1Ti ko e magaaho nai, kua hoko ai, ne fakaoti ai e vagahau he patuiki ko Peniamina, ke he tau kupu ne foaki age he taha agelu he Iki, kua onoono fano a ia ke he lanu tagata, kitia la kua veveli fakafohifo a lautolu ke he kehekehe ha kua matakutaku, ha ko e haele mai ne fai e Iki ki a lautolu.

2Kua kitia e lautolu a lautolu ni ke he tino, kua fakateaga ai he efuefu he kelekele. Kua tagi fakaleo lahi ai a lautolu auloa mo e pehe: Oi fakalofa mai, ti fakaaoga mai e lukutoto a Keriso ke moua ai e mautolu e fakamagaloaga he tau hala mo e fakamea ai ha mautolu a tau loto; ha kua tua a mautolu ki a Iesu Keriso ko e tama he Atua, ne tufugatia e lagi mo e lalolagi mo e tau mena oti, to hifo mai ai ke he tau fanau he tau tagata.

3No hoko ai, mole atu he vagahau e lautolu e tau kupu nai, ne hoko mai ai e agaaga he Iki, ti puke namo ai a lautolu ke he fiafia, ha kua moua e lautolu e fakamagaloaga ke he tau hala, ti mafola foki mo e manamanatuaga, ha ko e tua ha lautolu ki a Iesu Keriso ka haele mai tuga mo e tau kupu ne vagahau mai he Patuiki ko Peniamina ki a lautolu.

4Kua liu foki e Patuiki ko Peniamina vagahau ke he fakapotopotoaga mo e pehe atu: Ma haku tau kapitiga mo e haku tau matakainaga, haku tau magafaoa mo e haku tau tagata kua liu foki au ke ui atu ke fanogonogo mai a mutolu ke he tau kupu ne toe ka fakamatala atu e au.

5He kitia la, kaeke kua iloa e mutolu e tau mena oti ia ke he mitaki he Atua, kua fafagu mai a mutolu ke iloa ko e fakateaga noa a mutolu, mo e nakai aoga, mo e ha mutolu a veliaga foki.

6Kua pehe atu, au ki a mutolu, kaeke kua iloa e mutolu e mitaki he Atua mo e haana a fakamanavalahi ha ko e tau fanau he tau tagata; mo e, lukutoto kua fakatoka ai mai he fakaveaga he lalolagi, kia fai laveakiaga ka hoko mai ki a ia, kua tua ke he Iki mo e fakamakutu ke omaoma ke he haana a tau fakatufono, mo e fakatumau e tua a to hoko ke he fakahikuaga he haana a moui, ko e hagaao ia ke he moui fakatino tagata.

7Kua pehe au, ko e tagata ke moua e laveakiaga, ha ko e lukutoto ne fakatoka tuai mai he fakaveaga he lalolagi mo e tau tagata oti, tali mai he veli a Atamu, po ko lautolu ai nai po ke a mui a to hoko atu ke he fakaotiaga he lalolagi.

8Ko e kakano haia ne hoko mai ai e fakamouiaga. Ti nakai fai puhala foki ke moua ai e fakamouiaga tuga kua fakailoa atu, po ke fai puhala kehekehe foki ke moui ai e tagata ka e ko e tau puhala ni tuga ne kua fakakite atu e au.

9Kia tua ke he Atua; kia tua kua ha ha i ai a ia, ko ia ne tufugatia e tau mena oti, ke he lagi mo e lalolagi; kia tua kua ha ha ia ia e iloilo oti kana, mo e malolo katoa, ke he lagi mo e lalolagi; kia tua kua nakai maeke he tagata ke maama e tau mena oti kua maama he Iki.

10Ti pehe foki, kia tua a mutolu mo e tokihala mo e tiaki ha mutolu a tau mahani kelea, mo e fakatokolalo a mutolu ke he Atua; ti ole fakatokolalo mo e loto katoa ke fakamagalo mai e ia a mutolu; ko e magaaho nai, kaeke kua tua a mutolu ke he tau mena nai kia mailoga mitaki ke taute pihia.

11Ko e magaaho nai kua liu au ke fatiaki atu tuga ne tala atu e au fakamua, tuga ne kua iloa ai e mutolu e lilifu he Atua, kua iloa foki e mutolu haana a mitaki mo e logona foki ke he haana fakaalofa mo e moua ai e mutolu e fakamagaloaga he tau hala kua tupu mai ai e fiafia mo e olioli he ha mutolu a tau agaaga, pete ia kua manako au ke manatu e mutolu mo e tokaloto tumau, e lilifu he Atua, mo e ha mutolu a fakateaga, mo e haana a mitaki mo e fakamanavalahi ki a mutolu, e tau tagata fakateaga, ti fakatokolalo fakalahi ha mutolu a tau loto, kia ui atu ke he higoa he Iki ke he tau ako takitaha mo e tumau ke he tua ke he tau mena ka hohoko mai, tuga ne kua vagahau mai he gutu he agelu ki a mutolu.

12Ti kitia la, kua pehe atu au ki a mutolu kaeke ke taute e mutolu e tau mena nai, to ha ha ia mutolu tumau e fiafia, mo e puke ai ke he fakalofa he Atua, to fakamagalo foki e ia ha mutolu a tau hala; ti ha ha ki ai foki e iloilo ke he lilifu haana ne tufugatia a mutolu, po ke loto matala ai ke he tau mena kua tonu mo e hako.

13Ti nakai ha ha ia mutolu e manamanatuaga ke fakapakia e taha matakainaga, mo e foaki atu ke he tau tagata oti ha lautolu a tau tufaaga.

14To nakai toka e mutolu ha mutolu a tau fanau ke hoge, po ke nakai fai felevehi; po ke toka e mutolu ke holifono ki mua he Atua, po ke felatauaki e taha ke he taha, mo e fekafekau ke he tiapolo, ko ia ne pule katoa ke he tau mena kelea po ko ia foki ko e agaaga kelea ne talahau ai he tau matua ha tautolu, ko ia ko e fi ke he tau mena kua mitaki oti kana.

15To fakaako ai e mutolu a lautolu ke o ke he tau puhala kua tonu mo e mitaki; to fakaako atu ki a lautolu ke fakaalofa e taha ke he taha, mo e fekafekau e taha ke he taha.

16Ti ko mutolu foki ke lagomatai a lautolu kua manako lagomatai mai ia mutolu; kia foaki atu ma lautolu kua manako lagomatai, ti nakai toka ai e mutolu e kai ole ke tagi mai ai mo e noa, mo e vega kehe ai a ia ke mataematekelea ai.

17Liga kua lata ke pehe a mutolu; kua matematekelea ni e tagata ha ko ia ni ko e mena ia to nakai fakaolo atu ai haaku a lima, mo e nakai foaki atu foki ki a ia ha mena ke kai po ke foaki atu foki e taha mena haaku ke lagomatai a ia, ha kua tonu ni e haana a fakahala.

18Ka e pehe atu au ki a mutolu, Ma tagata na e, ko e ha tagata kua eke e mena nai, kua lata ia ia ke tokihala, ti kaeke kua nakai fakatokihala a ia ke he tau mena ne eke e ia, to matematekelea tukumalagi a ia, mo e nakai fai amaamanakiaga ke he kautu he Atua.

19Kitia la, nakai kia ko e tau tagata kai ole oti a tautolu? Kua falanaki atu oti nakai a tautolu ki a ia ko e Atua, ke he tau mena moua oti ha tautolu, ko e tau mena kai mo e tau tapulu, ko e tau auro, mo e tau ario, po ke tau koloa loga kua moua ai e tautolu?

20Ti kitia la, ke he magaaho nai, kua ui atu a mutolu ke he haana higoa, mo e ole atu ke fakamagalo ai e tau hala ha mutolu; Ti toka nakai e ia a mutolu ke kai ole mo e noa? Nakai; kua liligi hifo ni e ia haana a Agaaga ki a mutolu kua puke ai e tau loto ha mutolu ke he fiafia, mo e ai pa foki e ha mutolu a tau gutu kua nakai maeke ke vagahau ai ha kua lahi ni ha mutolu a fiafia.

21Ti ko e magaaho nai kaeke ko e Atua ne tufugatia a mutolu mo e falanaki foki ki ai ha mutolu a tau momoui mo e tau mena kua moua ai, kua foaki atu ni ki a mutolu e tau mena kua manako ki ai a mutolu kua hako, ke he tua, mo e falanaki ai foki to moua ai e mutolu, Oi, kua tonu ni ke foaki e mutolu e tau mena ha mutolu, e taha ke he taha.

22Kaeke kua fakafili e mutolu e tagata ke he tau mena ha mutolu kua ole mai a ia ki ai mo lagomatai, mo e fakakelea a ia, fefe kia e haau a fakahalaaga ka taofi ai e haau a tau mena; kua iloa, nakai ko e haau ka ko e he Atua, ne kua pule foki ke he haau a moui, ti mole ia kua nakai ole atu a koe po ke tokihala ai ke he tu mena ne eke ai e koe.

23Kua pehe atu au ki a mutolu, oi te ke he tagata ia ko e haana foki a tau koloa oti to moumou ai mo ia, ti ko e magaaho nai kua vagahau e au e tau mena nai, ki a lautolu kua muhu koloa, ke he tau mena he lalolagi nai.

24Ti pehe atu foki au ki a ia ne mativa; ko mutolu ne nakai muhu mena, ka kua lata ni, kia tumau a mutolu mai he taha aho ke he taha aho; ko e vagahau au ki a mutolu oi ne fakavihia e kai ole ha kua nakai fai mena a mutolu; kua manako ke pehe ha mutolu a tau loto: kua nakai foaki e au ha kua nakai ha ha ia au kaeke ne ha ha ki a au kua foaki atu ni e au.

25Kaeke foki kua pehe hifo a koe ke ke haau a loto kua nakai kelea a koe, neke fakahala ai a koe ti ko e fakahalaaga haau kua tonu, ha kua manako lahi a koe ke he mena kua nakai moua e koe.

26Ti ko e magaaho nai ke lata mo e tau mena kua vagahau atu e au ki a mutolu ke lata ia moe fakamagaloaga he tau hala ha mutolu, mai he taha aho ke he taha aho, ka nakai kelea ai a mutolu ki mua he Atua — to pehe au kua lata ia mutolu ke foaki atu e tau koloa ha mutolu ma lautolu kua nonofo gati, kia igatia ni e tagata mo e haana a tau mena, tuga ke fagai ai a lautolu kua hoge, fakatapulu a lautolu kua nakai fai felevehi, ahiahi atu ki a lautolu kua gagao mo e lagomatai ai a lautolu, fakaagaaga pihia ke he tino, ke lata mo e ha lautolu a tau manako.

27Ti kitia kua eke ai e tau mena oti na fakalotomatala mo e maopoopo; ha ko e mena kua nakai lata ke poi mafiti e tagata ke he haana a malolo. Ti pehe foki, kua lata a ia ke hakahakau ke moua ai e taha palepale; ko e mena ia kua lata he tau mena oti ke taute he puhala kua maopoopo.

28Kua manako au ke manatu e mutolu, kaeke kua fai tagata ia mutolu kua ole mai tau mena he haana a katokia, kua lata ni ke liuaki atu ai tuga ne mavehe ki ai, neke malaia ai a koe ke ke hala, mo e eke ai e koe e mena ke agahala ai foki e haau a katofia.

29Ti fakahiku aki, kua nakai maeke ia au ke tala atu oti e tau mena ka agahala ai a mutolu; ha kua ha ha i ai e tau puhala loga mo e falu a mena loga foki kua nakai maeke ia au ke totou atu.

30Ka kua maeke ia au ke tala atu pehe, ki a mutolu, kaeke kua nakai leveki e mutolu a mutolu ni, mo e ha mutolu a tau manamanatuaga mo e ha mutolu a tau kupu mo e ha mutolu a tau gahua, mo e leveki e tau fakatufono he Atua, mo e fakatumau foki ke tua ke he tau mena kua logona e mutolu ke lata mo e liu haele mai he Iki ha tautolu, pihia ke hoko atu ke he fakaotiaga he ha mutolu a tau momoui, to mamate ni a mutolu. Ti ko e magaaho nai, ma tagata na e ki a manatu, mo e aua neke malaia ai.