1Ne hoko ai, ne vagahau e Iesu e tau kupu ia, ne liu haga atu ai a ia ke he lanu tagata, mo e liu vagahau age foki a ia ki a lautolu kua pehe age, ko e mooli, ko e mooli, ke tala atu e au ki a mutolu, aua neke fakafili atu e mutolu, neke fakafili mai a mutolu.

2Ha ko e fakafili ke fakafili atu ai e mutolu, to fakafili mai ai ki a mutolu, ko e fafati foki ka fafati atu e mutolu, to fafati mai ai ki a mutolu.

3Ko e heigoa e mena kua kitekite ai a koe ke he mala akau ke he mata he haau a matakainaga, ka e nakai kitia e koe e akau fakalava ke he mata haau.

4Ke tala age foki fefe e koe ke he haau a matakainaga, Tuku mai a, ke kape kehe e au e mala akau he mata haau; kitia la, ha ha he mata haau foki e akau fakalava.

5Ko koe na ko e fakavai, a ti tiaki a fakamua e koe e akau fakalava he mata haau, a ti kitia mitaki ai e koe ke kape kehe e mala akau he mata he haau a matakainaga.

6Aua neke age e mutolu e mena tapu ke he tau kuli, aua foki ke liti ha mutolu a tau penina ki mua he tau puaka, neke taholi ai he tau hui ha lautolu, ti tafilu mai, mo e hehē ai a mutolu.

7Kia ole atu a mutolu, ti foaki mai ai ki a mutolu, kia kumikumi atu a mutolu, ti moua ai e mutolu, kia tukituki atu a mutolu, ti vevete mai ai ki a mutolu.

8Ha ko ia ka ole to moua e ia, ko e tagata foki ka kumikumi to iloa e ia, to vevete mai foki ki a ia kua tukituki atu.

9Ko hai kia e tagata ia mutolu ka ole mai haana a tama e areto, to age kia e ia e maka ki a ia?

10Ka ole mai foki e ika, ke age kia e ia e gata?

11Kaeke, ko mutolu kua mahani kelea, kaeke kua iloa e mutolu ke age e tau mena mitaki mo e tau fanau ha mutolu, ka e nakai kia au atu he foaki mai he Matua ha mutolu ha ha he lagi e tau mena mitaki ki a lautolu kua ole atu ki a ia?

12Ko e tau mena oti kua loto a mutolu ki ai, ke eke he tau tagata ki a mutolu, a ti eke a e mutolu e tau mena ia ki a lautolu, ha ko e fakatufono haia, mo e tau perofeta.

13Kia huhu atu a mutolu ke ne gutuhala pukilu, ha ko e mena pulahi e gutuhala, ti laulahi foki e hala ke pu atu ke he malaia, kua tokologa foki a lautolu kua huhu atu ki ai.

14Ko e mena pukilu e gutuhala, ti lautote foki e hala ke pu atu ke he moui, kua tokogaogao foki a lautolu ke moua.

15Kia fakamamao a mutolu mo e tau perofeta pikopiko, to o mai a lautolu ki a mutolu mo e tau tapulu mamoe, ka ko loto ko e tau luko kakati haia.

16To iloa maali e mutolu a lautolu ke he tau fua ha lautolu. Ke tau mai kia he tau tagata e fuhi vine mai he akau talatala po ke mati mai he akau mahukihuki?

17Pihia foki e tau akau mitaki oti kua takitaha mo e fua mai e tau fua mitaki, ka ko e tau akau kelea kua fua mai e tau fua kelea.

18Nakai maeke ke fua mai he akau mitaki e tau fua kelea, nakai maeke foki e akau kelea ke fua mai e tau fua mitaki.

19Ko e tau akau oti kua nakai fua mai e tau fua mitaki, to hahala ni mo e tolo ke he afi.

20Ko e mena foki haia ke iloa ai e mutolu a lautolu ke he tau fua ha lautolu.

21Nakai hohoko ke he kautu he lagi a lautolu oti kua pehe mai ki a au, ko e Iki na e, ko e Iki na e, ka ko ia ni kua eke e finagalo he haaku a Matua ha ha he lagi.

22Tokologa ke pehe mai ki a au ke he aho ia, Ko e Iki na e, ko e Iki na e, nakai kia ko e mena perofeta age a mautolu ke he haau a higoa, ko e haau a higoa foki he vega ai e mautolu ki fafo e tau temoni, ko e haau a higoa foki ne eke ai e mautolu e tau mana loga.

23A ti tala age ai e au ki a lautolu, nakai iloa ni e au a mutolu kia o kehe a, a mutolu ia au, ko mutolu ne eke e tau mahani kelea.

24Hanai, ka fanogonogo taha ke he haaku a tau kupu nai, mo e eke ai e ia, to fakatai e au a ia ke he tagata loto matala ne fakatu e ia haana fale i luga he mena patu.

25Kua to mai e uha, kua lele mai foki e tau vai, kua agi mai foki e matagi, kua peehi mai ke he fale ia, ka e nakai ni veli a ia, ha ko e mena kua fakave i luga he mena patu.

26Ka fanogonogo foki taha ke he haaku a tau kupu nai, ka e nakai eke ai, to fakatai a ia ke he tagata goagoa, ne fakatu haana a fale i luga he oneone;

27Kua to mai e uha, kua lele mai foki e tau vai, kua agi mai foki e matagi, kua peehi mai ke he fale ia, a ti veli ai, kua malipilipi ai a ia.