Ko e Veveheaga 12
Ko e tau fakaakoaga he Fakamoui ke he tau tagata Nifai — Kua kotofa mo e fakauku ai e ia e tau tutaki ne tokohogofulu ma ua — koe haana a tau kupu ke he lanu tagata — kua talahau foki e Lauga ki luga he Mouga — Fakatatai atu ki a Mataio 5.
1Ne hoko ai, kua vagahau e Iesu e tau kupu pihia ki a Nifai mo lautolu ne kua kotofa ai foki. (na ko e tokologa a lautolu ne kua kotofa mo e moua ai e malolo mo e pule ke papatiso ko e toko hogofulu ma ua a ia); kitia la, ne fakaolo atu ai e ia haana a lima ke he lanu tagata mo e fakamatala atu ki a lautolu kua pehe; Uhoaki a mutolu kaeke ke talia, mo e omaoma, a mutolu ke he tau kupu he toko hogofulu ma ua nai kua fifili e au mai ia mutolu ke fekafekau atu ki a mutolu, ke eke mo e ha mutolu a tau fekafekau, ki a lautolu foki kua tuku atu e au e malolo ki ai, kia maeke ai ia lautolu ke papatiso e lautolu a mutolu ke he vai. Ti ka mole atu e papatiso ha mutolu ke he vai, kitia la, to papatiso e au a mutolu ke he afi mo e Agaaga Tapu. Ko e mena ia, kia uhoaki a mutolu kaeke kua tua a mutolu ki a au mo e papatiso ai, ka mole he kitia e mutolu au mo e iloa ai foki au.
2Ti ko e mena ia, to monuina a lautolu kua tua ke he ha mutolu a tau kupu, ha kua fakamooli atu e mutolu kua kitia e mutolu au, mo e iloa foki au. Hanai, uhoaki a lautolu kua tua ke he ha mutolu a tau kupu, mo e hifo ai ke he mahani fakatokolalo ke papatiso ai, ha kua ahiahi atu a lautolu he afi mo e Agaaga Tapu, mo e moua ai e lautolu e fakamagaloaga ke he ha lautolu a tau hala.
3Hanai, uhoaki a lautolu ne loto holoilalo kua o mai ki a au, ha ko e mena to eke ma lautolu e kautu he lagi.
4Uhoaki a lautolu ne fakatutuku ha ko e mena ke fakamafanatia a lautolu.
5Uhoaki a lautolu ne mahani molu, ha ko e mena to eke ma lautolu e motu.
6Uhoaki a lautolu ne fia kai mo e fia inu ke he mahani tututonu, ha ko e mena to puke a lautolu ke he Agaaaga Tapu.
7Uhoaki a lautolu ne fakaalofa atu, ha ko e mena ofania mai a lautolu.
8Uhoaki a lautolu ne loto mea; ha ko e mena kitia atu e lautolu e Atua.
9Uhoaki a lautolu ne fakatupu e fakafeilo, ha ko e mena talahaua a lautolu ko e fanau he Atua.
10Uhoaki a lautolu oti ne eke fakakelea ha ko e haaku a higoa, ha ko e mena to eke ma lautolu e kautu he lagi.
11Uhoaki a mutolu ka eke fakakelea atu e lautolu, mo e favale ki a mutolu, mo e tukumale pikopiko a lautolu ki a mutolu ke he tau mena kelea oti ha ko au.
12Ha ko e mena to ha ha i ai ia mutolu e olioli mo e fiafia ni, ha ko e mena to lahi e ha mutolu a palepale ke he lagi, ha ko e mena favale pihia a lautolu ke he tau perofeta ne mumua ia mutolu.
13Ko e mooli, ko e mooli ke tala atu e au ki a mutolu, kua tuku atu e au ki a mutolu ke eke a mutolu mo masima he lalolagi, kaeke ke magalo e masima po ke heigoa e taha mena ke fakakonakona aki e lalolagi? Nakai fai mena ke aoga e masima ia ki ai ka e tolo ni ki fafo, mo e taholi ai he tau tagata.
14Ko e mooli, ko e mooli, ke tala atu e au ki a mutolu, kua tuku atu e au ki a mutolu ke eke mo maama he tau tagata nai. Nakai maeke ke galo e maaga kua fakatu i luga he mouga.
15Kitia la, kua tugi kia e lautolu e lamepa ti toka ai i lalo he kumete? Nakai, ka e toka ki luga he tokaaga lamepa, ke kikila atu ai ki a lautolu oti ha ha he fale.
16Ha ko e mena ia kia kikila atu pihia ha mutolu a maama ki mua he tau tagata nai, ke kitia ai e lautolu ha mutolu a mahani mitaki a ti fakaheke atu ai a lautolu ke he Matua ha mutolu ha ha he lagi.
17Aua neke manatu a mutolu kua hau au ke fakahui e fakatufono po ke tau perofeta; nakai hau au ke fakahui, ka kia fakamooli ai.
18Ha ko e mooli ke tala atu e au ki a mutolu, kua nakai tuai mole, taha iota po ke taha maaga matatohi mai he fakatufono, ka kua fakamooli oti ai ki a au.
19Kitia la, kua foaki atu tuai e au ki a mutolu e fakatufono mo e tau poakiaga he haaku a Matua, kia tua a mutolu ki a au, mo e tokihala mai he ha mutolu a tau hala, mo e o mai ki a au mo e loto malipilipi mo e agaaga fakatokolalo. Kitia la, ha i mua ha mutolu e tau poakiaga, mo e fakamooli mai tuai e fakatufono.
20Ha ko e mena ia, o mai ki a au mo e fakamomoui ai a mutolu, ha ko e mooli ke tala atu e au ki a mutolu ka nakai ni omaoma a mutolu ke he haaku a tau poakiaga, kua poaki atu e au ki a mutolu ke he magaaho nai, to nakai hao atu a mutolu ke he kautu he lagi.
21Kua fanogonogo a mutolu ne tala mai e lautolu ke he vaha i tuai, ti kua tohia foki ki mua ha mutolu, aua neke kelipopo tagata a koe, ko e tagata ne kelipopo tagata, kua hagahaga kelea a ia ke he fakafiliaga he Atua.
22Ka e tala atu e au ki a mutolu ko e tagata kua ita ke he haana a matakainaga, to hagahaga kelea a ia ke he haana fakafiliaga, ti ko ia foki kua pehe ke he haana a matakinaga, Raka, to hagahaga kelea a ia ha ko e fakatufono, ti ko ia ka pehe, ko e goagoa na e, to hagahaga kelea a ia ke he afi ko kehena:
23Ko e mena ia, kaeke ke hau a koe ki a au po ke manako ke hau ki a au, to manatu ai e koe e haau a matakainaga ka ha i ai e taha mena kua mamahi ai a koe —
24Kia fina atu a koe ke fakafeilo fakamua mo e haau a matakainaga, ti hau a koe ki a au mo e haau a loto katoa, to talia ai e au a koe.
25Kia fakafeilo fakaave a mua mo e tagata ne tagi he haana a tau mena ha ha ia koe, he o agaia a mua he magahehala, neke hoko mai e magaaho ke moua ai e ia a koe mo e tuku atu ai a koe ke he fale puipui.
26Ko e mooli, ko e mooli ke tala atu e au ki a koe to nakai fakaai ke hu atu ai a koe ki fafo a to oti pito e tau senine he age e koe, ka nofo a koe he fale puipui to maeke nakai ia koe ke totogi atu e senine taha ki a ia? Ko e mooli, ko e mooli, ke tala atu e au ki a koe, Nakai.
27Kitia la, kua tohia e lautolu he vaha i tuai. Aua neke faivao a koe.
28Ka e tala atu e au ki a mutolu, ka kikite atu taha ke he fifine mo e manako ki ai, kua faivao tuai a ia ke he haana loto.
29Kitia la, kua tuku atu e au ki a mutolu e taha poaki, kia aua neke toka he tau loto ha mutolu ha mena taha he tau mena ia.
30Ha kua mitaki ke fakatikai e mutolu e tau mena ia, ia mutolu, ka e nikiti ha mutolu a tau satauro, ka e ua tolo a mutolu ki kehena.
31Ne tohia mai foki pehe kaeke ke tiaki he taha haana hoana, kia age e ia ki ai taha tohi kua tiaki ai.
32Ko e mooli, ko e mooli ke tala atu e au ki a mutolu, kaeke ke tiaki he taha haana hoana ka e nakai faivao a ia, kua fakafaivao e ia a ia; ko e tagata foki kua hoana ki a ia ne tiaki, kua faivao tuai a ia.
33Kua tohia foki pehe, Aua neke omonuo pikopiko a koe, ka kia ta atu e koe ke he Iki e tau mena ne omonuo ai e koe.
34Ka ko e mooli, ko e mooli ke tala atu e au kia mutolu, aua neke omonuo ni, aua neke omonuo ke he lagi, ha ko e nofoaiki haia he Atua.
35Po ke lalolagi, ha ko e haana tuagahui a ia.
36Aua neke omonuo a koe ke he ulu haau, ha ko e mena nakai maeke ia koe ke fakahina po ke fakauli taha lauulu taha.
37Ka kia pehe ha mutolu a kupu, Hanai, hanai, nakai, nakai, ha ko e ha kupu ke loga ke he tau kupu na, ko e kelea a ia.
38Kitia la, kua tohia pehe, ke totogi e mata ke he mata, ka e totogi e nifo ke he nifo.
39Ka e tala atu e au ki a mutolu, aua neke taui atu e mutolu e kelea, ko e tagata ne poki mai haau a pakamata matau, kia haga atu e taha ki a ia.
40Ko e tagata foki ne fia fakafili a koe ke uta haau a peleue, kia tuku atu ki ai e koe mo e haau a pulupulu foki.
41Ka fakamakamaka taha ke o a mua ke he maila taha, a ti o a mua mo ia ke he na maila ua.
42Kia age e koe ki a ia ne ole tupe mai ki a koe, aua neke haga kehe a koe ia ia kua ogo mena mai ki a koe.
43Kitia la, kua tohia mai foki pehe, kia fakaalofa atu a koe ke he tagata ne katofia mo koe, ka kia fakavihia e tagata kua fai fi ki a koe.
44Ka e kitia la kua tala atu e au ki a mutolu, kia fakaalofa atu a mutolu ki a lautolu kua fai fi ki a mutolu, kia fakamonuina atu e mutolu ki a lautolu ne kaiaalu mai ki a mutolu, kia totonu atu a mutolu ki a lautolu kua fakavihia a mutolu, kia liogi foki a mutolu ma lautolu ne tukumale mai mo e favale mai ki a mutolu.
45Kia eke ai a mutolu mo fanau he matua ha mutolu ha he lagi, ha kua fakakikila mai e haana la ki a lautolu kua mahani kelea katoa mo lautolu kua mahani mitaki.
46Ha ko e mena ia, ko e tau mena na, mai he vaha i tuai ne ha i lalo he fakatufono, kua hohoko mai tuai e tau mena oti ia ki a au.
47Kua mole tuai e tau mena tuai kua foou e tau mena oti.
48Ha ko e mena ia kua finagalo ai au ke katoatoa ha mutolu a mahani mitaki, ke tuga au po ke ha mutolu a Matua ha ha he lagi kua katoatoa haana a mahani mitaki.