a lautolu ke aua neke fakaoti e liogi ke he ha lautolu a tau loto:

2Ne poaki a ia ki a lautolu ke mamatike mo e tutu ki luga he ha lautolu a tau hui. Ne mamatike a lautolu mo e tutu ki luga, he ha lautolu a tau hui.

3Ne hoko ai, ne liu tofitofi foki e ia e aleto mo e fakamonuina ai mo e age ke he tau tutaki ke kai ai.

4Kua oti tuai a lautolu he kai. Ne poaki e ia ki a lautolu kua tofitofi e lautolu e aleto mo e age ke he lanu tagata ke kai ai.

5Ka mole ia he tuku age e lautolu ke he lanu tagata, ne age foki e ia ki a lautolu e uaina ke inu, mo e poaki ki a lautolu ke tuku age ke he lanu tagata.

6Ne nakai fai aleto po ke ha uaina ne ta mai he tau tutaki po ke ta mai ai foki he lanu tagata;

7Ka e foaki mooli e ia ki a lautolu e aleto ke kai ai mo e uaina ke inu ai.

8Ti pehe atu a ia ki a lautolu; ko ia ke kai e aleto nai, kua kai e ia haaku a tino ke he haana a agaaga; ti ko ia ke inu e uaina nai kua inu e ia haaku a toto ke he haana a agaaga; to nakai fia kai po ke fia inu e haana a Agaaga, to makona tumau ni.

9Ko e magaaho ne oti e lanu tagata he kai mo e inu ai, kitia la, ne puke a lautolu ke he Agaaga, ne tauui auloa a lautolu ke he taha ni e leo, mo e fakaheke atu ki a Iesu, ko ia ne kitia mo e logona e lautolu.

10Ne hoko ai ne oti e fakaheke ha lautolu ki a Iesu, ti pehe age a ia ki a lautolu , kitia la, kua fakaoti ha ne fai e au e poaki ne poaki he Matua ki a au hagaao ke he tau tagata nai, ko e magafaoa ne toe mai he magafaoa a Isaraela.

11Kua manatu e mutolu ne vagahau e au ki a mutolu mo e tala atu ki a mutolu ka katoatoa e tau kupu a Isaia — kitia la kua tohia ai kua ha ha i mua foki ha mutolu, ko e mena ia kia kumikumi a ki ai —

12Ko e mooli, ko e mooli ke tala atu e au ki a mutolu, ka katoatoa e tau kupu ia, ko e magaaho ia ke katoatoa ai e maveheaga ne taute he Matua mo e haana a tau tagata ko e magafaoa a Isaraela na e.

13Ti ko e magaaho ia, to fakamaopoopo ai e toe tagata, ne fakamavehevehe fano ai he lalolagi mai he faahi uta, mo e faahi lalo, mo e faahi toga, mo e faahi tokelau, to hohoko atu a lautolu ke he maama ke he Iki ko e ha lautolu a Atua ko ia ne fakamoui a lautolu.

14Hanai, ne poaki mai he Matua ki a au ke tuku atu e au e motu nai ma mutolu, ke eke ai mo tufaaga ha mutolu.

15Ti kua tala atu au ki a mutolu a ne mai ke nakai tokihala e tau Tagata Kehe ke mole atu e tau monuina kua lata ke moua ai, e lautolu, ka mole atu foki e fakamavehevehe e lautolu e haaku a tau tagata.

16ti o atu a mutolu, ko mutolu haia ne toe mai he magafaoa a Iakopo, mo e ha ha i ai a mutolu ke he vaha loto ha lautolu kua tokologa ia, mo e eke ai e mutolu tuga e leona ke he vahaloto he tau manu he vao, ti tuga ne punua leona ke he tau fuifui mamoe, ka fina atu a ia mo e taholi ai mo e hēhē ai to nakai ha i ai foki taha ke laveaki ia.

17To lagaaki hake e ha mutolu a tau lima ki luga ha lautolu kua totoko ki a mutolu ko e ha mutolu a tau fi foki, to vevehe kehe a lautolu.

18Ti fakapotopoto fakalataha e au haaku a tau tagata ke tuga ne tagata kua tatanaki haana a tau fuhi saito ke he mena ne toka ai.

19Ha ko e mena to taute e au e haaku a tau tagata ne mavehe ki ai e Atua, hanai to taute e au haau a hoe mo lapatoa. Ti taute foki e au maau a tau aloalohui veo. To tuki malipilipi foki e tau motu loga, to tuku atu foki ke he Iki e tau mena ha lautolu ne moua he tau katoa mo e tau koloa ha lautolu ma e Iki, kitia la, ko au haia ke eke ai.

20To hoko ai, kua pehe mai e Matua, to tautau e pelu he fakafiliaga ki luga ia lautolu he aho katoa. Ti kaeke ke nakai tokihala a lautolu ti to hifo ai ki a lautolu kua pihia mai e Matua, hanai, ki luga he tau motu oti he tau Tagata Kehe.

21Ti hoko ai, to fakatu e au e haaku a tau tagata, ma magafaoa a Isaraela na e.

22Kitia la, ko e tau tagata nai, to fakatu e au ke he motu nai ke lata ai mo e fakakatoatoaaga he maveheaga ne mavehe e au mo e ha mutolu a tupuna ko Iakopo, ti eke ai e motu nai mo Ierusalema Foou. To ha ha i ai ke he vaha loto he tau tagata nai e tau pule mai he lagi. Ko au ke ha ha i ai he vaha loto ha mutolu.

23Kitia la, ko au haia ne talahau e Mose, ne pehe mai to fakatu he Iki ha mutolu a tupuna ko Iakopo, ti eke ai e motu nai mo Ierusalema Foou. To ha ha i ai ke he vaha loto he tau tagata nai e tau pule mai he lagi. Ko au ke ha ha i ai he vaha loto ha mutolu.

24Ko e mooli ke tala atu e au ki a mutolu, hanai ko e tau perofeta oti kamata mai ia Samuela mo lautolu oti ia foki ne mumui mai ia ia, ko lautolu oti ne vagahau, ne fakamooli ai ki a au.

25Hanai, kitia la, ko mutolu ko e tau fanau he tau perofeta, ha he magafaoa a Isaraela foki a mutolu, ko mutolu foki ha he maveheaga he Matua mo e ha mutolu a tau tupuna, ne pihia mai ki a Aperahamo: ko e haau a fanau ke monuina ai e tau magafaoa oti he lalolagi.

26Ha ko e Matua ne fakatu au fakamua ki a mutolu mo e fakafano mai au ke fakamonuina a mutolu ke he ha mutolu a tau liliu-keheaga takitokotaha mai he tau mahani kelea, ti ko e mena ia ko mutolu ko e tau fanau he maveheaga.

27Ti mole atu ia, ne monuina ai a mutolu ne fakahoko agataha he Matua e maveheaga ne taute e ia mo Aperahamo, ne pehe mai: Ko e haau a fanau ke monuina ai e tau magafaoa oti he lalolagi — ke he liligiaga he Agaaga Tapu mai ia au, ke he tau Tagata Kehe ke eke ai a lautolu mo motu mua atu e malolo ke he tau motu oti, ke lata foki mo e fakamaveheveheaga he haaku a tau tagata, he magafaoa Isaraela na e.

28To fakamatematekelea foki e lautolu e tau tagata he motu nai. Ka e pete ia, ka moua e lautolu e katoatoaaga he haaku a evagelia, ti kaeke ke fakamao e tau loto ha lautolu ki a au, ti liuaki atu e au e ha lautolu a tau mahani kelea ki luga he ha lautolu a tau ulu ni, kua pihia mai e Matua.

29Ti manatu e au e maveheaga ne taute e au mo e haaku a tau tagata, kitia la ne mavehe au mo lautolu ke fakapotopoto fakalataha e au a lautolu ke he magaaho kua lata ni mo au mo e liu tuku age foki ki a lautolu e motu he ha lautolu a tau tupuna ke eke mo tufaaga ma lautolu, ti ko e motu ia ka age ko e motu haia a Ierusalema, ti ko e motu ia foki ko e motu he maveheaga ma lautolu tukulagi, kua pihia mai e Matua.

30Ti hoko ai, kua hoko mai e magaaho ke fakamatala atu ai ki a lautolu e katoatoaaga he haaku a evagelia.

31Ti tua a lautolu ki a au pehe ko au ko Iesu Keriso, ko e Tama he Atua. To liogi a lautolu ke he Matua ke he haaku a higoa.

32Ko e magaaho ia ko e leo he ha lautolu a tau tagata toko, to leo lalahi a lautolu, to kalaga fakalataha a lautolu, ha ko e mena to kitia mata ni e lautolu.

33Ko e magaaho ia to liu fakapotopoto fakalataha a lautolu he Matua mo e tuku age e ia ki a lautolu a Ierusalema ke eke mo motu ha lautolu.

34Ko e magaaho ia to kalaga fiafia ai a lautolu — lologo fakalataha a mutolu, ko e tau mena malolo i Ierusalema, ha kua fakamafana he Matua haana motu, ha kua laveaki e ia a Ierusalema.

35Kua fakakite e Iehova e haana a lima tapu ki mua he tau motu oti, ti kitia he tau kalakala oti he lalolagi e fakamouiaga he Matua, ti kua taha ni a maua mo e Matua.

36Ko e magaaho ia to fakahoko ai e mena ne kua tohia, kua pehe mai, Ala a, ki a liu ala a; kia tapulu ai a koe ke he haau a malolo, Siona na e, Ierusalema na e, kia tapulu ai a koe ke he haau a tau tapulu fulufuluola, ko e maaga kua fakatapu, ha ko e mena nakai tuai hu atu ki a koe a ia kua nakai peritome, mo ia kua kelea.

37Kia lulululu e koe a koe mai he efuefu; ma Ierusalema na e, kia matike a koe, ti nofo a koe, kia vevete e koe e tau lili mai he ua haau, ko koe ne fofo he tau, ko e tama fifine a Siona na e.

38Ha kua vagahau mai pehe e Matua, ne fakafua atu noa a mutolu, mo e to laveaki ai mo e nakai fai tupe ke mole ai.

39Ko e mooli, ko e mooli ke tala atu e au ki a mutolu to iloa ai he motu haaku a higoa, hanai, ko e aho ia to iloa ai e lautolu ko au ni kua vagahau atu.

40Ko e magaaho ia to pehe atu ai a lautolu, kua fulufuluola lahi ni ki luga he tau mouga e tau hui haana kua talahau mai e tala mitaki ki a lautolu ko ia kua tokamau e mafola, kua talahau mai e tala mitaki ki a lautolu ke he tau mena mitaki, kua fakailoa mai e fakamouiaga, kua pehe mai ki a Siona: Kua pule haau a Atua!

41Ko e magaaho ia ke tuogo ai e tomatomaaga pehe; O kehe a, ki a o kehe a a mutolu, kia o atu a mutolu ke he mena na, aua neke pipiki atu a mutolu ke he mena kelea, kia o atu a mutolu mai i loto ia ia, ki a mea a mutolu kua totō e tau kapiniu he Iki.

42Ha ko e mena to nakai o atu fakatepetepe a mutolu, ti nakai o atu a mutolu mo e fehola, ha ko e mena to haele atu ai e Iki ki mua ha mutolu, to eke foki e Atua a Isaraela mo takitaki kau ha mutolu.

43Kitia la, to mahani iloiio haaku a fekafekau, to homo atu ni a ia, mo e fakaheke ki ai, mo e to fakatokoluga ai a ia.

44Tuga ne ofo ai e tau tagata tokologa ki a koe, kua maama pihia haana fofoga ki mua ke he tau mata he tau tagata, mo e haana tino foki kua mua ke he tau tino he tau fanau taane he tau tagata.

45To pipi ni pihia e ia e tau motu loga; kua taofi he tau patuiki ha lautolu a tau gutu ha ko ia, ha kua kitia e lautolu e tau mena nakai talahau atu ki a lautolu, kua iloa foki e lautolu e tau mena nakai logona mo e manamanatu ki ai a lautolu.

46Ko e mooli, ko e mooli ke tala atu e au ki a mutolu, to hohoko mooli mai e tau mena oti ia, tuga ni he poaki mai he Matua ki a au. Ko e magaaho ia ke hoko mai ai e maveheaga ia ne mavehe he Matua mo e haana a tau tagata ke fakamooli ai, ko e magaaho ia foki ke liu foki ha ha i ai i Ierusalema e haaku a tau tagata, ti eke foki a ia mo Motu mo lautolu.