1Ne hoko ai, mole atu e tau fakamatalaaga he Patuiki ko Peniamina ke he haana a tau tagata, kua ui atu a ia ki a lautolu, ha kua manako a ia ke iloa po ke tua nakai e haana a tau tagata ke he tau kupu ne vagahau e ia.

2Kua tali atu a lautolu oti ke he taha ni e leo pehe: Hanai, kua tua a mautolu oti ke he tau kupu oti ne vagahau mai e koe; ti iloa ai e mautolu e tonu mo e mooli, ha ko e Agaaga he Iki Mua Ue Atu kua gahuahua ai ke he tau loto, ko e mena ia to manatu ai ke liliu ha mautolu a tau loto mo e nakai fai manatu a mautolu ke eke ai e tau mena kelea, ka e fakatumau ni ke he tau mena mitaki.

3Ti ko mautolu, ha ko mautolu ni, pihia moe tau kupu mitaki tukulagi he Atua mo e tau fakamooliaga he Agaaga, kua kitia lahi ai e tau mena ka hohoko mai; kaeke kua lata ai, kua maeke ke perofeta ai e tautolu e tau mena oti.

4Ti ko e tua ne kua ha ha ia mautolu ke he tau mena ne kua fakamatala mai he patuiki ki a mautolu kua takitaki ai a mautolu ke lotomatala, ko e mena ia, kua fiafia lahi ai a mautolu.

5Kua talia e mautolu ke huhū atu ke he maveheaga mo e Atua ha mautolu ke eke ai e haana a finagalo, mo e omaoma ke he haana a tau fakatufono, ke he tau mena oti kua poaki mai e ia, ke he tau aho oti ke aua neke ta mai e tautolu e malaia kua nakai fai fakaotiaga, tuga ne vagahau mai he tau agelu, ke aua neke inu ai a mutolu ke he kapiniu he ita he Atua.

6Pehe nai e tau kupu ne mnako e patuiki ko Peniamina ke vagahau ai e lautolu: ti ko e mena ia a ti vagahau age ai a ia pehe; kua vagahau mai e mutolu e tau kupu ne manako au ki ai, ti ko e maveheaga ne taute e mutolu ko e maveheaga kua tonu.

7Ha ko e tau maveheaga ne taute ai e mutolu kua maeke ke fakahigoa ai a mutolu ko e tau fanau ha Keriso ko e haana a tau fanau taane mo e tau fanau fifine; kitia la, ko e aho nai kua moua ai e ia a mutolu ke he agaaga ha kua pehe mai a mutolu kua liliu e ha mutolu a tau loto ha ko e tua ke he haana a higoa; ko e mena ia kua fanau a mutolu ki a ia, mo e eke ai mo tau fanau taane mo e au fanau fifine haana.

8Ki lalo hifo he takitakiaga nai kua toka noa ai a mutolu, ti nakai fai takitakiaga foki ke toka noa ai a mutolu. Kua nakai fai higoa foki ke moua ai e mutolu e fakamouiaga; ko e mena ia kua manako au ke uta e mutolu e higoa a Keriso, a mutolu oti ne kua taute e maveheaga mo e Atua, to omaoma a mutolu a to hoko ke he fakaotiaga he ha mutolu a tau momoui.

9To hoko ai, ko e ha tagata kua taute e mena nai, to nofo a ia ke he faahi matau he Atua, ha ko e mena to iloa e ia e higoa kua ui aki a ia; ha ko e mena to fakahigoa a ia ke he higoa a Keriso.

10To hoko ai, ko ia kua nakai uta ai e higoa a Keriso, ka e uta ai ke he taha higoa foki, ko e mena ia to moua ai e ia e nofoaga ke he faahi hema he Atua.

11Ko e mena ia, kia manatu aua neke holifono a mutolu, aua neke uta kehe ai e higoa ia mai he ha mutolu a tau loto.

12Kua tala atu au ki a mutolu, kua manako au ke manatu e mutolu, ke tumau ke tohia ai e higoa ia ke he tau loto ha mutolu, kia nakai moua ai a mutolu ke he faahi hema he Atua, ka kia logona mo e iloa e leo ka ui atu ki a mutolu, mo e higoa foki ka ui aki e ia a mutolu.

13Kua maeke fefe he tagata ke iloa e haana a Iki, ka e nakai fekafekau a ia ki ai, ko ia foki ko e tagata kehe ki a ia, mo e mamao foki e haana a tau manatu mo e tau amaamanakiaga ke he loto?

14Ti pehe foki, kua maeke kia he tagata ke uta e ia e asini he haana a katofia mo e toka ai? Kua pehe atu au ki a mutolu, Nakai; to nakai toka foki e ia a ia ke kai mo e haana a tau fuifui manu to tutuli ni e ia mo e vega kehe ai. Ti pehe atu au ki a mutolu to pihia ni mo mutolu ka nakai iloa ai e mutolu e higoa kua ui aki a mutolu.

15Ko e mena ia, kua manako au ki a mutolu ke tu mo e mauokafua, falanaki tumau ke he tau gahua mitaki ne fakatoka ai e Keriso, ko e Iki ko e Atua Mua Ue Atu, kia fakamau e ia a mutolu maana, kia ta mai ai a mutolu ke he lagi ke moua ai e fakamouiaga tukulagi mo e moui tukulagi, ha ko e lotomatala mo e malolo mo e tonu mo e fakaalofa ki a ia ne tufugatia e tau mena oti he lagi mo e lalolagi, ko e Atua kua pule ke he tau mena oti. Amene.